Kucangtsi 39
39
A Ye Yusufu Jabci na Potifar
1Anyisu Ishimayel pu Yusufu si yi Ejib, ka jabci na Potifar, kinjo uwae ande ti uwe kusog Ukwe ti Ejib. Unde wu si unde ti uwe na itaen ti ku kyir kusog ukwe. 2Yaweh ti Yusufu ta tetso, awu ru risu. Awu ta kusog unde ti kununn-wu. 3Unde ti uwe-wu nung baa, Yaweh na te Yusufu na ta tetso, ama na ku nda wu, awu na ku tu iti ru yi uwe uwae meme iken ti awu ku nde. 4Ikyaen yine Yusufu tu kutxuwe titinyang uwe Potifar, ama Potifar sa wu kafe unde ti ku ndeya wu. Potifar sa wu ta risu ishikusog-wu ti meme iken ti awu site. 5Ti kiye ti awu sa Yusufu ta risu ishikusog-wu ti meme iken ti awu site, Yaweh waefa ishikusog unde wu ikyaen Yusufu. Itinyang na Yaweh ta risu Potifar yi iken ti awu site kusog-wu ti risaen ufang-wu meme. 6Ikyaen ayine awu ya meme iken ti awu site ta kujwo Yusufu, u kab wu uwae risu iken kyi be, se itici-wu amam.
Yusufu saen urom, u nyang ti sae timambe. 7Kiye iki tiri uwa unde ti kununn Yusufu site ijaen risu Yusufu, ama u ri te Yusufu baa, “Ba nae te m!” 8Amaa Yusufu pyir u ri baa, “Unde ti kununn-m sa m tsi risu kusog-wu ne ti meme iken ti awu site. 9Rurob unde iki skeb-yi ana-m kusog ike be. Unde ti kununn-m byang-wu ame iken iki be, se afu amam ikyaen ti, afu si uwa-wu. Ame u nde rimang u nde itso ikentitibi yine u raen Rimam ira?” 10Ko ti unda wu ku ri ira ti Yusufu ti usir usir, awu pyir kunn ti wu u nae te wu, ko ti awu u som fer te unda wu. 11Usir iki Yusufu sang uwae kusog ti awu kaa nde wande-wu. Unde iki, ko anyisu kununn atang iki ta-ba atang be. 12Unda wu ye Yusufu ti atupwa u ri baa, “Ba nae te m.” Amaa Yusufu tunn pu kutupwa-wu fa unda wu ti ajwo u sa inyae ter ruye uwae kusog atang. 13Ti unda wu nung baa, Yusufu na ter ya kutupwa-wu na ta fa pu wu awu kujwo, ama na u ruye pu wu uwae kusog atang, 14awu kunn anyisu kusog-wu ti tsitsi u ri te ba baa, “Ni nung! Mbaibrane wune ti ubaen-m jab ba, awu ba ti wu nde ti uru ijwe! Awu sang ba ike ti wu na u nae te m ama ame tso ukunn. 15Ti awu fxen ukunn ti ame tso ku sha itindeya, awu ter ru, u ya kutupwa-wu ta fa m ti ajwo.”
16Awu pu kutupwa Yusufu cwu te ijwe-wu ba kwar kiye ti unde ti kununn-wu kafe ba kusog. 17Ama unda wu pwen ira yine te wu baa, “Upyi-fu Mbaibrane ti afu pu ba ne, awu ba ti wu na u nde m uru ijwe. 18Ama ti ame tso ukunn ku sha itindeya, awu ter ruye u ya kutupwa-wu ta fa m ti kujwo.”
19Ti ti Potifar fxen ira yi ti uwa-wu ri te wu risu iken yi ti Yusufu na nde ne, awu tso rinae si-yi ti ti ri be. 20Awu ye ra Yusufu ka cwunnkyi pursuna uwog ti a ku pu ande ti raen Ukwe ira cwunnkyi atang. Ama kiye ti Yusufu ta pursuna atang, 21Yaweh te wu ta tetso, u tatso Yusufu ayib risi ti kutxuwe titinyang uwe unde ti ku kyir pursuna atang. 22Ikyaen ayine unde wu nda Yusufu rurob ti wu na si risu ande ba ti ta pursuna atang meme. Patag iken ti aba ku nde atang ta kujwo Yusufu. 23Unde ti ku kyir pursuna wu sa uwae tsi-wu risu iken iki ti ta kujwo Yusufu be, ikyaen ti Yaweh ti Yusufu ta tetso, u ku nda wu iti ru yi uwe uwae meme iken ti awu ku nde.
वर्तमान में चयनित:
Kucangtsi 39: kubNT
हाइलाइट
शेयर
कॉपी
Want to have your highlights saved across all your devices? Sign up or sign in
© Wycliffe Bible Translators, Inc. and
© The Nigeria Bible Translation Trust 1995, 2017
