LUKE 9
9
Jesu Niu Khommai Kariu-je-niakiutu Langpadbo
(Mt 10.5-15; Mk 6.7-13)
1Jesu niu pakhommaidung kariu-je niakiutu kulujiu rasadungtu hathon padra khatdi thiuniu maidungtu wikhaira pumtan nai jengtan pikhaide. 2Sichiujiu Tingwang gu Chawangdih chamse dinron tadra khatdi mara-sathiu maitu wikhaira paliutu langkhaide, 3haichiujiu paliu khuga dinkhai-e, “Naliuniu tadrabo tabin donniu wakhatnadi phung tad mane: tathundi, takhaodi, katiu-kasakdi, rangkangdi, ntiang malindi phungtad mane. 4Naliutu lukhaibo bamgase, naliuniu sibo namditu phutmak thenna sibo kyga bamlo; 5#Tk 13.51. #Lk 10.4-11.naliutu maidungniu lukhai maksai, sibo namdise saodiakjiu naliu phiga tabui bambo sidi paliutu rukhaibo thiujiu kasam khai diak milo.”
6Sichiujiu pakhommaidung siniu nam namga Kawichamse dinron tadjiu khatdi pabam hinaga maidungtu wikhaijiu tadronde.
Herod Niu Simasan Makbo
(Mt 14.1-12; Mk 6.14-29)
7 #
Mt 16.14; Mk 8.28; Lk 9.19. Galilee ga mawangpao, Herod niu padbambo lam hina hai chiu luboga, pasuang hamide, palamra maidungniu John Baptist hai kashaibo gasu ringwang lanbo-e chiujiu din-e. 8Khangsianiu Elijah hai maduwang lanbo-e chiujiu din-e, khangsianiu nda phaimiukakung maidung rong gasu khang khat ringwang lanbo-e chiujiu din-e. 9Herod niu din-e, “Iniu John pee dangmibo-e; chiudi Iniu palamga chiubambo piu hai saolo?” Sichiujiu paniu Jesu tu phuira karamjiu bamme.
Jesu Niu Chamai Sang Mangiutu Kikhaibo
(Mt 14.13-21; Mk 6.30-44; Jn 6.1-14)
10Khommaidung siniu malan wangjiu, paliuniu kamkhai mibo hinase Jesu khuga dinkhaide. Paniu paliutu maluang lujiu, paliu ronna Bethsaida kubo namdi lam tadmide. 11Maidungniu sise chiuluboga, paliudi pasai sui tadsude. Paniu paliutu lukhaijiu Tingwang gu Chawangdih chamse paliu khuga dinkhaide, khatdi thiuniu maidung hinatu wikhaide.
12Naimik kiusubo tingga, khommai khang kariu-je-niakiu siniu pakhuga wanglujiu din-e, “Maidung haitu langkhai milo, sichiujiu paliuniu nam namlam tadjiu katiu phiutadjiu khatdi jikhaira langkhai milo, palamra haise maidi habo bamme.”
13Chiudi Jesu niu paliu khuga din-e, “Naliu niu paliutu pi tiukhai bilo.”
Paliu niu paokakge, “Aliu khuga bambo sira taruak khuang mangiu nai chakhapek nia ronna bamme. Haibo maidung leng aliuniu tadlujiu katiu liura nangniu machun jiuma?” 14(Siga maidungse sang mangiu kumbo bamme).
Jesu niu pakhommaidung khuga din-e, “Maidung haitu khang ringiu-ringiu bao thiujiu pi ntao khailo.”
15Khommaidung siniu sichiujiu taliu khaide. 16Siga Jesu niu taruak khuang mangiu nai chakhapek niase thinlujiu tinggen lam ngang phuijiu, paliu jengniu Tingwang tu thuonkiu khaide; khatdi thenpang lujiu sise pakhommaidung khuga pikhaijiu, paliuniu maidungleng njankhai bide. 17Paliu mathiuse tiu magiu lude, sichiujiu malipadbose, pakhommaidung siniu chabeng kariu-je-niakiu khoi madui lanlude.
Peter Niu Jesu Lamga Din Madupadbo
(Mt 16.13-19; Mk 8.27-29)
18Naikhat Jesu niu paronna kahumjiu bamga, pakhommaidung pakhuga wang-e. Siga paniu paliu khuga maniu-e, “Maidungniu I hai sao-e chiujiu dinlo?”
19 #
Mt 14.1,2; Mk 6.14,15; Lk 9.7,8. Paliu paokakge, “Khangsianiu nang hai John Baptist si-e chiujiu din-e, khangsianiu Elijah si-e chiujiu din-e, khatdi khangsianiu ndagu phaimiukakung maidung rong gasu khat ringwang lanbo-e chiujiu din-e.”
20 #
Jn 6.68,69. “Naliura dechiu maninglo?” chiujiu paniu paliu khuga maniu-e. “I hai sao-e chiujiu naliura lulo?”
Peter niu paokakge, “Nang hai Tingwang gu Messiah si-e.”
Jesu Niu Pah Chariu Khengrabo khatdi Shairabo Lamga Dinbo
(Mt 16.20-28; Mk 8.30—9.1)
21Sichiujiu Jesu niu haise mai khat khugadi din makra paliu khuga tanjiu chamtan pikhaide. 22Paniu paliu khuga din-e, “Chamai Nahpiuse chariu khengsiak rabo-e, sichiujiu apaimaidung, singku paodung khatdi Tacheng-tajaigu katipaodung siniu lukhai lakge. Patu kamshatmi rabo-e, chiudi pasumbo nai pah ringsulan rabo-e.”
23 #
Mt 10.38; Lk 14.27. Sichiujiu paniu paliu mathiu khuga din-e, “Mai khatniu asai suinisai, paniu patu paronna mangai lujiu, naimachang pagu singchai phunglujiu asai suilulo. 24#Mt 10.39; Lk 17.33; Jn 12.25.Palamra pagu ringting majamai hinase hami rabo-e, chiudi ajengniu pagu ringting hakhai mimai situ rankhaibi rabo-e. 25Mai khatniu kadihpiri pakhiangna daolujiu, pagu ringtingse hamisai, paleng degu kagengbo daoralo? Maksai mai khatniu pagu ringting situ deguniu nkhiaklu ralo? Wakhat niudi nkhiak silakge! 26Mai khatniu agu Kawibo Champao jengniu khatdi adonjengniu mangamsai, Chamai Nahpiu niudi paken diboga, khatdi Papiu kendiboga, khatdi masanbo mazadung masuangga wang dasai mangam rabo-e. 27Pachang palingjiu Iniu naliu khuga dinbo-e chiubora haiga bammaidung khangsiara Tingwang gu Chawangdihse paliuniu ngao makthen shailakge.”
Lunlibo
(Mt 17.1-8; Mk 9.2-8)
28Paniu haidungse dinlubo sai nidkak khat saiga, Jesu niu Peter, John khatdi Jacob tu maluang lujiu luongbut khatga kakheng thiura tadle. 29Sichiu paniu kahumjiu bamboga, pazuse tamsinjiu kali mide, khatdi pafai-panidi kapuangjiu bensat mide. 30Simak dakjiu mai khangnia wanglujiu patu npao sude. Panaise Mose nai Elijah si-e, 31panaise tinggen-gu maken dibo ganiu wanglujiu, Jesu niu dechiujiu Jerusalem ga shai khaijiu Tingwang chunningse pi tathui khai ralo chiubo lamga npaode. 32Siga Peter nai pakahmaidungse nguijingkiu mide, chiudi paliu raklop padboga Jesu gu kendibo gase mai khangniase patu maluanglu bamniubose ngaode. 33Khangnia siniu Jesu tu phutmiboga Peter niu pakhuga din-e, “Paohubo, aliuniu haiga bambo hai dejiukha wilo! Aliuniu naleng khat, Mose leng khat, khatdi Elijah leng khat chiujiu mathenky thiukhaine.” (Paniu degu dinbamlo chiubo paniu sisiaklu makge).
34Paniu haichiu dinbamga, kamuong khatniu wanglujiu paliutu majiu suboga khommaidungse ping mide. 35#Isa 42.1; Mt 3.17; 12.18; Mk 1.11; Lk 3.22. #2 Pe 1.17,18.Kamuongjiu gasu chakhuan khatniu din-e, “Haise Anahpiu si-e, Iniu patu kadalubo-e, paniu kadinbo majailo!”
36Chakhuanse hamiboga, Jesu ronna bamniude. Haichiujiu paliuniu ngaolubo lamgase sibo tingga mai khat khugadi dinmakjiu, wahina mahinjiu bamme.
Jesu Niu Rasa Phungbo Nah Khattu Wikhaibo
(Mt 17.14-18; Mk 9.14-27)
37Pasaibo nai Jesu nai pakhommaidung khangsumse luongbut gasu kiuboga maidung siniu Jesu tu adao-e. 38Maidung rong gasu mai khatniu senjiu din-e, “Paohubo yo, anah khat nakha bambo piu haitu phuikhaira Iniu nakhuga khengbo-e! 39Rasa khatniu patu thinman lujiu, patu kam mathadjiu, kam mariudi-di khai khaijiu bambo-e, sichiujiu pamun gasu patai ta-nphopjiu patu kam magenthiu sonna mibo-e. 40Iniu nakhommaidung khuga patu wikhaira khengbo-e, chiudi paliuniu kam mawi ngam makge.”
41Jesu niu paokakge, “Naliu hai dejiukha malum kamak mailo khatdi maji kamak mailo! Dethengkha Iniu naliutu maluang bam ralo? Sichiujiu paniu maipiu khugase din-e, “Ngena situ haiga puiwanglo.”
42Piumainahse wangboga, rasa siniu patu kadihga kam nkhuang khai lujiu khatdi kam mariudi-di khai lande. Jesu niu rasa situ chamtan pijiu, ngena situ wikhai lujiu, papiu khuga pikhai mide. 43Siga mai hinase Tingwang gu kangambo pumtan situ paliu suang hamide.
Jesu Niu Pah Shairabo Lamga Dinlanbo
(Mt 17.22-23; Mk 9.30-32)
Jesu niu kamkhai mibo hina lamga maidung siniu paliu suang hajiu bamboga, paniu pakhommaidung khuga din-e, 44“Iniu naliu khuga dinkhaibo haise mangai tulo! Chamai Nahpiu situ maidunggu pumtan-ga pikhaimi rabo-e.” 45Chiudi pakhommaidung siniu haibo rambase sitanglu makge. Haise paliuniu simakra paliu khugasu baikhai mibo-e, chiudi sibo lamga paliuniu pakhuga maniura nping-e.
Saoniu Dithuralo
(Mt 18.1-5; Mk 9.33-37)
46 #
Lk 22.24. Saoniu dithu ralo chiubo lamga pakhommaidung siniu ari sude. 47Paliuniu maning bambose Jesu niu silujiu paniu pamungga chap bambo nahmai khattu ponsu lujiu paliu khuga din-e, 48#Mt 10.40; Lk 10.16; Jn 13.20.“Mai khatniu chamtan gasu haikumbo ngena khattu lukhaisai, paniu atu lukhaibo-e; khatdi mai khatniu atu lukhaisai, atu langkhaibo patudi lukhaibo-e. Palamra naliu ruanggasu siamthubo pasiniu dithu rabo-e.”
Naliutu Atungmak Maise Naliu Gu-e
(Mk 9.38-40)
49John niu din-e, “Paohubo, mai khatniu nazan gasu rasadungtu hathonpad bamniubo aliuniu ngaolujiu, aliuniu patu kham mide, palamra pahai aliu ruangga jaomak mai-e.”
50“Patu khammi tulo”, chiujiu Jesu niu pakhuga khatdi pakhommaidung khuga din-e, “Palamra naliutu atungmak maise naliu gu-e.”
Samaria Mai Nam Khatniu Jesu Tu Lukhai Makbo
51Jesu tu tinggen lam lusu mira nawang suboga, paniu Jerusalem lam tadkhaira maning lujiu tadsude. 52Samaria mai nam khatga paniu paleng kaden khaira walang tadmaitu pamasuangga langkhaide. 53Chiudi maidung siniu patu lukhaini makge, palamra pase Jerusalem lam tadkinbo-e chiubo paliuniu si-e. 54#2 Chaw 1.9-16.Haise khommai Jacob nai John niu ngaoboga, panai niu din-e, “Rapiu yo, aliuniu Elijah niu kambo kumjiu, tinggen lamsu chami kukiujiu paliutu kam maha mira nang suima?”
55Jesu niu paliu khulam mariwang lujiu din-e, “Naliura wadi sitang makge, palamra Chamai Nahpiu siniu chamaitu kam mahara wangbo makge, chiudi paliutu rankhai raleng wangbo-e.” 56Sigasu Jesu nai pakhommaidungse kakibo namlam tadmide.
Jesu Sai Suira Maidung
(Mt 8.19-22)
57Sichiujiu paliuniu tadkinboga, mai khatniu Jesu khuga din-e, “Nangniu tadkhaibo bam hinaga Iniu nasai suitadne.”
58Jesu niu pakhuga din-e, “Asathidi paky bamme, khatdi thingnadi pasib bamme, chiudi Chamai Nahpiu sira jikhaijiu mathak khairabo bam ha-e.” 59Paniu katambo mai khat khuga din-e, “Asai suilulo.”
Chiudi sibo piuniu din-e, “Paohubo yo, raiboga Iniu wanglujiu apiutu baikhai lune.”
60Jesu niu paokakge, “Kashaimainiu kashaimaitu pijiu baimi sulo. Nangra tadlujiu Tingwang Kadih chamse paoron lulo.”
61 #
1 Chaw 19.20. Mai khatniu din-e, “Paohubo yo, Iniu nasai suitadne, chiudi raijiu akikhun maitu kanuicham dinkhai lura suikhailo.”
62Jesu niu pakhuga din-e, “Mai khatniu chalu phura kafiu thinsu lujiu, sailam mariphui lansai, pase Tingwang gu Chawangdih leng bui makge.”
वर्तमान में चयनित:
LUKE 9: LIANBSI
हाइलाइट
शेयर
कॉपी
Want to have your highlights saved across all your devices? Sign up or sign in
Liangmai Naga (Re-Edited) - Masanbo Bible
Copyright © 2014 by The Bible Society of India
Used by permission. All rights reserved worldwide.
