Mata 14
14
Ndǝ Dǝlnta Kǝra Yawhana Ndǝr 'Ya Bamtizǝma
(Mar 6:14-29; Luk 9:7-9)
1Akwa saka nda Hirudus, kuhyir diyir Galili kǝ ngati ndǝrɛ ata kǝra Yɛsu, 2antǝ dza ka nkǝrɛ ala ndzǝr kǝthlǝr alari apǝri, “Əni ani Yawhana Ndǝr 'Ya Bamtizǝma; dzǝ hyati akwa ntǝnti! Ani sǝ nam tara 'ya nam tǝ dǝnar sǝr ndati ada kǝthlǝr akwa dza.”
3 #
Luk 3:19,20 Akwa saka nda Hirudus ngǝti Yawhana ka mbwai tǝni ka ɗalmbwa tǝni akwa fǝrsǝna kadǝbar Hiraudiya, mwalar Filibusu nam zǝrangǝri, 4#Fǝr 18:16; 20:21kadǝbar tǝ Yawhana ada gha alari: “Adi kal-kal tǝ gǝ kǝl tǝni wɛ.” 5Hirudus ada bara ka dzǝ tsi Yawhana, ama dzǝ ada hyivǝr ndzi, kadǝbar tǝ dar kǝtǝ tǝni apǝri dzǝ nabi.
6Vǝrǝr yaba Hirudus ka ɓakta si nkwar Hiraudiya ni ka fǝlɛ ala dar ka panyi ɗǝfa Hirudus tǝm-tǝm 7nam tǝ dzǝ 'ya alkawal ba mbǝrɛ apǝri dzǝ ata lari kǝlara sǝ nam tǝ dzǝ yuwɛ. 8Angǝri ka hati alari kǝr apǝri ka dzǝ nkǝrɛ, “Alai kǝra Yawhana Ndǝr 'Ya Bamtizǝma akwa kwatǝm kulini.” 9Kuhyi ni ka damitsǝnidzi, ama kadǝbar mbǝrɛ nam tǝ dzǝ tara 'ya akǝma sanga ndzǝrni, dzǝ tsau ka ndǝ lari sǝ tǝ dzǝ yuwɛ. 10Apani dzǝ ka hyanti ndɛ ka ndǝ dǝlnta kǝra Yawhana akwa fǝrsǝna. 11Antǝ dar ka si aka kǝra Yawhana akwa kwatǝm ka la nkwani, dzǝ ka mwari akǝri ala angǝri. 12Ndzǝr nuwur Yawhana ka si ka kǝtǝ saiyirni, ka lǝka harnta. Antǝ dar ka mwari ka gha ala Yɛsu.
Yɛsu Ghǝiyati Ndzi Kumthlani Kumɛ ka Ntufu ni
(Mar 6:30-44; Luk 9:10-17; Yaw 6:1-14)
13Sakatǝ Yɛsu tara ngati sǝ nam tara 'ya, dzǝ sǝba aka sar ɗǝwa-ɗǝwa ka tǝra akwa vui kura ndɛ akwa. Tǝ ndzi yarni ngati dar ka nu tǝni aka thlǝlɛ ka ngyar mǝlmɛ yarari. 14Sakatǝ Yɛsu sǝgǝl ka wula dlamiyir ndzi, dzǝ ka 'ya kalhur ata kǝra dar ka mbǝti ndzǝ kura kalang akwa ntsa dar.
15Sakatǝ tǝhaku kǝ 'ya, ndzǝr nuwurni ka si adzǝni, ka nkǝrɛ, “Vui ǝni ndǝ adi akwa wɛ, ndza tsǝtsi kǝ ɗi. Kudzǝ ka gǝ ngyar dlamiyir ndzi ni ka dar mwari akwa mǝlmɛ yarɛ ni ka dar lǝka ɗǝlba sǝr sǝmɛ ala kǝr dar.”
16Yɛsu ka kalaktsǝni, “Adi si ma dar tǝra wɛ; la daramɛ sǝr sǝmɛ ka dar sǝmɛ.”
17Dar ka sǝnau, “Akwani yar aka mantsǝkǝl takwara ntufu ba kulfa sǝɗɛ ɗiɗi.”
18Dzǝ ka nkǝrɛ, “Azǝramɛ aka dar alai akwani.” 19Antǝ dzǝ ka hau ndzi ni ka dar ndzai ata kusar. Dzǝ ka kǝtǝ takwara ntufu ni ba kulfa sǝɗǝ ni ba dzǝ ka haɓǝti ntsari ati ka usar Hyal ka pupwasi takwara yarni. Antǝ dzǝ ka la ndzǝr nuwurni yarɛ, ba ndzǝr nuwurni ka ndǝghǝnta ala ndzi. 20Dar sang sǝmɛ ka ghǝi, ba ndzǝr nuwurni ka ɗǝɗǝmti nam ɓutǝr-ɓutǝr nam tara mbi ka ghǝiyati wulna kumɛ kapu sǝɗɛ nam tara mbinta. 21Dar nam tara sǝmɛ kǝ 'ya apa sǝli kumthlani kumɛ ka ntufu, kura mwahyi kaka madausai akwa.
Yɛsu Mwari ata Kǝra Yimi ni
(Mar 6:45-52; Yaw 6:15-21)
22Tǝnyi Yɛsu ka hau ndzǝr nuwurni ka dar lǝkwa sar ka dar mwara lǝkǝmari atǝra tǝbwar palai damwa, sakatǝ dzǝ tara salamtsǝni dlamiyir ndzi. 23Aghǝla tǝ dzǝ tara salamtsǝni tǝ dar, dzǝ ka lǝti ata ngwama paya aka kǝrni ka 'ya aduwa. Sakatǝ tǝhaku 'ya, dzǝ duku akwanda. 24Ama sar ni kǝ kurtaka 'ya ɗara pǝɗǝm ta nya gar, ada ɗar bwanai aka ɓatsǝkǝiyir yimi kadǝbar tǝ sambar ada mbiya tǝni.
25Akwa dabwa saka makǝr ka la nkwa nǝr kula-kula Yɛsu ka lǝba adzǝ dar, tǝ dzǝ ada mwari ata kǝra yimi. 26Sakatǝ ndzǝr nuwurni yarɛ wula tǝni ada mwari ata kǝra yimi, dar ka yakatsǝnidzi. Dar ka nkǝrɛ, “Nda mambǝlɛ,” ba dar ka pu lǝlɛ tǝ hyivǝr.
27Ama tǝkǝma Yɛsu ka ndǝr ala dar, apǝri, “Panyi mɛ hankala gǝri, Yi diyɛ; ta gǝri ta hyivǝr mai.”
28Bitrusu ka kalaktsǝni alari, “Thlaku, ma apǝri ǝni gɛ, nkǝrɛ alai ka Yi mwari adzǝ ngɛ ata yimi ni.”
29Dzǝ ka nkǝrɛ, “Azǝrɛ.”
Antǝ Bitrusu ka sǝba akwa sar ni, tǝ dzǝ ada mwari ata kǝra yimi atǝra adzǝ Yɛsu. 30Ama sakatǝ dzǝ tara wula sambar ni aka dǝna, dzǝ ka hyivǝr ba, dzǝ ka baditsǝni ntsǝghǝldzi, dzǝ lǝlɛ ka nkǝrɛ, “Thlaku, mbati tǝra!”
31Tǝkǝma Yɛsu ka harar tsiyari ka kathlǝti tǝni, dzǝ ka nkǝrɛ, “Gɛ ndǝ nam aka hamnta dzǝri nkyiɗu, kami kura gǝ aka mbǝrsa?”
32Ama sakatǝ dar lǝkwa sar ni, sambarari ka hyati. 33Antǝ ndzǝ nam akwa sar ni ka vǝkǝr sǝlai alari, ka nkǝrɛ, “Dzǝri gǝ ani Zǝr Hyal.”
34Sakatǝ dar kǝ lǝba tǝbwanda, dar ka sǝgǝl akwa diyir Ganisarat. 35Sakatǝ ndzǝr vui ǝnda tara zǝndi apǝri ani Yɛsu dar ka ɗal kuɗahu ala sanga di yarɛ nam kudzǝghɛ aka vui ǝnda tǝ dar ka si aka sanga ndzǝ nam kura kalang-kalang alari 36ba dar ka kǝgyǝ tǝni ka dzǝ ngyar ndzǝ nam kura kalang yarni ka dar tsǝkwar nya lǝkutǝrni ɗiɗi, ba sanga ndzǝ nam tara tsǝkwar lǝkutǝrni nda dar ka mbǝtǝdzi.
©2023 Seed Company in collaboration with Language Developers and Bible Translators Association
