NASEPTE 3
3
Kengbai Sukdamna
1Chun, Peter leh Johan chuh, vaimim huon phat vela, paucham hun lai chun, Pathien Ho-In a lut ding chun a va chieh u a. 2Chun, upa kuo ahim a pientûng apat kêngbâi ahun zawn u a, zie pa chuh Ho-In a lutte kawma khutdawh dingin Ho-In kawtkhak hawih a tihnau achun, nichenga a kuol sak sek uh ahi. 3Zie pa chun, Peter leh Johan Pathien Ho-In a lut ding chuh a mu a, khut a na dawh a. 4Chun, Peter leh Johan in amah chuh a en u a, Peter chun a kawmah, “Kei uh ei hun entie!” a ti a. 5Amah chun, a kawm u apat banga him muh kinem in a vak en a. 6Himahleh, Peter chun, “Dangka leh sana bangmah ka nei puoi, himahlele, ka neih sun hun pie’ng ka: Nazareth Isu Krista min in keng in chieh ta’n,” a ti a. 7Tichun, a khut changlam a tu a, a kaitho ta a. Khutichun, thakhat in, a kênghaw leh a siekmit guh haw chuh a hung hât ta a; 8Chun, amah chuh a tho dawka, a ding a, keng in a chieh pan ngâl ta a. Khutichun, kenga chieh leh chawm chawm in, Pathien pakcha kawm zelin Pathien Ho-In achun a lutkhawm tau hi. 9Chun, kenga chieh leh, Pathien a pahchak chuh mi cheng chengin a muu a; 10Kawtkhak Hawih bula khutdawh a chu sek kha ahi tih a het phet un, a chunga thiltung chuh mak a sa mah mah u a, a buoi ten tau a. 11Chun, zie pa chun, Solomon bithaliep, a tihnau muna Peter leh Johan a tuk zing lai chun, mipite chun mak a sa mah mah tau a, a kawm lam u ah a hung tai khawm tau a.
Ho-In a Peter Thugenna
12Chun, Peter in mipite chuh a muh phetin, a kawm u ah, “Nang haw Israel mite haw, ziehaw hi bangati a mak sa? Keimauhaw thilhih theihna leh, Pathien ka ngaihsak ziek u a, zie pa hi ka chieh sak uh hi’n na ngai u ahim? 13Abraham te, Isak te, Jakob te Pathien, ei suonteu Pathien chun, a suok Isu hi a limbawl ahi ta hi. Amah chuh na matsak u a, Pilate in thahdawk a guot nasan inle, a masang ngêi ah na deih loh uh ahi kha.#Pdn 3.15 14Mi thiengtho leh Diktat kha na deih puou a, himahleh, tuolthatpa khah na kawm u a a hun piek dawk na ngên zawu ahi kha. 15Hinna Siempa chuh na that u a; himahlele, Pathien in amah chuh mithi lak apat a kaitho kit a, zie chuh a hetpihte ka hiu hi. 16Chun, amah min thilhih-theihna chun, zie kengbaipa hi hatna a pie ahi. Na muh u leh, na hetteu hi, amah min ginna ziekin hih ahi tai; Isu ginchakna ziekin, na bawnchau a mitmuh ah hihdam kei a hi tai.
17“Himahlele, suohpihte haw, nang haw leh na lawiupateu in Isu chunga na thilhih teu kha, na hetloh ziek u a na hih uh ahi tih ka hêi. 18Malai pek a kipatin, Pathien in a thiemgaute mang in, Krista’n dahum a thuok ding thu a na genlawk ta a, zie guol hin a hun tun sak ahi tai. 19Khutichun, na gitloh hawu ngaihdam a hih theihna dingin, lunghei unla, hung kihei kit un, khutichun, Lalpa kawm apat halh phat hungtung thei ina. 20Krista Isu, nang u dinga a guotsa khale hun sawl ina. 21Amahvang chuh, bangakai siemthak hun a tun masang sieh, amah chuh van a um tadih ding a hii, zie siemthak hun ding chuh Pathien in, malai pek a a thiemgau thiengthote manga a gen sa ahi tai. 22Mosi ngêi in, ‘Lalpa na Pathien un, kei ei sawl guol hin, nang haw lak ngeia mi, thiemgau khat hun sawl sak ina. Amah chun, na kawm u a a thugen cheng chuh ngaihthak sak unlau.#Dann 18.15, 18 23Mi kuole, zie thiemgau thu ngailo chuh, Pathien mipite laka pat khenchuom in um intin, sukmangthai in um ina!’ a tih khah.#Dann 18.19 24Ahi, Samuel um apat thiemgau chengcheng leh a nunga mite tawh, thugen chengcheng khan tulai chanchin hi a na genlawk sek uh ahi. 25Nanguh hi thiemgaute leh thugawlh chate na hiu a puo. Pathien in Abraham kawmah, ‘Na suonte ziekin khawvel a namtin vangsak ing ka,’ ti a a suonteu kawma a tiem khah.#Tsb 22.18 26Khutichun, Pathien in a suok chuh a tel a, na lak u a mi tin, a gitlohnau lampi apat a kinunghei sak chieta, vangsak dingin, na kawm u ah a hun sawl masa ahi,” a ti a.
वर्तमान में चयनित:
NASEPTE 3: GANGBSI
हाइलाइट
शेयर
कॉपी
Want to have your highlights saved across all your devices? Sign up or sign in
Gangte Holy Bible - PATHIEN LEKHABU THIENGTHO
Copyright © Bible Society of India, 2010.
Used by permission. All rights reserved worldwide.
