Matta 17
17
Nggətta sɨtɨ Yesu
(Markus 9.2-13; Luka 9.28-36)
1Beetɨ bətə tukoltaka, Yesu a por yə Bitrus ka Yakubu ka Yohana a mufə Yakubu, a nggɨrə kaarən a nə mwo gbyalatə, tənə dɨsərən ɓəmbə. 2Gaarə a hangɨn Yesu a nggəɗə humwaasərən kat təne nan. Humwasən ta ɓɨra ɓətɨ fərə, sɨɓwetɨ dan a nggəɗə ta ɓɨra hal-hal. 3Də a hangɨn Musa ka Iliya a dɨma kaarən, tən ta byeli ka Yesu.
4Bitrus a sa Yesu atɨ, “Həmɨmiye, ɓə wula atɨ hinə ganə. Ndɨka hina ɗa bolkye mwaakɨn ganə, hiɗə hɨnggu, hiɗə hɨnggə kpale Musa, hiɗə mgban hɨnggə kpale Iliya.”
5Sɨne a vor byele tee, pɨrɓatə nə huɗa pwat-pwat, ngga shi asɨ gbərən, mya kɨla korme dɨ vor pɨrɓatɨngɨn atɨ, “Nze de a na dɨ mworən nə anə, haa dɨ nɨnyi kɨr-kɨr kan. Samdə kwakingəwnə kɨləmrən.”
6Ite lagbengɨn a kɨla ləngɨn, təna fokə njiya a kopo ka kala. 7Yesu a shi hakarən, nda parən a sarən atɨ, “Maɗəm ɓe kala aa gəwnə.” 8Ite təna maddə nəngrən, tənaa yə naa ama, Yesu nə mbiɗi dɨsərən.
9Ite təne dɨ janga gə nə mwe, Yesu a sarən atɨ, “Ɓe hwunaa boyə ama le a nə sa hwuna nan, zə kulam fəra hɨn Nze da Ɓwaara hɨn ɓa maggə we ka myentə kan.”
10Lagbe dan a ɗiyən, “Mɨnə ɗa ji-lee kəndə ɓashita Musa a dɨ sa atɨ kpale Iliya ɓa luwa kwamətə a shi a mbəə, Ma Həmɨnpwa Yaɓwarən a ɓə shi?”
11Yesu a luwa a sarən atɨ, “Sə gən, Iliya shi, ɓa ɗadə shee kat mgban. 12Shezə na dɨ boyownə, Iliya tɨla kɨnɨnɨng, tənaa leyə atɨ sɨnə, səngɨn ɗa təna ɓə ɗan wule shee təna ɗan. Sə mgban hɨn Nze da Ɓwaara hɨn ɓa sop tənətə a tɨfəngrən.” 13Də lagbe dan a ɓə shea leyə atɨ a Yohana nzə-ɗa batisɨmatə nə nda dɨ bwe le a nəngɨn.
Yesu a dɨmdə pɨla nzə-dwatə dɨ sɨtɨ a nzə
(Markus 9.14-16; Luka 9.37-43a)
14Ite təna tɨla a haa ɓwaare a peyə də, ama a jipa Yesu, a gyerə humwasən. 15Mangɨn a san atɨ, “Həmɨmiye, zə ɗa purutɨ nze de. Sɨnə ka ootɨ mbərhe, nda dɨ tənə ka ootɨngɨn kɨr-kɨr. Mba-dɨ-mba, ootɨngɨn kana kɨttən da dɨ fukə ɗiye, a fərə mgban a haɓye. 16Na shi ka nzəngɨn a haka lagbe dəw tənaa mban a gwadən.”
17Yesu a luwa a sarən atɨ, “Hii! Hwun ji-ɗongə mwadiyale, a ji mgbɨləha wanetɨnə! Baa goɗi na ɓə nza kəwna? Baa goɗi hɨn ɓa ɓwamosowa kəwna? Wemi ka nzəngɨn ganə.” 18Yesu a gɨra pɨla nzə-dwatɨngɨn, nda dɨmgə sɨtɨ nze, tee tan-tan nze a piyagən.
19Beetɨ angɨn lagbe da Yesu a shi hakan, a ɗiyən le a haa ɓotə atɨ, “Mɨnə ɗa hinaa ɓə mba nzə-dwatɨngɨn a dɨmdən?”
20Yesu a sarən atɨ, “Gəkɨlə mwadiyale dəwnə nə ɓyeləng. Diyalə na dɨ boyownə, anda hwune ka mwadiyale nagi kəng-kəng ɓətɨ daasə bagalə, hwun ɓa boyə mwotɨnə atɨ, ‘Ɗaka hanə muɗə harə.’ Mwotɨngɨn ɓa muɗə. Taa asə də hwunaa dɨ mban a ɗa. 21Di wule pɨla nzə-dwate, hiwti ka gone ɓəmbə ɓa mban a dɨmdən.#17.21 Dorshi kwamətə tam ka Matta 17.21.”
22Ite Yesu ka lagbe dan a peyə haa hiɗə a vor njiya Galili, nda sarən atɨ, “Hɨn Nze da Ɓwaara hɨnə mya ɗərdi a vədi a tɨfə ɓwaare. 23Tən ɓa ɓɨlti, mwaakɨnə bətə hɨn ɓa maggə we ka myentə.” Lagbe dan a ɗa yedi-kɨttə kɨr-kɨr ka ləməgingɨn.
Shemtɨ Shafe
24Ite Yesu a tɨla ka lagbe dan a vor Kafanawum, ji-luu taa shemtə a Shafe a shi haka Bitrus a ɗiyən atɨ, “Nzə-kəndəshe dəwnə aawa mbwa taa shemtɨ Shafe ma?”
25Bitrus a sarən atɨ, “Sɨne dɨ mbwa.”
Bitrus ta pɨra a vor hwoɗye, Yesu nə tiya ɗiyən le atɨ, “Siman, ya hye niyaa? Dɨ haka yə wonə kana həmye a luu taa shemta? Dɨ haka ji-hwoɗəta? Naasə mgban dɨ haka omye?”
26Bitrus a san atɨ, “Dɨ haka omye.”
Yesu a luwa a san atɨ, “Anda sə, ji-hwoɗətə aa dɨ mbwa. 27Shezə gə ɓe myaa kɨɗa yedingrən, wudə kwaka haɓye, ɗongdə nggaktə a gərə Galili. Vaktɨ kwaməte hye kɨsə, hye wuna kwaamɨngrə, hye ɓa pa taa nee də a ɓa kən mbwa taa shemti. Wudə hye mbwarən hɨnggi ka hɨnggu.”
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.
