LUK 23
23
Jisu Pilat hato Apüi
(Mat 27.1-2,11-14; Mrk 15.1-5; Jhn 18.28-38)
1Khünaknu othom pangwüi ajong laxle Jisu Pilat hato pao. 2Ikha to hwome chix ma kaxfele akax: “‘Chongwang süi taxtha üntoxle Ku Messaiah, wanghom changpu’ le akaxle chix jaojaoe khünaknu chichangkya lom to jikle pao ngokya, ija mixsün kwome koppu.”
3Pilat-e chix ma atüi: “Nang Jehudi nok wanghom changchami?” Jisu-e lan: “Ija nange akaxdaoa.”
4Ifüima Pilat-e nguakhobu hia khünaknu ang thüi: “Kue ija mixsün ma kaxfe ang asule thaikya kha chemchu münatak.”
5Ikoxle hwome tamtaile atsang: “Chixe anwot-anokya makhange Jehudi chaxwan pangnu khato wüi tuwuk alai le. Chixe Galili makhange owang wanglaxle athax ikha alopüna.”
Jisu Herod hato Pao
6Ija atatlaxle Pilat-e atüi: “Ija mixsün Galili nok hia?” 7Otue chixe Jisu a Herod wangtinge o-kya kha tokya changa le awan ang kop, chixe chix Herod hato apao. Iponge Herod a Jerusalem ma tüikya. 8Jisu ngünkya zuma Herod mong huanuma müi, chemthüikoxle chixe chix mo wünkya atatle ngo laxle, amipong tokhange wüi ngünse le sung. Jisu-e ohünotün mwot mokkya ngün ang kopüi le chixe thüt. 9Ikhoma Herod-e Jisu ma kax huanuma atüi, ikoxle Jisu-e chix kax tuita to ngaxchu chilan. 10Nguakhobu hia Wanlom nwotmixbue thüntho chito hüilaxle Jisu ma kax huanuma fe. 11Herod hia chix süpahibue chix chichang-chizangkya mix changpule thütlaxle Jisu ajao ahai, üntoxle chix ang otha ngamkya nyilo awun le kox ilaxle chix Pilat hato wüi chatle achat. 12Üntoxle ija nyix makhange Herod hia Pilat nyi zuikhui ang achang, chemthüikoxle thoto hokhi a zan ang achangle ngokya.
Jisu Lang angkya Kaxfün Tsuak
(Mat 27.15-26; Mrk 15.6-15; Jhn 18.39—19.16)
13Pilat-e nguakhobu, mixpa tüichongbu hia khünaknu nyakle afox; 14üntoxle hwom ang thüi: “Hünzome ija khünak ku hato apüipu, üntoxle chixe khünaknu chichangkya lom to zun le pao ngole le thüipu; athax kue hünzom thüntho ma atwon le anodaoa, ikoxle hünzom kaxfyet bama chix thaikya kha kue münatak. 15Herod-echu chix ma thaikya kha chiatak, ikhoma chixe ija khünak kem hato wüi chatle achatpu. Ija mixsüne chix mik maxtang le thaidaokya kha müntüi. 16Idaile kue chix to zu füi fit laxle chix danle apaoüi.”#23.16: Züizüi laiza ma hokhi 17 a obo ang apütle (Mrk 15.6 to hulax). 17(Kaitox Pangpwon fo to hwom hanpakma Pilat-e kun ma hakle thomkya mix tupong danle apao angkya olom tüikya).
18Khünaknu pangnu wüi akhong: “Chix langdao, kwom ang Barabba danhüi!” 19(Barabba a tingnu ma tuwuk alaikya hia mix langkya khoma kun ma hakle thomkya mix changkya).
20Pilat-e Jisu wüi dansele tex laxle, khünaknu hama chatlechu zingmüi ma wünzex le ano. 21Ikoxle hwom chatle akhong: “Chix takle langdao! Chix takle langdao!”
22Othom azom lükya ma Pilat-e hwom ang thüi: “Ikoxle chixe chemzya amadaopu? Kue Jisu ma chix mik max tang thaikya tüta limachu münatak. Kue chix to zu füi fit üntoxle danle apaoüi.”
23Hwom ding-zak otukux kapuix itukux Jisu a lang angkya wüile akhongle ngo, üntoxle oshukma hwom akhongkyae wüi lütle shu. 24Ija khoma hwome jule ngokya ningle wüi mokle alyet angkya Pilat-e kaxkox. 25Tuwuk alaikya hia mix langkya khoma kun ma shole thomkya mixsün chixe dan, ilaxle hwom mongtsutsu ma mok angkya Jisu a owüiole hwom chak to kox.
Jisu Pünsak ma Takle Langkya
(Mat 27.32-44; Mrk 15.21-32; Jhn 19.17-27)
26Jisu a süpahibue zunle pao, üntoxle hwom paole ngoponge, tingkhua tokya nguiüi Simon le amünkya Sereni nok mixsün hwom füi apong. Hwome chix kop, chix ma pünsak dan, üntoxle Jisu füifüi ma chixe ija pai ang tom.
27Üntoxle khünaknu othom huanuma chix füifüi ma hüi; hwom khama chix hanpakma künmax-mongshanle sopngale azuikya shekobu tüikya; 28Ikoxlechu Jisu-e hwom chito hulaxle thüi: “Jerusalem angkya shekobu! Ku hanpakma taxsopngo, ikoxle ma hanpakma ilaxle masu masabu hanpakma soplax. 29Chemthüikoxle hulax: ‘Naosom chipux chipai le zomnu ang ngokyabu üntoxle otuechu tsom chiasipkyabu shomüi’, le khünaknue thüi angkya hanpak tunu hüile ngole. 30#Hos 10.8; Mik 6.16.Ipongma hwome haxnubu füi akax ang sütüi: ‘Kwom ding to düthüi!’ Üntoxle haxkho tsuakyabu ang thüiüi: ‘Kwom to akhup hüi!’ 31Chemthüikoxle hwome pün ohing ma tüitanto wüi ile jangmok thüikoxle athax pün ozik ang achang füima chemle changüi?”
32Üntoxle chichangchizang mwot moklaxle mütkop daokya mixsün anyichu wüi chix füi tomle lang ang pao. 33Üntoxle otue hwom “khangza hua”, le nyak kya haxhua to ngui, ikhama hwome chix pünsak ma tak ilaxle chichangchizang mixsün nyichu, tuita a chix tsaxchi kao ma üntoxle ata mix a nongchi kao male pünsak ma tak. 34#Mts 22.18.Üntoxle Jisu-e thüi: “Apa, hwom ang thailakkya tüikox; chemthüikoxle hwome chem moklaxpuix ija hwome münawan.”#23.34: Jisu-e thüi: “Apa, hwom ang thailakkya tüikox; chemthüikoxle hwome chem moklaxpuix ija hwome münawan.” Ija kax a züizüi laiza ma müntüi
Ijama hwome nantak ilaxle chix-nyi chix-za hwom bama ahanle lax. Üntoxle khünaknue hule ajong. 35#Mts 22.7.Ilaxle apün-adakyabue chuwüi chix ahai le thüi: “Chixe khünakbu a sünle; chix Zange kamle kopkya Messaiah jangchangba, makho alüile naxsünkox a!”
36 #
Mts 69.21. Üntoxle süpahibuechu chix hato hüilaxle poska le nyakkya jusi kox, üntoxle chix ajao ahaile thüi: 37“Nang Jehudi nok wanghom jangchangba nang lualua to sünlax.”
38Üntoxle IJA JEHUDI NOK WANGHOM le chix khangkho ma zale tox.
39Üntoxle chichang-chizangkya mixsün anyi pünsak ma takle thomkya tuitae Jisu ajao le thüi: “Nang Khrista münchang hia? Nang alüile sünkya boma kukhichu sün hüi!”
40Ikoxle ata mixsüne chix to sale thüi: “Chix füi tomwüi sikngün kop laxle ngaxchu nang Zang thua münza hia? 41Üntoxle künyie nang olom ma koplaxpu; chemthüikoxle künyie nang künyie mokdaokya tha thompu. Ikoxle ija mixsüne thaikya mwot chemchu chimok.” 42Ilaxle chixe thüi: “Jisu, nang wanghom ang achang laxle nguikya zuma ku taxalak.”
43Jisu-e chix ang thüi: “Otsingtsingma kue nang ang thüipu: Anyix wüi nang ku füi tomle zangkang to ngoüi.”
Jisu Zikya
(Mat 27.45-56; Mrk 15.33-41; Jhn 19.28-30)
44 #
Lai 26.31-33. Iponge tungto shen changkya, üntoxle tsomfüi kople chaxwannu pangnu khato zanghane nyankya chitüi le haxshix-zangnak. 45Üntoxle Zangshwom-Hom atsyen le thomkya nyi tanti makhange kyetle afi pao. 46#Mts 31.5.Ifüima Jisu-e azaxle thüi: “Apa, nang chak to kue ku chasa koxpu.” Ile akaxlaxle chix zi.
47Süpahi akhokyae, chempangle changpuix ibu ngünlaxle Zang mün achuakle thüi: “Otsingtsingma chix a sukya khünak wüi changdaoa.”
48Ikhama hu ang afoxle ngokyabu thome, bülepang changpuix ibu ngün ilaxle hwome ma khaxtok to chietle mongma ngale pao. 49#Luk 8.2,3.Chix füi huaksüi le süntsing münwan tüikyabu pangnu üntoxle Galili tokhange chix füito azui le hüikya shekobu thome tsai tokhange ibu to hule ajongle ngo.
Jisu Zukya
(Mat 27.57-61; Mrk 15.42-47; Jhn 10.38-42)
50Jehudi tinglong angkya Arimathia nok Jusep le amünkya mixsün tuita tüikya. Chix a khünak omüi, achuak achen koxle asule tüikya ilaxle Zang Wangting hüikya tanle ngokya mixsün tuita changkya. 51Chix tuita nguawang changkoxlechu hwom katzua hia süt-mwot bama hwom füi mongno chitomkya mixsün tuita changkya. 52Chix Pilat hato pao ilaxle Jisu mang jule lax. 53Ifüima chixe mang ajo laxle nyidax füi lop, ilaxle long thole zingkya, otuechu khünak mazukya zuk ma chix zu. 54Ija a hat aga lükya pangpwon asuikya nyix kha changkya, üntoxle nazak nyix hato nguile hüi.
55Galili tokya chix füito azui le hüikya shekobu Jusep füifüi ma azuile hüi, zukting awan ilaxle mang chemle toxpuix, ija ngün ang kop. 56#Lai 20.10; Tsk 5.14.Ilaxle hwom chat, üntoxle mang to paküli ongan müikya müngabu achwon.
Üntoxle nazak nyix Wanlom ma tüikya ningle hwomchu wüi nui.
वर्तमान में चयनित:
LUK 23: WANCBSI
हाइलाइट
शेयर
कॉपी
Want to have your highlights saved across all your devices? Sign up or sign in
Wancho Naga Bible - OTSAO BAIBEL
Copyright © 2012 by The Bible Society of India
Used by permission. All rights reserved worldwide.
