LUK 1

A leo tomuaki

1Tua Teovilas, i nigo a tangaloi lakua kareaki. A tangaloi rusa ramo huirataki na kinau hika kwara rana uli na leo huri na kinau rusa hinea ramo vai hikeni maikami. 2Rau ulibibi na kinau aira vano hinea keu rongora ba tina tangaloi hinea ramo taga tina tinatinakakiki, ramo viti na leoki tivarea. #Sione 15.27 3Vae hokinia, i nau nu huri tabetabeki na kinau aira vano hi ba tina tinatinakakiki. Vae huri hi nu domi u karea kwara na uli na leoki, na taura ne taritarisa lo halaki huriko. #Bol 1.1 4Nu lengaia haburu kwara kona kikilai tabetabeki savi na kinau aira vano hinea a tangaloi ramo toko huhuiko kinira kwara rau kareaki.

A kaihora tina taetae u tuliki na voraana noi Sione a tangaloi na bavtaes tangaloi

5Lolona a hugwe i Herot #1.5: I Herot. I Herot hi aia i Herot Lakua. Kona taga lo Deksenare lo buku hika takuni. mo hugwe koro na vanua Isrel*, a tangaloi* lingilingi katukwale a hinana i Sekaraea. Aia lo vakabela na tangaloi lingilingi rau kwareki a vakabela lui Avia hinea aia katukwale tiura u vanamai lo tubutubu i Eron. I vavinehi Sekaraea a hinana i Elisabet, vae aia vake a gwaloana na tangaloi lingilingi i tubuga i Eron. #1 Kron 24.10 6I rarua vunu lo nogaru mauriana raru toka u bakoto lo nako i God, raru rongohuri savi na tulikileo mana korokoro nona Hugwe i God. 7Vae i natugaru tikei huri i Elisabet he hago lai te natu, vae i rarua vunu mai tuana ngwarasea i Sekaraea, raru ngwarasea haburu.

8Lo rani katukwale i Sekaraea mana nona vakabela rau tuku lingilingi noga boloki lo nako i God, huri a noga taro kwara rana boloki lo Ingwa Kokona noi God. 9Lo doridori na tangaloi lingilingi rau vai* a matarongo mo sovi ti lui Sekaraea kwara ne hura a kinau* boniboni lo voda#1.9 voda. Aira Kwalaha rau viti kwara, kwotakwota. na kinau boniboni lo Tanotano Kokona. Lolona mo soro tilolo Ingwa Kokona nona Hugwe, #Eks 30.7 10a vao rau tu varea rau tiutangaroa lo taro na hura kinau boniboni.

11A kaihora tina taetae nona Hugwe mo maravuti kinia mo tu lo matua na voda hinea ramo hura a kinau boniboni luna. 12Lolona i Sekaraea mo tagaia u rongo hati mo mataku. 13Vae a kaihora tina taetae mo kwaha maia mo viti “Sekaraea. Ko hatu mataku. I God u rongo na nomu tiutangaroa, vae i vavinehimu i Elisabet ne hagovi na natu ngwera kinigo. Kona tau na hinana i Sione. 14I nigo kona lagwa, ne havutiko. Ne vora vae a tangaloi rusa vake ne havutira. 15Vae aia ne kwareki a tangaloi lakua lo nako na Hugwe i God. Aia nehe inu te waen diko a inuinu huira. Tina tinatinakakiki hi ne vora aia ne kukwere kina Tanungwe Kokona. #Nam 6.3; Jaj 13.4; 1 Saml 1.11 16Aia neri lavi na gwaloana rusa noi Isrel ramo mulemai taliku vaki mana noga Hugwe i God. 17A natu hi ne vano tomuaki na Hugwe hi, ne kwareki a kaikwali na nona leo. A nona domidomi mana nona huirana ne hoki na domidomi mana huirana nona tangaloi* duruduruki i Elaesa. Neri lai tabulutaki a ratama mana raranatu rana lagwalagwa maira taliku, a tangaloi rahe rongorongo-huri tea, ne lavira vaki lo hala na domidomi na bakotoana. Aia neri kware tabulutaki na tangaloi nona Hugwe i God rana rarai huria.” #a Mat 17.11-13; b Mal 4.5-6; d Mal 3.1

18I Sekaraea mo viti lakwa na kaihora hi, mo viti “?Vae nana kikilai kworoho kwara vae ne hokinia, huri i nau nu ngwarasea haburu, i vavinehigu u ngwarasea haburu vake?” #Jen 18.11

19A kaihora hi mo darakinia mo viti kwara, “I nau i Gabriel, nu tu koro na nako i God hinea mo horeau kwara na kwaha maiko, na viti na roro karea hika lakwako. #a Dan 8.16; 9.21; b Hib 1.14 20!Hika ko tagaia! Konahe kwaha lai tea kona butu tarisaki lo raniki hi a kinau vano hikani rana kworo, huri kohe hauhuri tea lo leo nomo viti, hinea kwara vae ne kukwere lo tarona.” #Luk 1.45

21Lo taro hi a tangaloi rau hugu tara i Sekaraea ramo toko domi lengalengakinia kwara “?Te kworohokinia te hikani, mo hugu mo tuai haburu lolo Ingwa Kokona noi God?” 22Lolona mo soro tivarea he kwaha lai te maira, vae rau kikilai kwara u taga te vakatabobo lolo Ingwa Kokona noi God. He malangaki na leo tea, mo vai a kaivosangi lakwara kina kabana.

23Hikani i Sekaraea a nona bolokiana hi lolo Ingwa Kokona noi God mo rovo, mo mule vaki tatana. 24Hika he tuai tea i vavinehina i Elisabet mo tatagwangira, hokinia mo hugu lolo ingwa a vula kailima. 25I Elisabet mo viti “Mo karea a Hugwe i God mo hago maiau lo hala hikani. Mo lavi na nogu maemaeana tiau lo nako na tangaloi huri nohe hago lai te natu.” #Jen 30.23

A kaihora tina taetae mo tuliki na voraana noi Jisas

26I Elisabet a vulana mo kaiono, i God mo hora nona kaihora tina taetae i Gabriel, vaki lo gwatuivanua a hinaki Nasaret lo vanua Galili*. 27Mo lavi na leo huri na vavine u toka kokona hinea a tangaloi katukwale a hinana i Sosev mo taubibia kwara ne laki maia. I Sosev aia a gwaloana nona hugwe lakua i Devit. A natu vavine hi a hinana i Meri. #Luk 2.5; Mat 1.16,18 28A kaihora hi mo vano vaki maia, mo viti “!Karea haburu! !A Hugwe i God u tabe kareakinigo! Aia maiko.”

29I Meri u rongo hati haburu lo leo nona kaihora hi, mo toko domidomi kwara, “?Kworoho a kaihora hi mo kwaha maiau hokinia hi?” 30A kaihora hi mo viti lakwae kwara, “Meri, ko hatu mataku, huri i God u tabeko. 31Vae i nigo kona tatagwangira, konari hagovi na natu ngwera, komo kwareki na hinana i Jisas*. #Jen 16.11; Jaj 13.3; Aes 7.14; Mat 1.21-23 32Aia ne lakua ne kwareki i Natu i God Aulu Karakara. A Hugwe i God ne vaia ne mulemai kina Hugwe Lakua hoki i tubuna i Devit. 33Neri kwareki a Hugwe Lakua nona gwaloana noi Sekov vaki tuai, ne hugwe korora vaki tuai, a gwereki tikei.” #2 Saml 7.12,13,16; Aes 9.7 #Maeka 4.7; Dan 7.14

34I Meri mo viti lakwa na kaihora hi kwara, “?I nau a tokakokona vae ne mule kworohokinia kwehi?”

35A kaihora hi mo daraki mo viti “A Tanungwe Kokona ne vanamai tilumu, a huirana noi God ne toka lumu. Hokinia a natu kokona hika ne kwareki i Natu i God. #Mat 1.20 36Ko domihagwe i belamu i Elisabet. Rau viti kwara he hago lai te natu. U ngwarasea haburu vae hikani a vulana kaiono ba. 37Hika hoki na Uliuli* Kokona hinea mo viti ‘A kinau he madi tea mai God.’ ” #Jen 18.14

38I Meri mo viti kwara, “I nau a tangaloi boloki nona Hugwe i God. Ne mule kwehi lakweau hokinia komo viti.”

Vunu a kaihora tina taetae mo vano tiua.

I Meri mo tiroki i Elisabet

39He tuai tea i Meri mo vaivai heheri mo lago hala kwara ne vano vaki lo gwatuivanua lo mahao na vutivuti na vanua Sutia. 40Mo maravuti, mo soro vaki tata i Sekaraea mo hihiolo ki Elisabet, mo kwaha maia. 41Lolona i Elisabet mo rongo na leo i Meri, i natuna mo kilu lolona. Vunu i Elisabet mo kukwere kina Tanungwe Kokona, #a Jen 25.22; b Luk 1.15 42mo kwaha karakara mo viti “I God u tabeko sileti na ranatu vavine savia. Vake u vai tabetabeki na natu hi vae kona bavae. #a Jaj 5.24; b Dut 28.4 43?Kworohokinia te hika a kinau lakua hika mo vai hikwe maiau, i retahi na nogu Hugwe* mo vanamai mo tirokiau? 44Lolona nomo rongo na leomu, i natugu mo kilu lolo lologu kina hahavutiana. 45Ne va havutiko huri ku hauhuri kwara a leo nona Hugwe lakwako ne mule luna kareaki.” #Luk 1.20

A bolo na kaluhakiana bulai Meri

46I Meri mo viti

“Nu kaluhaki na Hugwe i God kina domigu,

47a tanungwegu u havutia

huri i God aia a nogu Kaivakahi.

48Aia u domihagweau,

i nau a nona tangaloi boloki,

i nau a tangaloi vuroki.

Vae u tinakaki hika,

a tangaloi vunuhira rana viti

kwara i God u vai tabetabekiau, #1 Saml 1.11

49huri na kinau lalakua vano hika

mo vaira lakweau.

Aia a God na Huirana,

a hinana u kokona. #Sam 111.9

50Aia u vosangi na nona hahakaviana

lakwara hinea rau domi mavamavakinia

vanamai evina kinia

tina vakabela vakarusa. #Sam 103.13,17

51Mo hokaki na kabana kina huirana,

mo livu girigiriki na tangaloi kwetukwetutu

mana noga tovotovo rusa. #a Sam 89.10; b 2 Saml 22.28

52Mo reve surisuri na hugwe lalakua huira

tina hagehagelega,

mo tabera hinea a tangaloi vuroki. #a Job 12.19; b Job 5.11

53Mo vanganira hinea u marakatira,

kina kinau rau karea,

mo hora na tangaloi hugwe leletiu

a kinau tikei lo kabaga. #a 1 Saml 2.5; b Sam 107.9

54U hagobibi na tulikileo

hinea mo viti lakwai ratubuda,

mo vanamai

kwara ne hago mana nona kaihora

a gwaloana noi Isrel*. #a Sam 98.3; b Aes 41.8

55Vunu u domidomi-bibi

kwara ne vosangi

a hahakaviana lakwai Evraham,

vunu lakwa na nona gwaloana savia vaki tuai.” #1 Saml 2.1-10 #Maeka 7.20; Jen 17.7; 22.17

56I Meri mo toka mai Elisabet kwara a vula kaitolu vunu mo mule taliku.

A voraana noi Sione a tangaloi na bavtaes tangaloi

57A taroki mo maravuti kwara i Elisabet ne hagovi i natuna, vae mo hagovia a ngwera. 58I rabuluina, mai rabelana ramo rongoa kwara a Hugwe i God u karea haburu maia, aira vunu u havutira maia vake.

59Vae a natu hi a ranina mo kaikwalu, ramo vanamai kwara rana vai na kaimatai* lo siosio luna, vunu kwara vae rana suliti na hina i tamana i Sekaraea tiluna. #a Luk 2.21; b Jen 17.12; Lev 12.3

60Vae i retahina mo viti kwara, “!Eheo hetea! A hinana i Sione.” #Luk 1.13

61Vunu ramo viti lakwai retahina kwara, “Lo nomu vakabela a hina tikei kwehini.”

62Hikani ramo vai a kaivosangi lakwai tamana ramo uduhuri kwara, “?Tana kwareki na hina na natu hikani ihe?”

63Vunu i Sekaraea mo longi na veva tiura mo uliuli luna kwara, “A hinana i Sione.” Ramo mamarutiki. 64Bulu maia nga i Sekaraea mo kwahakwaha lai taliku, mo tinakaki mo kaluhaki i God.

65Hikani i rabuluina ramo mataku haburu, vunu a roro na kinau vano hini mo vano lalahi na gwatugwatui-vanua lolo vuti Sutia. 66Aira hinea rau rongo ramo domidomi luna, ramo uhi kwara “?A natu hika vae ne va boloki te kworohokinia tea?” U matangwasara kwara a huirana nona Hugwe i God aia maia.

A leo duruduruki noi Sekaraea

67I Sekaraea a tama na natu hi u kukwere kina Tanungwe Kokona, mo duruki na leo ti God mo viti

68“Tana kaluhaki na Hugwe

hinea a noda God

i kita a gwaloana noi Isrel*,

huri u vanamai kwara ne hago

maikita a bulana tangaloi

ne volitukuhikita. #a Sam 41.13; 72.18; 106.48; b Sam 111.9; Luk 7.16

69U rivuki na tangaloi katukwale a nona huirana eia

kwara ne vakahikikita,

aia u gwalo vanamai lui Devit,

a nona tangaloi boloki. #Sam 18.2

70I God mo tuliki terekakinia tuai lengalenga

lalahi na nona tangaloi* duruduruki kokona.

71Mo viti kwara ne vakahikikita

tina noda tavaluivuro,

tina noga huirana

hinea rau vai taratarakikita. #Sam 106.10

72U viti kwara ne vosangi na nona hahakaviana

lakwai ratubuda,

ne domidomi-bibi na nona leo harikiana kokona. #Sam 106.45-46

73-74Mo vai na tulikileo huira

lakwai tubuda i Evraham,

kwara vae ne kasatukuhikita

tina noda tavaluivuro,

huri kwara vae tana boloki nona,

tana hatu mataku, #Sam 105.8-9; Jen 17.7; Lev 26.42 #Jen 22.16-17

75tana ngwasara,

tana bakoto koro na nakona

vatahaki na rani na noda mauriana. #Taet 2.12-13

76“I nigo, i natugu, konari kwareki

a tangaloi duruduruki noi God Aulu Karakara.

I nigo kona vano tomuaki na Hugwe i God,

kona vai rarai na hala huria. #Aes 40.3; Mal 3.1; Mat 3.3

77Kona viti lakwa na bulana tangaloi

kwara vae ne vakahikinira,

ne domidomi koro na noga vaivai hati.

78A noda God a hahakavina eia,

u hahaloki tabetabekikita,

vae neri tiraki na leleha na ahiana

ne leleo tiluda. #Mal 4.2

79Vunu ne leleo vanamai tina taetae tiluga

hinea rau hugu tavuti na dodo na mateana,

ne turukikita hi lo hala

kwara vae tana hagwe na magemuana luna.” #Aes 9.2; 58.8; 60.1-2; Mat 4.16

80A natu hi mo ngwarasea hake, mo huira lo tarabehina lo tanungwena vake, mo toka lolo vanua vuroki tarisaki lo rani hi kwara vae ne vosangia sibona tivarea lakwa na gwaloana noi Isrel. #a Luk 2.40; b Mat 3.1

वर्तमान में चयनित:

LUK 1: HWT

हाइलाइट

कॉपी