OBUCHACHILO 6
6
Obumayanu bwabandu
1 #
Ayub. 1:6; 2:1 Olwa abandu bachaaka okhuba abanji khushialo, ne nibebula abaana abakhaana, 2Abamalaika bahenga hasi khushialo nibalola mbu, abakhaana babandu bali abelikondo lilayi. Kho abamalaika abo nibeyahulila abakhaana abo okhuba abakhasi babwe. 3Mana OMWAMI Nyasaye naboola ari, “Shindiitsa okhufuchilila omundu okhubaho mwoyo inziayo ta, okhuba ye nomundu namundu. Nebutswa alamenyanga khulwemiyika eshikhumi shilala nende amakhumi kabili chionyene.” 4#Obub. 13:33; Sira 16:7; Bar. 3:26Mutsinanga etsio, kata nende mutsinyanga tsiolunyuma, emindu emikhongo chialiho khushialo, echiarulana khulwibulo lwabaana ba Nyasaye nende omundu. Emindu tsana echio, nichio echiali echiamaani khandi echieifuma ikhongo muno mutsyanga tsiakhale etsio.
5 #
Mat. 24:37; Luka 17:26; 1 Pet. 3:20 Olwa OMWAMI Nyasaye yalola shinga olwa buli mundu yali omumayanu, khandi shinga olwa amapaaro komundu kali buli lwosi akobwonooni, 6yabeelela muno khulwa okhulonga omundu khushialo, ne nasinyikha mumwoyokwe muno, 7Mana naboola ari, “Ndalamulula buli mundu owandalonga. Ndalamulula abandu bano nende tsisolo nende ebindu ebimoolanga, nende amanyonyi, okhuba esinyiishe muno, emanyanga shindakhabilonjilekhwo ata shilala tawe.” 8Nebutswa OMWAMI Nyasaye yachamisibwa nende Noa.
Noa yerechekha khulwa omuyembo kweifula
9 #
Sira 44:17,18; 2 Pet. 2:5 Kano namakhuwa ka Noa. Noa yali omundu omulunjishi imbeli ewa Nyasaye. Mubulamubwe bwosi, shiyalikhwo neshika tawe. Noa yakhola amakhuwa amalayi kokhuchamisia Nyasaye. 10Ne Noa yali nende abasiani bataru bano, Shemu, Hamu nende Yafetsi. 11Nebutswa abandu boosi bonoonela Nyasaye, khandi eshialo shiali nishietsulamwo induli. 12Mana Nyasaye nahenga khushialo ne nalola mbu, neshimayanu muno, okhuba abandu boosi bali nibamenya obulamu obumayanu.
13Mana Nyasaye naboolela Noa ari, “Enduutsi mbu, nobulayi okhumulula abandu boosi okhurula khushialo, okhuba eshialo shitsuulemwo ebikhole bieindului. Lola, ndalabamulula boosi pe halala nende eshialo shiosi. 14Khulweshio wikaasilie eliaro likhongo okhurula khutsimbao tsiomusaala omukomari, okhalachemwo ebisika, mana obashekhwo ihula mukari nende elwanyi walio. 15Olikaasie ori, oburambi bwalio bube tsifuti ebukhumi bine namakhumi karaano, obuchiikha bwalio bube tsifuti amakhumi musaafu natsirano, nabwo obwiyinikhu bwalio bube tsifuti amakhumi kane natsirano. 16Okaasie eshilama ore khuliaro elo, ne oleshekhwo obwiyangu bwelitirisha, obuhela ifuti ndala neinusu okhurula khushilama eshio, mana ore omuliango mumbafu mwalio. Umbashe libe lietsigorofa tsitaru okhutsia ikulu. 17Okhuba ndalareera omuyembo kweyifula okhumulula ebilonje ebili mwoyo biosi khushialo. Buli shindu eshili khushialo shilafwa. 18Nebutswa ndalakhola indakano hakari wanje ninawe. Ne iwe nende abasianibo, omukhasiwo nende abakhasi babasianibo, mulenjila muliaro elo. 19Nawe olenjila muliaro elo nende bibili bibili biokhubuli oluyia lweshilonje eshili mwoyo, eshisaatsa nende eshikhasi kho mbu, obihonokosie bibeho mwoyo halala ninawe. 20Winjilemwo nende linyonyi lisaatsa nende likhasi okhurula khu buli oluyia lwamanyonyi, khandi tsisolo tsiosi, isaatsa neikhasi okhurula khubuli oluyia lwatsio kho mbu, bitsiililile okhubaho mwoyo. 21Winjilemwo nende ebiokhulia mana obibiishe, bibe ebiokhuliabio nende ebietsisolo namanyonyi.” 22#Abaheb. 11:7Mana Noa nakhola shinga olwa Nyasaye yamulaka okhukhola.
वर्तमान में चयनित:
OBUCHACHILO 6: OLUDC
हाइलाइट
शेयर
कॉपी
Want to have your highlights saved across all your devices? Sign up or sign in
