Johane 2
2
Mutshadho wa Khanani
1Hwane nya matshigu mararu, wu di manega dzegano tigoni ga Khanani ga Galileya. Mayi wa Jesu a di romo nuye avbo. 2Jesu a di ranidwe nuye ni vapizane vaye mutshadhotunu. 3Gu di kenelela wadwa. Mayi wa Jesu a di embela mwanaye, khuye: “Va mwalo wadwa.”
4Jesu a di hakha, khuye: “Nyamayi! Gasi ginani u gi vbwetago avbo gwangu? Gikhati Gyangu gi si gu vbohi.” 5#Wona gambe: Gen 41:55. Mayi waye a di embela sithumi, khuye: “Girani satshavbo iso a na gu mi rumago.”
6Gu diromo avbo livbandre na moyo misungwa nya siwindri, va nga bani va gu hamba umo mandza Vajudha; moyo ni moyo a diri ni gipandre nya mipimo mivili mwendro miraru. 7Jesu a di va embela, khuye: “Tadzani misungwa yoyo khu mati.” Va di dzegela gu mi tadza khu lihofu. 8Khavbo avbo, a di khuye: “Regani muya ninga muthangeli nya buzo.” Va di gira kharato. 9Muthangeli nya buzo, na lingide mati ma nga vbindrugedzwa ma khala wadwa, kha nga olu a nga bani a si guti umo wu ngata khumo, vbavbandze nya sithumi si nga regago mati, a di rana mwane, 10khuye: “Vathu vatshavbo va gu phela khu gu dusa wadwa nya wadi, hwane nya gu vathu vatshavbo, na va sede gwadi, khavbo a va ningago wadwa nya huto. Gasi uwe u di vega wadwa nya wadi kala olu!”
11Khigyo egi giliwugiso nya guphele gya Jesu a giredego tigoni ga Khanani ga Galileya a gu wonegisa kharati gidhumo gyaye; vapizane va di khodwa gwaye.
12 # Wona gambe: Mat 4:13. Hwane nya esi, a di relela Kafarinawume ni mayi waye, ni vandriyaye, gumogo ni vapizane, iyo a ngaya khalago matshigwana.
Guagiswa nya Nyumba ya Nungungulu
(Matewu 21:12-13; Marko 11:15-17; Luka 19:45-46)
13 # Wona gambe: Eks 12:1-27. Na yiri vbafuvbi Phasika nya Vajudha, Jesu a di gwela Jerusalema; 14Nyumbani ya Nungungulu a diya mana varengisi nya dzimombe, nya dzinvuta ni matuva, navo va nya gu turukari dzitsapawu. 15A di dzega dzingodzi a luga gisephu, a gu va tutumisa khigyo vatshavbo Nyumbani ya Nungungulu, ni dzinvuta dzawe ni dzimombe. A di vbaladza dzitsapawu dza va nya wugwewo wawe, a gu thesela dzimeza dzakone. 16A di embela varengisi nya matuva, khuye: “Dusani satshavbo sesi avba. Mu nga dzegini nyumba ya Babe wangu mu yi gira nyumba nya wugwewo wanu.” 17#Wona gambe: Dzind 69:9. Vapizane va di dundruga milowo yi gukhiyo: “Gukhathala nyi gu nago khu nyumba yago gu ngu nyi pwisa wuvi.”
18Khavbo avbo, Vajudha va di mu wudzisa, khavo: “Giyeyedzo muni u hi ningago gasi hi khodwe nya gukhethu u na ni fanelo nya gugire esi?” 19#Wona gambe: Mat 26:61; 27:40; Mark 14:58; 15:29. Jesu a di khuye: “Pfhungumulani Nyumba yeyi, eni nyi na yi vbahedza khu matshigu mararu.”
20Vajudha va di khavo: “Nyumba yeyi yi dzegide magumana na livbandre na moyo myaga na yi gu vbahwa uwe u na yi vbahedza khu matshigu mararu basi?” 21Aholu uye a di gu thula nyumba nya givili gyaye. 22Khu kharato, gikhati a nga wugago khu ga vafudego, vapizane vaye va di dundruga iso a nga ganelago, va gu khodwa khu Milowo ni magana ya Jesu.
23Gikhati gile nya Phasika a nga bani a romo Jerusalema, vathu nya vangi va di khodwa khu lina laye khu kotani nya siliwugiso a nga bani a gu gira. 24Aholu, Jesu kha nga va tumba, kholu a di gu vati vatshavbo. 25Kha nga vbweta gu embedzedwa mavbanyelo ya moyo ni moyo, kholu uye mune a di gu yiti myonyo yawe.
वर्तमान में चयनित:
Johane 2: BGE2014
हाइलाइट
शेयर
कॉपी
Want to have your highlights saved across all your devices? Sign up or sign in
A Bíblia em Gitonga © Bible Society in Mozambique, 2014.
