Marcos 14
14
Nema akpeneskama ania'a akmahai'a epathetakpok Jesús
1Hanet aknem nak nkaimommalhka altaqmelaikama lhma alvesai'a Pascua kanhan pan metka apiepheskama. Apkelemhama apmaniaie sacerdotes kakpota nhan escribas apkelleliaikama lhnak aktemakha ania'a akmovana ania'a la'a kakpota elpathetek ennapok na Jesús ma'a. 2Mang nak nkommahai'ak ellanak neksa aktaqmelaikama lhma m'a kakpota meliasangke lhma enenlhet'avok ma'a, kakpota nhan mankonnathaksek ma'a.
Lhema ngkelvana akiangkanma aimenek akmases aimes apietseksek Jesús
3Apnengkek nak Jesús akieto natemma Betania, Simon apnemakha, apto lhnak aptaqmelkeskaiam Jesús lepra ato m'a. Neksa aptavekha lhnak Jesús ma'a, akvai'o lhnak lhema ngkelvana, aksoiakmo lhnak lhema alhankok aimenek akmases aimes alabastro akmennave lhnak ma'a. Ka akteteskai'o lhnak apnakha Jesús ma'a, alentaskamo lhnak na alhankok, akiangkanmo nhan apietseksek Jesús aimenek akmases aimes. 4Nkennatheskangkek nak moklhem'a enenlhet ma'a, lhna aptaiangkok:
—¡Ntevaske nak akmases aimes ankok, ennavkek ham! 5Ntase niekhe nkoteniak ngkeskama akianmoma patakkom tep 300 denarios kakpota nkollangkok metka nak apkelletsekama —lhna aptaiangkok ma'a.
Apkeliennai'avek nak na apkellanei'o ngkelvana enenlhet'avok ma'a, 6koka lhna aptemak Jesús:
—¡Meliasamolhma ngkelvana nak! Ntasek aktakha nak helanei'o. 7Elloka ta mota metka apkelletsekama apieseksek anak ketlhengkap, hato ka elpasmok ketlhengkap ma'a, ko'o koka molhek hata apieseksek ketlhengkap. 8Ka heng ngkelvana nak nkelan'a niekhe avankelha la nkolana, nkeltelhnangkek epatek aceite akmases aimes. Mpenesavek alanei'o asiokha amanie knema akpekkanveiam hata m'a nemakha aklhengkeskaianlha enghapak. 9Akto haveniapak anke' aktakha nak alanai'a, etlhenekhok hata mota enenlhet alhma nkek ham aklhenalhko ta mota ania'a aktaqmanma nak —lhna aptemak Jesús ma'a.
Aptaqnongvekhak Judas Jesús
10Netamen Judas Iscariote apto lhema aphapak apkeltameskama apieseksek 12 m'a, apmeiekho lhnak apkakhangkelha apkelemhama apmaniaie' sacerdotes kakpota elpasmok elpathetek Jesús ma'a. 11Nkelpaihekhek nak apvalho'ok ma'a, apketlheianmo lhnak na have niapak ankek ellangkok hata patakkom Judas, metka apkeliekaskama nhan apketlheianma m'a. Ka apkeliaiangka lhnak aktaqmelakha la aknem kakpota epathetakpok Jesús ma'a.
Nentoma aktaqmanma
12Ampakhasekha nkek nak aknem aktaqmelaikama lhma pan metka apiepheskama, apkennapeiangkelha lhna mota nepkesek Pascua ankok. Ka apkelelmalhneiangka lhnak apkeltamesaikamok Jesús ma'a, lhna aptaiangkok:
—¿Ko la ta akietelha angellanengvakha nentoma ankok aktaqmelaikama lhma Pascua m'a, he? —lhna aptaiangkok ma'a.
13-14Lhna aptemak Jesús apkellanemo apkanet apkeltamesaikamok:
—Enmeiakha ta apiav'akha nak temma ha'e, elvetangakhak hata enenlhet ma'a apsekama ietangvalhva ieplomo iemmen. Elieplakha ta akvakho aptalhnengvakho pa'at, eleltennes hata apto la apnemakha m'a: "Hengetlhekmoskama lhkek apme eihok nentavekhelha konne pa'at pelhasep Pascua ankok akieplomo apkeltamesaikamok", hata etnangkok ellanak ma'a. 15Ka enenlhet hata m'a elvetaskesek hata lhema akiavai'a av'alhok pa'at neten apnemakha, akieplomo nema alaneskama aknaikamok qaselhaha. Elpeneso ta m'a kakpota antavokhak ma'a —lhna aptemak Jesús ma'a.
16Ka apkenmeiekho lhnak apkeltamesaikamok akieto na temma m'a, apkelvetai'ak nak aktemakha lhnak aplheianma Jesús, apkelpeneskamo lhnak nentoma ankok aktaqmelaikama lhma Pascua. 17Ka aptemo lhnak pelhasep ma'a, apmeiekho lhnak na Jesús kakpota nhan aplhamakha apkeltamesaikamok ma'a. 18Neksa aptaveikokha lhnak nekha asota m'a, lhna aptemak Jesús apkellanemo:
—Lhema apieseksek anak ketlhengkap heselhnanak hata, have niapak ankek astakha nak —lhna aptemak.
19Aiosak'ak na ntemak apvalho'ok apkeltamesaikamok, lhna aptaiangkok moklhem'a m'a:
—¿Ko'o nlho, he? —lhnak na aptaiangkok aplhamakha apkeltamesaikamok.
20Koka Jesús lhna aptemak apkellanemo:
—Lhema apieseksek anak 12 ketlhengkap, apto nhan nelteklheiangko nak lhemek pan av'alhok aphak anak. 21Nkovak hata aknem aktemakha aktalhesammalhka vakkahak Eniapom Neten apaivoma aktemakha aplhenammap Enenlhet Apketka nak, ¡enenlhet laie apto ta apselhnanongkoma m'a! Nkaimelhke lhta niekhe mankotek ngken enenlhet anak —lhna aptemak ma'a.
22Neksa aptaveikokha, apmamo lhnak Jesús pan, aptemo lhnak na gracias Eniapom Neten. Apiaptemo nhan ma'a, apkellaiangko lhnak na apkeltamesaikamok, lhna aptemak apkellanemo:
—¡Enma', etavamok! Koka hengka akto asiokha —lhna aptemak.
23Netamen apmamo lhnak na lhema nohaikok vino, ka aptemo mokhom gracias Eniapom Neten. Apkellaiangko nhan mokhom apkeltamesaikamok ma'a, ka apienaiangko lhnak ma'a. 24Lhna aptemak Jesús apkellanemo:
—Koka hengka ema ehenkok anak ngkotnek hata akiangkenammalhka kakpota nkoltaqmelkeskesek apkellangiemhaikama enenlhet'avok lhmankek ham. Nkolanak hata nhan alhnankok annemo mo'ok apvalho'ok apkenmahai'akha etnangkok ma'a Eniapom Neten kanhan enenlhet'avok. 25Aktakha nnelha asiamo lhemek vino ketlhengkap, hato ka m'a ainekhok mokhom vino alhnankok akieto m'a aptemakha nak apveske Eniapom Neten, have niapak ankek aktakha nak aspaioma —lhna aptemak Jesús.
Apkeltennaskama Jesús Pedro elhenek hata meiekpelkema
26Netamen ma'a apkennekmaseiangko lhnak salmos, ka apkenmeiekho lhnak neten metaimong akhaiam Olivos, 27lhna aptemak Jesús apkellanemo:
—Helieniekhak hata aplhamakho ketlhengkap, ka aktemo nak aktalhesammalhka vakkahak Eniapom Neten apaivoma m'a, lhna ntemak: «Aiensaksek hata apkellanekama nepkesek, netamen enielhpaknek hata apnaqtoskama m'a», ka ntemak ma'a.
28Koka alhatekhangvomok hata apieseksek apkenmaskengvaiakmo, aniakhak hata m'a akieto natemma Galilea, amanie apkenmahai'a ta enmeiakhak ketlhengkap ma'a —lhna aptemak.
29Koka lhna aptemak Pedro apkanemo Jesús:
—Nkaqhok elieniekhak lhamakho nak, ko'o koka moieniekhe lheiap —lhna aptemak Pedro.
30Ka apkatemmoiangka lhnak Jesús ma'a:
—Have niapak, ka pelhasep anak, amanie akmahai'a ngkotnek hanet akpaivoma tape'e, hanetolhem'a ta ngkotnek aplheianma mangheiekpelkema lheiap —lhna aptema.
31Koka Pedro aplhenekhavek na mota, lhna aptemak ma'a:
—Mma', motnek hata ko'o m'a, vakho ta hennapo' lhemek lheiap —lhna aptemak ma'a.
Lhnak na aptaiangkok ma'a aplhamakha apkeltamesaikamok ma'a.
Apkenmalhnongkoma Jesús akieto Getsemani
32Apmeiekho lhnak Jesús kanhan apkeltamesaikamok iokhalhma Getsemani, lhna aptemak apkellanemo:
—Eniakhamok hata hengke'e ka smak'ak aniakhak sekhek ko'o ha'e, smak'ak anmalhna —lhna aptemak
33Ka apkellaveiangka lhnak ma'a Pedro, Jacobo kanhan Juan kakpota etnangkok apketlhelhma'ak ma'a tep atketsek mokhom. Ampai'akha lhnak na akmaiose apvalhok, apkai'ak nak na Jesús ma'a, 34lhna aptemak apkellanemo:
—Aiosek anke na ntak evalhok ko'o, aslengangke asmahai'a angvetsepok ¡Eniakhamok hata ketlhengkap hengke'e, menaqten anko ie! —lhna aptemak.
35Ka aplhengamo lhnak Jesús tep atketsek ma'a, apkeltanentamo lhnak aptapno'ok nalhepop kakpota nhan apteklheklhemo lhnak na napa'at lhepop ma'a. Apkenmalhneiangka lhnak Eniapom Neten apkeltemo eiekaksek akientalhnema m'a, 36lhna aptemak:
—¡Ta! Apvankek lheiap elanak apmak'akha la elana', askeltave niekhe heiekaksek akientalhnema ta malha asnaqsepma ta akmaska akmak'o na nkovak. Momak'ak atnehek asmak'akha atnehek, vanlha apkelto la apmak'akha la etnek lheiap —lhna aptemak Jesús ma'a.
37Netamen apvektamo lhnak mokhom apkakhangkelha apkeltamesaikamok ma'a, apkelvetangvektamo lhnak apnakteianma ma'a, lhna aptemak apkanemo Pedro:
—¡Simon, aptenke i'e! ¿Mankapvanke i'e metienek akvakmo lhema hora? 38¡Menaqten, elelmalhna koka kakpota elammelhek aliepkonma ketlhengkap! Engvalhok koka avankek ma'a, man koka nkoliennak eniempeiok anak —lhna aptemak apkellanemo.
39Netamen aptaqhemo lhnak mokhom ma'a, apkenmalhnengvekho mokhom apkeltakhengveskekhek na mota aptemakha apaivoma apkenmalhnonkoma m'a. 40Aptaqhemavek nak mokhom neptamen ma'a, apkelvetangvekho lhnak mokhom apnaqteianma apkeltamesaikamok ma'a. Nkeliaqnenaikama lhnak apqatko'ok, tenn nak nkennapmak ma'a, apkeliampei'ak nak na songke. Ka apnaklhatekhaskekho lhnak mokhom ma'a, kenmankaktengkek na songkek ellatemmoma m'a. 41Aptaqhemavek nak mokhom neptamen Jesús ma'a, hanetolhema lhnak ngvaiakmok aptaqhemo mokhom. Ka apkelvetangvekho lhnak mokhom ma'a, lhna aptemak apkellanemo:
—¿Nheklhe nak apnaqteno kanhan apkeliamposakpo, he? ¡Vanlha etnamok! Ngva'ak hora ngkolhek hata angkongvakmo Enenlhet Apketka nak enenlhet'avok anak apkellanekamo na mota ngkollatsekama. 42¡Enaklhatakha', nok! Aplhekmek ha'e apto apmahai'a hellangkongvomok helammelhmakha nak —lhna aptemak ma'a.
Apathetammap Jesús
43Nheklhek nak apkelpaqmetkesaiangka Jesús apkeltamesaikamok ma'a, apvai'o lhnak apkeltameskama apvesai'a Judas. Apkeliantemaiakmo lhnak enenlhet'avok apkelletsoiakmo lhnak pelettav akvenaktema kanhan iamet. Apkelemhama apmaniaie sacerdotes, escribas kanhan metno apketko'ok apkellapaskama lhnak ma'a. 44Koka lhna aptemak sekhek ankek Judas ma'a apto apselhnanongkoma apkellanemo m'a:
—Ka aspetseso ta m'a, koka Jesús ma'a. ¡Elpathet hata m'a, elaqlakha ta, eltaqmelkaso ta apnaktetema apmeiok! —lhna aptemak.
45Ka apteteskaiakmo lhnak Judas Jesús ma'a, lhna aptemak apkanemo:
—¡Hengetlhekmoskama! —lhna aptemak.
Ka apetseskamo lhnak Jesús ma'a, 46kolhvavek ankek nak apkelpathetmak ma'a. 47Apleklemo lhnak pelettav akvenaktema apankok lhema enenlhet, apiaqtemanmo lhnak apaikok apkennengkasekama apto apiav'akha sacerdote. 48Netamen Jesús ma'a apkelelmalhneiangka lhnak, lhna aptemak:
—¿Se lha ntak apketlhekmo nak ieplomo pelettav akvenaktema, kakpota nhan iamet ketlhengkap, he? Malha enenlhet apmenielhma nak heltemeskasak. 49Lhamakho aknem alhta asketlhekmoskama Eniapom Neten apnemakha, man koka helpathetmak ketlhengkap ma'a. Koka kolhvave nak ngva'ak aknem aktemakha nak na m'a aklheianma vakkahak Eniapom Neten apaivoma —lhna aptemak ma'a.
50Ka apkeniaiangko lhnak lhamakho apkeltamesaikamok ma'a, apkelieniekhek nak Jesús. 51-52Ka apkeliantemekho lhnak Jesús ma'a, lhema apketkok nak na apieplekhak ma'a lhema ietamopai'a lhnoka apelhketemmap ma'a. Apkenmahai'ak nak niekhe elpathetek ma'a, koka apleiammakpavek noka ietamopai'a apelhketemmap ma'a, apkeniemo apkalhnai'o pankek ma'a.
Jesús napaqtavek apkelveskai'e
53-54Apieplekhek nak Pedro Jesús ma'a nemo akiantemekho apnemakha apto apiav'akha sacerdote, mokhek ketsek noka aplheiakmok ma'a. Apvekhavek nak na m'a, apnaiakmo lhnak na m'a nekha talha Pedro, apkakhaiangkek nak na m'a apkellanekama atong. Ka apkeliantemekho lhnak Jesús apkakhangkelha apkelemhama apmanie sacerdotes, metno apketko'ok, kakpota nhan escribas. 55Apkenmahai'ak nak ennapok ma'a lhna ngkanek apkelleliaiangka lhnak na moklhem'a enenlhet kakpota etnangkok apkenmopvanka ania'a etlhenek Jesús ngkolatsekama aptemakha. 56Ka apkelvai'o lhnak enenlhet ma'a, apketlheianmo lhnak ngkolatsekama aptemakha Jesús ma'a. Koka apkenmopvanka ania'a lhnak, alpeivekha lhnak aptaiangkok apketlheianma m'a.
57Lhna aptaiangkok moklhem'a:
58—Nenleng'a lhta ennengko'o apaivoma Jesús, apmahai'a etvaksek Eniapom Neten apnemakha nak nellanai'a lhta nengelelto enenlhet apankave nak. Netamen hanetolhema aknem alhta nhan aplhenak epenaksek apkelanekha alhnankok ma'a, metka apkelpasmoma enenlhet'avok —lhna aptaiangkok ma'a.
59Koka alpeivekha lhnak aptaiangkok apketlheianma m'a. 60Netamen apkenmekho lhnak apto apiav'akha sacerdote ma'a, apkenmalhneiangka lhnak Jesús ma'a, lhna aptemak:
—¿Apleng'a i'e aplhenammap ngkolatsekama aptemakha lheiap, he? ¡Eniasennakpo no panke apkatemmoikama! —lhna aptemak.
61Koka mang nak eniatemmoikama Jesús ma'a. Apkenmalhnekhavek nak mokhom apto apiav'akha sacerdote m'a, lhna aptemak:
—¿Lheiap ai'e Cristo, apketka m'a apto nak apkeliavenkaskesaiangka na mota apvesai'a enenlhet?
62Ka apkatemmoiangka lhnak Jesús ma'a:
—¡Ko'o m'a! Elvetak hata ketlhengkap Enenlhet Apketka nak elhek akieto akiennakha apoktong anak Eniapom Neten apto aknema apmopvana apanke, elhiemok hata aiseksek iephopai'a neten anak —lhna aptemak Jesús.
63-64Neksa aplengai'a lhnak ma'a, apkeliaptemo lhnak apkelentalhnema apto apiav'akha sacerdote m'a aniem'o aknatheskama, lhnak aptemak:
—Aptevaske apvesai'a Eniapom Neten enenlhet anak, melaimekpok angeleliama mokhom enenlhet kakpota etlhenek apkelanai'a ngkollatsekama, ntasek angaqhek —lhna aptemak.
Lhamakho apkelveskaie lhnak apkeleltemok ematong Jesús ma'a, 65moklhem'a lhnak apkelhpakhaiangkok apiemanong ma'a kakpota nhan apkellapkeskangkek nak na apaqto'ok. Apkeltekpongangkek nak na m'a, lhna aptaiangkok apkellanemo:
—¡Eihono aktekpongo nak! —lhna aptaiangkok.
Apkellanekama atong Eniapom Neten apnemakha lhnak na apkeltekpongamak napa'at Jesús ma'a.
Aplheianma Pedro meiekpelkema Jesús
66-67Apnengkek nak Pedro m'a akieto avhak pa'at, talha lhnak apkelhtemak ma'a. Ka akvai'o lhnak lhema ngkelvana apiav'akha sacerdote apkennengkasekama, nkeltameskamavek nak ma'a, lhna ntemak anemo:
—Lheiap alhta nhan aptaikama aplhelhma Jesús ko Nazaret —lhna ntemak ma'a
68Koka lhna aptemak Pedro apkatemmoiangka m'a:
—Moiekpelkak ko m'a enenlhet anak —lhna aptemak Pedro.
Ka apteiapmo lhnak atong Pedro m'a, akpaivomo lhnak tape'e. 69Netamen, akvet'o lhnak mokhom ngkelvana lhkek Pedro, lhna ntemak allanemo atlhelhma'ak ma'a:
—Ka enenlhet anak apieplekama lhta nhan Jesús ham —lhna ntemak.
70Ka apkatemmoiangka lhnak mokhom Pedro, lhna aptemak:
—Ieee, moiekpelkak ko m'a enenlhet anak —lhna aptemak.
Netamen moklhem'a enenlhet nak na aptaiangkok apkellanemo mokhom Pedro:
—Have niapak ankek ma'a, lheiap alhta nhan apieplekama Jesús, ko Galilea nhan lheiap —lhna aptaiangkok.
71Ka apiennakteskamo lhnak apaivoma Pedro m'a, apkeliateiangka lhnak ngkolatsekama apaivoma, lhna aptemak na aptemo juramento m'a:
—Alhenokha lhkek moiekpelkema ko enenlhet anak —lhna aptemak.
72Ka akpaivomo lhnak mokhom tape'e m'a, aklheianvekho lhnak apvalhok Pedro aktemakha lhnak apaivoma Jesús ma'a:
—Amanie akmahai'a ngkotnek hanet akpaivoma tape'e, hanetolhem'a ta ngkotnek aplheianma mangheiekpelkema lheiap —lhna ntemak aklheianvekho apvalhok Pedro m'a.
Netamen, apvenemo lhnak ngkeskama nkek ma'a.
©2023 LETRA Paraguay
