San Mateo 19
19
Cataj Jesús se vaa ne nó xcúún yuvii̱ quiriꞌi̱j yuvii̱ man nica̱ yuvii̱ a
1Ga̱a ne̱ quisíj caꞌmii Jesús nana̱ yoꞌ, ga̱a ne̱ curiha̱nj soꞌ estadó Galilea, ne̱ caꞌanj soꞌ nda̱a rne̱j tuꞌva chráá cuꞌna̱j Jordán, nda̱a estadó Judea a. 2Ne̱ canocoꞌ ri̱i̱ uxrá yuvii̱ man soꞌ, ne̱ nahuun sa̱ꞌ nij síí ranꞌ, quiꞌyaj soꞌ a.
3Ga̱a ne̱ cuchiꞌ do̱j síí fariseo rihaan Jesús, ne̱ me rá nij soꞌ cuta̱ꞌ nij soꞌ cacunꞌ xráá Jesús cheꞌé nana̱ caꞌmi̱i̱ Jesús a. Cheꞌé dan xnáꞌanj nij soꞌ man Jesús, cataj nij soꞌ a:
―Sese ne cuna̱j ꞌyaj chana̱ nica̱ ꞌo̱ snóꞌo, rá snóꞌo yoꞌ, ne̱ caꞌve̱e quiriꞌi̱j soꞌ man noꞌ taj stucua̱nj Moisés naꞌ ―taj nij soꞌ a.
4Ga̱a ne̱ cataj Jesús a:
―A̱j nayaa soj nana̱ no̱ rihaan Danj Yaꞌanj nana̱ taj se vaa asi̱j quiꞌyaj Yaꞌanj chumii̱, ne̱ quiꞌyaj Yaꞌanj snóꞌo, ne̱ quiꞌyaj Yaꞌanj chana̱ a. 5Ne̱ vaa ꞌó nana̱ taj a: “Cheꞌé dan ta̱náj snóꞌo man rej soꞌ do̱ꞌ, man nii soꞌ do̱ꞌ, ne̱ gu̱un rcuaꞌa̱a̱n soꞌ ga̱ chana̱ nica̱ soꞌ, ne̱ ase vaa o̱rúnꞌ yuvii̱ roꞌ, da̱nj ga̱a̱ ro̱j soꞌ ado̱nj.” Da̱nj taj Danj Yaꞌanj a. 6Dan me se né vi̱j ranꞌ yuvii̱ me ro̱j soꞌ asi̱j xcaj tuviꞌ ro̱j soꞌ a̱ maꞌ. ꞌO̱ se ase vaa o̱rúnꞌ yuvii̱ roꞌ, vaa ro̱j soꞌ na̱nj ado̱nj. Dan me se maꞌa̱n Yaꞌanj quiꞌyaj xcaj tuviꞌ ro̱j soꞌ, ne̱ cheꞌé dan ne nó xcúún a̱ ꞌó yuvii̱ caꞌne̱ꞌ tanu̱u̱ yuvii̱ man ro̱j soꞌ maꞌ ―taj Jesús rihaan nij síí fariseo yoꞌ a.
7Ga̱a ne̱ cataj nij síí fariseo a:
―Sese da̱nj vaa, ne̱ me cheꞌé caꞌneꞌ Moisés suun se vaa na̱xcaj snóꞌo ꞌo̱ yanj cataj xnaꞌanj se vaa quiriꞌíj soꞌ chana̱ nica̱ soꞌ, ne̱ caꞌve̱e quiriꞌi̱j soꞌ man noꞌ ga̱ ―taj nij soꞌ a.
8Ne̱ cataj Jesús rihaan nij soꞌ a:
―Cheꞌé se nichra̱j ndoꞌo nimán soj roꞌ, cheꞌé dan caꞌvej rá Moisés na̱xcaj soj yanj yoꞌ, ne̱ quiriꞌi̱j soj nica̱ soj a. Tza̱j ne̱ asi̱j guun cheꞌe̱ Yaꞌanj quiꞌyaj Yaꞌanj man yuvii̱, ne̱ ne vaa da̱nj maꞌ. 9Cuano̱ nihánj me se cata̱j xnaꞌanj ꞌu̱nj rihaan soj se vaa sese ne coto̱j chana̱ nica̱ ꞌo̱ soꞌ ga̱ ꞌó snóꞌo, ne̱ sese riꞌíj soꞌ man chana̱ yoꞌ ne̱ xcaj soꞌ man ꞌó chana̱, ne̱ tumé soꞌ cacunꞌ ase vaa síí otoj ga̱ chana̱ né ni̱ca̱ me vaa soꞌ na̱nj ado̱nj ―taj Jesús rihaan nij soꞌ a.
10Ga̱a ne̱ cataj nij síí tucuꞌyón snana̱ Jesús rihaan soꞌ a:
―Sese ne nó xcúún snóꞌo quiriꞌi̱j soꞌ man chana̱ nica̱ soꞌ, ne̱ taj cheꞌé xca̱j snóꞌo man chana̱ maꞌ. Vaa cheꞌé doj ca̱yáán maꞌa̱n soꞌ ado̱nj ―taj nij soꞌ a.
11Ga̱a ne̱ cataj Jesús a:
―Né tucua̱nj canoco̱ꞌ cunuda̱nj snóꞌo me nana̱ caꞌmii soj maꞌ. Ma̱an se do̱j nij snóꞌo canoco̱ꞌ tucuáán yoꞌ, quiꞌya̱j Yaꞌanj na̱nj ado̱nj. 12Dan me se vaa síí asi̱j caꞌngaa naꞌvej rá soꞌ xca̱j soꞌ man chana̱, tza̱j ne̱ vaa ꞌó soꞌ uún, ne̱ ga̱a me soꞌ xnii, ne̱ naquiꞌyaj capuú nii man soꞌ, ne̱ ga̱a achij xnii, ga̱a ne̱ naꞌvej rá soꞌ xca̱j soꞌ man chana̱ ga̱a a̱ maan ado̱nj. Dan me se vaa ꞌó soꞌ uún, ne̱ caꞌve̱e na̱nj xca̱j soꞌ chana̱, tza̱j ne̱ ma̱an se noco̱ꞌ ndoꞌo soꞌ man Yaꞌanj, ne̱ me ndoꞌo rá soꞌ gu̱un chij Yaꞌanj nimán nij yuvii̱, ne̱ ꞌyaj ndoꞌo soꞌ se‑su̱u̱n Yaꞌanj, ne̱ naꞌvej ina̱nj rá maꞌa̱n soꞌ xca̱j soꞌ chana̱ a̱ maan ado̱nj. Sese vaa ꞌo̱ síí uun nucua̱j noco̱ꞌ tucuáán yoꞌ, ne̱ cuna̱j ꞌyaj soꞌ ado̱nj ―taj Jesús a.
Cataj Jesús me cheꞌé aranꞌ rá soꞌ niꞌya̱j soꞌ man xnii leꞌe̱j a
13Ga̱a ne̱ nica̱j nij yuvii̱ man nij xnii leꞌe̱j caꞌnaꞌ nij yuvii̱ rihaan Jesús a. Me rá nij yuvii̱ cuta̱ꞌ Jesús raꞌa soꞌ raa̱ nij xnii leꞌe̱j, ne̱ cachi̱nj niꞌya̱j soꞌ rihaan Yaꞌanj cheꞌé nij xnii leꞌe̱j yoꞌ a. Tza̱j ne̱ caxríj yuva̱a̱ nij síí tucuꞌyón snana̱ Jesús man nij yuvii̱ yoꞌ a. 14Tza̱j ne̱ cataj Jesús a:
―Caꞌne̱ꞌ rá soj caꞌna̱ꞌ nij xnii leꞌe̱j rihanj á. Se̱ caráán soj chrej rihaan nij soꞌ a̱ maꞌ. ꞌO̱ se nij síí vaa da̱j se vaa xnii leꞌe̱j roꞌ, síí aꞌvej rá gu̱un chij Yaꞌanj nimán me nij soꞌ na̱nj ado̱nj ―taj Jesús a.
15Ga̱a ne̱ cutaꞌ soꞌ raꞌa soꞌ raa̱ nij xnii leꞌe̱j, ga̱a ne̱ curiha̱nj soꞌ rej yoꞌ a.
ꞌO̱ síí me rá ca̱yáán ga̱ Yaꞌanj nu̱ꞌ cavii nu̱ꞌ caꞌanj caꞌmii ga̱ Jesús a
16Dan me se cuchiꞌ ꞌo̱ síí tachru̱u̱ rihaan Jesús, ne̱ xnáꞌanj soꞌ man Jesús, cataj soꞌ a:
―Me suun sa̱ꞌ qui̱ꞌyáj, ne̱ caꞌve̱e ca̱yánj ga̱ Yaꞌanj nu̱ꞌ cavii nu̱ꞌ caꞌanj, ga̱a maestro̱ꞌ ―taj soꞌ a.
17Ga̱a ne̱ cataj Jesús a:
―Me cheꞌé xnáꞌanj so̱ꞌ manj cheꞌé se sa̱ꞌ ga̱. ꞌO̱ se o̱rúnꞌ Yaꞌanj me síí sa̱ꞌ ado̱nj. Tza̱j ne̱ sese me rá so̱ꞌ ca̱yáán so̱ꞌ ga̱ Yaꞌanj nu̱ꞌ cavii nu̱ꞌ caꞌanj, ne̱ cu̱nó so̱ꞌ nij suun noco̱o ya̱ ya̱ caꞌneꞌ Yaꞌanj cuno̱ níꞌ á ―taj Jesús a.
18―Me nana̱ ga̱ ―taj síí tachru̱u̱ yoꞌ, xnáꞌanj soꞌ man Jesús a.
Ga̱a ne̱ cataj Jesús a:
―Nana̱ nihánj a: “Se̱ ticavíꞌ so̱ꞌ yuvii̱ maꞌ. Se̱ cotoj so̱ꞌ ga̱ ꞌó yuvii̱ sese né ni̱ca̱ so̱ꞌ me maꞌ. Se̱ quiꞌyaj itu̱u̱ so̱ꞌ siꞌyaj ꞌó yuvii̱ maꞌ. Se̱ nanó so̱ꞌ cuentó ne̱ cheꞌé yuvii̱ maꞌ. 19Cara̱a̱ co̱chróó so̱ꞌ rihaan réé so̱ꞌ do̱ꞌ, rihaan nií so̱ꞌ do̱ꞌ á. Ase vaa ꞌe̱e̱ rá so̱ꞌ man ma̱ꞌán so̱ꞌ roꞌ, da̱nj ga̱a̱ ꞌe̱e̱ rá so̱ꞌ man tuvíꞌ so̱ꞌ á.” Yoꞌ me nana̱ cu̱nó so̱ꞌ ado̱nj ―taj Jesús rihaan síí tachru̱u̱ yoꞌ a.
20―Nu̱ꞌ nana̱ yoꞌ unoj ado̱nj. Vaa ꞌó se vaa achiin qui̱ꞌyáj naꞌ ―taj síí tachru̱u̱ yoꞌ rihaan Jesús a.
21Ga̱a ne̱ cataj Jesús rihaan soꞌ a:
―Sese me rá so̱ꞌ cunu̱u sa̱ꞌ ina̱nj nimán so̱ꞌ, ne̱ cavi̱i̱ so̱ꞌ caꞌa̱nj so̱ꞌ, ne̱ cutuꞌve̱e̱ so̱ꞌ nu̱ꞌ siꞌyáá so̱ꞌ, ne̱ saꞌanj quiri̱ꞌ so̱ꞌ roꞌ, caxri̱i̱ so̱ꞌ ston nij síí nique̱, ne̱ cuma̱n ndoꞌo siꞌyáá so̱ꞌ rej xta̱ꞌ, quiꞌya̱j Yaꞌanj na̱nj ado̱nj. Ne̱ dan me se caꞌna̱ꞌ so̱ꞌ, ne̱ ca̱nocóꞌ so̱ꞌ manj, caꞌa̱nj níꞌ á ―taj Jesús a.
22Dan me se cuno síí tachru̱u̱ yoꞌ nana̱ cataj xnaꞌanj Jesús rihaan soꞌ, ne̱ caꞌanj soꞌ, ne̱ nanó ndoꞌo rá soꞌ a. ꞌO̱ se síí ruꞌvee me soꞌ, ne̱ vaa ndoꞌo siꞌyaj soꞌ a.
23Ga̱a ne̱ caꞌmii Jesús rihaan nij síí tucuꞌyón snana̱ soꞌ, cataj soꞌ a:
―Ya̱ ya̱ cata̱j xnaꞌanj ꞌu̱nj rihaan soj se vaa sayu̱u̱n uxrá vaa caꞌve̱j rá nij ruꞌvee gu̱un chij Yaꞌanj nimán nij soꞌ na̱nj ado̱nj. 24Dan me se neꞌen soj se vaa sayu̱u̱n ndoꞌo vaa cache̱n xcuu camelló rihaan yuꞌuj ta̱j tacúún cúú nuvá, tza̱j ne̱ cuano̱ nihánj me se cata̱j xnaꞌanj ꞌu̱nj rihaan soj se vaa caꞌve̱e a̱ doj cache̱n xcuu yoꞌ yuꞌuj ta̱j tacúún cúú nuvá, nda̱a rá se vaa síí ruꞌvee, ne̱ se̱ guun caꞌve̱j rá soꞌ gu̱un chij Yaꞌanj nimán soꞌ a̱ maꞌ ―taj Jesús a.
25Dan me se cuno nij síí tucuꞌyón snana̱ Jesús nana̱ caꞌmii soꞌ, ne̱ caráyaꞌa̱nj uxrá nij soꞌ, cataj nij soꞌ a:
―Cheꞌé dan me se me síí gu̱un nucua̱j nani̱i̱ rihaan sayuun ga̱ ―taj nij soꞌ a.
26Niꞌya̱j Jesús man nij soꞌ, ne̱ cataj soꞌ a:
―Se̱ guun nucua̱j yuvii̱ nani̱i̱ maꞌa̱n nij yuvii̱ rihaan sayuun maꞌ. Sayu̱u̱n uxrá vaa rihaan nij soꞌ na̱nj ado̱nj. Tza̱j ne̱ xa̱ꞌ Yaꞌanj me se ne sayu̱u̱n a̱ doj vaa rihaan soꞌ a̱ maꞌ. Me maꞌa̱n rasu̱u̱n caꞌve̱e quiꞌya̱j soꞌ na̱nj ado̱nj ―taj soꞌ a.
27Ga̱a ne̱ cataj Pedró rihaan Jesús a:
―Ne̱ núj ga̱. A̱j tanáj núj nu̱ꞌ siꞌyaj núj, ne̱ nocoꞌ núj mán so̱ꞌ ado̱nj. Da̱j quira̱nꞌ núj ga̱ ―taj Pedró, xnáꞌanj soꞌ a.
28Ga̱a ne̱ cataj Jesús a:
―Ya̱ ya̱ cata̱j xnaꞌanj ꞌu̱nj Si̱j Caꞌnéé Yaꞌanj Ni̱caj Yuꞌunj man Yuvii̱ rihaan soj se vaa asa̱ꞌ cunuu naca̱ chumii̱ nihánj, ne̱ asa̱ꞌ guun cheꞌe̱j cayánj rihaan chruun xlá ya̱ veꞌé vaa, ne̱ ca̱yáán chuvi̱j nij soj si̱j noco̱ꞌ manj chruun xlá sa̱ꞌ ndoꞌo, ne̱ caꞌne̱ꞌ soj cacunꞌ cheꞌé chuvi̱j nij xꞌneꞌ nij yuvii̱ israelitá ado̱nj. 29Ne̱ síí tanáj veꞌ tucuá tanáj tinúú tanáj raꞌvij tanáj rej tanáj nii tanáj taꞌníí tanáj yoꞌóó tanáj canoco̱ꞌ soꞌ manj roꞌ, uxrá ya̱ doj a̱ quiri̱ꞌ soꞌ rasu̱u̱n, ne̱ ca̱yáán soꞌ ga̱ Yaꞌanj nu̱ꞌ cavii nu̱ꞌ caꞌanj ado̱nj. 30Tza̱j ne̱ queꞌe̱e̱ uxrá nij síí guun chij ndoꞌo rihaan chumii̱ nihánj roꞌ, gu̱un nij soꞌ síí noco̱ꞌ, ne̱ queꞌe̱e̱ uxrá nij síí ne gu̱un chij rihaan chumii̱ nihánj roꞌ, gu̱un chij nij soꞌ, quiꞌya̱j Yaꞌanj vaa güii na̱nj ado̱nj.
נבחרו כעת:
San Mateo 19: trc
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
© Wycliffe Bible Translators, Inc. 2024 segunda versión electrónica
