Kucangtsi 40
40
Yusufu Tsag Imbyi Kurwa na Ande Ifaen
1Isim ayine, unde ti ku txi ambyi ti ngwa na Ukwe ti unde ti ku nde wuci na Ukwe ti Ejib ndembeb Ukwe wu utob. 2Ukwe ti Ejib wu tso rinae te ande wande-wu ifaen bane, unde ti uwe itaen ti ku txi ambyi ti ngwa na Ukwe ti unde ti uwe itaen ti ku nde wuci na ukwe. 3Awu pu ba cwunn pursuna, kusog unde ti uwe na itaen ti ku kyir Ukwe ti Ejib, ti si uwog ti a cwunn Yusufu atang ama. 4Unde ti uwe pursuna wu pu ande ifaen bane faesi Yusufu kujwo ti wu na nungkyi ba uwae kiye wu ti aba ta uwae pursuna atang.
5Uwae utitang iki, meme ande ifaen bane sunn kurwa. Kurwa-ba yi site imbyi ira txitxi. 6Ucwe fam kiskinn ti Yusufu ba ti wu u ba nung ba, awu sae aba som sunng. 7Ikyaen yine, awu rang ande ba baa, “Imi ti nde ani som sunng?”
8Aba ri te wu baa, “Ati sunn kurwa meme-ti, ama unde iki ta-wu ti u ri te ti imbyi kurwa yi be.” Yusufu rang ba baa, “Imbyi kurwa ku ru ye-yi uwog Rimam ba be a. Ni pwen kurwa-ni ayi te m ti m fxen.”
9Ikyaen yine unde ti uwe itaen ti ku txi ambyi ti ngwa na Ukwe tsag te Yusufu kurwa wu baa, “Uwae kurwa-m, ame nung kutuku anam tsi uwe-m. 10Kutuku anam wu site akyikya ita. Ti awu bag atsing ti ti shab, awu mbub ajwug u waen awaen. 11Kitu Ukwe ta kujwo-m, ama ame kwaen awaen anam, u kam yi si uwae kitu wu, ama u ye na ukwe.”
12Yusufu ri te wu baa, “Imbyi kurwa-fu ta re. Ajwo kutuku ita ayi ku tso usir ita. 13Uwae usir ita, Ukwe u sa fu kafe ru ti unju wande-fu. Afu u ka kam ambyi anam na wu pangma ti afu ku nde kucang. 14Kiye ti iken a nyang pu yi afu, tangsom te m, ame ku jwam fu. Nde ya m, ti fu ri ira titinyang risu-m te Ukwe ti awu ā sa ruye m uwae pursuna ike, be ame u nde rimang. 15Ikyaen ti, kubenti, ame raen-m ira iki be. A ye ra m ti kpakang nwunn uten Mbaibrane. Ike cwucwo, ame raen-m ira iki ti a u ya m ba cwunn pursuna ike be.”
16Ti unde ti uwe itaen ti ku nde wuci fxen ti Yusufu ku tsag imbyi kurwa nyang timambe, awu ri baa, “Ame sunn kurwa. Uwae kurwa yi ame txir atyika buredi ita risu-m. 17Tyika ti txir ti ricwunnkyi apupwen munn ti wuci ti tsotso ikyaen Ukwe, amaa inung ba ku ci wuci yi ti ta uwae atyika yi risu-m.”
18Yusufu ri te wu baa, “Ayine ti si imbyi kurwa-fu. Atyika ita yi si usir ita. 19Uwae usir ita, Ukwe u pye ra risu-fu ru, u sa kupyirkum rimenn-fu kaa faesi ituku, ama inung u ba sag tag ibye rimenn-fu.”
20Uwae usir ti ita, ti si usir itimbae ukwe, awu nde ukwab na meme ande wande-wu. Awu sa ruye unde ti uwe itaen ti ku txi ambyi na wu, ti unde ti uwe itaen ti ku nde na wu wuci. 21Awu sa unde ti uwe itaen ti ku txi na wu ambyi kafe ru ti unju wande-wu. 22Amaa ana unde ti uwe itaen ti ku nde wuci, a ye wu tso iji pangma ti Yusufu ri. 23Amaa unde ti uwe itaen ti ku txi ambyi tangsom-wu te Yusufu cwucwo be.
वर्तमान में चयनित:
Kucangtsi 40: kubNT
हाइलाइट
शेयर
कॉपी
Want to have your highlights saved across all your devices? Sign up or sign in
© Wycliffe Bible Translators, Inc. and
© The Nigeria Bible Translation Trust 1995, 2017
