Johane 1
1
Lito li dzi giride Muthu
1Guhegulani li diromo Lito.
Lito li diri ni Nungungulu;
gambe Lito li diri Nungungulu.
2Ilo li diromo, guhegulani, ni Nungungulu.
3Satshavbo silo si vangidwe khu tshivba yaye,
gimwalo gi nga vangwa nyambana ilo.
4Ilo li diri ni guvbanya;
gambe guvbanya gu diri wenengedzo nya vathu.
5Wenengedzo wu ngu wenengedza gidemani,
aholu, gidema kha gya wu kodza gu wu tshima.
6 # Wona gambe: Mat 3:1; Mark 1:4; Luk 3:1-2. A di dugelela muthu nya gukari a nga rumedwago khu Nungungulu, lina laye a diri Johane. 7A dita kha nga fakazi, gasi gu fakazela Wenengedzo, gufela gu vatshavbo vakhodwe khu kotani yaye. 8Uye a di siri wenengedzo, aholu, dzude gasi guta fakazela wenengedzo.
9Lito li diri wenengedzo nya lisine,
wu ngatago mafuni gasi guta wenengedza muthu watshavbo.
10Li diromo tigoni, litigo li vangidwe khu tshivba yaye
aholu litigo kha la li pima.
11Li dita ga avo va nga bani vari vaye,
aholu, avo kha va li hakha.
12Gasi vale vatshavbo va nga li hakhago,
va khodwago ga ilo,
li di va ninga fanelo nya gukhale sanana sa Nungungulu;
13sivangwa sesi kha sa velegwa khu tshivba nya novba mwendro,
khu tumbunugo nya muthu,
mwendro khu gu haladza nya muthu,
aholu si velegidwe khu gugola ga Nungungulu.
14Lito li di dzi gira muthu,
li gu vbanya vbakari gwathu.
Ethu hi wonide gidhumo gyaye,
gidhumo li nga ningwago khu Babe waye,
kha nga Mwamana wa moyo nya gutale khu wuhigo ni lisine.
Wufakazi wa Johane Mubhapatisi
(Matewu 3:1-12; Marko 1:1-8; Luka 3:1-18)
15Johane a di mu fakazela, a gu ganela, khuye: “Khuye oyu nyi nga mu thula, kheni: Uye atago khu hwane gwangu a nyi thangede, kholu a di romo na nyi si velegwi.” 16Khu gutadzisega gwaye khu wuhigo, khavbo hi kodzago ethu hatshavbo, gu hakha nethu khavbo gwaye talo nya wuhigo watshavbo. 17Kholu, Nayo wu vegidwe khu Mosi, gasi wuhigo ni lisine, hi si hakhide khu tshivba ya Jesu Kristo. 18Mwalo muthu a wonidego Nungungulu. Mwanaye wa moyo a gu Nungungulu, a guromo monyoni ga Babe, khuye a nga hi tulela gu muti.
Johane Mubhapatisi a nguya mbeli ni wufakazi waye
(Matewu 3:1-12; Marko 1:1-8; Luka 3:1-18)
19Khuwo owu wufakazi wu nga girwago khu Johane, gikhati Vajudha va nga rumelago khu Jerusalema vaphasi nya mhamba ni Valevhi, gasi guya mu wudzisa, khavo: “Khuwe mani, uwe?” 20Uye, a di va hakha nyamba kanakana, khuye: “Eni khandreni Kristo.” 21#Wona gambe: Dhet 18:15-18; Mal 4:5. Va di mu wudzisa nyaluphye, khavo: “Gasi khuwe mani? Khuwe Eliya, gani?” A di va hakha, khuye: “Khandreni.” Va di mu wudzisa gambe, khavo: “Khuwe muprofeti?” A di va hakha, khuye: “Ahihi.” 22Khavbo avbo, va di khavo: “Gasi khuwe mani, na? Hi kodze guya ninga phindrulo ga avo va nga hi rumelago. Uwe wabune wari khuwe mani?”
23 # Wona gambe: Isa 40:3. A di hakha, khuye: “Eni nyi lito li huwelelago giwulani, khilo: ‘Lulamisani dzindzila dza Pfhumu, kha nga guganela ga muprofeti Isaya.’ ” 24Vambe nya avo va rumedwego va diri Vafarisi, 25va di mu wudzisa, khavo: “Khu ginani u bhapatisago, gasi khandruwe Kristo, mwendro Eliya mwendro muprofeti?” 26Johane a di hakha, khuye: “Eni nya gu bhapatisa khu mati, gasi vbakari gwanu womo oyu mu si mutigo, 27a gu uye atago khu hwane gwangu; eni nyi mwalo fanelo nya gutshule dzingodzi nya silato saye.” 28Silo sesi si giregide, Bhetaniya, khisikheyi nya tsongo wa Joridhani, avbo Johane a nga bani a gu bhapatisa avbo.
29Gandra ni dzimindru, Johane a di wona Jesu, a nga bani a gu mu tela a ganela, khuye: “Kha mu yi woni yile Nvutana ya Nungungulu yi dusago gighoho nya litigo.” 30Khuye nyi nga mu thula, kheni: “Hwane gwangu a nata uye a nyi thangedego, kholu a di romo eni na nyi si gu velegwi. 31Nyi di si muti; eni nyi dzude nyita bhapatisa khu mati gasi uye a tidwe khu va na Israyeli.”
32Johane a di fakaza, khuye: “Nyi wonide Liphuvbo nya Guage na li gu tshiga khu Ndzadzini lita mbaka vbatshani gwaye kha nga lituva. 33Nyi di si muti, aholu, uye a nga nyi ruma gu bhapatisa khu mati khuye a nga nyi embela, khuye: ‘Uye uno mu wonago na gu tshigedwa khu Liphuvbo, lita khala gwaye, khuye a bhapatisago khu Liphuvbo nya Guage.’ 34Nyi si wone khu maho yangu; nyi ngu fakaza nya gukheni uye Mwamana wa Nungungulu.”
Vapizane nya guphele
35Gandra ni dzimindru, Johane a di romo nyaluphye vbale ni vavili nya vapizane vaye. 36Na khuside maho a khedza Jesu a nga bani a guvbindra, a di khuye: “Kha mu yi woni yile Nvutana ya Nungungulu.” 37Na va pwide magana yaya, vapizane va vavili va di landra Jesu. 38Jesu, a di thendregedza a wona nya gukhuye va gu mu landra, a di khuye: “Mwa guvbweta ginani?” Va di hakha, khavo: “Rabi, (gutshamusago gupwani: Muhevbudzi) wa gu khala hayi?” 39A di va hakha, khuye: “Deluni muta gu wona.” Va di hongola vaya wona avba a nga bani a gu vbanyela avbo, va gu khala naye litshigu lolo. A diri silambo gikhati nya wu na.
40Andreya ndruye wa Simoni Pedro, a diri moyo nya vapizane vale va vavili va nga pwago magana ya Johane va gu landra Jesu. 41Uye, guphela, a di mana ndriyaye Simoni, a gu mu embela, khuye: “Hi manide Mesiya, gutshamusago pwani Kristo.” 42A di mu dzega aya naye ga Jesu. Jesu, na khuside maho a mu khedza, a di mu embela, khuye: “Uwe khuwe Simoni, mwamana wa Johane, u na ranwa pwani khuwe Khefasi” gutshamusago pwani: Giwindri.
Guranwa ga Filipi ni Natanayeli
43Khu limbe litshigu, Jesu a di dundruga guhongola Galileya. Na mane Filipi, a di mu embela, khuye: “Nyi landre!” 44Filipi a diri wa Bhetisayidha, tigoni ga Andreya ni Pedro. 45Filipi a di mana Natanayeli a mu embela, khuye: “Hi ngari gu mu mana wule a nga thudwago khu Mosi nayoni waye, a nga ganedwa khu vaprofeti; khu Jesu wa Nazareta, mwamana wa Josefe.”
46Natanayeli a di khuye: “Ina gu ngu dzi kodza gu duga gilo nya gyadi khu Nazareta?” Filipi a di khuye: “Delu uta wona.”
47Jesu, na wonide Natanayeli na gu hidzimela, a di khuye: “Oyu khuye a gu wa na Israyeli nya guvbelele, gwaye wu mwalo wukanganyisi.” 48Natanayeli a di wudzisa, khuye: “Wa gu nyi tela hayi?” Jesu a di hakha, khuye: “Na wu si gu ranwi khu Filipi, eni nyi gu wone nuri mutsani nya nguyu.”
49Natanayeli a di mu hakha, khuye: “Rabi! Uwe u Mwamana wa Nungungulu; u Pfhumu ya na Israyeli.” 50Jesu a di khuye: “Kha nga u khodwego khu magana nyi gu embedego nya gukheni: Nyi gu wone mutsani nya nguyu, u na wona silo nya sikhongolo nya guvbindre esi.” 51#Wona gambe: Gen 28:12. A di tadzisa, khuye: “Khu lisine, nyi ngu mi embelani, kheni: Mu na wona Ndzadzini na gu tudwe; dzingilozi dza Nungungulu na dzi gu lita ni gutshiga ga Mwamana wa Muthu.”
वर्तमान में चयनित:
Johane 1: BGE2014
हाइलाइट
शेयर
कॉपी
Want to have your highlights saved across all your devices? Sign up or sign in
A Bíblia em Gitonga © Bible Society in Mozambique, 2014.
