YAHYA 1
1
Pau Allataala a'jari rupatau
1:1-18
1Ri pakaramulana rie' Pau; Pau injo rie'i ri Allataala na Pau injomo Allataala. 2Ia ri pakaramulana rie'i ri Allataala. 3Iangase'na Ia appaa'jari na ampa gele kanara ri Ia tide' nua'jari manna se're risikuanna numaeng injo ripaa'jari. 4Lalang ri Ia rie' tallasa na tallasa injo assare sinara ri rupatau inni. 5Sinara injo assau rikalammang na kalammang injo gele akkulle ambeta. 6#Mat. 3:1; Mark. 1:4; Luk. 3:1-2Rie'mo se're tau risuro ri Allataala, Yahya arenna; 7ia rie'i assimpole se're sa'bi laassare passa'bi ripassala'na sinara injo, solanna patteteang ri iamo sikuanna tau a'jari tappa'. 8Gele ia sinara injo, mingka ia parallui lapappisa'biang passala'na sinara injo. 9Sinara nusitoje'na, nulalasinari injo sikuanna tau, rie'mu ri lino inni.
10Ia rie'mu lalang ri lino inni na lino inni ripaa'jari kanara ri Ia, mingka Ia gelei riisse' ri lino inni. 11Ia rie'i mange rianunNa, mingka sikuanna tau anunNa gele latarima. 12Mingka risikuanna tau latarima injo risare kahasa ri Ia solanna a'jari ana'-ana' Allataala, iamo intu iyai tutappa' injo lalang ri arenNa; 13iyaimo tau rianakang nugele battu ri rara iyareka battu ria'ra' rupatau, gele pole nubattu rikanara sinnana se're inni bura'ne, mingka nubattu ri Allataala.
14Pau injo maemmu a'jari rupatau, na ammarii ripassa'lakanta, na ditte maemmu rijanjang kala'biranNa, iamo intu kala'birang nurisareang injo mange ri Ia assimpole ana' sitau-tau ri AmmanNa, rassi barakka' na katojekang. 15Yahya assare passa'bi ripassala'Na na appau bakka'i, ”Iamo inni, nukukuangang injo rihattungku appau: Ribokoangangku larie'i Tumaeng riolomu rie', saba' Ia rie'mu rigelekupa rie'.” 16Saba' battu rikarassianNa ditte ngase' inni maemmuki nguppa dahuang lohe rupanna barakka'. 17Saba' hukkung Tora' ripassareangi patteteang ri Musa, mingka lasareki barakka' na katojekang nubattu ri Isa Almase.
18Gele rie' manna se're tau maeng anjanjang Allataala, mingka Ana' sitau-tauna Allataala, Turie' injo ri rihaanna Amma, Iamo lapalahere Allataala.
Lapappisa'biangi kalenna Yahya
1:19-28
(Mat. 3:1-12; Mark. 1:1-8; Luk. 3:3-6, 15-17)
19Iamo inni passa'bina Yahya rihattunna tau Yahudi rieki injo ri Yerusalem assuroi lohe imang surang tau Lewi lamange akkuta'nang ri ia, ”Inaiko? Kaumo Almase?”
20Lasa'bii kalenna na gele a'bura-bura, lakua, ”Gele nakke Almase.” 21#Ul. 18:15, 18; Mal. 4:5Maeng injo akkuta'nangimu isse' mange ri ia, ”Ampa appakonjo, inaiko? Apa kaumoka Elia?” Appihali pole Yahya, ”Gele!” ”Kaumoka nabbi larie' injo?” Lakuamo Yahya, ”Gele!” 22Injomo saba'na lakuaimo mange ri ia, ”Inaiko? Saba' kambe inni parallukang assare pappihali mange ri tau lasuro injokang. Apa lamupau ri kalemmu?” 23#Yes. 40:3Pappihalinna, ”Inakkemo sa'ra tau a'nga'ngara bakka' injo ri parang luara, pakalambusu pa'lalanganna Karaeng Allataala! Assimpole numaeng injo lapau Nabbi Yesaya.”
24Battu ri tau risuro injo, rie' todo' tau Farisi. 25Akuta'nangi ngase'mu mange ri ia, lakua, ”Ngura anrioko tau, ampa pade' gele kau Almase, gele todo'ko Elia, na kau gele nabbi larie' injo?” 26Appihali Yahya mange ri iyai, ”Nakke anrio tau ere jua kupake; mingka rie' tau ammenteng ripassa'lakammu tugele muisseki, 27iamo intu Ia, tulabattu injo ribokoangangku. Manna pallekkesi tulu' sandalaNa nakke gelea siratang.”
28Passala injo a'jari ri Betania ha'leanna Balang Yordan ri tampa'na Yahya anrio tau.
Yahya anjo'jo mange ri Isa
1:29-34
29Rimintara'namo mae Yahya lajanjangi Isa ambattu mange ri ia na lakuamo, ”Janjangimu Ana' jimbala'na Allataala, nulaappakalappasa injo kadorakaang ri lino inni. 30Iamo kukuangang rihattu kupauna: Ribokoangangku sallo' larie' se're tau labattu numaeng la'bi riolomo rie' na nakke, saba' Ia rie'mu ritide'ku juapa. 31Manna nakke riolo gelei kuisse', mingka iamo injo tujungku rie' na anrio tau surangang ere, solanna Ia ripappiissekang ri Israele.”
32Maenna injo assa'bi Yahya, lakua, ”Nakke maemmu kujanjang Nyaha Tangkasa naung battu ri langi' assimpole bangkeng bodo, na ammari ri baho ulunNa. 33Na manna nakke riolo gele todo'i kuisse', mingka Ia, tuassuro injo ri nakke lanrio tau surangang ere, maengi appau mae ri nakke: Ampa mujanjangi Nyaha Tangkasa injo naung rise're tau na ammari ri baho ulunNa, Iamo lanrio tau surangang Nyaha Tangkasa. 34Nakke maemmu kujanjang na assarea passa'bi: Iamo inni Ana' Allataala.”
Ana'-ana' gurung bungasa'na Isa
1:35-51
35Sungka'i mintara mae Yahya ammentengi pole ri injo assurangi rua ana' gurunna. 36Na rihattu injo lajanjammu Isa lumalo, jari lakuamo, ”Janjangimu Ana' Jimbala'na Allataala!” 37Ruaiya ana' gurung lalangngere apa nulapau injo, maeng injo a'lampaimu minahang ri Isa. 38Mingka assailei Isa mae riboko na lajanjangi ma'nassana iyai minahangi ri Ia jari lakuamo mange ri iyai, ”Apa mubojai?” Lakuaimo mange ri Ia, ”Rabbi (battuanganna: Guru), ri anteeKi mae ammari?” 39Appaui Isa mange ri iyai, ”Maeko lamujanjangi.” Mangei toje'mu na lajanjangi ri antee mae ammari, na allo injo assipammariangi surangang Ia; hattu injo barang latette' appa'mu. 40Rie' sala se'renna battu ri tau rua injo iamo intu Andreas, uranna siana' Petrus, sungka'i maeng lalangngere pauna Yahya minahangi ri Isa, 41Andreasmo pakaramula laurangi assijanjang Simon, uranna siana', na appaui mange ri ia, ”Kambe tauppamu Almase (battuanganna: Kristus).” 42Ia laurangi mange ri Isa. Isa latangarai na appaui, ”Kau Simon, ana'na Yahya, kau lariareng Kefas (battuanganna: Petrus).”
43Rimintara'namo mae latappuki Isa laa'lampa mange ri Galilea. Ia assiuppai Filipus na lakua mange ri ia, ”Minahangko ri Nakke!” 44Filipus assala'na battu ri Betsaida, kamponna Andreas na Petrus. 45Filipus laurangi assijanjang Natanael na lakua mange ri ia, ”Kambe tauppamu Ia nulapau injo Musa lalang ri kitta' Tora' surang ri kitta'na sikonjo nabbi.” 46Appaui Natanael mange ri ia, ”Apa lama'ringi rie' nubaji' battu ri Nazaret?” 47Lakuamo Filipus mange ri ia, ”Maeko na janjangi!” Isa lajanjangi Natanael ambattu mange riampi'Na, jari lapaumu passala'na ia, ”Janjangi, inni se're tau Israele toje', tide' leo'na lalang ri ia!” 48Lakua Natanael mange ri Ia, ”Anteekamua Kau na muisse'a?” Appihali Isa mange ri ia, ”Rigelemupa lakeo' Filipus, Kujanjammoko attiolung rahangang poong kaju ara.” 49Lakuamo Natanael mange ri Ia, ”Guru, Kau Ana' Allataala, Kaumo Karaeng ri taunna Israele!” 50Appaui Isa, ”Saba' Nakke appau ri kau, Kujanjangko attiolung rahangang poong kaju ara, jari tappa'ko? Kau laanjanjang passala nula'bi bakkakang battu ri injo.” 51#Kej. 28:12Jari lakuamo Isa mange ri ia, ”Sitoje'na Nakke appau mange ri kaui, kaumo laanjanjang langi' ta'bungkara na malaeka'na Allataala a'nai naung ri injo mange ri Ana' Rupatau.”
נבחרו כעת:
YAHYA 1: LAI_SLY
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
@LAI 2012 Indonesian Bible Society (Lembaga Alkitab Indonesia)
