LUK 22
22
Jisu Kop angkya Katzua
(Mat 26.1-5; Mrk 14.1-2; Jhn 11.45-53)
1 #
Lai 12.1-27. Athax a Kaitox Pangpwonle nyak kya an thukya nyix hato nguile hüi. 2Ikoxle nguakhobu hia Wanlom tsingpabue huxsa ma Jisu büle langüihex le otua lom; chemthüikoxle hwomchu wüi khünaknu thua za.
Jisu Khohang ang Juda Mongtsu
(Mat 26.14-16; Mrk 14.10-11)
3Wangshem hwom bün anyi kha angkya tuita, Juda Iskariot le nyak kya mixsün ma bao wang. 4Chix paolaxle, nguakhobu hia Zangshwom-Hom nyetmix alixachongbu füi, chixe hwom ang Jisu khohang angkya bama azua. 5Hwom ang huanuma mongmüi, ilaxle chix ang ngun koxüile tsao. 6Üntoxle chixechu wüi ija to lua, ilaxle khünaknu chitüi ponge hwom chak to Jisu owüiole kox angkya oshua lom ang süt.
Jisu-e Kaitox-Pangpwon Fongsüt Achwon
(Mat 26.17-25; Mrk 14.12-21; Jhn 13.21-30)
7Kaitox Pangpwon hanpakma chun hosa lang angkya an thukya nyix nguile hüi. 8Jisu-e ija kax füi Pitar hia Juhan nyi achale tomle apao: “Keme sax angkya Kaitox Pangpwon fong achwon thün!”
9Okhie chix ma atüi: “Kukhie ija ojongkha ma achwon koxle müiüile texpu?”
10Chixe lan: “Hünkhi tingnu to lele ngoponge, ti tik-kux kop laxle mixsün tuita apongüi. Chix füifüile chix nopkya hom to nguikox, 11ilaxle hom hopunu ang thüikox, ‘Nwotmix-e nang füi akaxle, kue ku wangshembu füi Kaitox Pangpwon fong sax angkya nui ojong?’ 12Üntoxle chixe homdingkho angkya nui chongkya tuita, komle atha-anyem daokya kha ahoüi, ikhama achwonlax.”
13Okhi nguikya thoma hokhi füi Jisu-e akaxkya tangtang ningle bang, ilaxle hokhie Kaitox Pangpwon fongsüt achwon.
Jowanpa Fongsüt
(Mat 26.26-30; Mrk 14.22-26; 1 Ko 11.23-25)
14Hanpak nguile hüikya zuma wangshembu füi tomle chixe ma ngwotnui lax. 15Chixe hwom ang thüi: “Kue, ku sikngünüi thoma hünzom füi tomle ija fong saxsele texhukya; 16chemthüikoxle kue hünzom ang thüipu, Zang Wangting to ija angaile changle ma-aho tanto kue ija fong chatle tam münsaxüi.”
17Ifüima chixe wansa tuita lax üntoxle münchong koxlaxle thüi: “Ija koplax, ilaxle hünzom khama ahanlax; 18Chemthüikoxle kue hünzom ang thüipu, athax makhange Zang Wangting mahüi mahüile, kue grep-ju münlingüi!”
19Üntoxle chixe ankhao kop, Zang achuak laxle ija ashik, üntoxle hwom ang koxle thüi: “Ija a hünzom hanpakma fakya ku tsangtsa changle. Ku texle atak angkya hanpakma ile moklax.” 20#Jer 31.31-34.Üntoxle fongsax füima, ile wüi wansa kop laxle thüi: “Ija wansa a hünzom hanpakma ajenkya ku aji#22.20: Züizüi laiza ma ofüima akaxkya Jisu zangwün ibu müntüiIja a ku tsangtsa changpu okhix 19 ma, anaole okhix 20 ma. ma Zang Tsaotsüt hozün changpu.
21 #
Mts 41.9. “Ikoxle hulax, ku khohang angkya mix ija tsap ma ku füi tomle tüile! 22Khünak Hosa a Zange naxchango le thüikya ningle zilaxüi, ikoxle owa makhange chix khohang laxpuix, chix a maxsax!”
23Ikoxle ile mok angkya mix hwom khama owa changüi le hwome tata ma atüi ang süt.
Akhokya Mix ang Achang angkya bama Alakya
24 #
Mat 18.1; Mrk 9.34; Luk 9.46. Hwom khama akhokya ang opupu achangüile wangshembu atinle zangwün alai. 25Jisu-e hwom ang thüi: “Chaxwannu wanghombu ang wangpünnu thakma zong tüile, üntoxle apün adakyabu ang ‘khünaknu zuikhui’ le nyakle! 26#Mat 23.11; Mrk 9.35.#Mat 20.25-27; Mrk 10.42-44. Ikoxle hünzom khama ile chichangüi; ikoxle hünzom khama owa ma akhopuix, chix nok-naoli ningle, üntoxle owa lompa hex chix da tuita ningle changüi. 27#Jhn 13.12-15.Büle jangthüiba fongsüt ma hakle thung ngokya mix hia humele fakya mix nyi achongkya opupuhex? Fongsüt ma hakle thung ngokya mix wüi münchanghex nyi? Ikoxle ku hünzom khama tuita humele koxkya mix ningle changle.
28“Ikoxle ku sikngünba ku füi othuithuima ngokyabu a hünzom; 29Ilaxle Apae ku ang apün-awang angkya zong koxle thomkya ningle, kuechu ija zong hünzom ang koxpu. 30#Mat 19.28.Ku Wangting ma hünzome ku tsap ma sax-lingüi, ilaxle Israel homjen bün anyi thakma apün-awang ang hünzom chongwang ngwotnui ma thungüi.
Jisu-e Pitar Atse angkya Aje
(Mat 26.31-35; Mrk 14.27-31; Jhn 13.36-38)
31“Simon! Simon! Apalax! Manzai mixe tsaxtsa hia tsaxjun süikya ningle, oma khatokya müikya süi ang, hünzom thwontsing angkya baoe tsaiju kaxju daoa. 32Ikoxle Simon, nang mongong thaile chinui angkya hanpakma kue nang bama jopdaoa. Ilaxle otue nang ku hato chatüihex, hüntüi-hünnao hwom ang nange zong adün angkya changle.”
33Pitar-e lan: “Jowanpa, ku nang füi tomle kun to donglaxle nang füi tomle zi ang ngaxchu ku achwon ngopu!”
34Jisu-e thüi: “Kue thüipu, Pitar, Nange ku owahex münawan le othom azom ma mathüi tanto awün o münhaüi.”
Okhüt, Nyitsong üntoxle Changlo
35 #
Mat 10.9,10; Mrk 6.8,9; Luk 9.3; 10.4. Ifüima Jisu-e wangshembu ma atüi: “Kue hünzom okhüt, nyitsong, hia chisoxbu chikop homle apaokya tuke hünzom tütalimachu tuitai hexcha?” Hwome lan: “Litamachu kwom tuitaikya kha müntüi.”
36Jisu-e thüi: “Ikoxle izuma a, opang ma okhüt hia nyitsong tüipuix, chixe ibu kop angkya changle; üntoxle owa ma changlo chitüipuix, chixe ma nyipong hang laxle thüichu tuita shak angkya wüi changle. 37#Isa 53.12.Chemthüikoxle kue hünzom ang thüifang, ‘mütkopkyabu khama chixchu wüi e’, le ku bama zale thomkya Lai Kax ngai angkya changle.”
38Üntoxle wangshembue thüi: “Jowanpa, hulax! Ikhama changlo anyi tüile.”
Üntoxle chixe hwom ang thüi: “Ibibi wüi nguiüi.”#22.38: Ibibi wüi nguiüi; chichangba Ibibi wüi nguingoüna.
Jisu-e Olip Haxhua ma Zangjop
(Mat 26.36-46; Mrk 14.32-42)
39Wan angkya ningle chixe tingnu danle tox, üntoxle Olip haxhua to pao; üntoxle wangshembuchu chix füi tomle pao. 40Otue chix onui to nguipuix, chixe hwom ang thüi: “Hünzom thwontsing to chidüt angkya bama joplax.”
41Ifüima chix hwom ha angkya haxnox tuita atsaile pao üntoxle akhuxlaxle zangjop. 42Chixe thüi: “Apa, nang mong jangtsuba, ku angkya ija sikngün wansa paohüi. Bachutix ku mongtex münchang, ikoxle nang mongtex ma wüi naxchang.” 43Zangkangting tokya kaxtaimix lai laxle chix ang tsakzong kox. Üntoxle huanuma mong sikngün laxle chixe sisi zongdong le jop; 44üntoxle chix zangmuk ti aji ningle jenle hax to düt.#22.44: Züizüi laizabu ma okhix 43-44 a müntüi.
45Zangjop ngokya zolaxle, chix wangshembu hato chat üntoxle hwom küntsik mongmae jiple ngokya ngün. 46Chixe hwom ang thüi: “Hünzom büthüikoxle jipngopu? Zolax üntoxle hünzom thwontsing to chidüt angkya bama joplax.”
Jisu Kopkya
(Mat 26.47-56; Mrk 14.43-50; Jhn 18.3-11)
47Chixe ile akaxle ngopong khae, chix wangshem tuita Juda le amünkyae zunlaxle khünak othom tuita nguile hüi. Chix Jisu hato dong ilaxle tun apong. 48Ikoxle Jisu-e thüi: “Juda, nange tun apongkya füi Khünak Hosa khohang puixnyi?”
49Chix füi tomle ngokya wangshembue chempangle changüihex ibu ngünkya zuma, hwome atüi: “Jowanpa, kwome kwom changlobu twonüi hia?” 50Ilaxle hwom kha angkya tuitae nguapa akhokya da tuita to hütle chix tsaxchi na suakle adüt.
51Ikoxle Jisu-e thüi: “Iwüi nguidaoa!” Chixe ija mixsün na to twon üntoxle otyatyale amüile kox.
52Ifüima Jisu-e chix kop ang nguikya nguakhobu hia Zangshwom-Hom nyetmix akhokyabu üntoxle mixpa tüichongbu füi akax: “Ku zakhut mix tukux, ku hato hünzom changlobu hia pünthombu füi nguipuix nyi? 53#Luk 19.47; 21.37.Nyixfole ku Zangshwom-Hom ma hünzom füi tomle ngopu, ikoxle ijaponge hünzome ku chikop. Ikoxle zangnak tsakzonge apünle ngoponge, ija hünzom hanpak changkoxpu.”
Pitar Atsekya
(Mat 26.57-58,69-75; Mrk 14.53-54,66-72; Jhn 18.12-18,25-27)
54Hwome Jisu kop laxle Nguakho hom to pao; üntoxle Pitar tsai tokhange azuile hüi. 55Hwome homtho osung wama wün tak üntoxle tomle thung. Pitar chuwüi hwom khato thung. 56Danu ang ngokya naochasa tuitae chix wün hama thungle ngokya ngün, üntoxle chix to tangthole hulaxle thüi: “Ija mixsünchu Jisu füi tomle ngokya mix changpu.”
57Ikoxle Pitar-e atsele thüi: “Afex, kue chix owahex ngaxchu münawan!”
58Noxta ngo füima mixsün tuitae Pitar sün tsing laxle thüi: “Nangchu hwom füi tomkya mix tuita changpu.” Ijamachu Pitar-e thüi: “Mixsün, ku hwom füi tomkya mix münchang.”
59Chatlechu wüi khonta#22.59: khonta: Haxnua tuita ahamkya janba (hour). tuita tukux ngo füima mama mixsün tuitae kaxshing kople akax: “Ija mixsün Jisu füi tomle ngokya mix münchangle mongao angkya jao müntüi, chemthüikoxle chixchu Galili nok changle!”
60Imachu wüi Pitar-e lan: “Mixsün, nange chempang bama akaxpuix, kue münawan!” Ile chix akaxle ngopong khae O ha. 61Jowanpa-e aküile tangthole Pitar to hu, ilaxle Jowanpa-e chix füi: “Aja O haüi thoma nange ku owahex münawan le azom ma thüiüi hexo!”, le akaxkya kax texle atak. 62Pitar Laile Pao üntoxle Mongmaxle Sop.
Jisu Ajao Ahaile Fit
(Mat 26.67-68; Mrk 14.65)
63Jisu nyele ngokyabue chix ajao ahai ilaxle chix to huanuma fit. 64Hwome chix mikzim üntoxle atüi: “Nang to owae fitpuix, ija awandao.” 65Ile hwome chix zong to adix-adakya kax huanuma akax.
Jisu Nguawangbu hato Apüi
(Mat 26.59-66; Mrk 14.55-64; Jhn 18.19-24)
66Zangngai füima, mixpa tüichongbu, nguakhobu üntoxle Wanlom nwotmixbu tomle asox, ilaxle Jisu nguawangbu hato apüi, 67Hwome thüi: “Kwom hama apua hüi, Nang Messaiah changcha hex?”
Chixe lan: “Kue akaxkoxlechu hünzome ku to ongüi münchang; 68Üntoxle kue hünzom hama kax tuita atüikoxle hünzome münlanüi. 69Ikoxle athax makhange Khünak Hosa a Khüthak Zang tsaxchi ma thungüi.”
70Hwom pangnue thüi: “Ikoxle nang Zang Hosa hia?” Chixe lan: “Ku Zang Hosa changle le hünzome wüi thüingün laxle hi!”
71Üntoxle hwome thüi: “Keme chatle kaxkhi mama münlom ngoüi! Athax kem jaojaoe chix kax atatle laxdaoa!”
वर्तमान में चयनित:
LUK 22: WANCBSI
हाइलाइट
शेयर
कॉपी
Want to have your highlights saved across all your devices? Sign up or sign in
Wancho Naga Bible - OTSAO BAIBEL
Copyright © 2012 by The Bible Society of India
Used by permission. All rights reserved worldwide.
