Yohanes 13
13
Yesus arye, el wipdeiyamuk nang, 12 nang sik yan deice, mek ilikeibukce, atalak arye nyabuk yupu
1Atalak ara, sik Yahudi yala ninye arye, Kaplina ati Kwalina ati, ambusumto yupnamek sum ubuk. Atalak ara, Yesus arye, ‘Tukwak mutuku bataknirye, na Ni Koprop Allah dam binamne’ tenen, akunum kel bikamuk. Yesus ara, tukwak mutuku ulamuk talak noutamak nirya ara, el wipdeiyamuk nang, sik 12 nang ati, bico tenebuka melilamuk bukni, el tukwak mutuku ulamuk talak sirya dakmanto ubuka anya arye, atalak ara, ‘Na mapu arye, nun ni Yesus pia weik arye bicoe tenepsilirye, talima arisulule, tenebikirye, kel kipnamak’ tenen, elce alukunyan winibuk ning deice arye peterebuk. Aning ara, ani.
2Atalak ara, Isa Mutuku Dongonye arye, ‘Anye malye winipnamle’ tenen, Simon el mi Yudas Iskariot ati, el talima akunum tamubukura, Yudas arye, ‘Yesus opnamak’ tenen, tonda, ‘Ninye yupu delilbinun’ tenen, akunum kintinibuk. Alukunyan sik dipnuyik ning bokuka arilanmek. 3Yesus ara, akunum kel bikamuk. Ara, ‘Allah el ulyak arye yase touk, tuba tamubuka el dam welepnamne. Na ni koprop arye, aning-aning nirya na amu tam akunum deipmanilba, na mikip deice arye aning-aning nirya malye kibuka bisiptinye,’ akunum tenyamuk.
4Yesus arye aning-aning nirya akunum kel kiyamukce, ilil kum, talye kanye bobuka ulamuka anya arye, sik yuk nang arye din dabuka kintinipdeipmekce, bokuka deipnin banmek talak ara, Yesus ara tikuk. Tikukce, el din ning asukumuk batakuka, el deice tam ongopmok baju kwiribukce, handuk mek kilina dobuka, el der tam koupdongobuk. 5Koupdongobukce, mek kwebuka loyang pum bisik dikdongobukce, deiyok koubuka, el mapu sik yan nirya mek ilikeipnin banmok. Sik yanmek ilikeipnin banmokop diparyuk, el der tam koupdongopmok handuk arye, sik yan tatang deice mek kililinmok.
6Sik yanmek ilikuka kilipnin banmoka ani, Simon Peterus bukmokak yayuk. Yayukura, Peterus arye, “Naio, anda na deiyoknye birye, na yanmek iliknunilam do?” nyabuka asipdeyukba, 7Yesus arye tamubuka, “Amio, wini talak ara, na wininmasin ning ati, ‘Deiyok noutamak ning ani’ tenen, kum tenepmalam bukni, aminyan talak ara, moubuka kel biknalame,” nyabuk. 8Yesus arye nyabukba, Peterus arye tamubuka, “Kume, Naio. Anda mambul weiknye binya arye, na yan ara pia mek kum liknutume,” nyabuk. Nyabukba, Yesus arye, “Mek kum ilikinyopura, na tamnye kum unalame. Talinye atonun unalame,” nyabuk.
9Nyabukura, Simon Peterus arye tamubuka nyabuk. “Se, aning ati ara, na yanuk kume. Na taruk ap, na kisok ap nirya, mek ilikeipnilyame,” nyabuk. 10Nyabuk bukni, Yesus arye tamubuka nyabuk. “Kume, mek akunum kekice ninye ara, sik nong nirya ara, telebuk ulul bukni, sik yan ara mek iliklamake. Na mapu anggunda, nininga kum, telebuk ululum bukni, tonoknye bira, kabula,” nyabuk.
11Yesus arye, “Anggun nirya akunum teleb ululum bukni, tonoknye bira kabula,” nyabuka ara, talya ati kum nyabuk. Deiyok ara, ‘Yudas arye ninye yupu deililbinamnile,’ akunum tenebuka ati, ayupu domobukce, nyabuk. 12Yesus arye, el mapu sik yanmek ilikda banmoka ani, akunum sengum abukce, el deice tam kwiriplopmok cang baju ara, tuba tamubuka tonap ongopdobukce, min bukmok sukumuk tamubuka bulbiyuk. Bukukce, nyabuk.
Narye anggun yanmek ilikmasina ara, aning nong ton bita bikmalum do, kum do? 13Aning deiyok ara, laka nyapnusine. Ara, anggunce nati, “Nun peterena deiyoknye, nun Weik Ninye Deiyoknye,” nyabuka nyanululuma ara, aning dipkoprop wininuna anya arye, merekuka nyanululume. 14Wini talak ara, narye, anggun deiyoknye, tonda, anggun peterena deiyoknye birye, anggun yan akunum mek ilikmasin atonun, anggun nirya arye, anggun kayapu nang nirya babye ati, yanmek ilikildanamlulume.
Ara, anggun nirya arye, anggun kayapu nirya ati, ‘Anang nirya ara, weik mambul bukni, nara sik amu tam atonunye, sik pil melinanye atonun unamne’ tenen, melilanauk unamlulume. 15Narye anggun kel bikna ati, winipmantonye wininipnirye, akunum peterepmasina ati, narye anggunti talima mitang ubuka, amutamnye atonun unmanurye pil dopmasin touk, anggun unamlum talak nirya noutamak arye, anggunce yuk nang ati atonun winildanamlulume.
16Na dipkoprop nyapsine. Pil deiyok nang arye, “Pil doplulume,” nyabikibuk, sik amu tam pil donyak nang ara, mitik mambuluk unyak bukni, el pil deiyoknye, sik deice tam ululnye bira, weik mambule. Aning atonun, deiyoknye birye, “Na yupu dobuka laka nyalbilyame,” nyalinye bira, weik mambul ulul bukni, el yupu dobuka laka nyalbinulinye bira, mitik mambul uka. 17Na Yesus ara, weik mambulnye unun bukni, arup ilikmasin atonun, ‘Anggunda na dong tam ululum ninye arye atonun wininamlum’ tenen, nyapsine. Winira, aning nirya akunum kekenmaluma anya arye, dipkoprop anyapmasin touk winimunyopura, Allah arye melibuka teleb ulinamsile. Yesus arye nyabuk.
Yesus min kum opmek talak bukni, Yesus arye, “Ninye yupu deilil binilyopura, opnamniake,” nyabuka, lak nyabuk yupu
18Alukunyanuk, Yesus arye el mapu ati, ayupu ton nyabuk. Narye wipdeiamsise nang nirya, akunum kel bikamsise anya arye, anggun nirya ati kum nyapsine. Bukni, Mazmur noutamak sekik yupu, nong upnamala ati, ayupu nyapnusine. Mazmur noutamak sekik yupu ara, ani.
‘Na ap neika ubuka din neika dinyam bukni, anye birye nati, ‘Malye kibuka opnamak’ tenen, yanipnunile ati, akunum kintinipmanile.’ (Mazmur 41:9)
19Ayupu akunum nyapmasina deiyok ara, nyapnusine. Ura, aning min kum winipmalye talak akunum laka nyapsinyopura, aminyan talak ayupu atonun akunum winibicopura, adeice arye moubuka tenepnamnulume. Ara, nara minop talak babye, doyanamle talak babye, Pia Kam Ululnye bira, na aunune. Na akunuma, yuknye kume. ‘Aning tenepnamlum’ tenen, akunum nyapsine. 20Tonda, ‘Na yupu dobuka peterelbinamak’ tenen, dolinun ninye ati, “Telebe,” nyabuka, talima areplibuk, nong kil-kil ulye ninye nirya ara, wininyaka deice arye, dipkoprop ara nati winininyake. Aning atonun, nati talima ariliba, dib tenenyak ninye ara, adeice arye dipkoprop ara, na dopdeipnuknye, Allah ap ati, talima aresinyake. Yesus arye nyabuk.
21Yesus arye ayupu nyabukopura, mambul kanye bobukce, nyabuk. “Na dipkoprop nyapsine. Anggun kan-kan noutamak bukni, tonoknye birye, ‘Nun ni Yesus ara, malye ninye arye opnamak’ tenen, ninye yupu delilbinamnile,” nyabuk. 22Nyabukura, Yesus el mapu kekebikce, ‘Se, yatanye biti nyapmasil do?’ tenen, dildanmekce, kanye walwal kibuk. 23Winibukba, Yesus ati kanye talima pia deiamuknye bira, Yesus dam bukmok. 24Winibuka Yesus ap neika bukmarika anya arye, Simon Peterus arye anye biti nyabuk. “Ance Yesus ati asipdelyame. ‘Elce tenepmasilanye si siptu’ tenen, nyapkine,” nyabuk.
25Nyabukura, Yesus dam bukmoknye birye, Yesus baripmokce nyabuk. “Naio, yatanye birye, ‘El opnamak’ tenen, ninye yupu delilbinul do?” nyabuka asipdeyuk. 26Asipdeyukba, Yesus arye nyabuk. “Narye adin ning roti dobuka yangalin makau pum bisik mek burupdongopnirye, arepnamananye bira, el akunuma,” nyabuk. Nyabukce, Yesus adiparyuk aroti dobuka dikilongon makau pum bisik dongobuka, Simon el mi Yudas Iskariot ati aribuk.
27Aribukba, Yudas arye doprobukopura, adiparyuk Isa Mutuku Dongonye arye, Yudas el talima pum tam wekuk. Wekukura, Yesus arye Yudas ati nyabuk. “Ance winipnuminye ning ara, minopce binuka winiplyame,” nyabuk. 28Yesus arye nyabuk bukni, el mapu awekmek nang nirya kan-kan arye tonoknye babye, Yesus arye nyabuk yupu ati, moubuka kum bikik. 29Ton nang ara, ‘E, Yudas ara nun yo bok talilinye ulula anya arye, Yesus arye ‘Kwalin ning dekelbinul’ tenen, nyapmal do?’ tenenmek. Ton nang ara, ‘Talye bona utotowa talina kum ninye yo bok melibuka arilbinul’ tenen, nyapmal do? Sik walwal asauk unmek.
30Yudas arye Yesus aribuk roti doprobukopura, minopce anyaik batakuka, bai tam binmok. Binmok talak ara, lukunyan akunum kibukura, inibuk.
Min kum winipmok talak bukni, Yesus arye Peterus ati, “Ance, ‘Anye bira na walwale,’ nyapnamanilame,” nyabuk yupu
31Ura, Yudas bai tam akunum bindobukba, Yesus arye el mapu ati ayupu nyabuk. “Wini talak ara, nara Ninye Mi Koprop Atonunye pil dopnaman deice arye, aminyan talak ninye nirya arye, nati si erebuka, na si weik arye erepdeipnamniyake. Tonda, na pil dopnaman deice arye, Allah el si weik arye erenamake. 32Na winipnaman deice arye, Allah el si weik arye erebikirye, kibuka si erenamaka anya arye, Allah arye nati pia teleb kipdeipniliba, na si babye weik arye erenamake. Allah arye anirya winipnamala ara, adiparyuk minopce winipnamale.” Yesus arye nyabuk.
33Nyabukce, ayupu ton nyabuk. “Na mapu, na ap, anggun ap, like mitik anunuk, neika unmabya ani, na yuk bindopnamne. Binyopura, anggunce epdenamnulum bukni, kum eipnamnulume. Narye Yahudi yala deiyok nang ati nyapse touk, anggun babye nyapsine. Ara, na benamne mutuku ara, anggun ap kum bitibye.
34Wini talak ara, ‘Wininamlum,’ tenen, winiryuk yupu ton nyapdeipnusine. Ayupu ara ani. Anggun nirya arye bico tenelamunce, melilanauk pia wininamlulume. Narye anggunti, bico tenebuka melilamsise touk, anggun babye atonun, bico tenebuka melilanauk unamlulume. 35Winibuka nyapmasin touk, bico tenebuka melilanauk pia winipmunyopura, winipmunya deice, ninye nirya eibikirye, ‘E, anang ara dipkoprop Yesus el mapu unyak atia’ tenen, kel biknamsiyake.” Yesus arye nyabuk.
36Nyabukura, Simon Peterus arye asipdeyuk. “Naio, anda dan mutuku binamalam do?” nyabuka asipdeyukura, Yesus arye, “Kume, na benamne mutuku ara, wini talak arye kum yanamlum bukni, aminyan talak ara, anggunce na aminyan yanamnulume,” nyabuk. 37Nyabukura, Peterus arye, “Naio, yata deiyok ati, adiparyuk kum dobolyakitinye do? An melina ati ara, ‘Na opnitinga babye, telebuka,’ tenenune,” nyabuk. 38Nyabukopura, Yesus arye Peterus biti nyabuk. “Kume, amio. Ance nati, ‘An melina ati ara, daopnitinge,’ nyapmanilam ning ara, dib do, telela do? Na kele, yim ayam arye min kum ngalukmalye talak ara, ance nati, ‘Anye bira, na walwale,’ nyabuka, like winilye deice arye pilipnamanilame,” Yesus arye nyabuk.
נבחרו כעת:
Yohanes 13: EIPA
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
© 2023, Wycliffe Bible Translators, Inc. All rights reserved.
