Mateo 28
28
Iyanpawil Si Jesus
(Mark 16:1-10; Luke 24:1-12; John 20:1-10)
1Idi iyakcheng miy Sabbath iy emangketa-nang na Domingko, si Mary Magdalene tan sema sa-kin Mary, kimowan iren manmatha na iyaybekaan Jesus. 2Biglen gwariy mahedsang a jegjeg tep gwariy anghil Afo Chiyos a sima-kod alid dangit. Inpolig to wala ma bathon ena-din niwa sakepan na dohang, et tiyokkongan to. 3Sema kasi-neng to, onsilen inges toy bakilat, tan polaw a pasiyay baro thon inges toy sila na akow. 4Nonta mita iren ma kowadja ma anghil, kekinayengkeng iren ketinahot, tan iyanbalin iren inges toy iyangketiy a too.
5Kigwan men ma anghil cha bibii i “Enog i tahot. Amtak i jowan anafes Jesus a iyaydansed koros. 6Nem nagwared jay tep iyanpawil a inges toy kigwan tod si-kayo. Gwali jo et si-neng jo. Chiyay i iyay-oligan to. 7Tahejon chakos, et kowan jod disipolos to i iyanpawil. Edagwas des Jesus a kimowan iy say si-kayod Galilee, et metaen jod man. Niman ma kigwan tahejo.”
8Kiyanoan ma iren ma bibiin imekal chiwa bekaan a ketinahot, nem kainimdeng ira pay. Bintik chen konen chiy disipolos. 9Idi chiyan betiha, biglen iyaspol iren Jesus, et timbal to ira. Imesop ma ired si-kathon iyantalimohod iren iyegnian chiy seki tho et chijaw cha. 10Kigwan men Jesus i “Enog i tahot. Jo kowan ired ma aahik i onkowan ired Galilee say metaen chaak chiwan.”
Sema Ingwanggwang Iren Na Manbanbantay
11Nonta maramen man-eekal iriy bibiid man, sema echom a solcharon iyanbanbantay, kimowan ired siyodad, et kigwan ched aafo na papari iwa emiin a epasamak. 12Sema iren aafo na papari tan iyangkaama, iyansi-si-nop ira say tabtabalen chiy pesing cha. Say iyanbalinan to, siyoksohan chiy sosolcharo na banay a katad na pilak. 13Binidin cha ira pay i “Kowan jod tothoo i nonta kalebian a kejino-kow kayo, kinibot iren ma disipolos Jesus i angel to. 14No iki-ngelan na gobirnador iyay, mahaamta kawin memnek cha si-katho say nagwariy mepesamak cha si-kayo.”
15Ida wa iren ma sosolcharoy pilak, et imag cha ma iyaybilin. Et ingkathod niman, sejay i naiyaygwanggwanggwang cha Hodjos.
Iyanparang Si Jesus Cha Disipolos To
(Mark 16:14-18; Luke 24:36-49; John 20:19-23; Inpasi-pasing 1:6-8)
16Sema iren sawal na sa-kin disipolos Jesus, kimowan ired chontog cha Galilee a kigwan Jesus i pengaspolan tod si-kara. 17Nonta mita res Jesus, chijaw cha, nem sema echom, iyanchegwa-chegwa. 18Imesop mes Jesus ired ma disipolos to, et kigwan to i “Emiin a karebengan cha dangit tan chiya dobong, iyay-i-kan cha si-kak. 19Tahejod ma emiin a toon gwared emiin a ili say manbalin iren disipolos ko. Bonjagi yo ira na ngaran Awa tan sema Anak tan sema Ispirito Santo, 20et itoroi yo ira say onoran chen emiin i inbilin kod si-kayo. Nemnem jo pay i gwaraak cha si-kayo na olay ingkathod kekcheng niyay a timpo.”
© 2023 Wycliffe Bible Translators, Inc. All rights reserved.
