Johani 11
11
Jesu a vuxa Lazaru hi le kufeni.
1A munhu wo kari i wa babya, a nga Lazaru wa le Betania, a mutini ka vaMaria ni makabye Marta. Lu. 10:38, 39
2Hi yena Maria loyi a nga tota Hosi hi mafura, a kulula mikonzo ya yona hi misisi yakwe; hi makabye wakwe, Lazaru, loyi a nga kari a babya. Mat. 26:7; Mar. 14:3; Xip. 12:3
3A vamakabye va lo rumela ka Jesu, vaku: Hosi, wangabye, loyi u mu ranzako wa babya.
4Kanilezi laha Jesu na a zi zwile, aku: Legi wubabyi a gi yisi kufeni, kanilezi gi yisa wudzunziweni ga Nungungulu; kasi a Nʼwana wa Nungungulu a fela ku dumiswa ha gona.
5Jesu i wa ranza Marta, ni makabye wakwe, na Lazaru.
6Hambu lezi a nga zwile lezaku wa babya, i lo tshama masiku mambiri laha a nga hi kona. Xip. 10:40
7Anzhako ka lezo, a ku ngalo ka vapizani: A hi tlheleleni Judia.
8A vapizani vaku ngalo ka yena: Rabi, lokuloku lezi a vaJuda va nga lava ku ku gandla hi maribye; wa haya kona kambe ke? Xip. 10:31
9Jesu i lo hlamula, aku: Xana a ku kona a khume ga tihora ni timbiri hi siku ke? Loku munhu a famba munwini, a nga khunguvanyeki, hakuva wa wona a kuwonekela ka misava leyi. Xip. 9:4
10Kanilezi loku munhu a famba ni wusiku, wa khunguvanyeka, hakuva a nga na kuwonekela.
11Loku a wulawulile lezo, aku ngalo kabye: Lazaru, a xaka ga hina, i etlele; kanilezi nza famba, nzi ya mu vuxa. Dan. 12:2; Mat. 9:24; Miti. 7:60
12A vapizani vaku ngalo kakwe: Hosi, loku a etlele, i ta kalamuka.
13Jesu i wa wulile hi kufa kakwe, kanilezi vona va lo alakanya lezaku i wula hi ku etlela wurongo.
14Zonake Jesu i lo va byela ziku dlunya, aku: Lazaru i file.
15Nzi tsakile hi kota ya nwina, lezaku nzi wa hi hava laho, kasi ma fela ku kholwa; kanilezi a hi yeni kakwe.
16Tomasi, loyi a vitwako Didimusi, i te ngalo ka vapizani-kulobye: A hi fambeniwo, hi yafa naye.
17Laha Jesu na a chikele, i lo mu kuma na a xwile xilahleni mune wa masiku.
18Betania ku wa hi kusuhani ni Jerusalema, a pfhuka wa ku ringana tikilometro timbiri.
19A vaJuda vanyingi va wa tile ka Marta na Maria a ku ta va chavelela hi kota ya kufa ka makabye wabye.
20Laha Marta a ngazwa lezaku Jesu wata, i lo mu khinga; kanilezi Maria i lo nonohisa a tshamile ndlwini.
21Marta i te ngalo ka Jesu: Hosi, loku u wa hi kona laha, a makabye wa mina ngha a nga fangi.
22Kanilezi nza zi tiva ni zalezi, lezaku ni zihi lezi u ta nga zi kombela ka Nungungulu, Nungungulu i ta ku nyika zona. Xip. 9:31
23Jesu aku ngalo kakwe: A makabye wa wena i ta vuka.
24Marta aku kakwe: Nza zi tiva lezaku i ta vuka hi siku go gumesa, a kuvukeni ka vafileko. Lu. 14:14; Xip. 5:29
25Jesu aku kakwe: Mina nzi kuvuka ni wutomi; loyi a kholwako ka mina, hambu loku a file, i ta hanya; Xip. 1:4; 3:36; 5:21; Kol. 3:4
26ni wihi a hanyako a kholwa hi mina, cima a nga tafa. Wa kholwa lexi ke?
27Yena aku: Ina, Hosi; nza kholwa lezaku hi wena Kristu, a Nʼwana wa Nungungulu, loyi a nga wa ta kuta misaveni. Mat. 16:16; Xip. 4:42
28Laha na a wulile lezo, i lo ya vitana Maria makabye wakwe hi le xihundleni, aku: A Mugonzisi i kona, wa ku vitana.
29Yena laha na a zi zwile, i lo hatlisa a suka, aya ka yena.
30Jesu i wa nga se ku chikela mutini, kanilezi i wa tshamile laha Marta a nga mu khingela kona.
31A vaJuda lava va nga hi naye lomo ndlwini, va mu chavelela, laha va nga wona Maria a hatlisa a suka, va lo mu lanzela, na va alakanya lezaku iya xilahleni ku ya rila kona.
32Maria na a chikele laha a nga hi kona Jesu, a mu wona, i lowa mikonzweni yakwe, aku ka yena: Hosi, loku u wa hi kona laha, a makabye wa mina ngha a nga fangi.
33Laha Jesu a nga mu wona na kari a rila, va rila kambe ni vaJuda lava va nga tile naye, i lo keta moyeni, a karateka,
34aku ngalo: Mu mu lahlile kwihi? Vaku kakwe: Hosi, ngona u ta wona.
35Jesu a rila. Lu. 19:41
36A vaJuda vaku ngalo: Mangabye, lezi a nga mu ranzisa zona!
37Kanilezi vanwani vaku ngalo: Xana munhu loyi a nga vulula mahlo ya xikhumu, i wa nga zi koti hikuyini a ku maha loyi munhu a ngafi ke? Xip. 9:6
38Jesu na a keta kambe mbilwini, i lota xilahleni. Makunu a xilahla xi wa hi mhako, yi nga valilwe hi ribye.
39Jesu i te ngalo: Susani ribye. Marta, a makabye wa loyi a fileko, aku kakwe: Hosi, makunu wa nuha, hakuva mune wa masiku na a file.
40Jesu aku kakwe: Xana a nzi ku byelangi nziku, loku u kholwa u ta wona a wukulu ga Nungungulu ke?
41Loku va susile a ribye ga xilahla, Jesu i lo tlakusa a mahlo yakwe, aku ngalo: Dadani, nza ku bonga hilezi u nzi zwile.
42Nza zi tiva lezaku wa nzizwa xikhati xontlhe; kanilezi nzi wula lezi hi kota ya xidlemo lexi xi yimileko laha, kasi va fela ku kholwa lezaku hi wena u nzi rumileko. Xip. 12:30
43Laha na a wulile lezo, i lo vitana hi gezu ga hombe, aku: Lazaru, huma!
44Loyi a nga file i lo huma, na a bohilwe mandla ni mikonzo hi miceka ya zilahlelo, ni nghohe yakwe yi fenengetilwe hi lesu. Jesu aku kabye: Mu tlhatlheni, mu mu tsika a famba. Xip. 20:7
45A vaJuda vanyingi, lava va nga tile ka Maria, na va wona lezi Jesu a nga zi maha, va lo kholwa ka yena. Xip. 2:23; 10:42; 12:11, 18
46Kanilezi a vanwani va vona va loya ka vaFarisi, va ya va hlawutela lezi Jesu a zi mahileko.
A vahombe va tsema khungo ha Jesu.
47Zonake a vapristi va hombe ni vaFarisi va lo tsombanyisa a huwo, vaku ngalo: Hi ta maha yini? A munhu loyi i maha ziwoniso zinyingi. Tis. 2:2; Mat. 26:3; Miti. 4:16
48Loku hi mu tsika a maha lezo, a vanhu vontlhe va ta kholwa ka yena; zonake a vaRoma va ta ta hi tekela a wutshamu legi ni tiko ga hina.
49Kanilezi a munwe wa vona, Kayafasi, loyi a nga hi mupristi wa hombe lego lembe, aku ngalo kabye: Nwina a mu tivi nchumu, Lu. 3:2; Xip. 18:14; Miti. 4:6
50hambu ni ku pima lezaku zi mu sasekele lezaku munhu munwe a fela vanhu, kasi a tiko gontlhe gi nga lovi. Xip. 18:14
51Makunu a nga wulangi lezi hi wutsumbu gakwe; kanilezi na a hi mupristi wa hombe lego lembe, i lo profeta ku ngalo: Jesu i ta fela tiko.
52Na ku nga hi tiko goce, kanilezi hi lezaku a fela ku wungeletela a vana va Nungungulu lava va hangalakileko. Isa. 49:6; Efe. 2:14; 1 Joh. 2:2
53A kusukela lego siku va lo tsema khungo lezaku va ta mu daya.
54Hikwalaho Jesu i wa nga ha fambi kubaseni xikari ka vaJuda; kanilezi i lo suka laho, aya tikweni legi gi nga kusuhani ni xiwula, le mutini wu vitwako Efraime, a tshama kona zinwe ni vapizani. Xip. 4:1, 3; 7:1
55A Pasika ga vaJuda gi wa tshinele; a vanyingi va lomu tikweni va loya Jerusalema, kasi ku ya ti basisa, a Pasika na gi nga se ku chikela. Xip. 2:13; 5:1; 6:4
56Va wa lava Jesu, va wutisana na va yimile lomo tempeleni, vaku: Mu alakanya yini? A nga tata laha mubuzweni ke? Xip. 7:11
57Kanilezi a vapristi va hombe ni vaFarisi va wa layile ku, loku munhu a ku tiva laha a nga kona, a va tivise, kasi va fela ku ya mu khoma.
वर्तमान में चयनित:
Johani 11: TSC72
हाइलाइट
शेयर
कॉपी
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
