MAK 6

A ngwera Nasaret rau bega ki Jisas

(Mat 13.53-58; Luk 4.16-30)

1I Jisas mo tiraki na tanotano takwahini mo mule taliku vaki lo gwatui-vanuana, vae a nona ngwalagelo ramo huria. 2Lo Rani* na Mabuana mo tinakaki mo huhui lolo vale* na tiutangaroa. Takwa-hi a tangaloi u rusa, vae ramo rongoa rau idila haburu. Ramo uduuduhuri kinira rau viti kwara, “?A tangaloi hika u lavi na huirana hika ave? ?U hagwe kworohoki na kikikila hika? ?U tuku vai kworohoki na vaisea? Aia a tangaloi vuroki hokikita. #Sione 7.15 3Aia a kaitabe na ingwa, i natu i Meri. I ratuana i Semis, i Sosev, i Sutas, vake i Saemon. I rahagwena rau hugu leia.”

Hikani a tangaloi savia takwa-hi rau bega kinia. #a Sione 6.42; b Mak 3.31

4I Jisas mo viti lakwara kwara, “A tangaloi vunuhi na vanua rau domi mavaki na tangaloi* duruduruki. Vae kehekeheki a tangaloi lo gwatui-vanuana mai rabelana mana nona vakabela rahe domi mavakinia tea.” #Sione 4.44

5Aia he vai lai te vaisea takwa-hi, kehekeheki u tau kabana lo tangaloi hinea rau lenga aira te kairua mo vakahikinira. #a Mat 14.14; Mak 6.13; b Mat 9.18; Mak 5.23; 7.32; 8.23,25; Luk 4.40; 13.13; Bol 9.12,17; 28.8 6I Jisas u idila haburu huri rahe hauhuri te luna.

I Jisas mo hora na nona kaihora kokona hangavulu dongwana kairua tivarea

(Mat 10.5-15; Luk 9.1-6)

Vunu i Jisas mo lakao laliki mo tiroki na gwatugwatui-vanua takwa-hi, mo huhui na tangaloi. 7-11Mo kware tabulutaki na nona kaihora* kokona hangavulu dongwana kairua, mo bete a huirana lakwara kwara rana bakoto kinia rana livu a tanungwe hati maira. Mo kwaha maira mo viti kwara, “Tulu nehe lai te kinau maikamu lo halamiu. Tulu nehe lai te bereti*, diko te tanga, diko te mane* lolo nomiu baos, aia tulu ne lai nomiu kaitiko kehekeheki. Tulu tavu a kaikwokwori na garumiu, vae tulu hatu hago lugwamiu kairua.” Vunu mo kwaha maira mo viti kwara, “Lolona tulu ne vano vaki lo gwatuivanua, tulu ne hugu lo ingwa katukwale rovonaki tulu neri tiraki na gwatuivanua takwa-hi. Diko tulu ne vano vaki lo gwatuivanua hinea a tangaloi rahe hahavakikamu tea, diko rahe rongohurikamu tea, tulu mo tiraki na gwatuivanua hi tulu mo gahaki na gwia tina garumiu, ne kwareki a kaimatai lakwara kwara vae rana tagahuri. Vae lo taroki a rongoana hati ne maravuti maira.”

Hikani mo horara kairua kehe nga, #a Luk 10.1; b Luk 10.4; d Luk 10.7; e Luk 10.11; Bol 13.51; g Mat 8.4; 10.18; Mak 1.44; 13.9; Luk 5.14 12vae ramo vano ramo heretuva kwara a tangaloi rana bohi tina noga hatiana. 13Rau livuti na tanungwe hati rusa tina tangaloi, ramo lilingi a oel tilo lengeana rusa, ramo vakahikinira. #a Sem 5.14; b Mat 14.14; Mak 6.5

A mateana kai Sione a tangaloi na bavtaes

(Mat 14.1-12; Luk 3.19-20; 9.7-9)

14Hikani a hugwe lakua i Herot #6.14: I Herot. I Herot hi aia i Herot Antivas. Kona taga lo Deksenare lo buku hika takuni. u rongo na roro i Jisas huri i Jisas a hinana u kwalao vataha na mahagweki. A tangaloi ratuaki rau viti kwara i Sione a tangaloi na bavtaes u ahi taliku, vae huri hi mo vai na bolokiana aira vano hi lo huirana. 15Vae ratuaki rau viti kwara aia i Elaesa. Tuaki rau viti kwara aia a tangaloi* duruduruki, hoki na tangaloi duruduruki hinea tuai. #Mat 16.14; Mat 8.28; Luk 9.19 16Vae lolona a hugwe lakua i Herot mo rongo, mo viti kwara, “I Sione a tangaloi na bavtaes hinea nomo sio utuhi na gwatuna, vae u ahi taliku.”

17-20Mo viti kwehini huri tuai i tuana i Viliv mo laki mana vavine katukwale a hinana i Herotias. Vae vaki takuni a hugwe lakua hi mo baluki na vavine hi mo laki maia. Vunu i Sione mo kwaha luna huri, mo toko viti lakwae kwara, “I nigo ku laki mai vavinehi i tuamu, vae a doridori hi he taritarisa tea vohoki.” Vae huri i Sione mo kwaha hokinia hi, i Herotias mo kwahakwaha haburu, vunu a hugwe lakua hi mo hora nona tangaloi ramo kwiribibi i Sione, ramo gwarubibia lolo ingwa na gwarugwaru. Vae i Herotias u lologuteka ki Sione radu, u lengaia kwara a hugwe lakua hi ne kwohia. Vae a hugwe lakua hi u mataku ki Sione huri u kikilai kwara i Sione aia a tangaloi bakoto u kokona, vae he vaia tea. U rongo hati kina leona tigwaravu aia vae u lagwa kwara ne rongoa. #a Luk 3.19-20; b Lev 18.16

21Vae lo rani hinea a hukao na hugwe lakua hi mo diu, mo vai na kanikani lakua mo kware na tangaloi lalakua, mana nona kaitomuaki na tangaloi na vuro, vake mana tangaloi lalakua lo vanua Galili* ramo vanamai ramo bulu maia. Hikani i Herotias mo hagwe na mahao lo taro hi kwara ne vai matei i Sione. 22I natu i Herotias mo vanamai mo soro tilolo ingwa mo vai hakwana, vae a hugwe lakua hi mana nona tangaloi ramo tagai na hakwana hini rau lagwa maia haburu. Hokinia a hugwe lakua hini mo kwaha mana vavine hi mo viti kwara, “Te havakinau te ku lengaia ko viti, na bete lakwako.” 23Aia u hahariki vakarusa lakwae mo viti “Nu hahariki kwara na bete a kinau hi lakwako hinea kona uduhuri. Diko te nogu mamalukoro duviki, na betea lakwako.” #Esta 5.3,6; 7.2 24Hikani a natu vavine hi mo soro tivarea, mo uduhuri ki retahina mo viti kwara, “?Vae na uduhuri naha?” I retahina mo darakinia mo viti kwara, “A gwatu i Sione a tangaloi na bavtaes.” 25A vavine mo mule taliku heheriki vaki mana hugwe lakua, mo viti lakwae kwara, “I nau nu lengaiko hika lai nga kwara kona beteau kina gwatu i Sione a tangaloi na bavtaes lo rova.” 26A leo hi mo vai na hugwe lakua hi mo rongo u rongo hati haburu, vae he viti tea kwara hetea lakwae, huri u hahariki u rovo ba lakwae tomuaki koro na nako na nona vao doluaki hinea rau vanamai huri kanikani. 27Vae heheriki mo hora na tangaloi na vuro katukwale mana leo kwara ne vano ne lavi na gwatu i Sione. A tangaloi na vuro hi mo vano mo soro tilolo ingwa na gwarugwaru mo sio utuhi na gwatu i Sione. 28Vunu mo lavia lo rova mo betea lakwa na vavine hi, mo betea lakwai retahina. 29Lolona a ngwalagelo noi Sione ramo rongo hokinia hi, ramo vanamai ramo lavi na tarabehina, ramo taua tilo gwaru-malanga*. #Mat 27.59-60; Luk 23.52-53; Sione 19.38,41

I Jisas mo vangani na tangaloi u tari vakailima

(Mat 14.13-21; Luk 9.10-17; Sione 6.1-14)

30A kaihora* kokona vano hi ramo mulemai taliku vaki mai Jisas, ramo viti savi na kinau hinea ramo vai, vake savi na leo hinea ramo huhui na tangaloi kinia. #Luk 10.17 31Hikani a tangaloi u rusa rau vanamai rau vano, vae i Jisas mana nona ngwalagelo vano hi a taroki tikei vohoki lakwara kwara rana kanikani. Hika mo kwaha maira mo viti “Ta vano vaki lo tanotano kahekita hinea a tangaloi tikei eia, tulu ne mala mabumabu te kelekele.” #Mak 3.20

32Vunu ramo tinakaki ramo vano lo aga aira kahera vaki lo vanua vuroki. 33Vae a tangaloi rusa ramo tagaira ramo vano, rau kikilaira vakatukwale kwara aira, ramo tiraki na gwatui-vanuaga savia, ramo kwalao ki garuga auta, ramo maravuti tomuaki Jisas mana nona ngwalagelo. 34I Jisas mo galo hake tina aga, mo tagai na vao lakua hi, lolo domina u hakavira haburu vohoki huri aira hoki na sivsivi a kaitagahuriki tikei. Mo tinakaki mo huhuira kina kinau rusa. #a Mat 9.36; 15.32; Mak 8.2; b Nam 27.17; 1 King 22.17; 2 Kron 18.16; Esik 34.8; Sek 10.2; Mat 9.36 35Mo toko raviravi, a nona ngwalagelo ramo vanamai vaki maia, ramo kwaha maia ramo viti kwara, “Hikani u raviravi, a vanua hika a vanua vuroki. 36Ko hora na tangaloi vano hikani rana vano vaki lo tokakivanua garagarani, lo gwatuivanua kwaririgi, rana voli te hinaka rana kani.”

37I Jisas mo darakinira mo viti kwara, “I kamu tulu bete te hinaka lakwara rana kani.”

Ramo uduhuri, ramo viti “?Tana vanga kworohokinira? ?Ku lengaia kwara kena vano kena voli a bereti* kina vatu u tari vakavidolua vakairua? #6.37: A vatu u tari vakavidolua vakairua aia hi a vatu 200,000. ?Kena voli kworohokinia?”

38I Jisas mo uduhuri kinira mo viti “?I kamu a kamiu bereti kaivihe? Tulu vano tulu taga.”

Ramo vano ramo taga, vunu ramo viti lakwae kwara, “A bereti kailima mana ikaki kairua.”

39Vunu i Jisas mo kwaha mana nona ngwalagelo kwara rana kwaheki na tangaloi vano hi rana hugu a gwatugwatuki lolo duvu kesakesa. 40Hikani ramo hugu a gwatuki u rusa, a gwatuki tuaki vidolua, vunu a gwatuki ratuaki ngavu kailima. 41Vunu i Jisas mo lavi na bereti hi kailima mana ikaki kairua, mo lalangao vaki lolo taetae, mo lagwaki God huri. Vunu mo volo utuutuhi na bereti vano hi, mo betekira lakwa na nona ngwalagelo kwara rana hileki lakwa na tangaloi. Vake mo kwaheki na ika hi kairua mo bete lakwara, ramo kani aira vunu. 42Aira vunu rau kani, vae rau kugwa. 43Vunu a nona ngwalagelo ramo hokoni na bereti hi mana ika hinea a tangaloi ramo kani dore a kete hangavulu dongwana kairua, rau kukwere. 44A gwira na ngwera ramo kanikani, aira u tari vakailima. #Mat 15.32-38; Mak 8.1-9

I Jisas mo lakao hivoulu lo kwai tokatoka lakua

(Mat 14.22-33; Sione 6.15-21)

45Heheriki i Jisas mo hora na nona ngwalagelo kwara rana galo tilolo agaga, rana vano tomua vaki lo gwatuivanua Betsaeta lo kwai tokatoka lakua tavaluki, vunu mo hora na tangaloi rusa ramo mulemule. 46Mo kwaha dudulira mo rovo, vunu mo vano mo galo hake vaki lo vuti mo tiutangaroa. #Mak 1.35; Luk 5.16; 6.12; 9.28 47Vae mo bongi a agaga aia lo livuka na Kwai* Tokatoka Lakua Galili*, vae i Jisas aia kahea auta. 48Mo tagai na nona ngwalagelo rau rongo hati haburu ramo huaki na agaga, huri a langi u here u huira haburu vovohira. Luirani i Jisas mo lakao hivoulu lo kwai vaki maira. Kwara ne lakao siletira, 49vae ramo tagaia rau maruti kinia mo lakao hivoulu lo kwai. Rau domi kwara a tamate, vae ramo vingaraki, #Luk 24.37 50huri aira vunu rau tagaia, rau mataku haburu.

I Jisas mo kwaha maira heheriki mo viti kwara, “A domimiu ne hatu kilukilu. I nau hika. Tulu hatu mataku.”

51Vunu mo galo maira tilolo aga, a langi hi mo hivo. A nona ngwalagelo rau idila haburu kinia, rau domi lengalengakinia kwara kworohokinia, #Mak 4.39 52huri aira rahe kikilai tea kwara a bereti* hinea i Jisas mo vangani na tangaloi rusa kinia u vosangi naha, a domiga rau madi haburu rahe domi kikilakinia tea. #Mak 8.17

I Jisas mo vakahiki na lengeana lo vanua Genesaret

(Mat 14.34-36)

53Ramo kwalao utuhi na kwai tokatoka lakua hi ramo vanamai vaki lo vanua Genesaret, ramo saniki-bibi na agaga takwa-hi. 54Ramo tiraki na agaga, heheriki a tangaloi ramo taga kikilaki Jisas. 55Vunu a tangaloi ramo kwalao lalahi na vanua savia takwa-hi, ramo lavi na lengeana ramo haura lo gwanaga, ramo kwalira vaki mai Jisas lo hava vanua ramo rongoa kwara aia takwa-hi. 56Vunu vatavataha na mahagweki i Jisas mo vano eia, lolo gwatuivanua kwaririgi, lolo gwatuivanua lalakua, lo tokakivanua, ramo kwali i rabelaga aira hi rau lenga vaki lo tanotano na hokahokaki hinaka, ramo kwaha mai Jisas kwara ne tirakinira rana kihi na gweregwere na lugwana. Vae aira vunu hinea rau kihia rau rongo karea. #Mat 9.20; Mak 5.27; Luk 8.44

वर्तमान में चयनित:

MAK 6: HWT

हाइलाइट

कॉपी