LUKE 10
10
Jesu Niu Khang Riak Chinnia-Je-Niakiutu Langkhaibo
1Haibo saiga Rapiu niu khang riakchinnia-je-niakiutu#10.1: riakchinnia-je-niakiutu; kasia gara riakchinnia ronna chiujiu raokhai-e. kada lujiu, paliu khangnia niatu, namdi hinaga langkhai-e. 2#Mt 9.37,38.Paniu paliu khuga din-e, “Atiatra leng kengjiu bamme, chiudi tenra maira tamme. Siniu atiatpao khuga atiatra maitu langkhaira khenglo. 3#Mt 10.16.Tadsulo, Iniu naliutu milypoi kumjiu tanijiuga langkhaibo-e. 4Rangkang khao maksai, chabeng maksai, chaphitop phungtulo; npuikiga maitu kahum khaira mathak tulo. 5Naliuniu maiky lungga ngutboga raijiu haichiu dinlo, ‘Haibo kyga agi-manaijiu bamlo.’ 6Siga agi-manaibotu lunibo mai bamsai naliugu agi-manaibo kahumse pariga pibam misulo; sichiu maksai naliugu agi-manaibo thoidamse lulan lulo. 7#1 Co 9.14; 1 Ti 5.18.Naliuniu riukhaibo kyga naliutu pikhaibo hinase tiu, sakjiu bamlo. Palamra tenbam maileng chaphijeng pirabo-e. Mai khat ky gasu mai khat kyga tad mariu tulo. 8Naliuniu tadkhaibo namdi gasu maidungniu naliutu lukhaisai naliuleng kaden khaibose tiujiu, 9sibo namdiga mara-sathiu maitu wikhailo. Khatdi siga bammai khuga haichiu dinlo, ‘Tingwang gu Chawangdihse naliu khuga nawang mide.’ 10#Tk 13.51.Chiudi naliuniu namdiga ngutboga naliutu lukhai maksai tadpad lujiu haichiu dinlo, 11#Mt 10.7-14; Mk 6.8-11; Lk 9.3-5.‘Naliu namdi gasu wangbo tabui sidi aliuniu naliu riga kasam khai diakbo-e. Chiudi Tingwang gu Chawangdihse naliuleng nawang mide chiubo maningtao lulo!’ 12#Chab 19.24-28; Mt 11.24;Mt 10.15.Iniu naliu khuga pachang paling dinbo-e, Ladjan thiubo Naise Tingwang niu sibo namditu suang, Sodom situ lungsa nkiu rabo-e!
Malum Makbo Namdidung
(Mt 11.20-24)
13 #
Isa 23.1-18; Ezk 26.1—28.26; Joel 3.4-8; Amo 1.9,10; Zec 9.2-4. “Chorazin yo! Dejiukha nasan hai salo! Bethsaida yo, dejiukha nasandi salo! Naliu khuga kamkhai mibo maisuang habodung haise Tyre nai Sidon ga kamkhai bamniu-e sai, maidungse maliufai benlujiu paliu nuan gasu lungli mibose nda lenmi bamta lakge! 14Ladjan thiubo Naise Tingwang niu naliutu suang Tyre nai Sidon tu lungsa nkiu rabo-e. 15#Isa 14.13-15.Capernaum yo! Naronna natu tinggen lam ponkhang lujiu bambo ma? Natura charuidih gase thon khaimi rabo-e!”
16 #
Mt 10.40; Mk 9.37; Lk 9.48; Jn 13.20. Sichiujiu Jesu niu pakhommaidung khuga din-e, “Naliu ladtu lukhai mai hinase alad lukhaibo-e; naliutu lukhai makbo maise atu lukhai makbo-e; khatdi atu lukhai makbo maise atu langkhaibo Apiutu lukhai makbo-e.”
Khang Riak Chinnia-je-niakiuse Malan Wangbo
17Khang riakchinnia-je-niakiuse paliu chun wichang wijiu malan wangde. Paliuniu din-e, “Rapiu yo, aliuniu nazan gasu chamtan pikhaiboga rasadung siniudi aliu kadin piu-e!”
18Jesu niu paliutu paokakge, “Satanse Tinggen lamsu hengri kalikbo kumjiu tiakkiu mibo Iniu ngao-e. 19#T.Lui 91.13.Kinglo! Iniu naliutu pumtan pikhaibo-e, sichiujiu naliuniu kaniu riga khatdi charuimaigapui riga taomaluijiu tadra khatdi Mikrepiu pumtan situ ngamlura pumtan pikhaibo-e, sichiujiu naliutu wakhatniudi kam masa ngam lakge. 20Rasadung siniu naliu kadin piubamme chiujiu naliu chun wimi tulo, chiudi Tinggen lam naliu zan raokhai mibo donniu naliu chun wilulo.”
Jesu Niu Chunwibo
(Mt 11.25-27; 13.16-17)
21Sibo wan gase Jesu niu Masanbo Hiupuina phuilujiu pachun wijiu, haichiu din-e, “Tinggen nai kadih Rapiu, Apiu yo! Iniu natu thuonkiu-e, palamra nangniu wasimaidung nai ningtingmai khugasu, baikhai mibose wasimak maidung khuga lenkhaibi-e. Yo, Apiu yo, haise nangniu machunbo si-e.
22 #
Jn 3.35;
Jn 10.15. “Apiuniu pakhiangna haise akhuga pikhai mibo-e. Nahpiu situ Papiu makbo mai khatniudi simakge, khatdi Papiu situ Nahpiu makbo mai khatniudi simakge khatdi Nahpiu siniu kadakhai mibo paliu khuga ronna lenkhaibo-e.”
23Sibosai Jesu niu pakhommaidung khulam mariwang lujiu paliu khuga mahin din-e, “Naliuniu ngaokhai mibo hina ngaolu maise dejiukha sanwilo! 24Iniu naliu khuga dinbo-e, chiubora nda phaimiukakung maidung khatdi chawangdung kakeng khaniu, thainai naliuniu ngaolubose ngaokhai nijiu tamibo-e, chiudi paliuniu ngaolu makjiu tamide, khatdi naliuniu chiukhai mibose chiukhai nijiu tamibo-e; chiudi chiukhai tangmakjiu tamide.”
Kawibo Samaria Maipiutu Din Champanbo
25 #
Mt 22.35-40; Mk 12.28-34. Tacheng-tajaigu katipao khatniu wanglujiu Jesu tu manlu raleng matan sude. Paniu maniu-e, “Katipao yo, tingtheng karingbo daolura Iniu dekam ralo?”
26Jesu niu patu paokakge, “Masanbo Ariakniu dechiu dinlo? Naliuniu dechiu dinpad chalilo?”
27 #
Taj 6.5;
Lev 19.18. Sinapiu siniu paokakge, “Naliu Rapiu Tingwang tu naliu lungchun pakhiangna, naliu pumtan pakhiangna, khatdi naliu maning pakhiangnaniu lungsalo,” khatdi “Napum naronna lungsabo kumjiu nakiningmaitu lungsalo.”
28 #
Lev 18.5. Jesu niu patu paokakge, “Nang maji-e, sise kumjiu kamlo, sichiusai nangniu tingtheng karingbose daolu rabo-e.”
29Chiudi Tacheng-tajaigu katipao siniu patu paronna kam maji lunijiu, paniu Jesu khuga maniu-e, “Saose akyning mailo?”
30Jesu niu paokakge, “Pawan khatga maipiu khat Jerusalem lamsu Jericho lam tadkiuboga, agatiu maidungniu patu chonlujiu pafai pani sutlude, khatdi dapkhaijiu kashai kumjiu thonkhai diakge. 31Siga singku khatniu sibo puidiga tadkiude, chiudi paniu sibo piutu ngaoluboga, npui katam lam maren tad mide. 32Sikumjiu Levi mai khatniudi tadwangjiu sibo piutu ngaolujiu, npui katamlam maren tadlan mide. 33#2 Char 28.15.Sichiudi Samaria maipiu khatniu sibo piu bambo bamga tadwangde, paniu patu ngaoluboga, patu lungsaboniu phuimide. 34Paniu pakhuga wanglujiu, wasa nai mumjawse pajamga nunkhai bide khatdi domkhai bide, sigasu paniu sibo piutu pagu chakhao poi riga khailujiu kiriuky khatga, puiwangjiu paniu patu akhi khaide. 35Pasaibo nai paniu rangkang nia khoipad lujiu, kiriupiu khuga pikhaide. Sichiujiu paniu kiriupiu khuga din-e, “Patu akhi mawi khailo. Iniu malan wangboga nangniu pakhuga thinkhai mibo hinase pikhailan bine.”
36Sichiujiu Jesu niu munkomjiu din-e, “Simai khangsum ruanggasu, saose agatiu maidungniu dapkhai bibo piu kiningmai kumjiu kamkhai bilo chiubo nang lukhailo?”
37Tacheng-tajaigu katipao siniu paokakge, “Patu lungsa khai bibo piu siniu-e.”
Jesu niu paokakge, “Sichiusai, nangdi tadsulo, khatdi sise kumjiu kamlo.”
Jesu niu Martha Nai Mary Khuga Wangbo
38 #
Jn 11.1. Sichiujiu Jesu nai pakhommaidung siniu paliu npui tadwangboga, paniu nam khatga ngut khaiboga, Martha kubo puiniu patu pakyga wangra lukhaide. 39Pasai kariupui Mary kubo khat bamme, paniu Rapiu phiga ntaolujiu paniu katikhaibose nkingjiu bamme. 40Changam hinase paronna kamrabotu maning khailujiu Martha niu wangjiu din-e, “Rapiu yo, asai kariupui hainiu wadi atu nkha khai makjiu changam hina aronna kamrabose nangniu wajeng chakkhai mak jiuma? Wangjiu atu nkha khaira patu dinkhailo!”
41Rapiu niu patu paokakge, “Martha, Martha yo! Nangra wa kakeng kambo donniu nalung manangjiu chariu bamme. Chiudi nakhuga wakhatra pageng bamkha-e. 42Mary niu majibose kada lude, sise pakhu gasu wadaodi khoipad silak mibo gu-e.”
वर्तमान में चयनित:
LUKE 10: LIANBSI
हाइलाइट
शेयर
कॉपी
Want to have your highlights saved across all your devices? Sign up or sign in
Liangmai Naga (Re-Edited) - Masanbo Bible
Copyright © 2014 by The Bible Society of India
Used by permission. All rights reserved worldwide.
