NASEPTE 5
5
Ananias leh Sapphira
1Himahlele, mi khat amin Ananias kiti, a zi Saphiras tawh a um u a; Ananias chun a lo a zuok a.#Nas 4.34, 35 2A zi lemsakpih in, a man a bang a îm ta a, a dang cheng chuh chawi in sawlchakte keng bul achun a kawih ta a. 3Himahlele, Peter in, “Ananias. Thagau Thiengtho thêm ding leh, lei man abang îm dingin, bangati a Setan in na lunggil a sukdim a?#Luk 22.3 4Na zawk ma cheng khan nanga hi zing lo maw? Na khawt nung in le, aman chuh nang thu thu hilo ahim? Bang zieka zie tawbang thilhih ding hi ngaihtuoh na hi? Mihiem thêm na hi puoh a, Pathien thêm na hi zawi!” a ti a. 5Chun, Ananias chun zie thu haw chuh a zak phetin, a puk a, a thi ta a; a za taphawt chun a lau mah mah tau a.#Nas 5.10 6Tichun, tangval haw chuh a kipan u a, a tuom u a, a zawn dawk u a, a vui tau a.#Joh 19.40 7Chun, dâkkâl thum vel nung chun, a zi chuh, thil umdante chuh he lo in, a hung lut a. 8Peter in a kawmah, “Nei hilh ah, lo chuh zie zat mai hin maw na khawt uh?” a ti a. Amah chun, “Hi, zie zat mai hin a hii!” a ti a. 9Ziephet chun, Peter in a kawmah, “Bangati a Lalpa Thagau zedapna a kithuguol na hiu hi? Ngaitie! na pasal vuite kengpekhaw chuh kawtkhak bul ah a hung um tai, nang le hun zawn dawk un au!” a ti a. 10Ziephet chun, thakhat in a keng bul achun a puk zieng ta a, a thi ta a. Tichun, tangval haw chuh a hung lut u a, amah chuh a thisa’n a hung mu tau a, a zawn dawk u a, a pasal kieng achun a vui tau hi. 11Chun, sapchuom haw lawi chengcheng leh, zie thu za taphawt chun a lau mah mah tau hi.
Thilmak leh Melchikna haw
12Chun, Pathien in, mipite lak achun thilmak leh melchikna tamtak, sawlchakte khut in a hih sek a. Gingtute cheng chuh, Solomon bithaliep a chun a kikhawm sek u a. 13Mi dang vang chuh, kuomah a laku ah a va tel ngam puou hi, himahlele, mi’n amau haw chuh a pakcha sek ui.#Joh 12.42, 43 14Tichun, a lak uh achun Lalpa gingcha numei leh pasal, behlap in a um zel tau hi. 15Khutichun, sawlchakte thilhih ziek chun, damlote le khawlai dung poh ah a puodawk u a, zâlkhun leh puonphah chunghaw a chun a kuol sak u a, Peter chieh viel in a lim bêka a lieh theih na’n, a tiu a. 16Chun, Jerusalem kimvela khawpite apat in mipite chuh, damlote, thitha buok matte hun pui in a hung khawm u a. ziehaw chule a hung dam zel tau hi.#Mrk 16.17, 18
Sawlchakte Sukgimtheihna
17Chun, Thiempu Lienpen leh, a guolte, zie khuo sunga Sadukaite chengcheng chun, sawlchakte chuh a mitthîp mah mah tau a; 18Khutichun, sawlchakte chuh a man u a, vantâng suongkul a chun a khum tau a. 19Himahleh, zie zan chun, Lalpa vânsâwlchâk in suongkul kawtkhakhaw chuh a hun hawng a, sawlchakte chuh a puidawk a, a kawm u ah, 20“Chieh unla, Pathien Ho-In ah va ding unla; mite kawmah zie hinna thak thu chengcheng hi va gen un,” a ti a. 21Khutichun, sawlchakte chun zie thu chuh a zawp u a, tichun, khawvak ding kuon in Pathien Ho-In a chun a va lut u a, a sinsak tau a. Ziephet chun, Thiempu Liente leh a guolteu chun, Israel lawiupate cheng leh vaihawm pawl chengcheng chuh a sam khawm u a; sawlchakte chuh a masang u a hun pui dingin suongkul a chun mi a sawl tau a. 22Himahlele, mimante chuh suongkul a a va chieh phet un, suongkul achun sawlchakte chuh a mu ta puou a, tichun, a chieh kit u a, vaihawmte kawm achun a va gen tau a, 23“Suongkul ka va tun u chun, suongkul chuh bit taka kikhak in, a ngakte le kawtkhak bula dingin ka muu a; himahleh, a sung ka va lut phet un, a sunga chun kuomah ka mu ta puou hi!” a tiu a. 24Tichun, Thiempu Liente leh, Pathien Ho-In lawiupate chun zie thu haw chuh a zak un, sawlchakte chunga thil tung chuh mak a sa mah mah tau a. 25Zie lai chun mi khat a hung a, a kawm u ah, “Ngaitiem u, suongkul a mi na khumteu khan Pathien Ho-In ah mi a sinsak ui!” ti’n a hung hilh a. 26Tichun, lawiupa chuh mimante chu tawh a va chieh u a, sawlchakte chuh a hun puikit tau a. Mipite’n suong a a seh dinguh a lauh ziekun, a chungu ah khauh tak in bangmah a hih ngam puou hi.
27Sawlchakte chuh In sung ah a puilut u a, vaihawmte masang achun a din sak u a; tichun, Thiempu Lienpen chun a kawm u ah, 28“Zie min a hi sinsak talo dinga thu ka hun piek uh hilo maw? himahleh, na thilhih u hi en un! Na thu sinsak un, Jerusalem na sudim vek tau a, zie pa thisan mawh hi ka chung u a na but guot uh ahi?” ti’n a suohsalh ta a.
29Himahlele, Peter leh sawlchak dangte chun, “Mihiem thu sangin Pathien thu ka zawp zawk dinguh ahi. 30Nang un Isu kross a khên den a, na thahpau khah, ei suonteu Pathien in a kaihthawh kit ahi tai.#Gal 3.18 31Amah mawng khah, Pathien in Lal leh Hukdampa hi dingin a changlam ah a limbawl ta a; Israel te gitloh lunghei sak ding leh ngaidam dingin,#Php 2.9 32Zie thu haw hetpihte chuh ka hiu a keihaw leh Thagau Thiengtho, Pathien in a thu zawp ta chengte kawma a piek ngêi chu tawh,” a tiu a. 33Chun, vaihawmte chun zie thu haw chuh a zak phet un, a lung uh a khei mah mah a, thah mai a ut tau hi. 34Himahlele, vaihawmte lak achun, a min Gamaliel, Pharisai Dan sinsakpa, mi cheng chengin a zah mah mah uh khat chuh a ding a, sawlchakte chuh pawtdawk sak phawt dingin thu a pie a; 35Chun, vaihawmte kawm achun, “Nanguh Israel mite haw, ziete chunga na thilhih guot u hi chingthei un. 36Tuma khan le, Theodas chuh, ‘Milien ka hi’ ti’n a hung um a, zie pa chuh mi zali velin a hun kithuohpih u a. Himahlele, amah chuh thah in a um a, a nungzuite chuh a bawn un a kithehdalh vek tau a, a thilhih hawu chuh bangmah a hi ta puoi. 37Chun, amah nung chun, min zik lai khan, Galili gama mi Juda khah a hung um kit a; mipi huntieng a nei kit a, himahleh, amah chule thah in a um a, a nungzuite cheng chule a kithehdalh vek tau hi.#Luk 13.1 38Zieziekchun, tuhin le na kawm u a ka gen ahi, ziete hi bangmah lawh kiu inla, hiti hin umsak hiet hiet un. A thil guonggalh hawu leh a thilhih teu hi, mihiem hih dawk mai a hih chun, mangthai kit pai un au, 39Amahvang chuh, Pathien apat a hih a hih chun, amau haw sumangthai thei puo’n lau. Pathien do a na hi zaw kha’n lau!” a ti a. Vaihawm pawl chun Gamaliel thuhilhna chuh a zawp tau a.#Tch 21.30 40Tichun, sawlchakte chuh a sam lut u a, a zêp u a, tichun, Isu min a thu gen kit lo hiel dingin thu a pieu a, a thahdawk tau a. 41Sawlchakte chuh, vaihawmte kawm apat a a pawtdawk phet u chun, Isu min zieka zahchâkna thuok taka guota a um ziek u chun a kipâk mah mah u a.#Mat 5.12 42Chun, ni chengin, Pathien Ho-In leh, mipite Inhaw achun, Isu chuh Krista ahi, tih sinsak leh hilh a hai diek puou hi.
वर्तमान में चयनित:
NASEPTE 5: GANGBSI
हाइलाइट
शेयर
कॉपी
Want to have your highlights saved across all your devices? Sign up or sign in
Gangte Holy Bible - PATHIEN LEKHABU THIENGTHO
Copyright © Bible Society of India, 2010.
Used by permission. All rights reserved worldwide.
