MAK 5

I Jisas mo vakahiki na tangaloi a tanungwe hati u rusa luna

(Mat 8.28-34; Luk 8.26-39)

1Hikani i Jisas mana nona ngwalagelo ramo maravuti lo Kwai* Tokatoka Lakua Galili* tavaluki ramo galo hake lo vanua Gerasa. 2Lolona i Jisas mo galo hake tina aga, mo hagwe na tangaloi katukwale u ngwalua lolo gwaru-malanga* maira. A tangaloi hi a tanungwe hati luna, #Mak 1.23 3u toka lo livuka na gwaru-malanga. A tangaloi tikei kwara rana gwarubibia taliku. 4Tigwaravu u havuti utuutuhi na seni lo kabana, vake u vai vurivuri na aean lo garuna. Aia u huira haburu kwara a tangaloi rana suria. 5U rani, u bongi, u lakao laliki lo livuka na gwaru-malanga, vake lalahi na vuti, mo kakaili, mo sioa sibona kina vatu. 6Hikani mo tagai Jisas vakahao, mo kwalao mo sovi hivo koro na nakona. 7-8Mo kakaili karakara kina dilao huira mo viti “!Jisas, i nigo i Natu i God hinea Aulu Karakara! ?Ku vai kwara kona vai aha maiau?”

I Jisas mo kwaha maia mo viti “Tanungwe hati, ko vano tina tangaloi hikani.”

Vunu a tangaloi hi mo kwaha mo viti “Nu suriko lo hina i God, ko hatu vai bulakikiau.” #a 1 King 17.18; Mak 1.24; Luk 4.34; b Luk 1.32; 6.35; d Mat 26.63

9Hikani i Jisas mo uduhuri kinia mo viti kwara, “?A hinamu ihe?”

A tangaloi hi mo darakinia mo viti kwara, “A hinagu i Vao huri i kami keu rusa.” 10Vae aia mo seseaka mo viti lakwai Jisas kwara ne hatu hora na tanungwe hati vano hi tina vanua takwa-hi.

11A dura rusa takwa-hi garagarani lo ngwarasa na vuti rau tuku kanikani. 12A tanungwe hati vano hi ramo kwaha mai Jisas ramo viti kwara, “Ko horakami vaki mana dura vano hinea, ko tirakikami kena soro tilologa.”

13Hikani mo masinge. A tanungwe hati ramo vano tina tangaloi hi ramo soro vaki lolo dura. A dura vano hi savira, a valuvaluga u tari vakairua, ramo kwalao tegetano ramo rovo lo baha tilolo kwai tokatoka lakua ramo dono. 14A tangaloi hinea ramo tagahuri na dura vano hi, rau kwalao ramo viti talahaki na roroki lo gwatuivanua vaki lo utaki vake. A tangaloi rusa rau vano kwara rana tagai na kinau hi. 15Ramo vanamai vaki mai Jisas ramo tagai na tangaloi hi a tanungwe hati mo vaia, aia u hugu takwa-hi, u lugwa, a gwatuna u karea ba, vae aira vunu rau mataku. 16Aira hinea rau tagaia ramo viti lakwa na tangaloi maira a havakinau hi mo vaiana lakwa na tangaloi hi a tanungwe hati luna, vake huri na dura vano hi. 17Vunu ramo maraka ramo kwaha mai Jisas kwara vae ne vano tina tataga.

18Lolona i Jisas mo galo tilo aga, a tangaloi hi a tanungwe hati mo vaia, mo kwaha maia mo viti kwara, “Na huriko.”

19Vae i Jisas he masinge tea, vae mo kwaha maia mo viti “Ko mule taliku vaki tatamu mana nomu vakabela, komo viti lakwara a havakinau hinea a Hugwe* mo vai lakwako, u hakaviko mo vai tabetabekinigo.” #Mat 9.6; Mak 8.26; Luk 5.24; 8.39

20Vunu a tangaloi hi mo mule mo lakao lalahi na Gwatuivanua Hangavulu mo matangwasaraki lakwa na tangaloi a havakinau i Jisas mo vai lakwae, vae a tangaloi savia hinea ramo rongoa rau idila haburu.

I Jisas mo vakahiki na vavine vunu mo rakati na natu i Saeras tina mateana

(Mat 9.18-26; Luk 8.40-56)

21I Jisas mo vano utuhi na kwai tokatoka lakua taliku vaki tavaluki, vae a vao lakua ramo vileki dalia takwa-hi auta. 22Hika a tangaloi lakua katukwale tiura hinea rau tuku tagahuri na vale* na tiutangaroa nona gwaloana noi Isrel* mo vanamai. A hinana i Saeras. Mo tagai Jisas mo vano vaki maia mo sovi hivo vovohi na garu i Jisas, 23mo seseaka huria mo viti kwara, “I natugu, a natu vavine u garagarani kwara ne mate. Ko vanamai, ko tau kabamu luna kwara vae ne rongo karea ne ahi.” #Mat 8.3; Mak 6.5; 7.32; 8.23,25; Luk 4.40; 13.13; Bol 9.12,17; 28.8

24Hikani i Jisas mo huri na tangaloi hi. A vao lakua ramo huria, ramo visusuni dalia.

25A vavine katukwale takwa-hi a daidai gwaravu u vaia a hukao hangavulu dongwana kairua. 26Aia u rongo hati haburu mo vano vaki mana tokita rusa. U mahuki savi na nona mane* vae he rongo karea tea, a kana lengeana mo toko hati vakevake nga. 27Mo rongo na roro i Jisas, vae lolona mo bulu mana vao mo lakao huri Jisas takuni. #Mat 14.36; Mak 6.56 28Mo domidomi luna sibona kwara, “Diko na kihi na lugwana vohoki na ahi.”

29Hikani mo kihi na lugwana a dai hi mo tirakinia vakatukwale, mo rongo lolo tarabehina kwara a kana lengeana u tirakinia. 30Heheriki i Jisas mo rongo kwara a huirana u vano tiua, mo halebohi vovohi na vao mo kwaha maira mo viti kwara, “?Ihe mo kihi na lugwagu?” #Luk 6.19

31A nona ngwalagelo ramo darakinia ramo viti kwara, “?Kohe tagai na tangaloi tea vano hika ramo toko visusuni dalidaliko? ?Vunu kworoho komo uduhuri kwara ihe u kihiko?”

32Vae i Jisas mo tagataga laliki kwara ihe hi mo kihia. 33A vavine hi u kikilai kwara i Jisas u vai kworoho maia, mo vanamai a huina u rururu kina matakuta, mo sovi hivo vovohi na garu i Jisas mo viti bakotoki savi na kinau lakwae. 34I Jisas mo kwaha maia mo viti kwara, “Natugu. A nomu hauhuriana u vaiko komo rongo karea. Ko mule lo magemuana, ku rongo karea tina kamu lengeana.” #a Mak 10.52; Luk 7.50; 17.19; b 1 Saml 1.17; 20.42; 2 Saml 15.9; 2 King 5.19; Luk 7.50; Bol 16.36; Sem 2.16

35Lolona hi mo toko kwaha radu nga, a tangaloi na leo ramo vanamai tina tata i Saeras, ramo kwaha mai Saeras ramo viti “Ko hatu vai na rongohati lakwa na Tisa. I natumu a mabuna u rovo ba.”

36I Jisas mo rongo na leo hi, mo kwaha mai Saeras mo viti kwara, “Hatu mataku, ko hauhuri kehekeheki.”

37Vunu i Jisas mo suri na tangaloi kwara rana hatu huria, vae mo lavi i Pita, i Semis mai tuana i Sione, aira kehekeheki ramo huria. #Mat 10.2; 17.1; Mak 1.29; 3.16-17; 9.2; 13.3; 14.33; Luk 6.14; 9.28; Bol 1.13 38Lolona ramo vano vaki mana ingwa na tangaloi lakua hi, i Jisas mo tagai na tangaloi maira ramo toko kurekurere, rau tangi. Tuaki rau ula karakara. 39Hika mo soro tilolo ingwa, mo kwaha maira mo viti kwara, “?Kworoho tulu mo kurekurere haburu tulu mo tangi? A natu he mate tea, aia u maturu.” #Sione 11.11

40A tangaloi ramo mana tiehia, vae mo hora savira tivarea, mo lavi na tama mana retahi na natu vavine hi, mana nona ngwalagelo kaitolu ramo huria, ramo soro vaki hinea a natu vavine mo ngwalulu eia. 41Hika i Jisas mo hago lo kaba na natu vavine hi, mo kwaha maia mo viti “Talita kumi.” A domiana na leo hi kwara, “Natu vavine, na viti lakwako, ko maraka.” #Luk 7.14

42Heheriki a natu vavine hi mo maraka, mo lakao. A natu hi a hukaona hangavulu dongwana kairua. Aira vunu rau idila haburu kinia. 43Vae i Jisas mo surira kwara rana hatu viti lakwa na tangaloi ratuaki. Vunu mo kwaha maira kwara rana bete te kinau lakwa na natu hi ne kani. #Mak 1.44; 7.36

वर्तमान में चयनित:

MAK 5: HWT

हाइलाइट

कॉपी