Mark 1
1
Sema Kaskasaben John A Naemonjag
(Matthew 3:1-12; Luke 3:1-18; John 1:19-28)
1Sejay i kapoanan na mapteng a chamag maypangkep Jesu Criston Anak Afo Chiyos. 2Gwariy inpasolat Afo Chiyos cha Isaiah a profita nonta bayag a kigwan to i
“Mengidagwasak na toon
mengisagana na
chedanen mo.#1:2 Malachi 3:1
3Gwariy sa-kin toon
mankelkeljaw chiwa dogad
a nagwariy toon
naiyan-iya-iyan a
towan kona i
‘Isagana yoy chedanen
alin Afo.
Singpet joy chalan a
panchedanan to.’ ” #1:3 Isaiah 40:3
4Et seman i etongpal nonta iyanparang si John a Naemonjag cha dogad a nagwariy toon naiyan-iya-iyan, et iyankaskasaba ired ma toon kimowan a iyanki-ngel a kigwan to i “Panbabawi et panbonjag kayo say pekawanan Afo Chiyos i basol jo.” 5Emiin a toon gwared Jerusalem tan cha sahop na Judea, kimowa-kowan ired kad-an John. Ingwanggwanggwang chiy basol cha, et biyonjagan iren John cha kolos a Jordan.
6Say baron John a Naemonjag, aagwel na bowek na camel tan ebalkesan na kathat. Naengan na choron tan chanom na dinowan. 7Et kigwan tod too i “Igwan aliy toon mantetened alid si-kak a mas manakabalin iy say si-kak, et nat maykariak angken mantalimohod a memasbas na iket na sapathos to. #1:7 Say obden naiyay-i-kan cha kababaan a too ono bagaen, memasbas na sapathos na afo tho no onmothok tan onsekep cha baliy, et say piyan John a a-seden, angken bagaen bengat, eg pay maykarin mansilbid Jesus. 8Inbonjag kod si-kayoy chanom bengat, nem si-katho di, ibonjag tod si-kayoy Ispirito Santo.”
Iyanbonjag Si Jesus
(Matthew 3:13-17; Luke 3:21-22)
9Nontan a timpon naemonjag si John, edafo wa dis Jesus alid Nazareth a gwared probinsiya na Galilee, et iyanpabonjag cha John chiwa kolos a Jordan. 10Idi kima-jat si Jesus cha chanom, mita thon chakos i dangit a edohatan tan Ispirito Santon inges toy kalapatin mansa-sa-kod ali ingkathod pima-tok cha si-katho. 11Et gwara waliy esel alid dangit a kigwan to i “Si-kam i ensemek kon pasiyen anak ko. Si-kam i panchadsahan kon chili.”
Siyolisog Satanas Si Jesus
(Matthew 4:1-11; Luke 4:1-13)
12Et into-no na Ispirito Santon chakos si Jesus chiwa dogad a nagwariy toon naiyan-iya-iyan. 13Gwares Jesus chiwan na epat a polon akow, et siyoli-solisog Satanas. Gwara ngo iriy mangkanekot a animal chiwa dogad, nem gwara ngo pay iriy anghilis a naengajod si-katho.
Inchogin Jesus A Mantoro
(Matthew 4:12-17; Luke 4:14-15)
14Idi iyakcheng a iyaykalebos si John a Naemonjag, kimowan si Jesus cha Galilee a mengikaskasaba na mapteng a chamag a edafod Afo Chiyos 15a kigwan to i “Sema timpon inpadton Afo Chiyos, mimothok ma. Chanchani diy pantorayan to. Isonga, panbabawi kayo na basol jo tan pati yoy mapteng a chamag.”
Pinispis Jesus Iriy Pilmiron Disipolos To
(Matthew 4:18-22; Luke 5:1-11)
16Nonta sa-kin akow, man-aahad si Jesus cha kilig na baybay na Galilee iy metaen tos Simon tan si Andrew a san-ahi. Manbalbalchow ired ma baybay tep seman i naiyanbiyagan cha. 17Et kigwan Jesus i “Gomali jod jay. Kay-olop kayod si-kak et panbalin tahejon disipolos ko. Sigod a naiyannigay kayo na paideng, nem niman itoroan tahejon mannigay kayo na too.” 18Et inpayas chen chakos i balchow cha, et ekiolop ma ira.
19Idi kimi-ki-nan si Jesus, mita thos James ni John a san-ahin anak iren Zebedee. Gwara ired bangka ren chiyan isaganay balchow cha. 20Et tiya-gway iren Jesus a chakos, et inpayas ches awechen si Zebedee tan sema iren edagboan a tood ma bangka, et ekiolop ma ira.
Enagchag Si Jesus Na Dimonyo
(Luke 4:31-37)
21Et kimowan ires Jesus cha siyodad a Capernaum. Nonta timpon Sabbath a akow na pan-inana na Hodjos, simekep ired synagog et inchogin Jesus a mantoro. 22Iyasdaaw iriy too niwa inpasing ton iyantoro tep sema toro-toro tho, gwariy karebengan ton nat inges toy toro-toro na mamaistoro na dinteg.
23Gwara ngod ma synagog i dahin iya-janan na dimonyo. 24Kimeljaw a kigwan to i “Jesus a i-Nazareth, niyana mowan pekibibiyangi kawi? Kimowan ka din mengomas kawi? Amtak no siya ka. Si-kam iwa Esantoan a into-no din Afo Chiyos.”
25Et inseg-ang Jesus iwa dimonyon kigwan to i “Eket ka! Awas ka!” 26Et inpakayengkeng na dimonyo ma dahi et imawas iwa dimonyon mankelkeljaw. 27Sema toon gwared man, iyasdaaw iren emiin a iyanbinaga i “Nganiyay? Ara! Badbado ja toro-toro. Gwariy karebengan ton memidin angken dimonyos et napiyati ra.” 28Idi iyakcheng ma iwan, magenon iyaygwadsak i chamag maypangkep Jesus ired emiin a siyo-siyodad a gwared ma sahop na Galilee.
Inpamapteng Jesus I Chakel A Too
(Matthew 8:14-17; Luke 4:38-41)
29Et bimo-day a chakos si Jesus chiwa synagog a simekep cha baliy Simon ni Andrew, et ekiolop ngos James ni John. 30Iyaytompong a gwared man i inepon Simon a biin man-oolig tep pimetang. Apaman a mimothok si Jesus, kigwan cha i mansekit. 31Et kimowan si Jesus cha kad-an ton iyagchian toy diwa tho, et chiya-chaan ton bingon. Iya-kal miy petang to et pikan iren ma bii.
32Nontan a ma-chem a iyalnek i akow, intolod na tood kad-an Jesus i chakel a mansekit tan sema iren iya-iya-janan na dimonyos. 33Emiin a toon gwared ma siyodad, esa-sa-nop ired bo-dayan niwa baliy. 34Et inpamapteng Jesus iriy mansekit na ekila-kilasin sahit. Chiyagchag to ngoy chakel a dimonyos chiwa toon iyangka-janan, et nat intolok ton on-esel ira ma dimonyos tep amta ra no siyes si-katho.
Iyankaskasabes Jesus Cha Galilee
(Luke 4:42-44)
35Nonta gwa-gwa thon kimakaok i manok, bimangon si Jesus et kimowan cha iyaydasin a dogad tep say mankararag chiwan. 36Si Simon ira, kimowan iren engana-anap. 37Idi sipol cha, kigwan cha i “Chiyan anafa ka na too.” 38Nem kigwan Jesus i “Emoy et ired ma echom a siyo-siyodad chiyay say mankasabaak ngod man tep si-kathoy kagol na kimowanan ko did jay.” 39Et iyangwasgwasgwas si Jesus cha emiin a siyodad cha sahop na Galilee a iyankaskasaba ired synagog tan chiyagchag to iriy dimonyos cha iyangka-janan a too.
Inpamapteng Jesus I Mansekit A Paladoy Kolid To
(Matthew 8:1-4; Luke 5:12-16)
40Nonta sa-kin akow, gwariy dahin paladoy kolid ton kimowan alid kad-an Jesus. Iyantalimohod cha sangoanan ton ekiadok na tolong a kigwan to i “Amtak i mebedin a a-kalen mo ja sahit ko no piyan mo say eg konen na too i ensekigak.”
41Et si Jesus, iyaykaasian, et in-okjad toy diwa thon kiyapkap to ma dahin kigwan to i “Piyan ko. Edinis ka wa.” 42Et epiged a chakos i kolid, et edinisan ma iwa dahi. 43Et inpabtik Jesus a tiyengteng to i 44“Iki-ngelim! Enog i ingwanggwanggwang iyay cha angken siyen too, no diket pandiritso ked kad-an na pari say metaen to i epiged i kolid mo. Et itangdal mod Afo Chiyos iwa inbilin Moses say amtaen na tothoo i edinis ka wa.” 45Nem sema dahi, bimetik a ingwanggwanggwang toy epasamak cha si-katho, isonga iyaygwadsak i chamag maypangkep na mapteng a nainpasi-pasing Jesus. Sema iyantongpalan to ket, nat mahakowan mes Jesus ired ma echom a siyodad. Isonga, kimowan et med dogad a nagwariy toon naiyan-iya-iyan, et edafo iriy tothood ekila-kilasin doga-dogad, et kimowan ired kad-an to.
© 2023 Wycliffe Bible Translators, Inc. All rights reserved.
