YAHYA 2
2
Pa'bontingang ri Kana
2:1-11
1Ri allo makatalluna rie' pa'bontingang ri Kana ri tana Galilea, na idonna Isa rie' todo'i ri injo; 2Isa surang ana' gurunNa rikeo' todo'i mange ripa'bontingang injo. 3Rihattunna kala'busang ere anggoro inungang, lakuamo idonNa mange ri Ia, ”Kala'busangi anggoro inungang.” 4Lakuamo Isa mange ri idonNa, ”Apa mukaa'raki mae ri Nakke, idong? Gelepai larapi' hattungKu.” 5Mingka idonNa appaui mange ripadaha-daha injo, ”Apa nulapau injo Isa mange ri kaui, geokang appakonjoi!” 6Ri injo rie' annambatu talle nuripakasadia pambissai lima surang bangkeng assituru' atoranna tau Yahudi inni, assinna takkaruapulo iyareka tassibilangang ruampulo litere. 7Appaui Isa mange ripadaha-daha injo, ”Assii ere talle intu sa'genna panno.” Jari laassi toje'i sa'genna panno. 8Maeng injo, appaui Isa mange risikonjo padaha-daha injo, ”Konni-konnina sai'i na erangi mange ri ponggaha pa'buakiang intu.” Jari laerangimu. 9Sungka'i ponggaha pa'buakiang injo lapinyami ere maeng injomo minra a'jari anggoro, – na ia gele laisse' nubattu ri antee mae, mingka padaha-daha, tunyai' injo ere laisse'i – ia lakeo'i bonting bura'ne injo, 10na lakua mange ri ia, ”Sikuanna tau appatalai anggoro nubaji' ri uruna na ampa baji'mu pakkasia'na tau nginung injo, ampamo nugele injo baji', mingka kau annanroko anggoro baji' sa'genna hattu inni.”
11Passala injo lapaa'jari Isa ri Kana ri tana Galilea, na iamo inni pakaramula lapaa'jari battu risikonjo tanraNa na ri appakonjona Ia lapappijanjangammu kala'biranNa na ana'-ana' gurunNa tappa'i mange ri Ia.
Isa ri Kapernaum
2:12
12 #
Mat. 4:13
Rimaennamo injo a'lampai Isa mange ri Kapernaum, a'rurung-rurungi indonNa surang uranna siana' na ana'-ana' gurunNa, na ammari ngase'i ri injo sikurangallo sallona.
Isa appakatangkasa Sapo Allataala
2:13-25
(Mat. 21:12-13; Mark. 11:15-17; Luk. 19:45-46)
13 #
Kel. 12:1-27
Sungka'i seppa'mo allo Pa'lappasanna tau Yahudi inni, a'lampai Isa mange ri Yerusalem. 14Rijurunna Sapo Allataala Ia anrumpa'i lohe padanggang sapi, jimbala na bangkeng bodo, na lohe pole tau laappassambe doe' attolong ri injo. 15Ia a'bua'i pamba'bala battu ritulu' ampai lapasimba ngaseki battu ri Sapo Allataala surang sikonjo jimbala na sapinai; doe' panukara'na lapasimbongi Isa na mejannai lapatua'-tuasai naung ri tana. 16Mange ripadanggang bangkeng bodo injo Ia appau, ”Alle iangase'na inni battu ri inni, ako bua'i Saponna AmmangKu a'jari tampa' pa'balu'-balukang.” 17#Mzm. 69:10Jari ngu'rangi ngase'mu ana' gurunNa ma'nassana rie' ta'ukiri: ”Angngai ri sapomMu iamo lalapaa'jaria Ahu.” 18Sikonjo ponggaha Yahudi injo lapa'ngarai Isa, lakua, ”Tanra apa akkulle Mupappijanjangang mae ri kambe ma'nassana Kau akkulle appanggeokang appakontu?” 19#Mat. 26:61, 27:40; Mark. 14:58, 15:29Appihali Isa mange ri iyai, ”Rokai Sapo Allataala inni, na tallungallo juai sallona Kupaentengi muliang.” 20Jari lakuaimo tau Yahudi injo mange ri Ia, ”Patampulo annang taung tau inni appaenteng Sapo Allataala na Kau tallungallo juai lamupaenteng?” 21Mingka nulakuangang injo Isa ri Sapo Allataala iamo intu batangkalenNa to'jua. 22Injomo saba'na, rimaeng attallasa'Na muliang battu rikamateang inni, ampamu ngu'rangi ana'-ana' gurunNa ma'nassana passala injo maemmu lapau-pau Isa, na iyai injo tappa'i mange ri Kitta' Tangkasa na mange pole ripau-pau numaeng lapau injo Isa.
23Rihattunna rie' juapa Isa ri Yerusalem, ri allo Pa'lappasang injo, lohe tau tappa' lalang ri arenNa, saba' iyai maengi lajanjang tanra-tanra nugele samara lapaa'jari Isa. 24Mingka Isa gele lapappitappakang kalenNa mange ri iyai, saba' Ia laisse'i sikuanna rupatau, 25na saba' gelejuai parallu manna se're tau lassare sa'bi ri Ia ripassala rupatau inni, saba' Ia laisse'i apa nurie' lalang ri atina rupatau inni.
נבחרו כעת:
YAHYA 2: LAI_SLY
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
@LAI 2012 Indonesian Bible Society (Lembaga Alkitab Indonesia)
