Lukas 19
19
Zakheus kal araag waelbaogti, Yesus tibaogha
1Yesus, “As Yerusalem tipto pinun,” aro as Yerikho aneko wa'ina palamog. 2As Yerikho enekoag nimi nhon saeagha tupne nhon sina Zakheus wamog. Zakheus poneko Roma nimi sembe kamna poloro torop nimi sikini nhon wamog. 3Zakheus ponekori, “Yesus yalamlange poneko wela saog nimi wamlange imnun,” aro ulamog aghana, nimi maikno sendebel alamekpa, el nong purundi Yesus imnep kom wamog. 4Ane sembe Zakheus el samenag merero menangal piogti, “Yesus yalamlenge imnun,” aro kal ara nhonag waelbaogti, tibogto wamog.
5Kal araag waelbaogti wamogpa, Yesus kal ara tamag aneko sekel piogti tiwalengkaogti, “Zakheus elemag kulukulae! Na sumene, ‘Tala mapsene?’ sembamnari andi aeag pinemeri wamnunam semban,” seog.
6Wene seogpa, Zakheus poneko elemag kulukul aogti, yeng uro kipto tolamogti, Yesus enero poa eldi aeag piog. 7Eldi aeag enero poa wa'alamogpa, nimi wamek nimi tanekori, “El Yesusna sa'a sembe malia aghabog ulamla nimi enekori aeag wa'al pil?” aro parog-parog alamek.
8Wene alamek aghana, Zakheus sekogti, Yesusag yubu lelamogti, “Nai, nu Saelbamsilamne ka'ebalulam! Nari tuba saeag wamlange nari pogto phende nembaneri, nhon nandamne sembe pimneri, ‘Phendep nena nimi saeagha orog nimi sembe tatsinun,’ aro lag phoro lelamna. Apna na samenag, ‘Roma nimi sembe kamna kaptoba poloro payalulom,’ aro aruklamsino aghana, nari phelektopne salero teno tanena, phelektopne nene nen lumbanun. Nimiag samoro tatsinun nena, sindi saeagha phelekto tomnonge aghabog tatsinun kom aghana, nen ma'aro ik tombare lumbaloa saog uropne tatsinun,” seog.
9-10Wene seogpa, Yesusti nimi tanekoag, “Nunisag Abraham samenag wamogti ulamog saog uro ae ene ngainge poneko babe nelepto uropne wamla.#Sumbaogha 18:1-8 Na mog so'oag nimi tangtopne yahingena, ‘Nimi ka'eseptangtop nimi ebahineri, wali nenero taulbahinun,’ aro yahi. Nunisag Abrahamdi samenag ulamog saog uro, wamap ae ene ngaingeri babe elag nelepto ual ane sembe, sumene Allahri nimi taluro saelbahinepne ae lom aneag keknep tal,” seog.
Tupne nhondi eldi arukna saeag pipsiog nimiag sunumna tol pina Yesusti ambatsiogha
(Matius 25:14-30)
11Yesusti yubu ambarelamsiogne as Yerikho wamek nimiri ka'elamek. Ka'elamekti sindi senelamek nena, “Yesus wene as Yerusalem palamlari, nuri as Yerusalem peram wamabag yal. Undop pagha, Yesusna Allahri wepto poghogne poneko wamsori, Yerusalem pile sum eneko el mori alniro nu sembe yubu sia lero saelbamsiso,” sembaek. Undo sembaek ane sembe, Yesusti sunumna yubu tol pina nimi tanekoag ambarelamsiogti, 12“Nimi nubunge nhon wamogti, ‘Weag mog so'o nhonag pineba, na yubu sia leropne towalengkaneik tanena, samoro yanun,’ sembaog. 13Wene sembaogti, anam pin komag eldi arukna sa'obare yopsiog. Yopsiogti sinag kamna kaptoba alikinag uropne leng-leng aroba emas agha sunuropne wanange sin a'ero-a'ero nhon-nhon tatsiog.#19:13 Sinag kamna kaptoba wanange tatsiogne Ibrani yubuag “mina” alamek nena, nimi nhondi wal tombare sop-sop awe tolamsoba, iliri kamna tatnepne sunsunum uro sin a'ero-a'ero nhon-nhon nikne tatsiog. Tarelamsiogti yubu ambatsiog nena, ‘Na pineba, wamne komag a'undi kamna kaptoba wanange tatsinne neneag agha na sembe nen ma'aro nubu nembarelamnumuna kekman samoro yanun,’ seogti sindi saeag nembaog.
14Wene aro tatsiogti, piog aghana, as aneko wamek nimiri el sembe sin karongdi nimi poglamsiekti, ‘A'un pimundi, nimi eneko towalengkipnep nimiag ambarelapmundi, “Nimi neneko sembe nu saekag komdi, el yubu sia leropne towalengkipseng kom,” sululom,’ aro nimi pogsiek. 15Pogsiek aghana, tup nimi nubunge poneko towalengero, ‘Mog so'oag wamang nimi sembe yubu sia lelamlul,’ aro sekirekpa, nen samoro eldi as anekoag yaog. Yaogti, ‘Nari kamna kaptoba tatsinonge sindi nubu nembaong to?’ aro eldi arukna samen kamna kaptoba wanange tatsiog nimi taneko yopsiog.
16Wene aro yopsiogpa, nimi samenag yaog nimi enekori ili nimi nubunge ponekoag ambarelamogti, ‘Nai, andi kamna kaptoba wanange ot nhon tatneomne nenekoag agha nari o'olamnori, nen wana mauamloa saog uropne sa'obare nembano,’ seog.
17Wene eldi arukna anekori, ‘Sa'obare nembano,’ seogpa ili ponekori, ‘An sik uro nari arukna walinge wamlam! Nari ologha andi saeag pimno aghana, andi wali sik uro saelbaom. Ane sembe nari an towalengkagheneba, as soro kalurop as sa'obare nimi sembe yubu sia lelapmendi, na umag saelbamsululam,’ seog.
18Eldi arukna phendepne eneko ambarel aogti, ‘Nai, andi kamna kaptoba wanange ot nhon tatneomne nenekoag agha nari o'olamnori, nen wana mauamloa saog uropne lambare nembano,’ seog.
19Wene seogpa, ili ponekori eldi arukna anekoag, ‘Nari an towalengkagheneba, as soro kalurop as lambare nimi sembe yubu sia lelapmendi, na umag saelbamsululam,’ seog.
20-21Eldi arukna wilindipne neneko yaogti ambarelamogti, ‘Nai, nari an sembe el wamnari, “Nari nai nimi yonge logne wamla,” sembano. Andi nimi luknuhiro nimiri saeagha uropneap, andamneri wero meroan komneap sop-sop taluro tolamsilam. Ane sembe nai, andi samenag kamna kaptoba wanange tatneomne neneko, “Ka'eseptaleag,” aro ta'asoma lomag wali uro wa'amogto paiamno. Kembalulam. Wene ane wamlaba, nen samoro tarelangken,’ seog.
22Wene seogpa, ili ponekori samoro yubu lelamogti, ‘An nari arukna wana yonge wamlam. Andi na sembe senelamnelamdi, “An nimi yonge wamlamdi, nimi luknuhiro nimiri saeagha uropneap, andamneri wero meroan komneap sop-sop taluro tolamlam,” aro yubu ambatnelam te? Andi wene aro yubu ambatnelam yubuag agha nari an sembe tam lelekto karebaneri, anag ikinne pelengkanun. 23Andi na sembe, “Elna nimi undopne wamlaba na log,” sembahom tanena, sa'a sembe kamna kaptoba nari tatkenonge neneko poa nubu nembanep nimi saeag andi pail pihinep kom? An sindi saeag pail pindi, “Kamna kaptoba neneko ma'aro nubu nembaleba, nani nen samoro yaleba, ma'aropne nene naniag talul,” aro uahom. Undo unuahom tanena, nari tatkenongeap, nen phelekto ma'aropneap topsene,’ seog.
24Wene seogti, nimi nubunge ponekori nimi wamek nimi tanekoag ambarelamsiogti, ‘A'undi kamna kaptoba wanange nhon ane eldi saeag agha toplulom. Topmundi elkae sa'obare nembao nimi enekoag tatlulom,’ seog.
25Wene seogpa, nimi wamek nimi tanekori lelamekti, ‘Nai! Elna kamna kaptoba wanange sa'obare salelamlaba, “Nen tatlulom,” selam te?’ aro wene seek.
26Wene seekpa, nimi nubunge yubu sia leropne ponekori sinag samoro yubu lelamogti, ‘Nari lelamnange ka'ebahut. Nimi etneri elag wamlenge, “O'oro saelbanun,” senelamle tanena, elag tatnepne nen ma'aro yabilul. Aghana nimi etneri elag wamlenge, “Limnun,” senelamle tanena, elag wamlenge babe kom talul,’ seog.
27Wene seogti, nimi nubunge ponekori nimi tanekoag ambarelamsiogti, ‘Wene pimundi, nimi nanag aisa nenelamneangdi, “Nu as anekoag nimi sembe yubu sia leropne talul kom,” alamong nimi tol pihina payahimundi, na whingag anea ya'ag opsululom,’ seog,” aro Yesusti sunumna yubu ambatsiog.
Yesus nimiri kiplamekne toman agha as Yerusalem wa'iogha
(Matius 21:1-11; Markus 11:1-11; Yohanes 12:12-19)
28Yesusti ni aneko wene aro ambatsiogti, sin whing toman agha menangaro palamogti, Yerusalem sip walelamog. 29Yerusalem sip walelamogti, yim Zaitun tamag sorop as Betfageap as Betaniaap aneko peramag piog. As phende abeneko peramag wamogti, eldi yubu ka'ero neleptop nang phende el whingag samenag pogsiog. 30Poglamsiogti, “As nu whingag wamla asag anet pururom. Pirumundi wa'alamtumun abeneko tilamtumunba, pham keledai me nhon kerekamika ipturom. Iptumun pham keledai ane alibag nimi nhon babe pham ane alibag pulingkirop kom pham kerektoba iptumundi, pham keledai ane lopto poa yarurom. 31Loplamtumunba nimiri a'unag, ‘Sa'a sembe pham ane loplamdom?’ aro hailogsiik tanena, a'undi samoro ambatsururom nena, ‘Nu Saelba Uhiropne poneko teko ualba pabalamnam,’ sururom,” aro ambatsiog.
32Wene aro ambatsiogpa, sin phende Yesusti pogsiog nang abeneko samenag pirekti kemelamdekpa, Yesusti ambatsiogha sunsunum uro wamogha iptek. 33Iptekti pham keledai aneko loplamdekpa, pham ngainang tanekori hailamsiekti, “Sa'a sembe pham keledai ane loplamdom?” aro haibahiek.
34Wene aro haibahiekpa, sindi samoro yubu ambarelamdekti, “Nuni nu Saelbamsilne ponekori, ‘Teko uanel,’ selba loplamnam,” serek.
35Wene serekti, pham keledai me aneko lopto poa leptekti, Yesusag poa yarek. Poa yarekti, sindi ag nongag enektop ag kwiripto Yesus puknebag pham keledai alibag aneko yangki agha Yesus keyapto pham keledai alibag pukirek. 36Pham keledai anekoag pulingkiogti palamogpa, nimiri sindi ag wangaro siliro pelengka urop ag kwiripto, “Kibukap,” aro Yesus yalamog ina toman yangalamek.
37Yesus palamogha Zaitun yimag agha kulukul ingkirobag anekoa as Yerusalem tiboghanebag palamogpa, eldi yubu ka'ero neleplamek nimi niri alniro Allah omeklamek. Sindi samenag agha Yesusag neleplamekpa, Yesusti ik sulu Allah mikibari uanepne ulamogha ililamekne sembe awiri yubu nubu uro Allah omeklamek. 38Sindi yubu nubu uro lelamekti,
“Nu Saelba Uhiropneri poglaba,
el siag kekhaekto yubu sia lenne yalamlange poneko paliag uropne omeklamsut!#Sepna 118:26
Imagne ponekoap aisa nenep tan koma ma'ap tangkamukap.
El paliag sirik imag wamlange omeklamsut!”
aro omeklamek.
39Wene alamekpa, Farisi nimi agha nimi etpare sin anabiag wamekne tanekori ka'ebaekti, Yesusag lelamekti, “Nai, andi nimi amolamsilamne wamlam. Andi yubu ka'ero neleptop nimiri an sembe yubu lelamangne sunsunum komdi sinag, ‘Yubu kom tahut,’ aro wembahilulam,” aro ambarek.
40Wene seekpa, Yesusti samoro sinag, “Nari a'unag sik uro lelamna. Sindi babe yubu kom taheng tanena, sindi wene lelamang saog uro kirik so'oag ubu paiamangne taneri babe haum alamseng,” aro sinag samoro ambatsiog.
41Yesus as Yerusalem peramag piogti, as soro kalurop as Yerusalem aneko kembi agha Yesus hail mag pelengero engkatsiog. 42Engkarelamsiogti, “A'un as Yerusalem nimi sumene wana hekahisoba, ‘Undo unuaberi, nu aisa nenep tan koma aingniro wamukap,’ aro el tahom tanena, a'un wali wamnep. Aghana a'un whingag wamlange ililamlom komdi, a'undi wana seneragnep kom. 43-44A'un as Yerusalem nimi taneri na Allahri wepto pogneogne yalamnange iamnelom kom. Ane sembe, a'unag amik uro yabilul nena, a'un aisa nimiri as Yerusalem ane tembom-kaembom aro sekel yaikti, a'un kanero, ‘Nimi opsukap,’ aro wea uroba sobaukang. A'un aisa nimiri wea wa'aikti, a'un as Yerusalem nimi olopsukang. As ene tembom-kaembom agha ni kwerekto pin serepna nembahiikpa, kirik pairo poa walerop kirik enekoag agha nhon babe nen sorobag sekamlul kom,” aro Yesusti as Yerusalem nimi engkatsiog.
Yesusti Allahri Mem Ae aramag wa'ina nimi yag lambahiogha
(Matius 21:12-17; Markus 11:15-19; Yohanes 2:13-22)
45Yesus Allahri Mem Ae aramag wa'iogti kemelamsiogpa, nimi maikno wa'ina pail alamek nena, “Yingkirop nimiri Allah sembe tatnepne kamna kapto tobukang,” aro pail alamekpa, kamna kapto tolamek. Yesusti ipsiogti, kamna kapto payalamek nimi yag lambahiog. 46Yag lanalamsiogti, yubu ambarelamsiogti, “Samenag Allahri yubu lebogne nimiri mome toro pibog nena,
‘Nari ae enena, na omektop nimiri molona molorop ae wamlul,’ seog.#Yesaya 56:7
Aghana a'undi ulamlomneag agha, ‘Nimi ohiro haoghaba torop nimi tognop tangtobag’ saog nembaom,” aro Yesusti yag lambahiog.#Yeremia 7:11
47Yesus sop-sop Allahri Mem Ae aramag wa'alamogti, nimi yubu ambarelamsiog. Yubu ambarelamsiog aghana, memnang Allah sembe palirop nang sikini yaboap, Musari yubu amohirop nangap, Yahudi nimi nubunangap tanekori, “Yesus obukap,” aro pa'asea sum elamek. 48“Obukap,” aro ulamek aghana, Yesusti yubu ambarelamsiogne nimi maikno ka'elamek nimi ni tanekori sindi wanaag, “Yubu ambarelamsilne wali uro ka'elamsebe,” senelamek ane sembe, Yahudi nimi nubunangdi, “Yesus saelbaberi obukap,” sembamekne ina eraruk wamog.
נבחרו כעת:
Lukas 19: kklKOS
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
© 2023 (Active), Wycliffe Bible Translators, Inc. All rights reserved.
