ZLI VIRZI 7
7
Nowe ati hay naŋ gar micam ng'ar palalam
1Bumbulvuŋ a ɓa Nowe na: «Ci ng'ar palalama, ka ati mizli ngi hay ɗikey gar. Asi yi pura na, a wuzla mizli migwenehey na, mijeŋŋe a mbuŋ ɗu, i ka pal ɗiki. 2A wuzla gwat misãmihey gar ngi gi mikuli da ya Buymisemuŋ, hil vur sukwi gar na, cuw cuw tarnaˀ, mizile zlaɓ ati mongoso, zlaɓ ati mongoso. Amma a wuzla gwat misããmihey magam taŋ mikuli ta na, hil cuw cuw vur sukwi taŋ, mizile zlaɓ ati mongoso, zlaɓ ati mongoso tewle. 3Ɗiyuwoy kwana, hil zlaɓ ati mongoso, zlaɓ ati mongoso vur sukwi gar cuw cuw tarnaˀ, mizile zlaɓ ati mongoso, zlaɓ ati mongoso, ɓa sukwi taŋ a ji nga mbuŋ nga mbuŋ asi ruwuy gar. 4Asi a ndir hin tarnaˀ, ɓa i sa go vuŋ a ruwuyo, a sa zik papas papas kukur mufaɗ, duvuɗ duvuɗ kukur mufaɗ, gwat misi titirihey ya miga taŋ gar na, i sa ngizla taŋ leɗeɗ gar asi ruwuyo.» 5Ɓi Bumbulvuŋ miɓa ɗaˀ le da Nowe ɓa a ga gar na, a ga le kasl kasl kanah.
Mekepel madiɗaŋ misirta hirwuy gar
6Ti mekepel madiɗa misirta hirwuy gar na, naɓa Nowe naŋ ti vi skat skat merkeɗe. 7Nowe a cam palalam ati ziri naŋhay, ngwas naŋ waɗ ngwas ngi ziri naŋhay, ɓa a laham a wuzla mekepel madiɗa na. 8Gwat misãmihey ngi gi mikuli ati ngi gi mikuli ta, ɗiyuwoy waɗ gwat memeɗe mikirnini ngisi ruwuyoy gar na, 9a soko gar ng'avi Nowe a hur palalama cuw cuw, mizile zlaɓ ati mongoso, mizile zlaɓ ati mongoso, kaɓa Buymisemuŋ miɓa ɗaˀ le. 10Angi hin tarnaˀ na, mekepel madiɗa a sirta hirwuyo le gar. 11Ti Nowe mindila vi skat skat merkeɗ, hin kuruˀ nga tarnaˀ ngi kiya mucuw naŋ na, miviɗiviɗi ngi yam mijileŋhey a nduzom, mifiliw ngir birngiŋ ngi muŋhoy a wunam biɗiŋ biɗiŋ. 12Vuŋ a gi a ruwuyo hã a zik papas papas kukur mufaɗ, yo duvuɗ duvuɗ kukur mufaɗ. 13Nowe micam ng'ar palalam ati ziri naŋhay na, i tapas nah vuna. Taŋ: Sem, Kam, Zafet waɗ ngwas naŋ ati ngwas ngi ziri naŋhay makir taŋ, 14waɗ sukwi ngi gwat misi titiri ngi ɓuhoy ati ginewey, gwat memeɗehey mikirnini a ruwuy, sukwi ngi ɗiyuwoy gar, gwat maslikiɗ ati gwat misi zlara gar. 15Gwat misi titiri mamusuwunamay gar a soko zlaɓ cuw zlaɓ cuw ng'avi Nowe a hur palalama. 16Sukwi ngi gwat misããmi gar, a cam palalama, mizile zlaɓ ati mongoso, mizile zlaɓ ati mongoso, kaɓa Buymisemuŋ miɓa ɗaˀ le da Nowe tuwa. Dar Bumbulvuŋ a gica miviŋ ngi palalam a hirnga Nowe. 17Mekepel madiɗa a zuɓ asi ruwuyo, a zik hin kukur mufaɗa. Yam a zuɓ, a slikiɗa palalama njiraŋ avu hirwuyo, aro capap a hirnga yama. 18Yam ara sik haɗi haɗi ti vendeke na si, ciɗak ciɗak asi ruwuyo, palalam ara liˀi sikikiki a hirnga yama. 19Yama ara zuɓ ti gidaŋ asi ruwuyo, a sirta muwã madiɗahaya sirit sirit wãˀ, si gazlavay kurzluˀ gar. 20Yam a nda hirnga ngi muwãhaya yik yik fineˀ metir tarnaˀa. 21Gwat misi titiri mikirnini asi ruwuyo, a ngizlam leɗeɗ gar: ɗiyuwoy, ginewey, gwat misi titiri ngi ɓuhoy, gwat mislireɓ slireɓ malaˀam a ruwuy, waɗ mizli ma. 22Gwat misi titiri mamusuwunamay a ruwuy mingbaŋngbaŋ gar na, a micam. 23Bumbulvuŋ mingizla gwat misi titiri ngi ruwuyoy gar na, naŋ kahana. Zle avu mizli titrahay, gwat madiɗa misãmihey, mislireɓ slireɓey hã avu ɗiyuwoy. A ngizlam leɗeɗ wãˀ asi ruwuyo. Sey Nowe pal naŋ mindir waɗ mizli misi ati naŋhay bummoˀ a hur palalama.
Nowe ati hay naŋ gar muboko tir palalam
24Yam a ndir fin fin asi ruwuyo, a zik hin skat ti kukur zlum.
נבחרו כעת:
ZLI VIRZI 7: BEGDC
הדגשה
שתף
העתק
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fhe.png&w=128&q=75)
רוצים לשמור את ההדגשות שלכם בכל המכשירים שלכם? הירשמו או היכנסו
Bible en Langue Guiziga © L’Alliance Biblique du Cameroun, 2011.