Yohana 11
11
1Mundu mulala, Lazaro wa Betani, womu lidala lya Maria namwavo wewe Marita, ya lwala. 2Kandi ya li Maria zana wa vaka Mwami maguta, ni yeya virenge vivye nelisu lilye, mbotso wewe Lazaro ya lwala. 3Kunangwa avabotso veve va tuma mutumwa ni va vola, Mwami, uyu wa u yanza a lwala. 4Navutswa Yesu lwa ya hulira ya vola, Ubulwaye yibu si bu veye bwokuduka likudza navutswa bu veye kigira ubukumi bwa Nyasaye, Mwana wa Nyasaye a duke kukuminywa. 5Yesu ya yanza Marita namwavo wewe na Lazaro. 6Kunangwa lwa ya hulira a lwala, ya menya madiku gaviri ha ya li na a veye. 7Inyima ya yaga ya volera avegidzwi veve, ku tsie kandi Buyuda. 8Avegidzwi veve va mu volera, Rabi, kalunu ndi Vayuda venya kukulasa na magina; ive u tsie yo kandi? 9Yesu ya tivula, Tsisaa tsyombasu si tsi veye likumi na tsiviri? Mundu na a genda mu mbasu si yikigitala kigira a lola ubulavu bwekivala yiki. 10Navutswa na a genda ubudiku a likigitala, kigira ubulavu si bu veye muye. 11Ya vola vindu yivi: nenyima ya yivi ya va volera, Lazaro mulina wetu a gonanga tsindolo; navutswa inze ntsitsa kumuvukidza. 12Kunangwa avegidzwi va mu volera, Mwami, na a va na a gonanga a la hona. 13Navutswa Yesu ya vola ku likudza lilye; navutswa navo va ganagana a volanga ku lisosa mu ligona tsindolo. 14Hene yaho Yesu ya va volera habulavu, Lazaro u kudzi. 15Kandi inze kigira mwi nye nyanzi kigira nda vula kuva yo, mwinye mu duke kusuuvira; navutswa gendi ku tsie kuye. 16Ma Tomasi, wa langwa Malongo, ya volera avegidzwi avakye, Kwinye ku tsie naye, ku kudze halala naye.
17Kunangwa Yesu lwa ya duka, ya mu nyola na a goni madiku gane mu kilindwa. 18Betani lya li himbi ne Yerusalemi, mbula tsimaili tsiviri; 19kandi vanyingi ku Vayuda vadza ku Marita na Maria va va leminye mwoyo kigira mbotso wavo. 20Ku nangwa Marita lwa ya hulira Yesu yadzanga, ya tsia kumwaganira: navutswa Maria ya li ni yikaye mu inyumba. 21Maku Marita ya volera Yesu, Mwami, u va wa li hano, mbotso wange nkano si ya kudza mba. 22Liva kalunu mmanya ku vyosi kya u saala Nyasaye. Nyasaye a la ku ha. 23Yesu ya mu vo lera, Mbotso wowo a la simuguka. 24Marita ya mu volera, Mmanya a la simuguka mu lisimuguka ku lidiku lyekiheri. 25Yesu ya mu volera, Inze mbeye lisimuguka, kandi mbeye livamwoyo: u suuvira inze, kaliva na a kudza, a la va mwoyo; 26ku vosi u veye mwoyo na a suuvira inze si a li kudza mihiga nemihiga. U suuviye yaga? 27Ya mu volera, Yee, Mwami; inze nsuuviranga, ive u veye Kristo, Mwana wa Nyasaye, uudza mu lirova. 28Kandi lwa ya mala kuvola yaga, ya tsia na a langa Maria amwavo wewe galaha, na a vola, Mwegidzi a veye hano a ku langa. 29Naye lwa ya hulira, ya singira bwangu na a tsia kuye. 30(Yesu ya li na a kikiri kwingira mu kadala, navutswa ya li na a veye ha Marita ya mwaganira.) 31Kunangwa Avayuda va li halala naye mu inyumba, ava mu leminya mu mwoyo, lwa va lola Maria na a singira na a twula bwangu, va mu londa, va vola a tsitsa kulirira ha kilindwa. 32Kunangwa Maria, lwa ya duka ha Yesu ya li na a mu lola, ya gwa ha virenge vivye, na a mu volera, Mwami, u va wa li hano, mbotso wange nkano si ya kudza mba. 33Yesu lwa ya mu lola na a lira, na Vayuda ava mu londa va lira, ya kenya, na a henda mwoyo, 34na a vola, Mwa mu vika haliha? Va mu volera, Mwami, hamba u lole. 35Yesu ya twula maliga. 36Kigira yiki Avayuda va vola, Henza kuli a mu yanza 37Na vutswa avalala kuvo va vola, Uyu wa kunula tsimoni tsyomboku, si a nyala kukola mundu uyu kandi u ta kudzi? 38Ma Yesu ya kenya hali kaviri, ya duka ha kilindwa. Nakyo kya li mu luhangaywa, kandi ligina lya vikwa ku. 39Yesu ya vola, Mu twulidze ligina. Marita, mbotso wa uyu wa kudza, ya mu volera, Mwami, kalunu a funya; kigira lero a veye mukudzu madiku gane. 40Yesu ya mu volera Si nda ku volera, Nu u suuvira u la lola ubukumi bwa Nyasaye? 41Kunangwa va twulidza ligina. Na Yesu ya henza migulu na a vola, Dada, nku santidza kigira wa mbulira. 42Kandi nda manya u mbulira madiku gosi: navutswa kigira kiduma ki singira ku inyasi, nda ga vola, va duke kusuuvira nkani nive wa ntuma. 43Kandi lwa ya mala kuvola ndi, ya langa nomwoyo munene, Lazaro, u twule. 44Naye wa li na a kudzi ya twula, na a boheywi amakono nevirenge netsingubo tsyekilindwa; kandi mu moni mwimwe na a bohe ywi nengubo. Yesu ya va volera, Mu mu boholole, a tsie.
45Kunangwa avanyingi ku Vayuda avadza halala na Maria ni va lola kya ya kola va mu suuvira. 46Navutswa avalala kuvo v a tsia ku Vafarisayo ni va va volera vindu vya Yesu ya kola.
47Avasalisi vanene na Vafarisayo va vugannya kyina, ni va vola, Ku kola ndi? Kigira mundu uyu a kolanga vilolekidzu vinyingi. 48Ni ku mu leka ndiyo, avandu vosi va la mu suuvira: kandi Avaromi va ladza va hile kivala kyetu nehiri yetu. 49Navutswa mulala kuvo wa langwa Kaiafa, ya li na a veye musalisi munene muhiga yigwo ya va volera, Mwinye si mu manya kindu kali kilala, 50kandi si mu ganagana nu bulahi ku mwinye mundu mulala a kudzere avandu, ihiri yosi i vule kukudza. 51Navutswa yaga si ya vola mwene: navutswa kigira ya li na a veye musalisi munene muhiga yigwo ya profeta Yesu a la kudzera ihiri; 52kandi si ya kudzera ihiri yeng'ine, navutswa a duke kusannya halala avana va Nyasaye vosi ava salana. 53Kunangwa kutwula ku lidiku yilyo va lomba kyina va duke kumwiita.
54Kigira yiki Yesu si ya vaya kandi habulavu mu Vayuda, navutswa ya tsia mu kivala ahimbi neligendanyama, mu lidala lya langwa Efiraim; ya menya yo halala navegidzwi veve. 55Lipasaka lya Vayuda lya li himbi: navandu vanyingi vanegira Yerusalemi imbiri welipasaka, va twula mu kivala, ni va tsia kwetakasa. 56Kunangwa venya Yesu, ni va volerana lwa va singira mu litempeli Mu lole ndi? Si a lidza mu liliai 57Avasalisi vanene na Vafarisayo va li ni va laga, mundu na a manya ha a veye, a vuule, va duke kumugumira.
वर्तमान में चयनित:
Yohana 11: MBE
हाइलाइट
शेयर
कॉपी
Want to have your highlights saved across all your devices? Sign up or sign in
©Bible Society of Kenya, 1967
