Yohana 12
12
1Kunangwa Yesu, madiku gatanu na lilala imbiri welipasaka ya tsia Betani, wa Lazaro ya li, uyu wa Yesu ya simugukidza kutwula mu vakudzi. 2Ni va mwihula yo vyokulia vyomgolova: Marita ya va megera; navutswa Lazaro ya li mulala kuvo avikala ku vyokulia naye. 3Mi Maria ya vugula maguta genardi yere, ga funya mwayu, ageratili indala, aga gulwa vindu vinyingi, na a vaka Yesu virenge, ni yeya virenge vivye nelisu lilye: inyumba yekolera mwayu. 4Navutswa Yuda Iskarioti, mulala ku vegidzwi veve, naye niye u li mu zama, ya vola, 5Kigira ki maguta yaga si ga gulwa tsishilling tsimia tsivaka, tsi hebwe avadaka? 6Si ya vola yaga kigira a verera avadaka; navutswa kigira ya li mwivi, kandi kigira ya ginga kilinga, na a hila vya vikwa mu. 7Kigira yiki Yesu ya va volera, Mu mu leke, a ga vikire lidiku lyelitebwa lyange. 8Kigira avadaka mu veye navo halala madiku gosi; navutswa si mu veye ninze halala madiku gosi.
9Kunangwa kiduma kya Vayuda va duka kumanya a veyo: ni vadza, navutswa si vadza kigira Yesu yeng'ine, navutswa kandi va duke kulola Lazaro wa ya simugukidza kutwula mu vakudzi. 10Navutswa avasalisi avanene va lomba kyina va duke kwiita Lazaro kandi; 11kigira vanyingi ku Vayuda va twula ni va suuvira Yesu, kigira uyu. 12Mugamba kiduma kinene kya li ni kidza mu lilia, lwa va hulira Yesu yadza Yerusalemi, 13va leta amatu gamakindu ni va twula ni va tsia kumwaganira ni va kupa isango, Hozana: u gasidzeywi uyu udzanga mu lieta lyo Mwami, naye niye Mwami wa Israeli. 14Kandi Yesu ya nyola kimoli kyesukiri na a nina ku, kuli wa ga ng'odwa, 15U ta tia, Mkana wa Zioni: henza, Mwami wowo udzanga, wikaye ku kimoli kyesukiri. 16Vindu yivi avegidzwi veve si va hulira lwambiri: navutswa Yesu lwa ya mala kukuminywa, kunangwa vidzulitsa yaga ga ng'odwa kuye kale, kandi va mu kolera vindu yivi. 17Kigira yaga kiduma kya mu londa lwa ya langa Lazaro mu kilindwa, na a mu simugukidza kutwula mu vakudzi, kya lolekidza. 18Kandi kigira yiki kiduma kya mwaganira, kigira va hulira ya kola kilolekidzu yiki. 19Kunangwa Avafarisayo va volerana avene, Mu lole si mu nyala kukola kindu; henza, avomkivala va mu londa.
20Kandi va li ho Avagreki valala, kuvo ava li ni vanegira kukola miluka mu lilia. 21Kunangwa yava va tsia ku Filipu, mundu wa Betsaida, lidala lye Galilaya, ni va mu teva, ni va vola, Mwami, kwenya kulola Yesu. 22Filipu ya tsia na a volera Andreya: Andreya yadza na Filipu ni va volera Yesu. 23Yesu ya va tivulira, na a vola, Isaa i duki, Mwana wa Adamu a kuminywe. 24Ligali, ligali, mmu volera, inzoli yengano ni i vula kugwa mu marova ni i kudza i la tigala yeng'ine; navutswa ni i kudza i lama lyama linyingi. 25Uyu u yanza livamwoyo lilye a li gotidza; kandi u dunyira livamwoyo lilye mu kivala yiki uyu a li li vika kuduka liva mwoyo ii ta hera mba. 26Mundu ni ya ntumekira, a nonde; inze ha mbeye, kandi mutumekiri wange a la va ho: mundu ni ya ntumekira, Dada wange a la mu ha ubukumi. 27Kalunu mwoyo gwange gu henda; nda vola ndi? Dada, u mbonnye ku isaa yiyi? Navutswa kigira yiki ndadza ku isaa yiyi. 28Dada, kuminya lieta lilyo. Kunangwa mwoyo gwa twula migulu, gu vola, Nda mala kulikuminya, na nda li kuminya kandi. 29Kunangwa kiduma kya li ni ki singiye, ni ki gu hulira, va vola, Li ligita: avandi va vola, Ingelosi u volerana naye. 30Yesu ya tivula, na a vola, Mwoyo yigu si guudzi kigira inze, navutswa kigira mwinye. 31Kalunu ni likalaga lyavomkivala yiki: kalunu munene wekivala yiki a la tebwa. 32Kandi inze, ni ngingwa igulu welirova, nda ng'usa avandu vosi vadze ku inze. 33Navutswa ya vola yaga kuvuula ni likudza ki lya a li kudza. 34Kigira yaga kiduma kya mu tivulira Kwa hulira mu lilaga, Kristo a hindira mihiga nemihiga: na ive u vola ndi, Ga dukira Mwana wa Adamu a gingwe? Ni bwaha Mwana wa Adamu uyu? 35Kunangwa Yesu ya va volera, Ha tigaye hakekeke ubulavu bu veye ku mwinye. Gendi lwa mu veye nobulavu, kisundi ki ta mu nyola: kandi uyu u genda mu kisundi si a manya wa a tsitsa. 36Lwa mu kikiri nobulavu, mu suuvire ubulavu, mu duke kuva avana vobulavu.
Vindu yivi Yesu ya vola, kandi ya tsia ni yivisa. 37Navutswa kali ya va kolera vilolekidzu vinyingi imbiri wavo, si va mu suuvira: 38li duke likuva lya Isaya muprofeti ya vola
Mwami, ibwaha u suuvira livola lyetu?
Kandi ibwaha wa vuulirwa mukono gwo Mwami?
39Yiki ni kigira si va nyala kusuuvira, kigira Isaya ya vola kandi.
40Ya va fuma tsimoni tsyavo, kandi ya dinnya mwoyo gwavo;
Gase va la lola netsimoni tsyavo, ni va manya nomwoyo gwavo,
Ni veganira, Na inze mba honnye.
41Vindu yivi Isaya ya vola kigira ya lola ubukumi bwibwe; kandi ya vola kuye. 42Halala na yaga, kali ku vanene vanyingi va mu suuvira; navutswa si va mwiyamira mba kigira Vafarisayo, gase va la kungwa mu livugana: 43kigira va yanza ubukumi bu twula ku vandu kuvita ubukumi bu twula ku Nvasaye.
44Yesu ya gamba na a vola, Uyu u suuvira inze, si a suuvira inze, navutswa uyu wa ntuma. 45U lola inze, a lola uyu wa ntuma. 46Inze ntsitsi kuva ubulavu bwavomkivala, ku vosi u suuvira inze a ta menya mu kisundi. 47Kandi mundu u hulira amakuva gange, na a ta ga gumira, inze si mmu kalagira mba: kigira si ndadza kukalagira avomkivala, navutswa kuhonnya avomkivala. 48Mundu u nyambakana, na a ta bugirira amakuva gange, a veye nomulala u mu kalagira: livola lya nda vola li la mu kalagira ku lidiku lyekiheri. 49Kigira inze si nda vola aga twula ku inze mwene; navutswa Dada wa ntuma ya mpa lilaga, lya mbola nelya nzilwadza. 50Inze mmanya lilaga lilye li veye livamwoyo li ta hera mba: kunangwa aga mbolanga, kuli Dada ya mbolera, mbola ndiyo.
वर्तमान में चयनित:
Yohana 12: MBE
हाइलाइट
शेयर
कॉपी
Want to have your highlights saved across all your devices? Sign up or sign in
©Bible Society of Kenya, 1967
