SAHRUOTHUNA 4
4
Kain Ta Abel A Thie
1Cakhutaata Adam ca a napuvnung Evi kha pachang te nu a phya. Kain kha sa te, “Abyipa abyana thueta sacapaa i sa tli,” a ta. 2Cakhutaata a nuta Abel kha a sa. Abel ca tuv a khiepa cuo te Kain ca lu a thlupa ta a cuo. 3Cuo aa vya de tiyta Kain ta Abyipa abie riypata lu taata a vyipa kha a vya cyi. 4#Heb 11.4 Abel zaw ta a pachuo taapa a tuvtaata kha vya cyi te, thie te a thu cenapa kha la te Abyipa ca a pihluo ra. Abyipa ca Abel hne a pihluopa cunglie kha a palung a tluo. 5Cuorasala Kain hne a pihluopa cunglie kha a palung tling vyi. Caacuonakawta Kain ca a hi haasa te a minghmie a chie. 6Abyipa ta Kain kha, “Khaapanakawma na hi haa te na minghmie ca a chie? A phasa pata tue la cuhluo li pata ica aw'a ma? 7A phata tah na tue li kieca suena ta chiypakaa lie kha a nu te aca bya thluo kha; suena ta nama kha aca uv khing, cuorasala nama ta na uv riypa tana a cuo,” a ta.
8 #
Mat 23.35; Luk 11.51; 1Jhn 3.12 Kain ta a nuta Abel kyihuo khata, “Ruo luo si'a puv,” a ta. Ruo luo ama chiy taata a nuta Abel kha a thie. 9Cakhutaata Abyipa ta Kain kha, “Na nuta Abel ca khaapaliema a aw?” a ta. Kain ta, “Pachang va ang; Kama ca i nuta a kingtuv tama i cuo?” a ta. 10#Heb 12.24 Abyipa ta, “Tuokhaapa hmang ma na tue? Naathlie tie; Na nuta thiyse na alyi taata kama'a luo a kya khi! 11Nama ca na kuv ta na palangpa na nuta thiyse dang riypata a pakaa a kya uopa alyi taata chiesapa tana na cuo tli. 12Lu na thlu tiyta alyi ta na cuota kung pavyi'a vyi; ing li lu li pata a vievuvlepa tana na cuo aa,” a ta. 13Kain ta Abyipa ca, “Duo ina tepa ca hing ang khu'apa cuo vyi! 14Ataning ca alyi taa hingta inaa cade tli ciy, na hmiekung taa hingta i nu aa; hingpa alyi lie hing ing li lu li pata vievuvle'a angte, naa hmungpa mekaa ta ina thie'a yi,” a ta. 15Cakhutaata Abyipa ta, “Cahaacata cuo'a vyi! Ahunghmuo cuose Kain a thiepa ca le sariy tana phuv la pata a cuo aa,” a ta. Caacuonakawta Ama a hmungpa ahungtahmuo a ma thie li riypata Abyipa ta Kain cunglie kha pachangna riypa suokha a chi. 16Cakhutaata Kain ca Abyipa hmiekung taa khata a ruo te Eden ningchiyluo ta a awpa Nod ruo lie kha khy a sa.
Singna Hringzya Aa Pathuna
17Kain ta a napuvnung kha pachang te nu phya te Enok a sa. Khypuv khy kha tla te a sacapaa ming la pata Enok a ta. 18Enok ta Irad a sa; Irad ca Mehujael paa ta a cuo, Mehujael ca Methushael paa ta a cuo, Methushael ca Lamek paa ta a cuo. 19Lamek ca napuv pahning a hnyi; pakha ca Adah ta yi te a hrangpa pakha ca Zillah ama ta. 20Adah ta Jabal kha sa te ama ca thluodaa lie aw yi te sahring a ziypa zaw bangkhuo ciypathlatuv ta a cuo. 21A uvnupa ming ca Jubal ta cuo te ama ca tingtuo hne ramang a tungtuv bangkhuo ciypathlatuv ta a cuo. 22Zillah ta Tubal-kain kha sa te, ama ca daa hne thaa su a sapa bangkhuo ciypathlatuv ta a cuo. Tubal-kain sietanung ca Naamah ta a cuo.
23Lamek ta a napuvnung zaw kha:
“Adah hne Zillah, na naathlie tie ung;
niema Lamek napuv zaw, i ripa hing naathlie tie ung;
Hmaa ina paphya nakaw tana satliepa pakha i thie,
24Kain a thiepa kha le sariy ta phuv lapa a cuo kieca,
Lamek a thiepa ca le sawsariy le sariy ta phuv lapa a cuo hrahring aa,” a ta.
25Adam ta a napuvnung kha pachang pakhaa te, sacapaa pakha sa te Seth ta pata ming a di, tahematapakieca ama ta, “Kain ta Abel a thie nakaw tana Khazing ta Abel luvriy ta haatiy pakha ina pi,” a ta. 26Seth zaw ta saata pakha sa te, Enosh ta pata ming a sa. Capa cuo ning taa cata Abyipa ming hmuo pata abie hruo ama za pathu.
נבחרו כעת:
SAHRUOTHUNA 4: LNT
הדגשה
שתפו
העתק
רוצים לשמור את ההדגשות שלכם בכל המכשירים שלכם? הירשמו או היכנסו
Lutuv Holy Bible © Bible Society of Myanmar, 2023.