Mateo 27
27
In-awat Ches Jesus Cha Pilate
(Mark 15:1; Luke 23:1-2; John 18:28-32)
1Idi eta-nang ma, emiin a aafo na papari tan iyangkaama, tiyabtabal chiy pesing chen mengipabonon Jesus. 2Et bidod cha wa et inkowan ched Pilate a gobirnador et say iawat cha.
Sema Ingkathiy Judas
(Inpasi-pasing 1:18-19)
3Si Judas a enraidor Jesus, nonta iyamtaan to i kiyowis ches Jesus a kigwan cha i mesepol a metiy, iyanbabawis Judas. Isonga, in-oli tho ma tedon polon palata ired ma aafo na papari tan iyangkaama 4et kigwan to i “Iyanbasolak tep enraidorak na toon nagwariy basol to, et niman mechosa say metiy.”
Insongbat cha i “Nengoy pekibiyang mid tan? Si-kam ngoy mahaamten tan.” 5Inchetog men Judas iwa pilak chiwa timplo, et iyamtik. Kimowan men iyanba-jat.
6Sema aafo ira ma papari, kiyopkop cha ma pilak, et kigwan cha i “Nat iyaytolok chiwa dinteg tayon may-echom iyay a pilak cha pilak na timplo tep aosal na bayad na biyag na too.” 7Iyantabtabal ma ira no nengoy pesing chen mengosal niwa pilak, et iyantothodagan cha i osalen chen menongkal na chagen ma naengamag na banga say panbalin chen bekaan na bisita. 8Isonga, seman a chaga, engaranan na Chaga na Chala ingkathod niman. 9Et etongpal i kigwan Jeremiah a profita a “Ida ra ma tedon polon palaten iyantolagan na echom a poli-polin Israel a bayad to. 10Et iyosal chen emayad na chagen ma naengamag na bangen inbilin Afo Chiyos cha si-kak.” #27:9-10 Zechariah 11:12-13; Jeremiah 32:6-9
Binistigal Pilate A Gobirnador Si Jesus
(Mark 15:2-5; Luke 23:3-5; John 18:33-38)
11Si Jesus, man-ak-akgwat cha sangoanan gobirnador. Inbagaan gobirnador i “Si-kam i ari na Hodjos?”
Insongbat Jesus i “Ahow, agpayso ta kigwan mo.”
12Nem idi inbasolan iren ma aafo na papari tan iyangkaames Jesus, nat simongsongbat. 13Et inbagen Pilate cha si-katho i “Nat mowan iki-ngeliy chakel a engicharoman ched si-kam?” 14Nem nat siyongbathan pay Jesus i angken sa-kin engicharoman ched si-katho. Isonga, iyasdaaw a pasiya ma gobirnador.
Kiyowis Ches Jesus A Kigwan Cha I Metiy Koma
(Mark 15:6-15; Luke 23:13-25; John 18:39—19:16)
15No timpo na Piyasta na Inda-bas na Anghil cha Hodjos, say ogadi na gobirnador, naengibolos na sa-kin balod a pispisen na too. 16Nontan a timpo, gwariy sa-kin balod a maremag a iyanngaran na Barabbas. 17Isonga, idi iyansa-sa-nop i chakel a too, inbagaan iren Pilate i “Siyay piyan jon ibolos ko? Si Barabbas ono si Jesus a iyanngaran na Cristo?” 18Kigwan to man tep amta tho i apal i engiawathan chen Jesus.
19Idi mantoktokkong pay si Pilate cha tokkongan na kowis, gwariy minsahin edafod imbaliy ton kigwan to i “Enog i biyang chitha toon nagwariy basol to tep epadigathak a pasiya niwa kiyokip ko maypangkep cha si-katho nonta kalebian.”
20Nem sema iren aafo na papari tan iyangkaama, igwis chiy tothoon ibagaan ches Pilate i ibolos tos Barabbas iy pebono thos Jesus. 21Isonga, idi inbagen Pilate mowan i “Siyen ja chegwiy piyan jon ibolos ko?” insongbat cha i “Si Barabbas.”
22Et kigwan men Pilate i “No setan i piyan jo, ngoy pesing kod Jesus a iyanngaran na Cristo?”
Kigwan chen emiin i “Idansam cha koros!”
23Kigwan mowan Pilate i “Niyana, ngoy imag ton ngaaw?”
Nem ema-men kimeljaw ira i “Idansam cha koros!”
24Iyamta wen Pilate i nagwariy pesing to tan chanchanin manngalawngaw i too. Isonga, engala na chanom, et iyanbolod sangoanan na tothoo. Et kigwan to i “Iyanboloak say amtaan jo i nat iyaybiyangak cha kebonon ja too. Si-kayoy mahaamta!”
25Insongbat iren ma toon emiin i “Si-kawi tan aanak miy mahaamta na ketiy to!”
26Et inbolos Pilate si Barabbas iy si Jesus ngo, inpabaras Pilate et in-awat to say idansa red koros.
Iyang-angja Na Sosolcharos Jesus
(Mark 15:16-20; John 19:2-3)
27Idi iyakcheng ma iwan, insekep na sosolcharos Jesus cha baliy na gobirnador. Sini-nop chen emiin i echom chen biyo-ngolan cha. 28Ingkal cha wiy baro tho, et biyaroan cha na depang a inges toy nainbaro na ari. 29Engamag pay ira na bengel a aamag na gwahal a iyas-asbithan, et inbengel chen singen korona. Engala pay ira na bila-jo, et inpaegni red gwanan a diwa tho. Et iyantalimohod ira, et iyang-angja ra i “Si-kam a Ari na Hodjos, sapay koma onbaya-bayag i biyag mo!” 30Chiyop-chopdaan cha, et ida ra ma bila-jon towan egnii, et inpegpeg-as ched toktok to. 31Idi kincheng chen iyang-angja, ingkal cha ma depang a baro, et biyaroan cha na sigod a baro tho. Et inbetik cha walen idansa red koros.
Indansa Res Jesus Cha Koros
(Mark 15:21-32; Luke 23:26-43; John 19:17-27)
32Idi maramen niyan-ibetik na sosolcharos Jesus chiwa siyodad, gwariy toon iyaspol chen i-Cyrene a si Simon i ngaran to. Inpilit chen sakbathen toy koros Jesus. 33Idi mimothok ired dogad a engaranan na Golgatha a say banag to, dogad na pohel na toktok na too, 34in-i-kanan ches Jesus na inom a edaohan na gall. #27:34 Tanem i gall. No singka-chom naiyaydaok cha mainom a memjed na sahit. Nem idi nimathan Jesus, nat ininom to.
35Idi indansa na sosolcharos Jesus cha koros, bininga-bingay chiy baro tho, et iyanbobonot ira say amtaen chiy a-daen cha. 36Timokkong ira wen iyanbantay. 37Sema iyaycharoman to, iyaypakpak cha sa-pat na toktohan Jesus a kigwan to i “Sejay si Jesus a Ari na Hodjos.” 38Gwara ngoy chegwen tolisan a iyaydansed koros. Sema sa-ki, gwared gwanan Jesus, tan sema sa-ki ngo, gwared gwili tho.
39Sema iren kedina-bas, ingwaleggweg chiy toktok cha et kiyelsithan ches Jesus a 40kigwan cha i “Kigwan mo i omasen moy timplo, et a-magen mo mowan na tedon akow. No agpayso tan, tolongim i angel mo! No agpayso ngo i si-kam i Anak Afo Chiyos, epas ka did ta koros.”
41Sema ngo iren aafo na papari, mamaistoro na dinteg, tan iyangkaama, iyang-angja ra ngos Jesus i 42“Tiyolongan toy echom, nem eg to mebedin a tolongan i angel to. Si-katho konoy Ari na Israel. No agpayso tan, on-epas koma did ma koros et memati kiyed si-katho. 43Napiniyal tos Afo Chiyos, tan nakigwan to i si-kathoy Anak Afo Chiyos. No agpayso tan, tolongan Afo Chiyos no pategan to.” 44Et sema iren tolisan a iyaydansed koros, inges to ngoy inpasing chen engang-angjen Jesus.
Sema Ingkathiy Jesus
(Mark 15:33-41; Luke 23:44-49; John 19:28-30)
45Idi alas dosi wa, bimolinget i intiron dogad ingkathod alas tris. 46Et idi alas tris ma, kimeljaw si Jesus a chili i “Eli, Eli, lama sabachthani?” a say banag to, “Chiyos ko, Chiyos ko, niyana in-olay moak?” #27:46 Psalm 22:1 47Et sema iren echom a kainakgwat chiwan, idi inki-ngelan cha man, kigwan cha i “Towan ta-gwayes Elijah.” 48Sema sa-kid si-kara, bintik ton chakos a engala na singen bolak. Insiwsiw tod enpait a inom, et intebek tod bila-jo. Et inka-gwat to wed Jesus say sepsepen to. 49Nem kigwan na echom i “Kanin, memeta no onkowan alis Elijah a mena-cha.” 50Kimeljaw mes Jesus mowan et inbolos toy ispirito tho. 51Nontan ngon timpo, sema kortined timplo, iyanchegwen ebi-nik a iyanchogid kayang ingkathod sa-kod. Jimegjeg pay tan iyanbekay batho. 52Edohatan pay i iyaybekaan na etiy, tan sema chakel a maronong a tothoon Afo Chiyos a iyangketiy, iyanpanpawil ira, 53et bimo-day ali ched iyaybekaan cha. Idi iyakcheng mes Jesus a iyanpawil, sema ngo iren iyanpanpawil, kimowan ired Jerusalem a esantoan a siyodad, et chakel i eni-neng cha si-kara.
54Sema kapitan na sosolcharo tan echom ton manbanbantay cha Jesus, nonta diyekna riy jegjeg, tan mita ren emiin i epasamak, epaladoy tahot chen kigwan cha i “Seja too, agpayson Anak Afo Chiyos!”
55Gwara pay iriy chakel a bibiin kebinantay chiwa ki-ki-nan. Si-kariy ekiolo-olop cha Jesus alid Galilee, tan chiya-cha-chaan cha na mesepol to. 56Gwared si-kara ires Mary Magdalene, si Mary a inen James tan si Joseph, tan inen James tan si John a anak iren Zebedee.
Sema Ingkaybeken Jesus
(Mark 15:42-47; Luke 23:50-56; John 19:38-42)
57Nonta ara-chem, gwariy baknang a toon mimothok a i-Arimathea a iyanngaran na Joseph a disipolon Jesus. 58Kimowan cha kad-an Pilate a inbaga tho no mebedin a a-daen toy angel Jesus, et inbilin Pilate i may-i-kan cha si-katho. 59Et iden Joseph i angel Jesus a dinibothan to na dofot a bado. 60In-ejan to wed ma bekaan to ngon aneng maosal chiwa dohang a ekotkothan a batho. Et engipolig ma na banay a bathon insa-din tod ma sakepan to, et bimetik. 61Si Mary Magdalene tan sema sa-kin Mary, ketinokkong iren chiyan sangoa ma bekaan.
Biyantayan Chiy Iyaybekaan Jesus
62Sema akow a Biyarnis, si-kathoy nainpansagana na Hodjos para cha gwa-gwa thon akow na pan-inana ra. Nonta akow na pan-inana, sema iren aafo na papari tan Pharisees, kimowan ired Pilate, 63et kigwan cha i “Afo, niyemnem mi i nonta sibibiyag pay iwa maitek a too, kigwan to i manpawil na tedon akow. 64Isonga, mapteng no gwariy bidinen mon manbantay cha iyaybekaan to ingkathod maykatdon akow, nahol ni onkowan iriy disipolos ton mengibot na angel to, et ichamag ched tothoo i iyanpawil. No mepesamak iwan, sema pantongpalan niyay a itek cha, mema-ma iy say sema sigod.” 65“Tiwa,” kigwan Pilate. “Olop kayo na solcharo, et tahejo. Ipahat jon bantayan a kostoy iyaybekaan to.” 66Idi iyakcheng ma iwan, kimowan ired ma dohang, et engipakpak ira na malked bathon ena-din na sakepan say mesi-neng no iyayki-ki-nan. Et inpabantay ched sosolcharo.
© 2023 Wycliffe Bible Translators, Inc. All rights reserved.
