MAK 16

I Jisas mo maraka taliku tina mateana

(Mat 28.1-8; Luk 24.1-12; Sione 20.1-10)

1A Rani* na Mabuana mo rovo, vunu i Meri a vavine Maktala, i Salome, mai Meri i retahi i Semis, ramo vano ramo voli noga kinau* boniboni kwara rana vurae na tarabehi i Jisas kinia. 2Hikani lo Sade sirovobongi bise a mataniaho mo takwaka, ramo vano vaki lo tabu. 3Ramo lakao lo hala, ramo toko uhiuhira muleki kwara, “?Ihe ne rihi na vatu lakwakita te hika, tina matakihala na gwaru-malanga* hi?”

4Hikani ramo lalangao, ramo tagai na vatu hi huri u lakua haburu, vae u rihiana ba. 5Ramo soro tilolo gwaru-malanga hi, ramo tagai na ngwalagelo katukwale mo hugu lo matua na gwaru-malanga hi, u lugwaki na lugwa lotu gwaravu, ramo maruti kinia. #Rev 7.9,13 6Hika mo kwaha maira mo viti kwara, “Tulu hatu mataku. Nu kikilai kwara tulu tuku taga haro i Jisas, a ngwera Nasaret, aia hi hinea ramo durua tilo kaibetu. Vae u tikei hike. U maraka taliku. Tulu tagai na tanotanona ramo lulukinia eia. 7Tulu vano tulu viti lakwa na nona ngwalagelo, i Pita, maira ratuaki vake, kwara aia ne vano tomuakikamu vaki Galili*. Tulu ne tagaia takwa-hi, hokinia hi mo viti terekaki lakwakamu.” #Mat 26.32; Mak 14.28

8Hikani ramo ngwalua tivarea ramo kwalao tina gwaru-malanga hi huri rau rongo a huiga u titikeiki ramo rurururu kina matakuta. Vae rahe viti na kinau te vohoki lakwa na tangaloi kwara te katukwale, huri rau mataku haburu. #16.8: Lo Buku Kokona tuaki hinea a tangaloi rau ulira tuai, rau hoke na leo hika kina leo hinea mo viti kwara, “9 A ravavine vano hi ramo vano vaki mai Pita mai rabuluina, ramo viti huri savi na kinau hinea a tangaloi hi mo viti lakwara. 10 Vunu takuni tiua hi, i Jisas mo betera kina leo tatoka hinea u kokona. A leo hi u viti kwara i God u vakahiki na tangaloi, u kwiribibira vaki tuai a gwereki tikei. Hikani i Jisas mo lalahi na nona tangaloi ramo kwalahaki na leo hi doluaki na varamana.”

I Meri a vavine Maktala u tagai Jisas

(Mat 28.9-10; Sione 20.11-18)

9I Jisas u maraka tina mateana, lo Sade sirovobongi bise mo vosangia sibona tomuaki lakwai Meri a vavine Maktala, aia hinea i Jisas mo livuti na tanungwe hati kaibitu tiua. #Luk 8.2 10A vavine hi mo mule vaki mai rabului Jisas hinea rau rongo hati rau tuku tangi, mo vitia lakwara. 11Vae lolona ramo rongo mo viti kwara i Jisas u ahi, aia u tagaia, rahe hauhuri te luna.

A ngwalagelo kairua noi Jisas raru mo tagaia

(Luk 24.13-35)

12Vunu takuni tiua hi i Jisas mo vosangia sibona lakwa na nona ngwalagelo kairua lo halagaru vaki lo vanua auta, vae lo taro hi a tarabehina u dolua. 13Raru mo mule taliku raru mo viti lakwara ratuaki, vae rahe hauhuri te luna.

A ngwalagelo noi Jisas hangavulu dongwana katukwale rau tagaia

(Mat 28.16-20; Luk 24.36-49; Sione 20.19-23; Bol 1.6-8)

14I Jisas mo vosangia sibona rovonaki lakwa na nona ngwalagelo hangavulu dongwana katukwale lolona ramo toko kanikani. Mo kwaha luga, huri a noga hauhuriana tikei, vunu vake huri a domiga u madi haburu kwara rana hauhuri lo tangaloi hinea ramo viti kwara rau tagaia u ahi taliku. 15Mo kwaha maira mo viti kwara, “Tulu vano doluaki na varamana, tulu kwalahaki na Roro Karea lakwa na tangaloi doluaki. 16Ihe hi ne hauhuri lo Roro Karea hi ne lai bavtaes ne ahi. Vae ihe hi he hauhuri tea, i God ne arekinia tilo mateana. #Bol 2.38; 16.31,33 17I God ne bete na kaivosangi na nona huirana aira hika lakwara hinea rau hauhuri. Lo hinagu rana livu tanungwe hati tina tangaloi, rana kwaha lo leo mataroi. #a Bol 8.7; 16.18; b Bol 2.4,11; 10.46; 19.6; 1 Kor 12.10 18Diko rana kwali a ngwata, diko rana inumi na kinau hati, vae ranahe rongo hati tea. Rana tau kabaga lo tangaloi hinea rau lenga vae rana ahi.” #a Luk 10.19; Bol 28.3-6; b Bol 4.30; 5.16; 8.7; Sem 5.14-15

I Jisas mo mule tagaulu vaki lolo taetae

(Luk 24.50-53; Bol 1.9-11)

19A Hugwe* i Jisas mo kwahakwaha mana nona ngwalagelo mo rovo vunu i God mo lavia tagaulu vaki lolo taetae, mo hugu lo matuai God. #a 2 King 2.11; Bol 1.9-11; 1 Tim 3.16; b Sam 110.1; Mat 22.14; 26.64; Mak 12.36; 14.62; Luk 20.42; 22.69; d Bol 2.33,34; 5.31; 7.55,56; Rom 8.34; Eves 1.20; Kol 3.1; Hib 1.3,13; 8.1; 10.12; 12.2; 1 Pita 3.22 20A ngwalagelo ramo vano, ramo heretuva vataha na mahagweki, vae a Hugwe u hago maira, u vosangi kina kaivosangi rusa kwara a noga heretuva u kareaki. #16.20: Lo Buku Kokona rusa hinea a tangaloi rau ulira tuai a leo na buku hi u rovo lo gweregwereki 16.8. A leo aira vano hi lo ves 9-20 rau tikei luga.

वर्तमान में चयनित:

MAK 16: HWT

हाइलाइट

कॉपी