Lukas 18
18
Yesusti, “Allahag papna koma wanaag agha sarikto mololamlulom,” aro ambatsiogha
1Wene aro ambatsiogti, Yesusti nen eldi yubu ka'ero neleptop nimiag, “A'undi Allahag mololapmundi, ‘Sololamna,’ semban koma sop-sop tipto elag mololamlulom,” aro wenelamsiogti, sunumna tol pina ambarelamsiog. 2Yesusti lelamogti, “As nhonag nimi nubunge tam lelekto kemel pina kareptopne nhon wamog. El tam kareptopne ponekori log semban koma nimi orange babe, Allah babe kipsirop kom. 3As anekoag babe kaldam kel nhon wamog. Kel enekori tam kareptop nimi enekoag sop-sop molol alamogti, ‘Nimi nhondi na aisa nenero malia uaneoba, tam nene kemero karebatnemenba, nanag sik uropne sunsunum uro lunuro tatnelul,’ aro molol alamog.
4Wene kaldam kel enekori, ‘Tam naringe kembamendi, yepto karebatnululam,’ aro molol alamog aghana, tam lelekto kemero kareptopne ponekori yepto karebarelamog kom. Tam karebarelamog kom aghana, el ponekori seneraghogti, ‘Nari Allah sembe log senero kiplamna komdi, nimi sembe teba'en senelamsin. 5Aghana kaldam kel eneri sop-sop yalamlari, nebel alamnel. Tam ane kemero karebane kom tanena, “Kaldam kel ene sop-sop yingkina yubu nebel alamneleag,” aro el sembe tam kemero karebaneba, nimi enekori elag lunuro tatlul,’ seogti tam karebaog,” aro Yesusti eldi yubu ka'ero neleptop nangag sunumna sunuro ambatsiog.
6Wene aro ambatsiogti, nu Saelba Uhiropne ponekori sunumna neneag tol pina tipto ambarelamsiogti, “El tam lelekto kemel pina kareptopne poneko wana sengkwanektop nimi wamnep aghana, eldi babe seneragto, ‘Tam karebanun,’ aro lelamogne sembe a'undi wali uro seneraglamlulom! 7El wana sengkwanektopne enekori babe, ‘Maiknoro mololamnelne sembe tam karebanun,’ seog tanena, Allah porog uro tam karebi agha lumbanepne ponekori eldamneri wepsiog nimi sembe huahilul? Eldamneri wepsiog nimi tanekori sinag kweleknag Allahag, ‘Nu sembe tam karebatsululam,’ aro engero mololamseng tanena, Allahri sin sarikto wailag ibarelamsinep te? Kom. 8Nari sik uro a'unag lelamnange, Allahri sin sembe elemag tam porog uro karebi agha lumbalul. Ot nari wanaag hail dalamnangena, na mog so'oag nimi tahinge nen samoro yane sum eneko, ‘Allahag wana palilamik nimi ipsinun to, kom to?’ aro hail dalamna,” seog.
Yesusti sunumna Farisi nimiap, Roma nimi sembe poloro torop nimiap abenekoag sunumna tol pina ambatsiogha
9Aneko wamek nimi nhon-nhondi sindam nimi sembe, “Allahri nun agha wana porog nimi senelamsil,” aro seneraghal dalamekti, nimi orange sembe teba'en senelamsiek. Sin metmereng arop nimiag Yesusti likiptop yubuag tol pina ambarelamsiogti, 10“Ik nhon sum nimi phende, nhonna Farisinge, nhonna Roma nimi sembe kamna poloro toropne wamdek. Wamdek nimi abeneko, ‘Allahri Mem Aeag pineri, Allahag molona molbanun,’ aro pirek. 11Pirekti Farisinge poneko nimi whingag sekel pina eldi wanaag Allahag yubu lelamogti, ‘Nani Allah, na nimi ora nimi tane saog uro wamna komdi, walinge agha ulamnange sembe, “Nani,” aro kiplangken. Sin ora nimi haogha torop nimiap, sik komne urop nimiap, kelabo haogha torop nimiap wamang. El Roma nimi sembe kamna poloro torop nimi neneko babe wamlari, eldi malia ulamlange saog uro nari ulamna komne sembe anag, “Wah,” aro kiplangken. 12Na ik saekpare ua ulamnaag sop-sop ik phende kwaneng ten koma anag mo seneragto moloro ulamna. Nari saeag wamlange agha ni poloro palu sa'obare nembi agha sa'onge nene an sembe pogto palilamna,’ aro eldi wanaag Allahag yubu lelamog.
13Wene aro lelamogpa, el Roma nimi sembe kamna poloro toropne poneko weag nimi liliag sekamogti, imag tiwalengkan koma wana ikin uro Allahag mololamog. Allahag mololamogti, ‘Nani Allah, na malia urop nimi agha wamna. Andi na omna koma yareag sembanululam,’ aro saramag ol dalamogti, Allahag molona mololamog.
14Nari a'unag sikne agha ambatnuahin nena, sin nimi phende abeneko wene aro Allahag yubu leptek nimi agha Allahri ot nimi nhonog sembe, ‘Wana porog nimi ene nari whingag wali wamlul,’ sembaog. Nimi enekori, ‘Na malia urop nimi agha wamnange yareag sembanululam,’ aro molbaogne ponekona, Allahri nimi ene wana porogne sembaogpa, nimi eneko aeag wali piog. Nari lelamnange nenena, nimi etneri eldamne paliag nenep tale tanena, nimi eneko mombolag talul. Nimi etneri eldamne mombolag nenep tale tanena, nimi eneko paliag talul,” aro Yesusti ambatsiog.
Yesusti me ologne kipsiogha
(Matius 19:13-15; Markus 10:13-16)
15Yesusti yubu ambarelamsiogpa, nimiri me ologne payalamsiekti, “Me ologne taneag sae pipsululam,” aro Yesusag mololamek. Payalamsiek aghana, Yesusti yubu ka'ero neleptop nangdi kemelamsiekti, nimi tanekoag, “Payahiseng kom,” aro irikto walamsiek.
16Wene aro walamsiek aghana, Yesusti me tanekoag, “Nanag yalulom,” aro yopsiogti, nimi taneko ambarelamsiogti, “Me tane nanag wali yaukang. A'undi irikahiseng kom. Nuni Allahri sin wamang saog urop nimi babe paiamsildi, saelba ulamsil. 17Nari a'unag yubu sikne agha ambarelamsin nena, nimi etneri eldamne olog mabo saog nenep tangka Allahri saelba uhiroba kipto tople kom tanena, Allahri saelba ulamsil nimi tanep ina wa'ina wamnep kom,” aro ambatsiog.
Tupne nhon Yesusag hailaogha
(Matius 19:16-30; Markus 10:17-31)
18Wene aro ambatsiogpa, nimi nubunge Yahudi nimi saelba uhiropne nhondi Yesusag hailamogti, “Nani, an yubu amohiropne walinge wamlam! Yubu ambatnululam! Nari hulamne pere agha ya'ag kamag uro unne nanag talul?” aro Yesusag haibaog.
19Wene aro haibaogpa, Yesusti nimi enekoag, “Nanag, ‘Walinge,’ selam nena, nimi mog so'oagne nhon babe walinge wamla kom. Ot Allah mo aghabog walinge wamla. Andi sa'a sembe nanag walinge selam?” seog.
20Wene seogti, Yesusti nen tipto yubu ambarelamogti, “Allahri Musa pere agha aruksirop yubu ambatsiogne an el wamlam.
Ora nimiri nengabo kelabo haogha topsiseng kom.
Nimi ya'ag opsiseng kom.
Nimiringe haoghaba topseng kom.
Minirop yubu lepseng kom.
Ani anindi yubu ka'ero kiplamsululam.
Ni ane Allahri samenag ambarogpa, Musari tipto ambatsiogpa, ka'elamapne an babe el wamlam,” seog.#Keluaran - Lambaeka 20:12; Ulangan - Sariktoba 5:16-20
21Wene aro ambarogpa, kabuni enekori Yesusag samoro lelamogti, “Andi ni leplamne nenena na olog wamsiag agha saelbamsia kekman wene babe saelbamnari ulamna,” seog.
22Wene seogne ka'ebaogti, Yesusti nen kabuni enekoag, “Ot nhonog andi ulamlam komne nhon wamla. Andi saeagha ni wamlange nimiag kamna kapto topmendi, kamna tatkeikne nimi saeagha orogne tatsululam. Undo tatsimen tanena, tup nenep taneba maikno Imagne ponekori whingag an sembe polop talul. Tatsimenba samoro nanag yamendi, nanag yubu ka'ero neleplamnululam,” seog.
23Yesusti wene seogpa, nimi enekori ka'ebaogti, saeagha maikno wamogne sembe wana ikin taog. 24Wana ikin taogpa, Yesusti nimi enekoag kembi agha lelamogti, “Nimi saeagha tup uro urop nimi Allahri saelba ulamsil nimi tanep ina wa'ina wamnepne eka'uk sirik wamla. 25Sik uro eka'uk sirik. Pham unta nhon el nong olog nenep tangom agha imis phoroba lom toman wa'inep te? Eka'ukti wa'inep kom senelamlom. Aghana nen eka'uk phelektopne nhon wamlangena, tup nimi Allahri saelba ulamsil nimi tanep ina wa'ina wamnepne nen phelekto eka'uk sirik wamla,” seog.
26Yesusti wene seogne ka'ebaek nimiri lelamekti, “Tup nimi sembe eka'uk tanena, etne agha Allahri taluhirop nimi tanep?” aro haibaek.
27Wene aro haibaekpa, Yesusti samoro nimi tanekoag ambarelamsiogti, “Nimirina, ‘Uro yabinep kom,’ senenne ot Allahrina uanepneog wamla,” seog.
28Yesusti wene seogpa Petrusti, “Nu kembahimen! Nuringe nia mangkina saeagha uropne ni lipsibori, anag neleplangkeap,” aro Petrusti Yesusag wene aro ambarog.
29-30Wene seogpa Yesusti, “Nari a'unag yubu sikne agha ambatnuahin. Nimi etneri, ‘Allahri saelba ulamsil nimi tanun,’ aro eldinge ae, eldi eldo ilipsae, elkel, eldi ili ilin, eldi elmabo nimi enekori nhon sae yamolopsilenge sembe wene wamap ko'o eneag Allahri lunuro nen ma'aro maiknoro phelektopneap tatlul. Nia mangkina sae yamoloplenge sembe tatleba, elag talul nena, nimiri aeap, eldi eldo yabo ilipsaboap, eldi kelap, eldi ili yabo ilin yaboap, eldi elmaboap babe wene wamap ko'o eneag elag talul. Nen nhonna, amik yalamle ko'oag Allahri ya'ag kamag uro unne neneko tatsilul,” aro Yesusti ambatsiog.
Yesus el seklero tebanepne sembe ik wilindip sum ambatsiogha
(Matius 20:17-19; Markus 10:32-34)
31-33Yesusti aobare nang wepsiog nang eneko mo poloro wimbitsiogti, yubu lelamogti, “Ka'eamnululom. Na mog so'oag nimi tahinge, nimiri nanag ulamukangne sembe samenag Allah yubu silimu tiplamek nangdi mome toro pibek. Wene nu Yerusalem walelamebeba, nanag uro yabilulne sembe mome toro pibekne neneko sunsunup tangto uro yabilul. Sindi samenag nanag uro yabinepne sembe mome toro pibek nena, ‘Nimiri el saelbaikti, nimi sisa Yahudi kom nimi saeag nembaukang. Nimi sisa Yahudi kom nimi tanekori yubu nepto san tiliplamikti, silumag suplamikti, taeplam-taeplam lobikti, ya'ag obukang. El ya'ag obik aghana, ik wilindip sum eneko nen kamag talul,’ aro mome toro pibekne sunsunum uro sik uro yabilul,” aro Yesusti sin aobare nang taneko ambatsiog.
34Yesusti wene aro ambatsiogne sembe sin wana sao kaupsiogpa, “Yubu nene sa'a sembe ambatsil?” aro yubu lomag waliro wali uro seneraghek kom.
As Yerikho peramag Yesusti haing uropne wali nembaogha
(Matius 20:29-34; Markus 10:46-52)
35“Yesus Yerusalem waelbanun,” aro as Yerikho peramag inaag palamogpa, nimi nhon haing uropne ina abolag pukamog. Ina abolag pukamogti, nimi pang yang ulamek nimiag, “Yepto tatnululom,” aro mololamsiog. 36Mololamsiogti wamogpa, nimi maikno palamekti, yubu mu alameka ka'ebahiogti, “Nimi maikno palamangne sa'a sembe palamang?” aro nimiag haibahiog. 37Haibahiogpa sindina, “Yesus Nazaretne poneko ina ane toman palamla,” aro ambarek.
38Wene aro ambarekpa, haing urop nimi enekori haum aro yubu lelamogti, “Yesus, an Daud sisange mangap talumne. Na yareag sembane,” aro haum alamog.
39Wene aro haum alamogpa, nimi whingag palamek nimi tanekori, “Yubu kom tae!” aro wenelamek. Wenelamek aghana, el poneko nen ma'aro mikip uro haum aro lelamogti, “An Daud sisange mangap talumne, na yareag sembane,” aro haum alamog.
40Wene aro haum alamogha ka'ebaogti, Yesus palamog aneko pabom seogti, “Na yoplamnel nimi ene payalulom,” seog. Poa piekpa, Yesusti nimi enekoag, 41“Andi sembalam nena, ‘Nanag sa'a agha uanoho,’ sembalamdi yopnelam?” aro haibaog.
Wene aro haibaogpa, haing urop nimi enekori, “Nai, ‘Nari haing ene kwelekanoho,’ sembamnari yopken,” seog.
42Wene seogpa Yesusti, “Andi nanag sikne aro wana palilamlamne neneri an wali nembaghel. Andi haing ene kwelekaghele,” seog.
43Yesusti wene seog abeneko pere haing kwelekaogpa, Yesusag neleplamogti, Allah omek-omek palamog. Undo haing kwelekaogha nimi maikno tanekori ibekti, sindi babe Allah omeklamek.
נבחרו כעת:
Lukas 18: kklKOS
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
© 2023 (Active), Wycliffe Bible Translators, Inc. All rights reserved.
