LUKAS 13
13
Doraka surang kasissaang
13:1-5
1Rihattu injo rie'mo tau mange ri Isa ngerang kareba ripassala'na tau Galilea, nulahuno injo Pilatus jari rarana a'leo'i rara binantang nulapa'koro'bangangi injo. 2Appaui Isa mange ri iyai, ”Pangisse'mu tau Galilea rihuno injo la'bi loheang kadorakaanna na kadorakaanna tau Galilea maraeng injo, saba' appakonjona passareannai? 3Gele! PauKu mange ri kaui. Mingka ampa geleiko jarra, manna kau lamate appakonjo ngase' todo'ko. 4Iyareka pangisse'mu tau sampulo karua injo mate lara'bai tembo' riampi'na Siloam, la'bi loheang kasalaanna battu rikasalaanna sikuanna tau maraeng ammari injo ri Yerusalem? 5Gele! pauKu mange ri kau. Mingka ampa geleko jarra, manna kaui lamate appakonjo ngase' todo'ko.”
Pakkalebarang poong kaju ara gele ambua
13:6-9
6Jari lapaui pole Isa pakkalebarang inni, ”Se're tau rie' poong kaju arana nuattimbo ri koko anggoro'na, na ia mangei a'boja buana poong kaju ara injo, mingka gele nguppa. 7Jari lakuamo ri paahung koko anggoro injo: Janjangimu, tallungtaumma sanging mae konni a'boja buana poong kaju ara inni na gelepa minang anrumpa'. Ta'bangi poong kaju inni! Tide' jua matu-matunna attimbo ri koko inni! 8Appihalimu tau injo: Karaeng, lapppasammu riolo attallasa taung inni, lakubingkung-bingkungi tana risiappuna ampai kusare se'la, 9barang komo apa taung pole akkulle juai ambua; ampa gelepai pade', injo rita'bammu!”
Isa appakagassing tau garring ri allo Passambajangang
13:10-17
10Rie' se're hattu Isa ngajarai risala se're sapo passambajangang ri allo Passambajangang. 11Ri injo rie' se're bahine sampulomu karua taunna ladongkoki setang na lagarringi sa'genna bungku' na gelemu akkulle ammenteng lambusu. 12Rihattunna Isa lajanjang bahine injo, lakeo'i na appaui mange ri ia, ”Oe idong, molemu garrimmu.” 13Maeng injo lapatompangi limanna Isa rateang ulunna bahine injo, na rihattu injo toje' jua ammenteng lambusu bahine injo, na lapakala'biri Allataala. 14#Kel. 20:9-10; Ul. 5:13-14Mingka kuku'i ponggahana sapo passambajangang injo saba' Isa appakagassingi tau garring ri allo Passambajangang, jari lakuamo mange ri tau lohe injo, ”Rie' annangallo laripake anjama. Jari battuimoko risala se'renna allo injo laripakagassing na ako ri allo Passambajangang.” 15Mingka appaui Isa mange ia, ”Oe tau munape', gelejua sikuanna tau ri kau lapasulu' tedonna iyareka jaranna battu ri barana na mangei lapainung manna injo allo Passambajangang? 16Bahine inni tuina Abraham na sampulomu karua taunna ritambang ri Ibilisi; gelejua ia parallui rilekkesi battu ritambanna injo?” 17Rihattu appau appakonjo Isa, siri' ngase'i sikonjo balinNa na tau lohe injo sanna' rannuna kanara lajanjanna sikonjo passala nula'biri, numaeng lageokang injo Isa.
Pakkalebarang lisere sinahu na bibi
13:18-21
(Mat. 13:31-33; Mark. 4:30-32)
18Jari lakuamo Isa, ”Assimpole apa passala Pakkaraengang Allataala na surangang apamo lakupassinrapangangi? Pakkaraengang injo assinrapangi lisere sinahu nulaalle na lapatahurui tau ri kokonna, 19attimbo lisere injo na a'jari poong na jangang-jangang injo a'bua'i poo ri pangka-pangkana.” 20Appaui pole Isa, ”Surangang apamo lakupassinrapangi Pakkaraengang Allataala? 21Pakkaraengang injo assinrapangi bibi nulaalle injo se're bahine na lakaleo'i lalang ri labu' patampulo litere lohena sa'genna assoho ngase'.”
Inaimo laripakasalama'
13:22-30
22Maeng injo a'lampai Isa a'lili' battu rise're kota mange ri kota maraeng na battu ri se're desa mange ri desa maraeng langajara na latarrusang lingkaNa mange ri Yerusalem.
23Jari rie'mo se're tau akkuta'nang mange ri Ia, ”Karaeng, siso'di' jua tau laripakasalama'?” 24#Mat. 7:13-14Appihali Isa mange ri tau rie' ri injo, ”Apparri-parriko a'molong ri babaang sipu injo! Saba' Nakke appau mange ri kau: Lohe tau apparri-parri a'ra' la'molong, mingka gele akkulle. 25Jari ampa ambaummu opuna sapo na maemmu lajoli pallo'bi'na, ammentengi mamoko pantarang ampako akkatto'-katto' pallo'bi' na mukua, Karaeng, ripambungkarangkang pallo'bi'! na Ia laappihali ampai appau mange ri kau, Geleiko kuisse' tau battu ri anteeiko mae. 26#Mat. 7:22-23Jari lamukuaimo: Maengkang nganre surang nginung ri a'rakamMu na Kaumo maeng ngajara risikonjo lalang bakka' ri kota pammariamba! 27#Mzm. 6:9Mingka Ia laappau mange ri kau: Geleiko kuisse' tau battu ri anteeko mae, a'lampako battu ri a'rakangKu, oe kau ngase' tau anggeokang intu nudaa! 28#Mat. 22:13, 25:30 #Mat. 8:11-12Ri injomo mange larie' parau na gigi a'rekuki, rihattu mujanjannna Abraham surang Ishak na Yakub surang sikonjo nabbi lalang ri Pakkaraengang Allataala, mingka kau laripamballungko ansulukang. 29Larie' tau battu ripatang sulapa'na lino inni na iyaimo laattolong nganre lalang ri Pakkaraengang Allataala. 30#Mat. 19:30, 20:16; Mark. 10:31Sitoje'na rie' tau kateppusang laa'jari kaminang riolo na rie' tau kaminang riolo laa'jari kateppusang.”
Isa parallu mate ri Yerusalem Pa'nganroang mange ri Yerusalem
13:31-35
(Mat. 23:37-39)
31Rihattu injo rie'mo lohe tau Farisi na appaui mange ri Isa, ”A'lampamoko, bokoi tampa' inni, saba' a'ra'Ko lahuno Herodes.” 32Lakuamo Isa mange ri iyai, ”A'lampaimoko na paui mange ri asu borong injo: Nakke ambongka setang na appakagassing tau garring, allo inni surang mintara, na ri allo makatallunapa ampaa laammono'. 33Mingka allo inni na mintara surang ruambangngi parallui Kutarrusang juapa lingkaKu, saba' gele siratang se're inni nabbi lamate rihuno ampa gelei ri Yerusalem. 34Yerusalem, Yerusalem, kau muhuno sikonjo nabbi na mubundu'i batu sikuanna tau risuro mange ri kau! Pinsikuramma a'ra' lapparappung ana'-ana'mu, assimpole anrong jangang laparappung injo ana'-ana'na rahangang kapina, mingka geleiko a'ra'. 35#Mzm. 118:26Sitoje'na sapommu inni laribokoi na laa'jari sino-sinoi. Mingka Nakke appau mange ri kaui: Gelema lamujanjangi pole sa'genna larapi' hattu mupaunai:
Ripakala'birimu tau rie' injo mae lalang arenna Karaeng Allataala!”
נבחרו כעת:
LUKAS 13: LAI_SLY
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
@LAI 2012 Indonesian Bible Society (Lembaga Alkitab Indonesia)
