LUKA 17
17
Chinkwana chinde chia Yeso
(Mat 18:6–7,21–22; Mar 9:42)
1Yeso agatebia aborokigwa baye, “Amang’ana ’okogocha takomocha kooroka, korende obobe nobwaye omonto oria okoyarenta! 2Anga mbuya kobua ase omonto oria asungerwe orogena rogosia ase rigoti riaye, arutwe enyancha ime, kobua aragere oyomo bw’aba abake akore ebibe. 3Erende; oyomino karakore ebibe, mokanie; karaonchoke, mwabere. 4Naende karakore ebibe asore ara gatano na kabere ase rituko erimo, karakoiranere ara gatano na kabere na goteba: Naonchokire, mwabere.” 5Abatomwa bakamotebia, “Omonene, tomentere okwegena gwaito.”
6Omonene akabora, “Onye mwarenge nokwegena koreng’aine buna entetere y’omote onga buna omosabisabi, anga mwatebia omokenene oyo: Simoka, bwesimeke nyancha, noro anga nobaigwera.
7“Korende ning’o asemore oyore nomosomba okorema, gose okorisia ching’ondi, oramotebie ekero akorwa mogondo agosoa nyomba: Inchuo bwango oikaranse, orie endagera? 8Inee! Takomotebia: Ebeke ang’e, ondoiserie endagera goika indie inywe, na nyuma yaye, naye orie na konywa? 9Gose nkomotebia are omosomba oria ng’a mbuya mono, ekiagera akora eki achikwa? 10Naboigo nainwe, komorakore onsi aya mwachikirwe, teba: Intwe nabasomba bataisaneti; twakorire aya atogwenerete gokora.”
Yeso okogwenia abanto ikomi abarenge noborwaire bwa ukoma
11Ase enchera ekogenda Yerusalemu Yeso ngoeta arenge egati ya Samaria na Galili. 12Ekero are gosoa omochie oyomo, akaumerana nabanto ikomi abarenge noborwaire bwa ukoma, bateneine are; 13na barabwo bagaaka eriogi bakabora, “Yeso, Omonene, tororere amabera!”
14Agachia kobarora, akabatebia, “Genda mweorokie ase abakuani.” Kobakogenda bagasibeka. 15Oyomo obo agachia korora ng’a osibekire, akairana okomobaka Nyasae ase eriogi rinene, 16akagwa ase amagoro a Yeso, okomoiraneria ng’a mbuya mono, na ere n’Omosamaria orenge. 17Yeso akabora, “Tari bonsi ikomi basibeka? Baria kianda, ng’ai bare? 18Onde tanyorekanete oiranete komotogia Nyasae, otatiga omogeni oyo?” 19Akamotebia, “Tenena, ogende; okwegena kwao gwakogwenirie.”
Ogocha kw’oboruoti
(Mat 24:26–28,37–41)
20Yeso agachia koborigwa n’Abafarisai, “Oboruoti bwa Nyasae indi borache?” Akabairaneria, “Oboruoti bwa Nyasae tibori gocha ase ebimanyererio bikororekana, 21gose tibakobora: Rora naiga bore, gose: Naaria! Rora, oboruoti bwa Nyasae nigo bore ime asemore.”
22Agatebia aborokigwa baye, “Amatuko nache morarigie korora rituko erimo ri’amatuko ’Omwana‐o‐mwanyabanto, korende timokorirora. 23Naende nababatebie: Rora aaria, gose: Rora aiga! Timogenda, gose timobatunyana. 24Naki buna okomesa gokomesa korwa ensemo eyemo goika ensemo ende, nabo Omwana‐o‐mwanyabanto arache koba ase rituko riaye. 25Korende ritang’ani nagwenerete konyora ogochandwa okonge, na kwangwa nekegori eke. 26Naende buna yabete ase amatuko a Nuhu, naboigo erabe nase amatuko ’Omwana‐o‐mwanyabanto. 27Barenge koria, bakonywa, bakonyuoma, bakonyuomerigwa, goika rituko riria Nuhu asoete ase obwato; etoigo egacha, egasiria bonsi. 28Naboigo buna yabete ase amatuko a Loti: Barenge koria na konywa, bakogora, bakoonia, bagosimeka, bakoagacha. 29Korende ase rituko riria Loti aruete Sodomu omorero na ekebiriti bigatwa korwa igoro, bigasiria bonsi. 30Naboigo erache koba ase rituko riria Omwana‐o‐mwanyabanto araoroke. 31Ase rituko riria oyore kerama igoro, na ebinto biaye bire nyomba ime, taika abibogorie; nere oyore mogondo naboigo tairana inka. 32Moinyore moka Loti. 33Oyorarigie koegera obogima bwaye nabosirie, korende oyorasirie obogima bwaye nabonyore. 34Nabatebirie, obotuko boria abanto babere nababe ase oborere obomo, oyomo nairwe, na oyonde natigwe. 35Abakungu babere nababe bagosera ase orogena oromo; oyomo nairwe, na oyonde natigwe. [ 36Abanto babere nababe mogondo, oyomo nairwe, na oyonde natigwe.]”
37Bakamoboria, “Ng’ai Omonene?”
Akabairaneria, “Ase ribego rire nao chinsoti chigosangererekana.”
वर्तमान में चयनित:
LUKA 17: EKEGUSIIBBLE
हाइलाइट
शेयर
कॉपी
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
