Matta 16
16
Farise a ɗilə sɨgbəshe
(Markus 8.11-13; Luka 12.54-56)
1Farise ka Saduke a shi haka Yesu a kanarən, təna ɗiyən atɨ, nda bɨlərən sɨgbəshe dɨ pwa.
2Nda luwa a sarən atɨ, “Fəre kana gəə kaadə hwuna dɨ sa atɨ, ‘Haa nə ɓa gə shəng-shəng, gəkɨlə pwanə kpalam,’ 3ka hawure hwuna dɨ sa atɨ, ‘Ɓoole nə ɓa njima, gəkɨlə mgba pwa ndə dɨ rika.’ Hwuna lee shee a nə gətɨ haa, shezə hwunaa lee sɨgbəshi shinə dɨ ɗa ɓəgəng. 4Mi wanetɨnə mi hashi, a ji-ɗongə mwadiyale tənə dɨ ɨli gəkɨlə mya bɨlərən sɨgbəshe! Myaa dɨ bɨlərən asə som pɨrgə hɨnggə Yunana.” Yesu a ɗakarən a muɗə a haa som.
Maɗe da Farise ka hɨnggə Saduke
(Markus 8.14-21)
5Ite təna nggɨra a ɓayatɨ gəre, myentɨ lagbe dan a nggurgə buroditə. 6Yesu a sarən atɨ, “Bəmdə myensəwnə ka wule maɗe da Farise ka hɨnggə Saduke.” 7Lagbe dan a ɗiyəsə le a wakasərən a sasə atɨ, “Gəkɨlə myaa shim ka buroditə səngɨn ɗa nda ɓə bwe le ma?”
8Yesu a lee la təna dɨ ɗiyəsə a wakasərən, nda ɗiyərən atɨ, “Mwadiyale dəwnə nə ɓyeləng, ɓə mɨnə ɗa hwuna dɨ boyəsə le a nə burodite hwun tam kaara? 9Baa ɓəgəng kwa-hubosəwnə aa banga ma? Hwunaa yə ɗyanga ka burodite tuf morye haru bəw laka tuf a zɨmə, nda konye ya mya pora? 10Ɓə burodite tukolukpe mgban, a ite morye haru bəw laka fwat a zɨmə, nda konye ya mya pora? 11Mɨnə ɗa hwunaa leyə atɨ aa a nə buroditə na dɨ bwe le? Na səwnə atɨ, bəmdə myensəwnə ka wule maɗe da Farise ka Saduke.” 12Də lagbe dan a ɓə shea leyə atɨ aa a nə maɗa dɨ ɗɨkdə buroditə ngga hɨtɨka nda dɨ byelə, a nə wule kəndəshe da Farise ka Saduke nda dɨ byelə.
La Bitrus a boyə nə Yesu
(Markus 8.27-30; Luka 9.18-21)
13Yesu ka lagbe dan a shi njiya Kesariyatɨ Filipi, nda ɗiyə lagbe dan atɨ, “Ɓwaare a dɨ sa ka hɨn Nze da Ɓwaara atɨ hɨnə wonə ya?”
14Təna luwa a san atɨ, “Imi a dɨ sa atɨ hyenə Yohana nzə-ɗa batisɨmatə, imi a dɨ sa atɨ hyenə kpale Iliya, imi mgban a dɨ sa atɨ hyenə Jerimaya, naasə hiɗə dɨ vor kpalyee kaaɗəng.”
15Nda ɗiyərən atɨ, “Ɓə hwun, hwuna sa ke atɨ hɨnə wonə?”
16Siman Bitrus a luwa a san atɨ, “Hyenə Ma Həmɨnpwa a Yaɓwarən, a Nze da Həmɨnpwa ma ka myentə.”
17Yesu a san atɨ, “Həmɨnpwa wulakəw hye Siman nze da Jona, gəkɨlə aa ɓwaara bɨlu la, shezə Baagi arə a vor pwanə. 18Gəkɨlə ləngɨn na dɨ səw atɨ, hyenə Bitrus#16.18 Bitrus: A kwa-Heline, naarəngɨn nə “faratə.”, a nə faratɨnə hɨn ɓa nwo vɨnə hiwtɨ de, a tən petɨ ji-kottɨ de, kwatɨfə vɨrata won aa dɨ mbarə. 19Hɨn ɓa vu sə-wuna kwatɨfə həmnə pwa. Sa kat hye ɓoyə ganə a vɨratə mye ɓoyə gaarə a vor pwa, sa kat hye paran ganə a vɨratə mye paran a vor pwa.” 20Də Yesu a gɨra lagbe dan, a sarən atɨ ɓe tənaa boyə ama atɨ sɨnə Ma Həmɨnpwa a Yaɓwarən.
Yesu a bwe wule mbɨrte ndi ɓa mbɨrə
(Markus 8.31–9.1; Luka 9.22-27)
21Dɨ fərəngɨn, Yesu a tiya bwetə ta boyə lagbe dan le atɨ, mbak-mbak ndi Nze da Ɓwaara ɓa wudə Urshelima ndi ɓa sop tənətə som-som a tɨfə mi kpan-kpanye ka kɨsehəmi kpan-kpanye ka ji-lee kəndə ɓashita Musa. Mye ɓa ɓɨltən, beetɨ bətə mwaakɨn ndi ɓa maggə we ka myentə. 22Bitrus a warən a gyenge a tiya ta dɨkan atɨ, “Həmɨmiye, wule sa a dɨ ga bəngra!”
23Yesu a virwa a sa Bitrus atɨ, “Təkəsə ke kwe Shetan! Hyenə ɓa ɗɨkdi na pawo, teewa koɗə hɨnggə Həmɨnpwa, hɨnggə ɓwaara hye dɨ koɗən.”
24Də a hangɨn Yesu a sa lagbe dan atɨ, “Ma dɨ mwi atɨ nda kwaɗe, mbak-mbak mangɨn ɓa məntəmə nəngɨn, a nggur kada ɓɨdɨmtɨ dan a kwaɗe. 25Gə ma kat dɨ mwi atɨ ndi ɓa mbədə myensən ɓa ɗongərə, ma mgban ɗongə myensən gə le de, ndi ɓa ɗɨmtɨrə. 26Mɨnə wula də ka ite atɨ ɓwaara a pedə shi vɨratə kat a ɗɨmə, nda shea ɗongə myensən? Naasə mgban mɨnə ɓwaara ɓa vədən a kwaamɨ myensən? 27Gəkɨlə hɨn Nze da Ɓwaara hɨn ɓa shi a vor fukata Baagi kat ka malyenye de, hɨn ɓa mbwa nagi ndo ma moonə sa mangɨn a ɗa. 28Diyalə na dɨ boyownə, imi a vorsəwnə 'ye kanyi ganə ɓəgəng, aa dɨ kɨla we baa fəra tən ɓa naa Nze da Ɓwaara nee dɨ mɨna a vor həmne dan.”
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.
