Lukas 20
20
Yahudi nimi nubunangdi Yesusag, “Andi etneri mikipneag agha ulamlam?” aro haibaeka
(Matius 21:23-27; Markus 11:27-33)
1Ik nhon sum Yesusti Allahri yubu walinge Allahri Mem Ae aramag nimi ambarelamsiog. Ambarelamsiogpa memnang Allah sembe palirop nang sikini yaboap, Musari yubu amohirop nangap, Yahudi nimi sembe wenehirop nangap Yesusag yaek. 2Yaekti hailamekti, “Andi ulamlamne nene etneri mikipne anag pibori, ‘Unulamlulam,’ aro pogkeoba ulamlam? Nunag ambatsimenne ka'ebaukap,” aro haibaek.
3Wene aro haibaekpa, Yesusti sinag samoro, “Nari babe a'unag tam nhon haibahinun. A'undi ambatnemunne ka'ebanun. 4Yohanes maghag pelengehiropne ponekori ulamonge, elna etneri poghogpa, nimi maghag pelengelamsio senelamlom? Mog so'oag nimiri to, Imagneri to?” seog.
5Wene seogpa, sin mamun tognoro hail dalamekti, “Nuri elag samoro, ‘Imagne ponekori Yohanes poghog,’ sebe tanena, Yesusti nunag hailamsileri, ‘Imagne ponekori poghog tanena, sa'a sembe Yohanesti yubu ambatsionge sembe sik sembaom kom?’ seleag. 6Aghana nuri senenne lag phoro, ‘Mog so'oag nimiri agha Yohanes poghog,’ sebe tanena, nimi maikno tanekori, ‘Yohanes Allahri yubu silimu tiptopne wamo,’ aro sik senenne agha nu kirikti opsiikag,” aro log senelamek.
7Nimi sembe log senelamekti, “Yohanes maghag pelengehiropne ponekona, talangeri poghogne nu ekon,” seek.
8Wene seekpa Yesusti, “Undop pagha tanena, nari babe a'unag, ‘Etneri mikipne nanag pairo pogneoba ulamna,’ aro lag phoro ambatsinun kom,” seog.
Anggur awe torop nangag tol pina Yesusti sunumna ambatsiogha
(Matius 21:33-46; Markus 12:1-12)
9Wene seog aghana, nimi tanekoag tipto sunumna nhon ambarelamsiogne ane.
“Nimi nhondi awe wero haing anggur aweag mebog. Mebogti awe torop nang yae ua unnangag, ‘Nari awe tolapmunba, wana mauamleba, a'unap nanap undo poghol dalamukap,’ aro yubu nikne lebek. Yubu nikne lebekpa, awe ngainge poneko laplobi agha piogti, ko'o maiknoro weag mog so'oag wamog. 10Piogti wamogha haing anggur wana maurop li yaogpa, awe ngainge ponekori eldi arukna poglamogti, ‘Nari awe torop nang yae ua urop nang tanekoag pimenba, wana maubaonge na sembe pogto pibongne tatkeikpa payalulam,’ aro poghog. Poghog aghana, awe wero yae ua urop nang tanekori arukna aneko salero olamekti, tatna koma, ‘Pululam,’ seekpa nongog mo yaog. 11Nongog yaogpa, awe ngainge ponekori nen eldi arukna phendepne poghog. Poghog aghana, awe yae wamek nimi tanekori obekti, el san tilipto ali nembaekti, ‘Saombalulam,’ aro tatna koma yag lambaek. 12Yag lambaekpa, nong mo samoro yaogpa, awe ngainge ponekori eldi arukna wilindipne, ‘Tol pululam,’ aro poghog. Piog aghana, awe yae wamek nimi tanekori el babe tatna koma obekti, yag lambaek. Oro yag lambaekpa, meneng sisua seklero awe ngainge ponekoag samoro piog.
13Undo olamsiekpa, awe ngainge ponekori yubu lelamogti, ‘Nari wene sa'a uanun? Nari name o'ona semba ulamnange wanaag sirikne neneko pognun. Pogneba sindi seneraglamikti, “Awe ngainge ponekori me yal,” aro el kipnepneog wamla,’ sembaogti elme poghog.
14Wene sembaogti poghogpa, awe yae ua urop nimi tanekori elme yalamogha ibek. Ibek aghana, yubu nikne lelamekti, ‘Awe ngainge elme, el amik awe ngainge tanep nimi eneko wene ane yalamla. Nuri el ya'ag obebe andarina, iliri saeagha taneko nuri saeag timbalul,’ seek. 15Wene seekti, elme eneko salero anggur awe paiag sip toro toboglobekti, ya'ag obek,” aro Yesusti sunumna ambatsiog.
Sunumna ane wene aro ambatsiogti, nimi tanekoag hairo ambarelamsiogti, “Awe ngainge poneko amik yaleri, awe yae ua urop nimi tanekoag huahilul? 16Yaleri awe yae ua urop nimi taneko luknuro ya'ag opsileri, awe neneko, ‘Awe wero yae wamlulom,’ aro yog nimiri saeag nembalul,” aro Yesusti ambatsiog.
Wene aro ambatsiogne nimi wamek nimi taneko ka'ebaekti, Yesusag ambarelamekti, “Wene selamne nenena uro yabinep kom!” seek.
17Wene seekpa, Yesusti sinag tangabom agha kembitsiogti, “Wene a'undi, ‘Uro yabinep kom,’ selom aghana, Allah Yubu samenag mome toro pibekne lilim wamlange nene Allahri sa'a sembe lebog sembalom? Allahri Yubuag mome toro pibog nena,
‘Ae sorop nangdi kirik nene mali aro toboghaek aghana,
kirik neneko yangan kirik o'omne yangap tao,’
aro mome toro pibog.#Sepna 118:22 Ane sa'a sembe lemnep sembalom? 18Nimi etne kirik ene alibag eba timbale nimi eneko solabalul. Nimi etneag kirik ene timbaleri, niknibale nimi eneko oro urubalul,” aro Yesusti ambatsiog.
19Wene aro Yesusti sunumna ambatsiogpa, ka'elamek abeneko pere Musari yubu amohirop nangap, memnang Allah sembe palirop nang sikini yaboap tanekori, “Eldi nunag, ‘Malia ulamlom,’ aro ambatsil,” aro seneraghek. Ane sembe sindina, “Wela uro sumene babe Yesus haing sae kaupto saelbaukap?” aro ina elamek aghana, sin logti, “Nimi maikno tanekori nu wabahiikag,” aro el saelbaek kom.
Yahudi nimiri Yesusag, “Kaisar kiptopne sembe kamna wali tarukap to, kom to?” aro haibaeka
(Matius 22:15-22; Markus 12:13-17)
20Yahudi nimi nubunang tanekori, “Yesus haing sae kaupto saelbahabe,” aro Yesusti ulamogne sop-sop keme-keme neleplamek. “Haing sae kaupto saelbahabe,” senelamekti sindi nimi Yesusag poglamsiekti, “Yesusti yubu lero ulamogne wali uro kemelapmundi, ‘Sik uro el tahabe,’ senelamloa saog uro yubu win-win aro monag aluktop yubuag agha elag haibalulom. Elag haibamunba, Yesusti Roma nimi sembe san tiliptop yubu leple tanena, tam nembaberi, el haing sae kaupto saelbaberi, mog so'o saelba uhiropne gubernur saeag nembaukap,” aro haing keme-nelerop nimi Yesusag pogsiek. 21Pogsiek nimi taneko Yesusag yaekti, yubu lelamekti, “Nai, andi yubu amoro ambarelamsilamne, sik yubu mo lero ambarelamsilam. Andi yubu ka'erop nimi sembe, ‘Nimi ologne to, nubunge to,’ senelamlam kom aghana, Allah yubu porog uro Allahri seneragtopne sunsunum uro ambarelamsilam. 22Ane sembe andi yubu ka'ebaukap. Roma nimiri nu luknuhiro saelba uhiropne nubunge Kaisar ponekori nunag, ‘Kamna a'undi saeag agha na kipnange sembe pogto tarelamnululom,’ aro arukahiog. ‘Tarelamnululom,’ aro arukahiogpa, nuri wali el tarelamukap to, kom to?” aro monag aluktop yubu haibaek.
23Wene aro haibaekpa, Yesusti seneraglamogti, “Sindi tam nene haibi agha selbel werobag sae kiliro pail palamneang,” aro Yesus samenag el taog. El wamogti, yubu lelamogti, 24“Kamna kaptoba wanange nhon kembanundi, toro pepnumun,” seog. Payaekti Yesus pebelaekpa Yesusti, “Kamna kaptoba wana wamlange neneag nimi yame sunuropne wamlangeap, nimi si mome toro wamlangeap abenekona etneringe wamla?” aro haibahiog.
Wene aro haibahiogpa sindina, “Roma nimi nubunge Kaisartinge kamna kaptoba aneag wamla,” seek.
25Wene seekpa Yesusti, “Kamna kaptoba wana aneag Kaisarti yame sunurobaap, eldi siap pairop tanena, Kaisarti a'unag, ‘Tatnululom,’ sele tanena, ‘Eldinge,’ aro tarelamlulom. Apna sa'a-sa'a Allahringe wamla tanena, Allahag tarelamlulom,” seog.
26Yesusti wene seog nena, haibaek nimi tanekori, “Selbel werobag sae kiliro pail pukap,” aro tam nubunge nene nimi whingag Yesusag haibaek aghana, Yesusti wana hektopneag agha yubu walingeog lebogpa, elag tam pimnep kom. Yesusti yubu lebogne ka'ebaekti, lo'om aro yubu kom taek.
Saduki nangdi Yesusag yaekti, nimi teptopne nen kamag tanepne sembe haibaeka
(Matius 22:23-33; Markus 12:18-27)
27Ik nhon sum Yahudi nimi nubunang Saduki nang etpare Yesusag yaek. Saduki nimiri seneraglamek nena, “Nimi teptop nimi nen amik kamag taukang kom,” aro seneraglamek aghana, “Yesusag haibaukap,” aro yaek. 28Yesusag yaekti hailamekti, “Nai, an yubu amoro ambarelamsilamne wamlam. Tam nhon ambatkebeba, andi lepmenne ka'ebaukap. Samenag Musari mome toro pibog yubuag kemelamap nena, ‘Eldo ilipsae wamdek aghana, eldo me koma tebale tanena, ilipsaeri yauog kel eneko maupto topleri, eldo sembe lumbanep me nhon piplul,’ aro Musari mome tobog.#Ulangan - Sariktoba 25:5-6 29Tam nene sembe sunumna nhon ambatkukap. Sin eldo yabo ilipsabo nimi saekpare nang wamnari, yandonge poneko kelabo toamna agha me koma tebanep. 30Tebanep tanena, ilipsae phendepne ponekori, ‘Naro lunumna me nhon wamso,’ aro yauog kel eneko maupnep. Maupnep aghana, el poneko babe me koma tebanep. 31Tebanepba ilipsae wilindipne ponekori babe undo unuanep. Ilipsae tomne, lamne, no'opne undobog nimi saekpare tanekori kel eneko maupnep aghana, me koma ni tebanep. 32Komopnag kel eneko babe tebanep. 33Nimi saekpare nang tanekori kel eneko undo toamna ane sembe, amik nimi teptopne kamag tanep sum eneko kel eneko etneri kel tanep?” aro Yesusag mipto haibaek.
34Wene aro haibaekpa, Yesusti samoro sin Saduki nang tanekoag, “Nimi wene so'oag wamang nimiri nengabo kelabo top tangkamnep. 35Aghana amik nimi teptopne nen kamag taukang sum eneko, nimi etne Allahri tam lelekto kembi agha, ‘Nimi ene ya'ag wamnebag sunuropne,’ senehirop nimi taneko kamag nembahile tanena, nimi tanekori nengabo kelabo top tangto ulamukang kom. 36Sin wamikne Allah arukna imagnang malaikat saog uro wamukang ane sembe, nen tebanep koma ya'ag wamukang. Sin nimi teptobag agha Allahri nen kamag nembahile tanena, sinna Allah elmabo wamukang. 37Allahri teptop nimi kamag nembahilul nena, Musa eldamneri, ‘Nimi teptopne kamag nembahilul,’ aro lag nenero mome toro pibog. Musa alog kal peramag sekamogpa, uro yabiogne sembe Musari mome toro pibog yubuag nu Saelba Uhiropne poneko, ‘Allah Abrahamap, Ishakap, Yakubap paia uhiropne,’ aro engelamogti, mome toro pibog.#Keluaran - Lambaeka 3:6 38Allah whingagna ni kamag wamang ane sembe, Allah ponekona, ‘Nimi ya'ag teptoba wamukang,’ aro paia uhirop kom. Elna, ‘Nimi kamag wamukang,’ aro paia uhiropne wamla,” aro wene seog.
39Wene seogpa, Musari yubu amohirop nang tanekori ka'ebaekti, “Nai, andi yubu amohiro leplamne sik. Wali sirikne agha leplam,” seek.
40Wene seekpa, yog nimi nhondi babe elag mipnepne sang-sanga mipto haibanep kom wamog.
“Kristus sik uro Daud elme wamla to, kom to?” aro Yesusti hairo ambarelamsiogha
(Matius 22:41-46; Markus 12:35-37)
41Yesusti nimi tanekoag ambarelamsiogti, “Nimiri yubu lelamang nena, ‘Kristus#20:41 Samenag nimiri Yunani yubu lelamek nena Allahri, “Saelbamsululam,” aro wepto poglulne poneko sembe “Kristus,” aro si engero lelamek. poneko Daud elme wamla,’ alamang. Sa'a sembe, ‘Daud elme,’ alamang?” aro yubu ambatto haibahiog. 42Yesusti nen tipto ambarelamsiogti, “Wene alamang aghana, Daud eldamneri Kristus poneko sembe, ‘Na saelba uneropne,’ aro engero lebog. Daud eldamneri Allah omekto septop yubu mome toro pibogneag agha Kristus poneko sembe lelamog nena,
‘Nia mangkina Saelba Uhiropne ponekori na saelba uneropne ponekoag yubu lelamogti,
“Na sae sirik sip pulamena kekman, 43andi aisanang andi yan mombolag pimneba nembahinun,” seog,’
aro mome toro pibog.#Sepna 110:1
44Nunisag Daud ponekori Kristus poneko sembe, ‘Na saelba uneropne,’ aro lelamog tanena, welaro nimiri Daud paliag nenero Kristus poneko sembe, ‘Daud elme,’ aro lemnep?” aro ambatto haibahiog.
Yesusti Musa yubu amohirop nang sembe wenehirop yubu ambatsiogha
(Matius 23:1-36; Markus 12:38-40; Lukas 11:37-54)
45Yesusti yubu ambarelamsiogpa, nimi taneko ni ka'elamek abeneko pere Yesusti eldi yubu ka'ero neleplamek nimiag wenero ambarelamsiogti, 46“Sin Musari yubu amohirop nang tanekori ulamangne saog uro a'undi babe unuaheng kom. Sin Musari yubu amohirop nang taneko sindam nimiri paliag nenep tangka nubu nimiri enektop ag walinge agha nongag wangalamangdi, nimiri pail wa'ina kamna kapto torobag wa'alamangdi, ‘Nimiri na wali sembanehengdi, kipneheng taneogna wali,’ aro nimi whing toman pang yang ulamang. Nimi poloro Allah yubu lero winirop aeag babe, nimi haiptangto kwaneng yoro nikag terobag babe, ‘Nimi nubunang purobag aghabog pukamsene,’ aro pulamang. 47Sin nimiri, ‘Na kipneheng,’ aro unulamang aghana, aboapti kaldam kelabori ae babe, saeagha uropne babe sin Musari yubu amohirop nang tanekori taluro tolamang. Taluro tolamang aghana, sindi malia uropne sembe, ‘Niknip tanun,’ aro Allahag molona we uro kiliro lelamang. Unulamangne nene sembe ni tam kemero karebalulne ponekori kemelamsildi, tam ikin sirikne sinag pipsilul,” aro Yesusti wenero ambatsiog.
נבחרו כעת:
Lukas 20: kklKOS
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
© 2023 (Active), Wycliffe Bible Translators, Inc. All rights reserved.
