ZLI VIRZI 8
8
1Akẽh na, Buymisemuŋ aro ti Nowe keŋŋe a hirnga ati gwat misãmi ngi ɓuhoy ati ngi hayay gar misi ati Nowe a hur palalama, Buymisemuŋ a ˀufo himiɗ asi ruwuyo, dar yam a zla hisik. 2Miviɗiviɗi ngi yam mijileŋhey a dislam, mifiliw ngir birngiŋ ngi muŋhoy a dislam, joˀ vuŋ a wuyuh. 3Naŋ kine, a dirba mekepel madiɗa migi hin skat ti kukur zlum na, yam a zla hisik neˀneˀ asi ruwuyo, ara hil mi a ruwuyo. 4Angi hin mukuruˀ ngi kiya mitarnaˀ naŋ na, palalam ara kirik a hirnga muwã Ararat. 5Yam ara hisik, ara hisik na si, hã a ndila kiya mukuruˀ naŋ. Angi hin muɓulaˀ ngi kiya mukuruˀ naŋ na, hirnga ngi muwãhay ara bugoko vu muduba. 6Hin kukur mufaɗ a dirba nah na, Nowe a wuna fenetir naŋ mupula zleˀe avu palalama. 7A pul magagak, a slikiɗ, a ru, a mawa, hã yam a kus, a pula ruwuyo. 8Dar a pul gonok, ɓa ara pura, da yam a hil mi le asi ruwuyo kwani. 9Amma gonoko, a lum li cifi ta, a mawa nga ciki Nowe, a hur palalam a muŋ, asi hirwuyo gar aro sirit sirit ti yam aruŋ, Nowe a tila haŋ til, a co di kulaˀ nga hur palalama. 10A kutuk hin tarnaˀ ma, a pula gonok tuwa ng'avra ma. 11Gonok a mo ng'avi Nowe ngi pastaˀ naŋ, ti kalaf ngi mihaŋ ngi tumtumbur miɗiɗa wureˀ ngik avu mi! Naŋ kine, Nowe a si na le, yam a hil mi le asi ruwuyo muduba. 12A kutuk hin tarnaˀ ava, a pula gonoko ng'avra tuwa ma, amma gonok a mo ng'ava mata. 13Ti Nowe mindila vi skat skat merkeɗ ti purla, hin ɓulaˀ ngi kiya mudumbuŋ naŋ na, yam a hil mi, a pula hirwuyo le. Nowe a turo hirnga ngi palalam avra, a pura na, hirwuy a suf le. 14Angi hin mizli ngir cuw nga tarnaˀ naŋ ngi kiya mucuw naŋ na, hirwuy a muˀul le ngbaŋngbaŋ wãˀ. 15Akẽh na, Buymisemuŋ a ɓa Nowe na: 16«Bi ti hur palalama, ka ati ngwas ɗik, ziri ɗikey waɗ ngwas ngi ziri ɗikeye. 17Sukwi ngi gwat misããmihey gar misi avu ka, sukwi ngi ɗiyuwoy gar, gwat madiɗa misããmihey ati mislreɓ slreɓey gar na, bo taŋ a haŋ, ɓa a zliɗam hirnga asi ruwuy gar, a jam, a sikam asi ruwuyo.» 18Nowe a bawa ti hur palalama ati ziri naŋhay, ngwas naŋ waɗ ngwas ngi ziri naŋhaya. 19Dar gwat misããmihey gar, misãmi memeɗehey, ɗiyuwoy waɗ gwat miwenewene ngi ruwuyoy gar, a boko ti hur palalama ti sukwi ti sukwi. 20Nowe a ɗiyi li gi mikuli da Buymisemuŋ. Gwat misãmi madiɗa ngi gi mikulihey ati ɗuyuwoy magam taŋ mikuli na, a zuɓ soŋ soŋ a wuzla taŋ, a gi taŋ mikuli zlam zlam wãˀ da Buymisemuŋ, ar li ngi mikuli naŋ mi ɗiya tuwa. 21Mikuli misi zĩˀĩ naŋ a tisl mevel tuwa, Bumbulvuŋ mizãˀã na, dar a ɓi a mevele: «Y'anta sa nisa hirwuyo asi mburo mata ndiɗaˀ wãˀ. Gisiŋ wuluk ngir mevel ngi mbur ngi gi malambaˀa, naŋ zle ti zuŋ. Amma y'anta sa ziza gwat misi titiriheye keɗeɗe kaɓa ya miga hana mata ndiɗaˀ wãˀ. 22Hirwuyo, ti naŋ misi ada ɗagay na, mohor ati sifi, kiya himiɗ ati kiya lendeɓ, viya ati hinpas, papas ati duvuɗ gar na, anta sa kiɗam mi ta ndiɗaˀ wãˀ!»
נבחרו כעת:
ZLI VIRZI 8: BEGDC
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
Bible en Langue Guiziga © L’Alliance Biblique du Cameroun, 2011.