NASEPTE 4
4
Peter leh Johan Vaihawmte Ma ah
1Chun, Peter leh Johan in mipite kawma thu a gen lai u chun, thiempute haw, Ho-In veng lawiupate, leh Sadukaite haw chuh a kawm u ah a hung tung phut u a. 2Sawlchakte nih chun, Isu mithi lak apat a thawhkit ziekin, mithite le thokit ding ahiu ui, tih thu a gen ziek u chun, a lungkim puoh mah mah tau a. 3Khutichun, a man u a, nitâk lam a hih ziekin, a zing gei in suongkul ah a khum tau a. 4Himahlele, a thugen uh ngaithate laka mi tamtakin a gingchau a; a tam lam u chuh pating chiet le sangnga vel ahiu hi. 5A zing chun, Juda lawiupate, upate, leh Dan thuzikte chuh Jerusalem ah a kikhawm u a. 6Thiempu Lienpen Anna te, Kaiapha te tawh, Johan te, Aleksandar te leh, mi dang, thiempu lienpen inkuonpihte chuh a kimuhpih u a. 7Tichun. Peter leh Johan chuh a masang u chun a din sak u a, a kawm u ah, “Bang thilhih-theihna’n em, kuo min in a ziehaw hi na hih uh?” ti’n a dawng u a.
8Tichun, Peter chuh Thagau Thiengtho in a dim a, a kawm u ah, “Mipi chengcheng lawiupate leh upate haw; 9Kengbaipa chunga thilpha hihna thu leh, sukdam a hihna thu a tunia hi nei suohsalh u chun, 10nanghaw leh, Israel mite cheng chengin zau un, Nazareth Isu, kross a na khetdên uh, Pathien in mithi lak apat a a kaihthawh kit khah, amah min mawng chun, zie pa hi, tak ahin na masang u ah dam in a ding a hi tai. 11Isu ngêi chun, Pathien Lehkha thu’n:
‘Nanguh insate haw, na suong deih loh uh,
Na paih dawk u kha, a ning a suong pawimawh pên ahi,’
ti a a gen kha ahi.#Sam 118.22
12Mi dang kuomah kawmah hukdamna a um puoi; van khupsin nuoi ah, mihiem sak lak ah, ei hukdam ding min dang himhim a um puoi,” a ti a.
13Chun, Peter leh Johan hansan zie chuh a muh un, lehkha thiemlo leh, mi mawl mai ahiu hi tih a heu a, mak a sa mah mah tau a. Ziephet chun, Isu kawmah a um kha tau hi tih a he tau a. 14Mi a sukdampau chuh Peter leh Johan kawma ding a muu a, bangmah la a gen thei diek puou hi. 15Khutichun, a vaihawmnau In chuh nusieh dingin a hilh u a, ziephetchun, amau haw chuh a kiho u a, 16“Zie mite hi bang I lawh ta ding u? Thilmak kithang taktak a hih ui tih Jerusalem a mite chengin le a he ta ngâl u a, eihawn la I niel thei diek puoh ngâl u a. 17Zie thu hi mipite laka a kithan zak beh lohna dingin leh, Isu min a thu gen talo hiel dingin vau hitiu,” a kitiu a.
18Tichun, amau chuh a sam u a, Isu min a thugen lo hiel ding leh sinsak lo hiel dingin a hilh tau a. 19Himahlele, Peter leh Johan chun a kawm u ah, “Pathien mitmuh in, Pathien thu zawp sangin nang haw thu zawp dik zaw ding ahi? ngaihtuoh un, a tiu a. 20Kei un vang, thil ka muh u leh ka zak teu chuh gen lo in ka um thei puou hi,” a tiu a. 21Ziephet chun, amau haw chun, a hah vau zaw deuh u a, a thadawk tau a. Mipi ziekin gawtna lemchâng a mu puou a; a thilhih ziek u khan mi cheng cheng in Pathien a pakcha ngâl u a. 22Thilmak a sukdam pau chuh kum sawmli sanga tamzaw a hi ngâl a.
23Tichun, Peter leh Johan a thahdawk nung u chun, a lawiteu kawmah a va chieh u a, Thiempu Liente leh upate’n a kawm u a a genteu chuh a hilh vek tau a. 24Gingtute cheng chun zie a thugen u chuh a het phet un, a guolin ngeih tak in Pathien kawmah, “Lalpa, nang van te, leisiet te, tuisuohgiet leh a sunga umte chengcheng Siempa na hii!#Pdn 20.11; Neh 9.6; Sam 146.6 25Nangin Thagau Thiengtho in, ei suonpau na suok, David kam ah zie thu haw hi na na gen ta a:
‘Jentel te bangati a lungna a?
Namtin in bang zieka thil manloh ngaihtuoh ahiu hi?#Sam 2.1-2
26Khawvel lengte a kiguo sausau u a,
Lawiupate le a kikhawm khawm u a,
Lalpa leh Krista do ding chun,’ ti’n.
27Zie khawpi a hin, na Suok Thiengtho, na thau nuh Isu do ding chun, Herod leh Pontia Pilate tawh, Jentel te leh Israel mipite chuh, a kigawm khawm tak zet uh ahi. 28Amau haw chuh, na thilhih-theihna leh, nangmah deihdan a thil um dinga na guotlawksa cheng hih dinga kigawm khawm ahiu hi. 29Khutichun, Lalpa, ngaitie! tu a ei hun vau zieu haw hi; na suokte hi hangsan takin na thu gensak in la. 30Mite hih dam dingin na khut zakkhum ah, na suok Thiengtho, Isu min a thilmakte leh melchiknate hih chule phalsak in,” a tiu a.
31Chun, a paucham zawh phet u chun, a kikhawpkhawmnau In chuh a hung lîng a, a bawn un Thagau Thiengtho in a hung dim tau a; tichun, hangsan takin Pathien thu a gen tau hi.
Gingtu Hinkhuo Diktak
32Khutichun, gingcha mipite chuh lungthim munkhat leh, ngaihtuohna mun khatin a um u a. A lak u a khat chan le, a thil neih teu chuh keia chuom ahi a ti puou a; a thil neih taphawt u chuh a kihawm zaw sek ui. 33Tichun, sawlchakte chun, thilhih-theihna nasatak tawh, Lalpa Isu thawhkitna thu a hetsak sek u a, tichun, Pathien in a bawn u a chung achun vangsakna nasatak a sunkhum ta a. 34Tichun, a laku ah khatchale, tasam a um puou hi. Gam hileh, In hileh, a neita’n a khawng u a; a thil zuok man hawu chuh a hun chawi u a, 35sawlchakte kawmah a pieu a; tichun dangka haw chuh a sinmawh uh kiting kham chietin a hawm sek ui.
36Chun, Kupra tuikuol a pieng, Levi chi, Joseph kiti, sawlchak te’n Barnabas a tihpau (a min umzie chuh “Lungmuonna Cha,” tihna ahi), 37A lo neih chuh khawng in, a man a hun chawi a. sawlchakte keng bul ah a kawih ta a.
वर्तमान में चयनित:
NASEPTE 4: GANGBSI
हाइलाइट
शेयर
कॉपी
Want to have your highlights saved across all your devices? Sign up or sign in
Gangte Holy Bible - PATHIEN LEKHABU THIENGTHO
Copyright © Bible Society of India, 2010.
Used by permission. All rights reserved worldwide.
