San Mateo 20
20
Nanó Jesús cuentó cheꞌé da̱j na̱ruꞌvee Yaꞌanj rihaan nij síí ꞌyaj se‑su̱u̱n soꞌ a
1’Ase vaa quiꞌyaj ꞌo̱ síí toꞌo̱j rej ma̱n ndoꞌo coj chruj uvá roꞌ, da̱nj vaa uun chij Yaꞌanj ado̱nj. Dan me se síí toꞌo̱j yoꞌ roꞌ, rej taxre̱j curiha̱nj soꞌ nano̱ꞌ soꞌ síí quiꞌya̱j suun rihaan toꞌóó soꞌ rej ma̱n coj chruj uvá yoꞌ a. 2Ga̱a ne̱ ꞌo̱ caꞌmii soꞌ ga̱ nij síí quiꞌya̱j suun rihaan toꞌóó soꞌ, se vaa ꞌo̱ saꞌanj denario go̱ꞌ soꞌ cheꞌé suun quiꞌya̱j suun ꞌo̱ ꞌo̱ nij soꞌ ꞌo̱ güii, ne̱ caꞌnéé soꞌ man nij soꞌ, quiꞌya̱j suun nij soꞌ rihaan toꞌóó soꞌ a.
3’Ga̱a ne̱ agaꞌ u̱u̱n curiha̱nj uún síí toꞌo̱j yoꞌ, caꞌanj soꞌ rihaan yuꞌvee, ga̱a ne̱ queneꞌen soꞌ doj snóꞌo nicu̱nꞌ maꞌa̱n u̱u̱n rihaan yuꞌvee, ne̱ taj va̱j suun rihaan nij soꞌ a. 4Ga̱a ne̱ cataj soꞌ rihaan nij soꞌ a: “Caꞌa̱nj soj quiꞌya̱j suun soj rihaan toꞌój, ne̱ na̱ruꞌvee ꞌu̱nj rihaan soj cheꞌé nu̱ꞌ suun quiꞌya̱j suun soj ado̱nj”, taj soꞌ rihaan nij mozó a. Dan me se caꞌanj nij snóꞌo yoꞌ quiꞌyaj suun nij soꞌ uún toꞌóó síí toꞌo̱j yoꞌ a.
5’Ga̱a ne̱ caxu̱j do̱ꞌ, agaꞌ vaꞌnu̱j do̱ꞌ, curiha̱nj uún síí toꞌo̱j yoꞌ, ne̱ nariꞌ soꞌ doj síí quiꞌya̱j suun rihaan toꞌóó soꞌ, ne̱ caꞌnéé soꞌ man nij soꞌ quiꞌya̱j suun nij soꞌ rihaan toꞌóó soꞌ uún a.
6’Ga̱a ne̱ agaꞌ ꞌu̱nꞌ curiha̱nj uún síí toꞌo̱j yoꞌ, ne̱ nariꞌ soꞌ doj síí nicu̱nꞌ maꞌa̱n rihaan yuꞌvee, ne̱ cataj soꞌ a: “Me cheꞌé nicunꞌ maꞌa̱n soj nu̱ꞌ güii nihánj ga̱. Taj va̱j suun quiꞌyaj suun soj naꞌ”, taj soꞌ, xnáꞌanj soꞌ man nij soꞌ a. 7Ga̱a ne̱ cataj nij soꞌ a: “Ma̱an se taj síí rqué suun man núj quiꞌya̱j suun núj maꞌ”, taj nij soꞌ a. Ga̱a ne̱ cataj síí toꞌo̱j yoꞌ a: “Caꞌa̱nj soj quiꞌya̱j suun soj rihaan toꞌój á”, taj soꞌ rihaan nij soꞌ a.
8’Veé dan, ga̱a ne̱ nichrunꞌ cata̱ꞌ güii tuꞌva quij, ga̱a ne̱ caꞌneꞌ síí toꞌo̱j yoꞌ suun rihaan se‑mo̱zó soꞌ síí tumé saꞌanj se vaa na̱ruꞌvee soꞌ saꞌanj rihaan nij síí quiꞌyaj suun rihaan toꞌóó soꞌ yoꞌ a: “Canacu̱nj so̱ꞌ caꞌna̱ꞌ nij síí quiꞌyaj suun yoꞌ, ne̱ na̱ruꞌvee so̱ꞌ rihaan nij soꞌ á. Asino ya̱a̱n na̱ruꞌvee so̱ꞌ rihaan nij síí catúj suun agaꞌ ꞌu̱nꞌ, ga̱a ne̱ na̱ruꞌvee so̱ꞌ rihaan nij síí catúj suun rej naꞌya̱a̱n á”, taj soꞌ rihaan síí tumé saꞌanj yoꞌ a.
9’Dan me se asino ya̱a̱n caꞌnaꞌ nij síí catúj agaꞌ ꞌu̱nꞌ rihaan síí tumé saꞌanj, ne̱ ꞌo̱ saꞌanj denario quiriꞌ ꞌo̱ ꞌo̱ nij soꞌ a. 10Ga̱a ne̱ caꞌnaꞌ nij síí catúj rej naꞌya̱a̱n rihaan síí tumé saꞌanj yoꞌ a. Noco̱o doj saꞌanj quiri̱ꞌ nij soꞌ, rá nij soꞌ, tza̱j ne̱ veé da̱nj ꞌo̱ saꞌanj denario quiriꞌ ꞌo̱ ꞌo̱ nij soꞌ uún a. 11Nacaj nij soꞌ saꞌanj, ga̱a ne̱ guun cheꞌe̱ nij soꞌ caꞌmii nij nij soꞌ niꞌya̱j nij soꞌ síí toꞌo̱j yoꞌ, 12ga̱a ne̱ cataj nij soꞌ a: “Síí nihánj me se o̱rúnꞌ orá gue̱e̱ quiꞌyaj suun nij soꞌ, tza̱j ne̱ ꞌo̱ cuya̱a̱n naruꞌvee so̱ꞌ rihaan nij soꞌ ga̱ núj, ne̱ quiꞌyaj suun núj nu̱ꞌ güii, ne̱ goꞌ uxrá naán xráá núj ado̱nj”, taj nij soꞌ rihaan síí toꞌo̱j yoꞌ a. 13Ga̱a ne̱ síí toꞌo̱j yoꞌ cataj rihaan ꞌo̱ nij mozó a: “Ne ta̱ꞌyunj mán so̱ꞌ, maan tinu̱j. Ma̱an se a̱j caꞌmii níꞌ cheꞌé se vaa quiꞌya̱j suun so̱ꞌ cheꞌé ꞌo̱ saꞌanj denario cheꞌé ꞌo̱ güii a. 14Naca̱j so̱ꞌ saꞌanj quiꞌyaj canaán so̱ꞌ, caꞌa̱nj so̱ꞌ á. Ma̱an se ina̱nj me raj cuya̱a̱n na̱ruꞌvej rihaan síí nihánj na̱nj ado̱nj. 15Ne nó xcúnj qui̱ꞌyáj se vaa rii nimanj, rá so̱ꞌ naꞌ. Xco̱j ruva̱a̱ rá so̱ꞌ, cheꞌé se quiꞌyáj se lu̱j rihaan tuvíꞌ so̱ꞌ naꞌ”, taj síí toꞌo̱j yoꞌ rihaan síí quiꞌyaj suun rihaan toꞌóó soꞌ a.
16’Veé da̱nj gu̱un rej rihaan níꞌ a. Nij síí noco̱ꞌ ndoꞌo cuano̱ roꞌ, gu̱un nij soꞌ síí gu̱un chij, ne̱ nij síí uun chij cuano̱ roꞌ, gu̱un nij soꞌ síí noco̱ꞌ, quiꞌya̱j Yaꞌanj vaa güii na̱nj ado̱nj ―taj Jesús a.
Síj vaꞌnu̱j cataj xnaꞌanj Jesús se vaa cavi̱ꞌ soꞌ ne̱ cunu̱u iꞌna̱ꞌ uún soꞌ a
17Ga̱a ne̱ cavii Jesús caꞌanj soꞌ chumanꞌ Jerusalén, ne̱ caꞌanj chuvi̱j nij síí tucuꞌyón snana̱ soꞌ ga̱ soꞌ, quiꞌyaj soꞌ a. Veé asi̱j va̱j o̱rúnꞌ chaꞌnu̱j nij soꞌ chrej, ne̱ caꞌmii Jesús rihaan nij soꞌ, cataj soꞌ a:
18―Ni̱ꞌyaj soj á. Va̱j níꞌ chumanꞌ Jerusalén, ne̱ ta̱ꞌaa nii manj Si̱j Caꞌnéé Yaꞌanj Ni̱caj Yuꞌunj man Yuvii̱, ne̱ nago̱ꞌ nii manj rihaan nij xrej ata̱ suun noco̱o do̱ꞌ, rihaan nij síí naquiꞌyaj cu̱u stucua̱nj Moisés do̱ꞌ a. Ne̱ caꞌne̱ꞌ nij soꞌ cacunꞌ cheꞌej, ne̱ cata̱j nij soꞌ se vaa cavi̱ꞌ ꞌu̱nj a. 19Ga̱a ne̱ nago̱ꞌ nij soꞌ manj rihaan nij síí yaníj, ne̱ caꞌnga̱ꞌ naco̱o̱ nij síí yaníj queneꞌe̱n nij soꞌ manj, ne̱ go̱ꞌ nij soꞌ cuartá xráj, ne̱ cachro̱n nij soꞌ manj rihaan rcutze̱ a. Tza̱j ne̱ cache̱n vaꞌnu̱j güii, ga̱a ne̱ cunu̱u iꞌna̱ꞌ uún ꞌu̱nj, quiꞌya̱j Yaꞌanj ado̱nj ―taj Jesús a.
Cachíín niꞌya̱j nii Jacobo ga̱ Juan se vaa ca̱ta̱ ro̱j soꞌ suun sa̱ꞌ doj quiꞌya̱j Jesús a
20Ga̱a ne̱ cuchiꞌ nii ro̱j síí cuꞌna̱j Jacobo ga̱ Juan rihaan Jesús, ne̱ taꞌníí síí cuꞌna̱j Zebedeo me uún ro̱j soꞌ a. Dan me se cuchiꞌ nij taꞌni̱j noꞌ rihaan Jesús, ga̱a ne̱ canicunꞌ ru̱j noꞌ rihaan Jesús, ne̱ cataj noꞌ se vaa vaa se cachi̱nj niꞌya̱j noꞌ rihaan soꞌ, rá noꞌ a.
21―Me se achiin mán so̱ꞌ ga̱ ―taj Jesús, xnáꞌanj soꞌ man noꞌ a.
Ne̱ cataj noꞌ a:
―Caꞌne̱ꞌ so̱ꞌ suun se vaa asa̱ꞌ guun chij so̱ꞌ, ne̱ quita̱j ro̱j taꞌníj xꞌnúú so̱ꞌ, ne̱ ꞌo̱ soꞌ ca̱yáán rej nuva̱ꞌ so̱ꞌ, ne̱ ꞌó soꞌ ca̱yáán rej ni̱chruún so̱ꞌ, ne̱ quiri̱i̱ taꞌngaꞌ ro̱j soꞌ ga̱ so̱ꞌ, cata̱j so̱ꞌ, raj a ―taj chana̱ yoꞌ a.
22Ga̱a ne̱ cataj Jesús rihaan ro̱j tinu̱j ro̱j soꞌ a:
―Ne neꞌen ro̱j so̱j me rasu̱u̱n cachíín niꞌya̱j ro̱j so̱j rihanj nihánj a̱ maꞌ. ꞌO̱ se gu̱un nucua̱j ro̱j so̱j quira̱nꞌ ro̱j so̱j sayuun nda̱a vaa qui̱ránꞌ ꞌu̱nj naꞌ ―taj Jesús, xnáꞌanj soꞌ a.
―Gu̱un nucua̱j rój na̱nj ado̱nj ―taj ro̱j soꞌ a.
23Ga̱a ne̱ cataj Jesús a:
―Ya̱ ya̱ quira̱nꞌ ro̱j so̱j sayuun ga̱j na̱nj ado̱nj. Tza̱j ne̱ né ꞌu̱nj me síí nari̱i̱ me síí ca̱yáán xꞌnúú ꞌu̱nj rej nuva̱ꞌ ꞌu̱nj do̱ꞌ, rej ni̱chruún ꞌu̱nj do̱ꞌ maꞌ. O̱rúnꞌ Réj síí nicu̱nꞌ xta̱ꞌ cata̱j xnaꞌanj me síí quiri̱i̱ taꞌngaꞌ ga̱j na̱nj ado̱nj ―taj Jesús a.
24Ga̱a cuno ꞌó chi̱ꞌ nij síí tucuꞌyón snana̱ Jesús se vaa caꞌmii ro̱j tinu̱j ro̱j soꞌ rihaan Jesús, ne̱ caꞌmaan rá nij soꞌ niꞌya̱j nij soꞌ man ro̱j soꞌ a. 25Ga̱a ne̱ canacúún Jesús man cunuda̱nj nij soꞌ se vaa caꞌna̱ꞌ nij soꞌ rihaan soꞌ, ne̱ cataj soꞌ a:
―Neꞌen soj se vaa nij síí ata̱ suun ma̱n rihaan chumii̱ nihánj me se rii taꞌngaꞌ uxrá nij soꞌ rihaan tuviꞌ nij soꞌ na̱nj ado̱nj. Ne̱ nij síí ata̱ suun noco̱o me se niha̱ꞌ rá nij soꞌ gu̱un chij nij soꞌ rihaan tuviꞌ nij soꞌ a. 26Tza̱j ne̱ se̱ gaa da̱nj scaꞌnúj nij soj a̱ maꞌ. ꞌO̱ se sese me rá nij soj gu̱un chij nij soj rihaan tuviꞌ nij soj, ne̱ gu̱un nij soj mozó rihaan ta̱ranꞌ tuviꞌ nij soj á. 27Ne̱ xa̱ꞌ nij síí uun rá gu̱un chij doj rihaan tuviꞌ nij soꞌ, tza̱j ne̱ ase vaa mozó nu̱u̱ rihaan ꞌo̱ ruꞌvee roꞌ, da̱nj ga̱a̱ nij soj rihaan ta̱ranꞌ tuviꞌ nij soj na̱nj ado̱nj. 28Dan me se nda̱ꞌ se Si̱j Caꞌnéé Yaꞌanj Ni̱caj Yuꞌunj man Yuvii̱ mej, tza̱j ne̱ ne caꞌna̱ꞌ ꞌu̱nj ne̱ gu̱un nij yuvii̱ mozó rihanj maꞌ. ꞌO̱ se caꞌnáꞌ ꞌu̱nj ra̱cuíj man nij yuvii̱ na̱nj ado̱nj. Ne̱ caꞌnáꞌ ꞌu̱nj nayo̱n ma̱ꞌanj rihaan yuvii̱ ne̱ cavi̱ꞌ ꞌu̱nj cheꞌé cacunꞌ ata̱ nij soꞌ, ga̱a ne̱ nani̱i̱ nij soꞌ rihaan sayuun, qui̱ꞌyáj na̱nj ado̱nj ―taj Jesús a.
Naxraꞌ rihaan vi̱j síí tuchri̱i, quiꞌyaj Jesús a
29Ga̱a ne̱ cavii nij soꞌ chumanꞌ Jericó, ne̱ cachéé ri̱i̱ ndoꞌo yuvii̱ xcó Jesús a. 30Ne̱ vaa vi̱j síí tuchri̱i ya̱nj tuꞌva chrej, ne̱ cuno ro̱j soꞌ cuentó se vaa cache̱n Jesús rej ya̱nj ro̱j soꞌ a. Cheꞌé dan caguáj ro̱j soꞌ, cataj ro̱j soꞌ a:
―Taꞌníí Taꞌnij Siꞌno̱ David síí cayáán ga̱a naá mé so̱ꞌ, Señor. Cunu̱u ꞌe̱e̱ rá so̱ꞌ man rój rugua̱nj ―taj ro̱j soꞌ a.
31Tza̱j ne̱ taj nij yuvii̱ rihaan ro̱j soꞌ a:
―Dínj tuꞌva ro̱j so̱j á.
Tza̱j ne̱ doj a̱ nucua̱j caguáj ro̱j soꞌ, cataj ro̱j soꞌ a:
―Taꞌníí Taꞌnij Siꞌno̱ David síí cayáán ga̱a naá mé so̱ꞌ, Señor. Cunu̱u ꞌe̱e̱ rá so̱ꞌ man rój rugua̱nj ―taj uún ro̱j soꞌ a.
32Ga̱a ne̱ canicunꞌ Jesús, ne̱ canacúún Jesús man ro̱j soꞌ se vaa caꞌna̱ꞌ ro̱j soꞌ rihaan soꞌ, ne̱ cataj soꞌ a:
―Da̱j qui̱ꞌyáj man ro̱j so̱j, rá ro̱j so̱j ga̱ ―taj Jesús, xnáꞌanj soꞌ man ro̱j soꞌ a.
33Ga̱a ne̱ cataj ro̱j soꞌ a:
―Nachugu̱u̱n rihaan rój, rá rój ado̱nj.
34Ga̱a ne̱ cunuu ꞌe̱e̱ rá Jesús man ro̱j soꞌ, ne̱ cutaꞌ Jesús raꞌa Jesús rihaan ro̱j soꞌ, ga̱a ne̱ veé ma̱an orá dan cunuu sa̱ꞌ rihaan ro̱j soꞌ na̱nj ado̱nj. Ga̱a ne̱ caꞌanj ro̱j soꞌ ga̱ Jesús a.
נבחרו כעת:
San Mateo 20: trc
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
© Wycliffe Bible Translators, Inc. 2024 segunda versión electrónica
