LUKA 18
18
Omoreng’anio bw’omoboraka na omogambi
1Yeso akabatebia omoreng’anio ng’a nebagwenerete komosaba Nyasae botambe, tibakwa emioyo, 2akabora, “Narenge omogambi ase omochie gete, otasigete Nyasae, gose taare koyiera monto. 3Na ase omochie oyio narengeo omoboraka orenge komochiera botambe, ogoteba: Ngambera boronge ase omosira one. 4Omogambi oria ase ekero egeke tancha; nyuma agateba ase omoyo oye: Nonya inche tinsigeti Nyasae, gose tindi koyiera monto, 5korende ekiagera omoboraka oyo andosirie, nimogambere boronge, tacha kondosia ase ogonchichera botambe.” 6Omonene akabora, “Igwa aya omogambi otari omoronge agoteba. 7Inee! Nyasae takobanyorera oboronge abachore baye, abakomorera omobaso na obotuko? Na ere takoba omoremereria asebare? 8Nabatebirie nabanyorere oboronge ase obwango. Korende Omwana‐o‐mwanyabanto kagocha, Inee, nanyore okwegena ase ense?”
Omofarisai na omorusia ebango
9Akabatebia omoreng’anio oyo ase abanto baare gwekaga ng’a nabanyene oboronge, bagochaya abande bonsi, 10“Abanto babere bagatiira gochia Hekalu gosaba; oyomo n’Omofarisai na oyonde omorusia ebango. 11Oria Omofarisai agatenena, agasaba iga ase omoyo oye: Nyasae, nakoiraneirie ng’a mbuya mono, ekiagera inche tindi buna abanto bande, abauri, abatari boronge, abatomani, gose buna oyo omorusia ebango. 12Igo nkweng’ata ara kabere ase echuma; ndua ensemo ya ikomi y’okonyora kwane gwonsi. 13Na oria omorusia ebango agatenena are, tarigia nonya nkoimokia amaiso aye igoro, korende ageaka‐aka egekuba kiaye, okobora: Nyasae, indorera amabera inche omonyene ebibe! 14Nabatebirie inwe: Omonto oria nigo aigete bwoye konya obareirwe oboronge kobua oria onde, ekiagera oyokweimokereria igoro nairanigwe inse, na ere oyokweirania inse naimokererigwe igoro.”
Yeso ogosesenia abana abake
(Mat 19:13–15; Mar 10:13–16)
15Bakamorentera abana ebing’werere, erinde abakune; korende aborokigwa baye bagachia kobarora, bakabatanga. 16Korende Yeso akabarangeria bache asare, ogoteba, “Batige abana bache asende, timobaisa kobatanga, ekiagera abare buna aba, oboruotibwa Nyasae nobwabo. 17Ekeene nabatebirie: Onde bwensi otancheti oboruoti bwa Nyasae buna omwana omoke, takobosoa nonya ng’ake.”
Obogima bwa kare na kare, na obobe bw’obotenenku
(Mat 19:16–30; Mar 10:17–31)
18Na omogambi gete akamoboria, “Omworokia omuya, ninki ndakore inyare koba nomwando bw’obogima bwa kare na kare?”
19Yeso akamoiraneria, “Naki okondoka omuya? Onde tari omuya otatiga Nyasae bweka. 20Kwamanyire amachiko; Totomana, Toita, Toiba, Toteba oborimo, sika iso na nyoko.”
21Akabora, “Ayio onsi ninyabwatete korwa obwana bwane.”
22Ekero Yeso achia koigwa aya, akamotebia, “Egento ekemo ngekoremete; oonie ebio ore nabio bionsi ogabere abataka, na aye nobe nenibo igoro. Erio ochiche ontunyane.”
23Korende ekero achia koigwa aya akaba nomoichano, ekiagera arenge omonda mono. 24Nabo Yeso akamorigereria, akabora, “Nabe aakong’u ase abare abanda gosoa ase oboruoti bwa Nyasae! 25Naki naororo engamia goeta ase ekebao gi’esindani, kobua omonda gosoa ase oboruoti bwa Nyasae.”
26Na abwo abayaigwete bakabora, “Ning’o rende oranyare gotooreka?”
27Akabora, “Aya takonyarekana ase mwanyabanto, nigo akonyarekana ase Nyasae.”
28Petero akabora, “Rora, intwe twatigire chinka chiaito, twagotunyanire aye.”
29Akabatebia, “Ekeene nabatebirie: Monto onde tari otigire enyomba, gose mokaye, gose abamwabo, gose abaibori, gose abana, ase engencho y’oboruoti bwa Nyasae, 30otanyore kobua ara aange bono, naende ase ense egochi‐gocha obogima bwa kare na kare.”
Obobani bwa gatato bwa Yeso igoro y’ogokwa kwaye
(Mat 20:17–19; Mar 10:32–34)
31Erio Yeso akaira baria ikomi na babere, akabatebia, “Rora, ngotiira tore kogenda Yerusalemu, naende amang’ana onsi ayarikeretwe Omwana‐o‐mwanyabanto nababani naikeranigwe. 32Naki nabekwe ase amaboko ’abanto b’Ebisaku, nakorerwe echeche, na gokorerwa bobe, na gotwerwa amate; 33naende inabamoake emecharichi na komoita, na ase rituko ria gatato naboke.”
34Korende tibamanya nonya nering’ana erimo ase aya. Ring’ana eri rikabiseka asebare, na tibamanya ayatebetwe.
Yeso okogwenia omonto omouko
(Mat 20:29–34; Mar 10:46–52)
35Ekero achia goika ang’e na Yeriko omonto oyomo omouko naikaransete enchera ensemo ogosaba ebiegwa. 36Agachia koigwa omoganda ogoeta, akaboria, “Inki ekio?”
37Bakamoiraneria, “Yeso o Nazareti ogoeta.” 38Agaaka eriogi, akabora, “Yeso, omwana o Daudi, indorera amabera!”
39Nabwo batang’aine bakamokania, bakamotebia akire, korende ere akamenta mono goaka eriogi, “Omwana o Daudi, indorera amabera!”
40Yeso agatenena, agachika arentwe asare. Agachia komoika ang’e, akamoboria, 41“Ninki origetie ngokorere?”
Akamoiraneria, “Omonene, inyare korora.”
42Yeso akamotebia, “Oegwe okorora; okwegena kwao gwakogwenirie.”
43Erio kegima akaba nkorora are, akamotunyana, okomotogia Nyasae; na abanto bonsi bagachia korora aya, bakamotogia Nyasae.
वर्तमान में चयनित:
LUKA 18: EKEGUSIIBBLE
हाइलाइट
शेयर
कॉपी
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
