Marcos 13
13
Aplheianma Jesús nkolhek hata aktevaso Eniapom Neten apnemakha
1Neksa apteiapma lhnak Jesús Eniapom Neten apnemakha, lhna aptemak apkanemo lhema apkeltameskama Jesús:
—Hengetlhekmoskama ¡Elanhono ha'e, avanhek anke nak alanemmalhka Eniapom Neten apnemakha nak! —lhna aptemak.
2—Hai', avanhek anke niekhek, koka nkosavhalhkok hata nema aktevaskama, mankaimalhkek hata takhalhet mo'ok metaimong —lhna aptemak Jesús.
Akmak'akha ta nkotnek amanie aktemongvanlha ta nnelha aknem
3Netamen Jesús kakpota nhan apkeltamesaikamok apkelmeiekho lhnak ma'a metaimong akhaiam akvesai'a Olivos akieto ammelhakha Eniapom Neten apnemakha m'a. Ka apnemo lhnak Jesús ma'a, apkelteteskektamo lhnak Pedro, Jacobo, Juan kakpota nhan Andres, ka apkelelmalhneiangka lhnak ma'a, lhna aptaiangkok:
4—¿Se lha aknem ngkolhek aktevaso Eniapom Neten apnemakha, he? ¿Ko la ta aktemakha qaselha mongenatkeskama nkolentepok hata ma'a kakpota angeliohok ennengko'o angketvakmo ta aknem, he? —lhna aptaiangkok ma'a.
5Ka apkellatemmoiangka lhnak Jesús ma'a, lhna aptemak:
—¡Ellaho ta ketlhengkap ngkolhek aliennengkesko'o! 6Ngkanek elvak hata aplhamakma enenlhet, hata etnangkok hengke'e: "Ko'o hengke'e", hata etnangkok ma'a. Eliennengkesek hata aplhamakma enenlhet'avok ma'a. 7Apkelleng'ak hata nkek ketlhengkap apkennapommap kanhan aklhenammalhka ania'a apkennapommap hengke'e kakpota nhan mo'ok apkellavakha. Koka mellaga nko ie', nkovak hata m'a, koka mankovakmok mokhom aktemakha nnelha aknem lhmankek ham. 8Ennapakpok hata apkellavakha eniammelhek mo'ok apkellavakha, apkelveskai'e mo'ok apkellavakha nhan, nkolpaklhemmak hata nhan lhepop moklhem'a apkellavakha lhmankek ham. Mamma ta nha ngkotnek aptekamok enenlhet'avok, koka ampakhasekha nkek apkellengaiangko akientalhnema enenlhet'avok lhmankek ham. 9¡Ellaho ta ketlhengkap! Nkolhek hata aliantemakho apkakhangkelha apkelientalhnakha apkelveskaie, mangkolhek hata altaqmelkaso m'a. Nkolhek hata nhan altekpongka nemaknekhelha ngkanek ko askeltamesaikamok ketlhengkap. Koka etlhengkes hata hetlheianma ko'o napaqtavek ma'a, 10ngkanek nkaimelhkek sekhek ngkolhek aleltennasengka ania'a aktaqmanma aklhamakho apkellavakha amanie akmahai'a nkovak nnelha aknem lhmankek ham. 11Mankoltama nkek apvalho'ok ketlhengkap apkenmak'akha ta eltehek apkellatemmoikama m'a neksa nema aklakleqha napaqtavek apkelientalhnemo. Espíritu Santo ta ellapvaneskesek apkellatemmoikama m'a, malha apkeliatongkoma la apankek ma'a. 12Hata akvo'o ta aknem anak ma'a, ellanak hata emmakpok apkelialheng'a apankavek enenlhet, kakpota nhan elleltok etekievekhak ma'a. Nnavek na apiapma'ak la'a elleltok hata ngkolhek annapakho apketkak apankave', kakpota nhan apketkak ennapekhak hata ngkana'ak apankave'. 13Eltaknevakpok hata ketlhengkap ngkanek ko'o askeltamesaikamok, koka ngkolhek hata alvongkaso tep apkellelto nak melvatesaikamok akvakmo ta aktakha nnelha aknem lhmankek ham. 14Apkelvet'ak hata nkek ketlhengkap nema akpekkanveiam qaselha ngkolatsekama nkek ma'a akieto nak manganemmalhkelha ampekkanvomok qaselha (nkaimelhkek nkoitek apkeliangveiakmo aptangko la apkelietsatekamok). Koka apkakhangko la enenlhet na temma Judea, ntasek hata enieniangkok enmankok akieto neten metaimong akhaiam akiavai'a. 15Apnek hata nkek lhema enenlhet neten pa'at apnemakha, metiep ankek apkeliangvekha la qaselha apanko'ok konne apnemakha. 16Aploka ta nkek enenlhet nalhma, metaqho nkek evakhak apkaqlammap. 17¡Ketlhengka ta laie ngkelvana nlosave', aiosak'ak hata nhan ngkelvana'ak apiama la mokhom neme nko'ok atkak! 18Elelmalhnama ta kakpota mankoietehek aktema neksa ieiam apvalhok anak, 19ngkanek avanhek ankek hata ngkotnek apkellengaiangko enenlhet'avok akvakmo ta aknem anak ma'a. Mangkolhek hata m'a apkellengaiangko enenlhet'avok ma'a apkelanei'o sekha lhnak nanek Eniapom Neten lhma nkek ham, mangkolhek hata nhan netamen ma'a. 20Koka Apveske eiakvatesok hata aknem apkellengaiangko enenlhet'avok ma'a kakpota mesavhakpek apkeletsepma, ngkanek avanhek apkellamelaiam enenlhet apkellelto lhta apkeliekieskama. 21¡Ellanhonoho! Menmamonkek takha ania'a aklhenammalhka ta apvetammap Cristo hengke'e, nlho ka la nhan apnema ha'e. Eliaskem hata 22ngkanek elvak hata apkelietkesammakpo Cristo, kakpota nhan apkeleltennasemmap ania'a apkenmopvanka'a ania'a. Ellanangkok hata qaselha mongenatkeskama kakpota nhan qaselha hempelapkeskama kakpota eliennengkesek aplhamakho enenlhet'avok lhmankek ham, nkomahak hata nhan eliennengkesek aptangko nak nema aliekieskama. 23¡Ellaho ta m'a! Aspenesavek askeleltennaskama ketlhengkap amanie akmahai'a nkovak qaselha nak ma'a —lhna aptemak.
Apvektanlha ta Enenlhet Apketka
24—Netamen apkellengaiangko ta enenlhet'avok, nkomaskok hata atsaso aknem alhma nkek ham, kakpota nhan pelten. 25Epallentak hata apiav'a, nkolievhama ta nhan qaselha aliennaktema aknaiangko nak ma'a neten. 26Netamen elvetak hata Enenlhet Apketka nak apkelhiaiam aiseksek iephopai'a akieplomo apmopvana kakpota nhan apientalhnemo. 27Ellapaksek hata nhan ángeles alhma nkek ham, nelhkeiha, nepieiam, tep aknem kanhan mankolha aknem kakpota eniankesekhak apkellelto nema aliekieskama.
28Kotlhen no apkelvalho'ok aktemakha nak higuera iamet asietkeskama. Apkelvet'o la aktengok alenteiapma alhnankok kakpota nhan alielsellemo ava', apkeliavek ketlhengkap ma'a nkanketvakmek akmokhetmakha akielhna. 29Nnavek na m'a, apkelvet'o ta lhamakho qaselha akientalhnema ta aktakha nak alheianma, elioho ta nkanketakmek apvektanlha ta Enenlhet Apketka nak. 30Have niapak ankek ma'a, ka apkaktengaikamok anak kolhva elvetangkok hata m'a. 31Nalhepop kakpota nhan neten nkomaskok hata m'a, koka mankomaskengvomek hata aspaioma nak. 32Mamma nkoiho knem kanhan alanei'o aknem ngkotnek hata m'a, meliohok na ángeles, meihok na Apketka nak ma'a, vanlha koka apiavek ma'a Eniapom. 33Askeleltennaskek ketlhengkap elelketnamok hata, elelmalhna ta nhan ngkanek meliohok aknem nkovak hata m'a.
34Malha aptonak apveske la aplhengama nak, apnengkenkasekha nak apaivoma apkenmakmesaikama kakpota ellaneskasama apnemakha m'a. Moklhem'a nhan ellangkok apkenmakmekama ta neptamen, lhema nhan apkelanekama atong pa'at ma'a. 35Elelketnamo ta nhan ketlhengkap ngkanek meliohok aknem evatak Apveske apanko'ok. Nlho ka la evatak ienaqteso, pelhasep, neplhet pelhasep, nlho ka la nhan alpaivo la tape'e, akmopakmo lhma kelha nhan. ¡Elketnamok hata! 36Nkotlapkesek kelha apvekta m'a elvetangvetak kelha apnaqtenakha ketlhengkap ma'a. 37Ka stakha nak askellano ketlhengkap kakpota nhan aplhamakho enenlhet'avok lhmankek ham ¡Elelketna mota! —lhna aptemak.
©2023 LETRA Paraguay
