San Mateo 21
21
Catúj Jesús chumanꞌ Jerusalén a
1Ga̱a ne̱ cuchiꞌ Jesús cuchiꞌ nij síí tucuꞌyón snana̱ soꞌ cuchiꞌ tuꞌva chumanꞌ cuꞌna̱j Betfagé a. Na̱j chumanꞌ yoꞌ tacóó tacaan cuꞌna̱j Tacaan ma̱n Chruun Olivó, ne̱ nichru̱nꞌ naj chumanꞌ Jerusalén ga̱ chumanꞌ cuꞌna̱j Betfagé yoꞌ a. Ga̱a ne̱ caꞌnéé Jesús man vi̱j nij síí tucuꞌyón snana̱ soꞌ caꞌa̱nj ro̱j soꞌ rque chumanꞌ yoꞌ, 2ne̱ cataj soꞌ rihaan ro̱j soꞌ a:
―Catu̱u̱ ro̱j so̱j chumanꞌ nihánj, chumanꞌ na̱j rihaan níꞌ, ne̱ nu̱ꞌ nari̱ꞌ ro̱j so̱j ꞌo̱ burró cha̱na̱ numi̱i, ne̱ vaa taꞌníí xoꞌ burró leꞌe̱j nicu̱nꞌ ga̱ xoꞌ ado̱nj. Nache̱ ro̱j so̱j man burró cha̱na̱ yoꞌ, ne̱ ni̱caj ro̱j so̱j man ro̱j xoꞌ caꞌna̱ꞌ ro̱j so̱j rihaan ꞌu̱nj á. 3Ne̱ sese xna̱ꞌanj nii man ro̱j so̱j me cheꞌé nache ro̱j so̱j burró, ne̱ cata̱j ro̱j so̱j a: “Síí ꞌNi̱j Raꞌa man níꞌ achiin ro̱j xcuu nihánj rihaan chugua̱nj. Tza̱j ne̱ rque do̱j nanica̱j uún ro̱j xoꞌ, quiꞌya̱j soꞌ na̱nj á” ―taj Jesús rihaan ro̱j so̱ꞌ a.
4Dan me se nu̱ꞌ yoꞌ quiꞌyaj Jesús, ne̱ quisíj nda̱a vaa taj síí nataꞌ snana̱ Yaꞌanj ga̱a naá a. Ne̱ síí nataꞌ yoꞌ roꞌ, cataj soꞌ a:
5Cata̱j soj rihaan nij síí ma̱n chumanꞌ Sion a:
“Ni̱ꞌyaj soj á.
Síí gu̱un chij rihaan soj roꞌ, ꞌnaꞌ soꞌ rihaan soj ado̱nj.
Síí nica̱ꞌ nimán me soꞌ,
ne̱ quita̱j soꞌ xráá burró a.
Xráá taꞌníí xcuu ꞌyaj suun quita̱j soꞌ na̱nj ado̱nj.”
Da̱nj cataj nij síí nataꞌ yoꞌ a.
6Dan me se caꞌanj ro̱j síí tucuꞌyón snana̱ Jesús, ne̱ quiꞌyaj ro̱j soꞌ nu̱ꞌ nda̱a vaa cataj Jesús rihaan ro̱j soꞌ a. 7Dan me se nica̱j ro̱j soꞌ man ro̱j taꞌni̱j ro̱j burró cha̱na̱ yoꞌ caꞌanj ro̱j soꞌ rihaan Jesús, ne̱ cutaꞌ ro̱j soꞌ yatzíj xráá ro̱j xcuu, ne̱ cavii Jesús a. 8Ne̱ ri̱i̱ uxrá yuvii̱ cuchruj yatzíj saga̱nꞌ nij yuvii̱ rá chrej, ne̱ taꞌa̱j nij tuviꞌ nij soꞌ roꞌ, caꞌneꞌ coj chruun ma̱n tacaan, ne̱ caraa nij soꞌ rá chrej, cache̱e̱ ro̱j burró yoꞌ rihaan yatzíj do̱ꞌ, rihaan coj chruun do̱ꞌ a. 9Ne̱ va̱j uxrá yuvii̱ quitáá ya̱a̱n rihaan Jesús, ne̱ va̱j uxrá yuvii̱ noco̱ꞌ rej xco̱ Jesús a. Ne̱ caguáj nij yuvii̱, cataj nij yuvii̱ a:
―Síí sa̱ꞌ uxrá me Taꞌníí Taꞌnij Siꞌno̱ David síí cayáán ga̱a naá na̱nj á. ꞌNaꞌ síí caꞌnéé Síí ꞌNi̱j Raꞌa man níꞌ na̱nj á. Se lu̱j ndoꞌo ꞌyaj Yaꞌanj cheꞌé soꞌ a. Síí sa̱ꞌ uxrá me Yaꞌanj si̱j nicu̱nꞌ xta̱ꞌ na̱nj ado̱nj ―taj nij yuvii̱, caguáj nij yuvii̱ a.
10Dan me se catúj Jesús chumanꞌ Jerusalén, ne̱ caráyaꞌa̱nj ta̱ranꞌ nij yuvii̱ ma̱n chumanꞌ yoꞌ, ne̱ cataj nij soꞌ a:
―Me síí atúj chumanꞌ ga̱ ―taj nij síí ma̱n chumanꞌ Jerusalén, xnáꞌanj nij soꞌ man nij yuvii̱ atúj chumanꞌ Jerusalén a.
11―Síí nihánj me Jesús síí cavii chumanꞌ Nazaret chumanꞌ na̱j estadó Galilea, ne̱ síí nataꞌ snana̱ Yaꞌanj me soꞌ ado̱nj ―taj nij yuvii̱ catúj chumanꞌ Jerusalén, niꞌya̱j nij soꞌ man Jesús a.
Quirii Jesús man nij yuvii̱ tuꞌvéj rasu̱u̱n rej ya̱nj nuvií noco̱o a
12Ga̱a ne̱ catúj Jesús rej ya̱nj nuvií noco̱o, ga̱a ne̱ guun cheꞌe̱ soꞌ quirii soꞌ man nu̱ꞌ nij síí tuꞌvéj rasu̱u̱n do̱ꞌ, man nij síí quiránj rasu̱u̱n ma̱n rej ya̱nj nuvií noco̱o do̱ꞌ a. Ne̱ tiguíj raꞌa soꞌ nij chruun mesá natuná nii saꞌanj rihaan, ne̱ tiguíj raꞌa soꞌ chruun xlá ta̱j nij síí tuꞌvéj chaꞌaa̱n a. 13Ga̱a ne̱ caꞌmii soꞌ rihaan nij soꞌ, cataj soꞌ a:
―Ya̱ uxrá taj Danj Yaꞌanj se vaa tucuá Yaꞌanj rej achíín niꞌya̱j yuvii̱ rihaan Yaꞌanj me nihánj ado̱nj. Tza̱j ne̱ ase vaa yuꞌuj yuvej rej atúj yuve̱ síí itu̱u̱ vaa tucuá Yaꞌanj nihánj, quiꞌyaj soj na̱nj á ―taj Jesús a.
14Ga̱a ne̱ catúj nij síí tuchri̱i catúj nij síí rengo̱ catúj rej ya̱nj nuvií, ne̱ nahuun sa̱ꞌ nij soꞌ, quiꞌyaj Jesús a. 15Ne̱ ma̱n xnii catúj rej ya̱nj nuvií, ne̱ caguáj nij xnii cataj nij xnii a:
―Síí sa̱ꞌ uxrá me Taꞌníí Taꞌnij Siꞌno̱ David síí cayáán ga̱a naá na̱nj ado̱nj ―taj nij xnii a.
Ne̱ vaa xrej ata̱ suun noco̱o vaa síí naquiꞌyaj cu̱u stucua̱nj Moisés vaa, ne̱ queneꞌen nij soꞌ nu̱ꞌ suun sa̱ꞌ quiꞌyaj Jesús rej ya̱nj nuvií, ne̱ cuno nij soꞌ nana̱ caguáj nij xnii a. Ga̱a ne̱ caꞌmaan rá nij soꞌ, 16ne̱ cataj nij soꞌ a:
―Unó so̱ꞌ nana̱ aguáj nij xnii nihánj naꞌ. Me cheꞌé aꞌvej so̱ꞌ cagua̱j xnii da̱nj ga̱ ―taj nij soꞌ, xnáꞌanj nij soꞌ man Jesús a.
Ne̱ cataj Jesús a:
―Ya̱ unó ꞌu̱nj a. Me cheꞌé ne naya̱a̱ nij soj nana̱ no̱ rihaan Danj Yaꞌanj ga̱. Ga̱a naá, ne̱ caꞌmii ꞌo̱ soꞌ rihaan Yaꞌanj, cataj soꞌ se vaa niꞌndaj ya̱ veꞌé caꞌmii xnii do̱ꞌ, neꞌej utzii too do̱ꞌ, cheꞌé Yaꞌanj, quiꞌyaj maꞌa̱n Yaꞌanj, taj nana̱ no̱ rihaan Danj Yaꞌanj a ―taj Jesús rihaan nij soꞌ a.
17Ga̱a ne̱ tanáj Jesús man nij soꞌ, ne̱ curiha̱nj soꞌ chumanꞌ Jerusalén, ne̱ caꞌanj soꞌ chumanꞌ Betania, ne̱ caranꞌ soꞌ ꞌo̱ yanꞌ a.
Canacoo̱ ꞌo̱ chruun higó, quiꞌyaj Jesús a
18Rej naꞌya̱a̱n cavii uún Jesús, ne̱ ga̱a caꞌanj soꞌ chumanꞌ Jerusalén, ne̱ naꞌaan rque soꞌ a. 19Ga̱a ne̱ queneꞌen soꞌ ꞌo̱ chruun higó nicu̱nꞌ tuꞌva chrej, ne̱ caꞌanj soꞌ tacóó chruun yoꞌ, tza̱j ne̱ taj va̱j a̱ ꞌó chruj higó ne quiri̱ꞌ soꞌ a̱ maꞌ. Ma̱an na̱nj coj u̱u̱n táá raa̱ chruun yoꞌ a. Ga̱a ne̱ caꞌmii soꞌ rihaan chruun yoꞌ, cataj soꞌ a:
―Daj chiha̱a̱ míj se̱ cumán chruj raá so̱ꞌ maꞌ ―taj Jesús a.
Ne̱ nu̱ꞌ caꞌmii soꞌ rihaan chruun, ne̱ ma̱an orá dan canacoo̱ chruun higó yoꞌ a. 20Ga̱a ne̱ caráyaꞌa̱nj nij síí tucuꞌyón snana̱ Jesús, queneꞌen nij soꞌ se vaa quiranꞌ chruun yoꞌ a. Ne̱ cataj nij soꞌ a:
―Asa̱ꞌ caꞌvee nu̱ꞌ nacoo̱ chruun nihánj cuano̱ ga̱ ―taj nij soꞌ, caráyaꞌa̱nj nij soꞌ a.
21Ga̱a ne̱ cataj Jesús rihaan nij soꞌ a:
―Ya̱ ya̱ cata̱j xnaꞌanj ꞌu̱nj rihaan soj cuano̱ se vaa sese se̱ guun vi̱j rá soj ne̱ ꞌo̱ cuchuma̱n rá soj, ne̱ doj a̱ quiꞌya̱j soj vaa güii, se vaa quiꞌyáá ꞌu̱nj man chruun nihánj ado̱nj. Dan me se cata̱j xnaꞌanj nij soj rihaan quij xca̱a̱n yoꞌ se vaa cu̱riha̱nj quij rej nicu̱nꞌ quij ne̱ caꞌa̱nj ni̱j quij rque na yaꞌa̱nj, ne̱ ya̱ caꞌa̱nj ni̱j yoꞌ rque na yaꞌa̱nj, quiꞌya̱j soj ado̱nj. 22Ne̱ nu̱ꞌ se vaa cachi̱nj niꞌya̱j soj rihaan Yaꞌanj roꞌ, rque̱ Yaꞌanj rihaan soj, sese ya̱ ya̱ cuchuma̱n rá soj na̱nj ado̱nj ―taj Jesús a.
Xnáꞌanj nii man Jesús me síí caꞌneꞌ suun rihaan soꞌ quiꞌya̱j soꞌ nda̱a vaa ꞌyaj soꞌ a
23Ga̱a ne̱ catúj Jesús rej ya̱nj nuvií noco̱o, ne̱ tucuꞌyón soꞌ nana̱ man nij síí ma̱n rej ya̱nj nuvií yoꞌ a. Ga̱a ne̱ cuchiꞌ nij xrej ata̱ suun noco̱o do̱ꞌ, nij síí uun chij rihaan nij yuvii̱ do̱ꞌ, rihaan soꞌ, ne̱ xnáꞌanj nij soꞌ man soꞌ, cataj nij soꞌ a:
―Me síí caꞌneꞌ suun rihaan so̱ꞌ qui̱ꞌyáá so̱ꞌ nda̱a vaa ꞌyáá so̱ꞌ ga̱ ―taj nij soꞌ a.
24Ga̱a ne̱ cataj Jesús rihaan nij soꞌ a:
―Vaa ꞌu̱nj uún, ne̱ vaa ꞌo̱ nana̱ xna̱ꞌanj ꞌu̱nj man nij soj, ne̱ sese ya̱ cata̱j xnaꞌanj nij soj nana̱ yoꞌ rihanj, ne̱ cata̱j xnaꞌanj ꞌu̱nj rihaan soj me síí caꞌneꞌ suun rihanj a. 25Dan me se me síí caꞌneꞌ suun rihaan Juan cuta̱ꞌ ne soꞌ man yuvii̱, rá soj ga̱. Yaꞌanj naꞌ. Ase nij yuvii̱ xa̱ꞌ. Cata̱j xnaꞌanj nij soj rihanj á ―taj Jesús a.
Ga̱a ne̱ nuchruj ra̱a̱ ndoꞌo nij soꞌ ga̱ tuviꞌ nij soꞌ, cataj nij soꞌ a:
―Sese cata̱j níꞌ se vaa Yaꞌanj caꞌneꞌ suun rihaan Juan cuta̱ꞌ ne soꞌ man yuvii̱, ne̱ cata̱j Jesús rihaan níꞌ me cheꞌé ne cuchuma̱n rá níꞌ nana̱ caꞌmii Juan, cata̱j soꞌ a. 26Tza̱j ne̱ sese cata̱j níꞌ se vaa né si̱j caꞌneꞌ Yaꞌanj suun rihaan me Juan, ne̱ caꞌma̱an rá nij yuvii̱, ne̱ quira̱nꞌ níꞌ sayuun, quiꞌya̱j nij yuvii̱ na̱nj á. ꞌO̱ se nij yuvii̱ me se síí caꞌnéé Yaꞌanj nata̱ꞌ snana̱ Yaꞌanj me Juan, rá cunuda̱nj nij yuvii̱ na̱nj ado̱nj ―taj nij soꞌ rihaan tuviꞌ nij soꞌ a.
27Ga̱a ne̱ cataj nij soꞌ rihaan Jesús a:
―Ne neꞌen núj me síí caꞌneꞌ suun rihaan Juan cuta̱ꞌ ne soꞌ man yuvii̱ maꞌ ―taj nij soꞌ a.
Ga̱a ne̱ cataj Jesús rihaan nij soꞌ a:
―Cheꞌé dan se̱ cataj xnaꞌanj ꞌu̱nj rihaan nij soj me síí caꞌneꞌ suun rihanj qui̱ꞌyáj nda̱a vaa ꞌyáj maꞌ ―taj Jesús rihaan nij soꞌ a.
Nanó Jesús cuentó cheꞌé ro̱j taꞌníí ꞌo̱ soꞌ a
28Ga̱a ne̱ nanó Jesús cuentó nihánj cuno nij soꞌ a:
―Ne̱ da̱j vaa nana̱ nihánj nana̱ cata̱j xnaꞌanj ꞌu̱nj rihaan soj, rá soj ga̱. Vaa vi̱j taꞌníí ꞌo̱ soꞌ a. Ne̱ cuchiꞌ soꞌ rihaan ꞌo̱ taꞌníí soꞌ, cataj soꞌ a: “Cuanꞌ cavi̱i̱ so̱ꞌ quiꞌya̱j suun so̱ꞌ rque naa̱ chruj uvá, rej”, taj soꞌ rihaan taꞌníí soꞌ a. 29“Se̱ caꞌanj ꞌu̱nj maꞌ”, taj xnii yoꞌ rihaan rej soꞌ a. Tza̱j ne̱ orá nii doj canica̱j nimán soꞌ, ne̱ caꞌanj quiꞌya̱j suun soꞌ a. 30Ga̱a ne̱ cuchiꞌ rej xnii rihaan ꞌó taꞌníí soꞌ, ne̱ cataj xnaꞌanj soꞌ se vaa caꞌa̱nj xnii yoꞌ, quiꞌya̱j suun yoꞌ a. “Caꞌa̱nj ꞌu̱nj, ata̱j”, taj soꞌ rihaan rej soꞌ a. Tza̱j ne̱ ne caꞌa̱nj soꞌ quiꞌya̱j suun soꞌ maꞌ. 31Ne̱ me taꞌníí snóꞌo yoꞌ cuno sa̱ꞌ rihaan soꞌ, rá soj ga̱ ―taj Jesús, xnáꞌanj Jesús man nij soꞌ a.
―Xnii caꞌanj quiꞌya̱j suun roꞌ, cuno ya̱ soꞌ rihaan rej soꞌ a ―taj nij soꞌ rihaan Jesús a.
Ga̱a ne̱ cataj Jesús rihaan nij soꞌ a:
―Ya̱ ya̱ cata̱j xnaꞌanj ꞌu̱nj rihaan nij soj cuano̱ se vaa nij síí tihaꞌ yuꞌunj man yuvii̱ cheꞌé impuestó do̱ꞌ, nij chana̱ niha̱ꞌ rá ga̱ chii do̱ꞌ, táá ya̱a̱n rihaan soj aꞌvej rá nij soꞌ gu̱un chij Yaꞌanj nimán nij soꞌ, ne̱ náj xco̱ nij soj ado̱nj. 32ꞌO̱ se cuchiꞌ Juan rihaan nij soj, ne̱ tucuꞌyón soꞌ rihaan nij soj da̱j quiꞌya̱j soj cuno̱ sa̱ꞌ soj rihaan Yaꞌanj, tza̱j ne̱ ne cuchuma̱n rá nij soj nana̱ caꞌmii soꞌ maꞌ. Tza̱j ne̱ nij síí tihaꞌ yuꞌunj man yuvii̱ cheꞌé impuestó do̱ꞌ, nij chana̱ niha̱ꞌ rá ga̱ chii do̱ꞌ, cuchumán rá nana̱ caꞌmii Juan na̱nj ado̱nj. Ne̱ queneꞌen soj se vaa cuchumán rá nij soꞌ, tza̱j ne̱ ne nuchra̱nꞌ nimán soj, ne̱ ne cuchuma̱n rá maꞌa̱n soj maꞌ.
Nanó Jesús cuentó cheꞌé yuvii̱ chiꞌi̱i̱ ꞌyaj suun rihaan naa̱ a
33’Ne̱ cuno̱ uún nij soj ꞌó cuentó nihánj á: Dan me se vaa ꞌo̱ síí toꞌo̱j, ne̱ cuchruj soꞌ ꞌo̱ naa̱ chruj uvá, ne̱ quiꞌyaj soꞌ chingá nu̱ꞌ anica̱j tuꞌva naa̱ yoꞌ, ga̱a ne̱ gáán soꞌ yuꞌuj rej xtu̱nꞌ chruj uvá ne̱ cavi̱i̱ na, ne̱ cuneꞌ soꞌ ꞌo̱ veꞌ nataꞌ ca̱yáán nij síí tu̱mé naa̱ yoꞌ a. Ga̱a ne̱ tanáj soꞌ man naa̱ yoꞌ rihaan síí quiꞌya̱j suun naa̱ yoꞌ, ne̱ curiha̱nj soꞌ caꞌanj soꞌ ga̱nꞌ a.
34’Ga̱a quisíj yavii cuta̱ nii chruj uvá, ne̱ caꞌnéé síí xna̱a̱ yoꞌ man ꞌó taꞌa̱j nij se‑mo̱zó soꞌ rihaan nij síí nu̱u̱ tumé xnaa̱ soꞌ cuxra̱ꞌ taꞌa̱j nij soꞌ nda̱a vaa quiri̱ꞌ ꞌo̱ ꞌo̱ nij soꞌ, ne̱ caꞌna̱ꞌ ni̱caj ꞌó nij mozó taꞌa̱j uvá rihaan síí xna̱a̱ a. 35Ga̱a ne̱ taꞌaa nij síí nu̱u̱ tumé naa̱ man ꞌó nij mozó cuchiꞌ uún a. Dan me se goꞌ uxrá nij soꞌ chruun xráá ꞌo̱ mozó yoꞌ, ne̱ ticaviꞌ nij soꞌ man ꞌó mozó yoꞌ, ne̱ goꞌ uxrá nij soꞌ yahij man ꞌó mozó yoꞌ ne̱ yu̱u̱n cheꞌe̱ caviꞌ soꞌ na̱nj ado̱nj. 36Ga̱a ne̱ caꞌnéé uún síí xna̱a̱ yoꞌ man ꞌó da̱nj mozó caꞌa̱nj uún rej na̱j xnaa̱ soꞌ a. Tza̱j ne̱ nij síí nu̱u̱ tumé naa̱ roꞌ, veé da̱nj quiꞌyaj uún nij soꞌ man nij mozó yoꞌ a.
37’Veé dan, ga̱a ne̱ caꞌnéé síí xna̱a̱ yoꞌ taꞌníí soꞌ rej ma̱n nij síí nu̱u̱ tumé xnaa̱ soꞌ a. ꞌO̱ se guun rá síí xna̱a̱ yoꞌ a: “Cara̱a̱ cochro̱j nij síí tumé naa̱ rihaan taꞌníj sese caꞌa̱nj taꞌníj tza̱j xe̱e̱”, rá síí xna̱a̱ yoꞌ a. 38Tza̱j ne̱ queneꞌen nij síí tumé naa̱ man taꞌníí síí xna̱a̱, ne̱ cataj nij soꞌ a: “Síí nihánj me síí gu̱un síí xna̱a̱ naa̱ nihánj vaa güii na̱nj ado̱nj. Cheꞌé dan ticavi̱ꞌ níꞌ man soꞌ, ne̱ gu̱un xna̱a̱ maꞌa̱n níꞌ man naa̱ nihánj chugua̱nj”, taj nij soꞌ rihaan tuviꞌ nij soꞌ a. 39Ga̱a ne̱ taꞌaa nij soꞌ man taꞌníí síí xna̱a̱ yoꞌ, ne̱ quirii nij soꞌ xeꞌ, ne̱ ticaviꞌ nij soꞌ man taꞌníí síí xna̱a̱ ado̱nj. 40Ne̱ asa̱ꞌ caꞌnaꞌ uún síí xna̱a̱ yoꞌ, ne̱ da̱j quiꞌya̱j soꞌ man nij síí nu̱u̱ tumé xnaa̱ soꞌ, rá nij soj ga̱ ―taj Jesús, xnáꞌanj soꞌ man nij xrej do̱ꞌ, man nij síí uun chij do̱ꞌ a.
41―Quiꞌya̱j ndoꞌo síí xna̱a̱ yoꞌ sayuun man nij síí chiꞌi̱i̱ ꞌyaj suun xnaa̱ soꞌ, ne̱ ticavi̱ꞌ soꞌ man nij soꞌ na̱nj ado̱nj. Ne̱ ta̱cuachén soꞌ xnaa̱ soꞌ rihaan ꞌó síí tu̱mé xnaa̱ soꞌ, ne̱ yavii cuta̱ nii chruj uvá roꞌ, veꞌé rque̱ nij soꞌ chruj yoꞌ rihaan síí xna̱a̱ yoꞌ na̱nj ado̱nj ―taj nij soꞌ rihaan Jesús a.
42Ga̱a ne̱ cataj Jesús a:
―Me cheꞌé ne naya̱a̱ nij soj nana̱ nihánj nana̱ no̱ rihaan Danj Yaꞌanj ga̱:
Yuvej quiriꞌíj nij síí cuneꞌ veꞌ roꞌ,
guun yuvej sa̱ꞌ vaa se uun doj
rihaan cunuda̱nj nij yuvej ma̱n tacóó veꞌ yoꞌ na̱nj ado̱nj.
Maꞌa̱n Yaꞌanj Si̱j ꞌNi̱j Raꞌa man níꞌ quiꞌyaj da̱nj,
ne̱ cuna̱j uxrá vaa yoꞌ, rá níꞌ ado̱nj,
taj Danj Yaꞌanj a. 43Cheꞌé dan cuano̱ nihánj me se cata̱j xnaꞌanj ꞌu̱nj rihaan nij soj se vaa caꞌne̱ꞌ rá Yaꞌanj ga̱ yan uun chij soꞌ rihaan nij soj, ne̱ cune̱ꞌ soꞌ man ꞌó nij yuvii̱ gu̱un chij soꞌ rihaan, ne̱ veꞌé quiꞌya̱j ꞌó nij yuvii̱ yoꞌ nu̱ꞌ se vaa me rá Yaꞌanj quiꞌya̱j nij soꞌ na̱nj á. 44Ne̱ yuvej yoꞌ me se ase vaa yuvej yoꞌ vaa ꞌu̱nj, ne̱ ase vaa yuvii̱ acoꞌ cheꞌé yuvej yoꞌ vaa yuvii̱ naꞌvej rá cuno̱ rihaan ꞌu̱nj, ne̱ uxrá quira̱nꞌ nij soꞌ sayuun na̱nj ado̱nj. Ne̱ ase vaa yuvii̱ quinij yuvej yoꞌ xráá roꞌ, vaa nij yuvii̱ quiꞌya̱j uxrá ꞌu̱nj sayuun man na̱nj ado̱nj ―taj Jesús a.
45Dan me se cuno nij xrej ata̱ suun noco̱o cuno nij síí fariseo cuno cuentó nanó Jesús, ne̱ xcaj nij soꞌ cuentá se vaa cheꞌe̱ maꞌa̱n nij soꞌ me cuentó nanó Jesús a. Ase vaa nij síí nu̱u̱ tumé naa̱ vaa maꞌa̱n nij soꞌ niꞌya̱j Jesús a. 46Ga̱a ne̱ nanoꞌ nij soꞌ da̱j ga̱a̱ ta̱ꞌaa nij soꞌ man Jesús, tza̱j ne̱ cuchuꞌviꞌ nij soꞌ niꞌya̱j nij soꞌ man nij yuvii̱ a. ꞌO̱ se síí nataꞌ snana̱ Yaꞌanj me Jesús, rá nij yuvii̱ a.
נבחרו כעת:
San Mateo 21: trc
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
© Wycliffe Bible Translators, Inc. 2024 segunda versión electrónica
