SAHRUOTHUNA 3
3
Suena Taapa Hne Duotena
(Rom 5.12-21)
1 #
Bie 12.9; 20.2 Abyipa Khazing ta a sapa saruopa hrangpa tie laata pariy ca a zyate viepa ta a cuo. Pariy ta canung ca thukhyi te, “Khazing ta, ‘Diedung chunglie thingthyi suokhakha hing ning'a va ung ciy aca tapa yi a aw ma?” a ta. 2Canung ta, “Diedung chunglie a awpa thingthyi bangkhuo hing ma ning khu; 3cuorasala Khazing ta, “Diedung liekhingkhuo lie a awpa thingthyi ca ning'a va ung ciy, a hrie hmuo hrie'a va ung ciy, nama ning kieca nama thiy aa malie a ta,” a ta. 4Cuorasala pariy ta, “Thiy'a va ung ciy; 5nama ning kieca nama ning khu pahne ta nama ming vuo'a te Khazing haata a pha hne a chie kha nama pachang ra aa, tapa kha Khazing ta a pachang nakaw tana a cuo,” a ta. 6Canung ta capa thingkungpa a thyi ta malie palung a lanazya, a puvthenazya, hne singna riypata khing aa chiynazya kha a hmung tiyta a thyi kha lu te a ning; aa thaalie a awpa a navaapa zaw kha a cawta pi te a ning ra. 7Ama ning khu pahne ta ama ming kha vuo te ama thliehripa ta ama awpa kha amaa pachang; caacuonakawta thyikuv hnaa kha bie yi te amaa hryi.
8Zuoluo ningne ning, capa diedung lie Abyipa Khazing a vya cakuolepa pu kha ama thyi tiyta capaa hne a napuvnung ca Abyipa Khazing hmiekung taa khata diedung chung thingkungpa hraw luo kha ama vaa nu. 9Cuorasala Abyipa Khazing ta capaa kha u te, “Khaapaliema nama aw?” a ta. 10Ama ta, “Diedung lie na vya cakuolepa pu kha thyi angte na i thliehripa ta i aw nakawta ca ciy angte i nu,” a ta. 11Khazing ta, “Ahungma na thliehripa ta na awpa ca caa chang?” Ning'a va ung ciy ica tapa yi thingthyi kha ning kanaa ung ciy? a ta. 12Capaa ta, “Kama ina pipa ciy canung hingta thingthyi ca na pi tena i ning,” a ta. 13#2Kor 11.3; 1Tim 2.14 Cakhutaa cata Khazing ta canung kha, “Na tuepa hmang hing khaapatama a cuo? a ta. Canung ta, “Pariy ta na dung tena i ning,” a ta. 14Abyipa Khazing ta pariy kha,
“Nama ca hingpa hmang hing na tue nakawta,
saruopa bangkhuo hrawlie
chiesana kha na ang aa;
na pavaw ta a thiy'a cate,
alyi diypa kha
na chuo chung bangkhuo ta na ning aa.
15 #
Bie 12.17
Canung hne namaa lalalieta cuose,
canung ciyhruo hne nama ciyhruo alalalieta cuose a cariena kha i chi aa;
ama ta na luv kha ca carie'a te,
nama ta a lidu kha na daw aa,” a ta.
16Canung kyihuo khata,
“Nu na phya tiyta pasana i paruv sa vie aa;
pasana a hluvsa na ang cangta na saa na sa aa,
cuorasala na navaapa ca khing ngiethie'a cate,
ama ta aca uv aa,” a ta.
17 #
Heb 6.8
Cakhutaata capaa kyihuo khata,
“Nama ca na napuvnung bie kha naa ngie nakawta hne,
‘Ning'a va ung ciy,’ ica tapa yi
thingthyi kha na ning nakawta,
na cuota alyi hing chie i sa aa;
na chuo chung bangkhuo riethyisa pata re hrie'a cate na sa na ning aa;
18alyi lie ahling hne asu kya pu'a te,
lu lie a pupa uohnaasiyyhnaa kha na ning aa.
19Alyi luo na kaana te ta,
na hmie taata na mathle aa ruo pathlana te ta
re hrie'a cate na sa na ning aa.
Tahematapakieca alyi ta sapa tana na cuo.
Nama ca alyi diypa ta cuo cate alyi diypa luona na kaa pakhaa aa,” a ta.
20Capaa ta a napuvnung kha Evi ta pata ming a sa, tahematapakieca ama ca cawsaa bangkhuo nung tana a cuo. 21Cakhutaata Abyipa Khazing ta Adam hne a napuvnung ca savang ta caw kha tuepa yi te a pahryi yi.
22 #
Bie 22.14
Cakhutaata Abyipa Khazing ta, “Mang tie ung, cawsaa hing a chie a pha pachang te kiema malie a lu tli hing, hringna thingkung a thyi hing lu'a te, ning'a te chuozaa ta a hring pathlyi aa,” a ta. 23Caacuonakawta Abyipa Khazing ta Eden diedung taa khata papya te ama a sanapa ta a cuopa alyi kha thlu riypata a pathlie. 24Khazing ta cawsaa ca papya te hringna thingkung luopuv kha rieve riypata Eden diedung ningchiyluo kuo lie kha cherubim hne a kuo ting ta aa pahie thepa a khe hunglungpa zueziy kha a chi.
נבחרו כעת:
SAHRUOTHUNA 3: LNT
הדגשה
שתפו
העתק
רוצים לשמור את ההדגשות שלכם בכל המכשירים שלכם? הירשמו או היכנסו
Lutuv Holy Bible © Bible Society of Myanmar, 2023.