Mateo 9
9
Zesopa madirra siri torraui inabiquemanirrari
Maraco 2.1-12; Roca 5.17-26
1Nazapa darroniza rraui torrezanizapa coriza rrippeuarri pouadeni ori narronemanapouiuarri ori tanimanaza uana tocananimana-pomarrari. Zeso poua mamadi naui Capenaouarri bacco tanimanarrari nade. 2Naraha nauiuarripa madirra ide tone biqueraza isso siri torraui poua taboroza poriza Zesoza eccarronemanarrari. Zeso pouatoui dameraqquiri naui qqui tazapa poua bodiza nauato tarrari: —Parrissa, Zesopa madirra inanomiuiuarrine nauato taui −quenaui Zeso pouaza auato tezape coma tarrariza uati tarrari: —Otesse, ticappina-rrerarri! Arri uimasiri tinanarraro bazimape onanamossini. Rridapanape ticca uima Deoza tobicani −narrari nade.
3Zeso atti nama nazapa zodeodenicca marinarra maridedeni mota mittemanazapa pouadenira sserrerre cosseri narrari: —Paparra, Zesopa: “Uimasiri onanamossina” naua. Poua attipa: “Ouape pina Deo orrani” nanarra narrarissa naua. Zesocca uimape bica terrerani, pina Deo itamassorrarissa naui! −quenaui nade. 4Naraha Zesopa pouadeni bodidenicca uima nauato tazapa pouadeniza uati tarrari: —Nerrecotoui ouaza uima uaidira taniccara tibodideni uatomanarraro? −naui nade. 5—Naraha nerrecoma narraro uimana tiadeniza denima narrora tani? Arra madirra coma tarraricca uimasiri onanamossini narrora taqui? Coma tarrari onanabicauina denima narrora tarrarorane? 6Naraha oua Madirra Bedi orrarrarope madirracca uimasiri onanamossiniuarrine Deocca dacorehe ocarrini nauatoqquiri tiquenaniuarrinepe, arri namiza naqui ouatti ocarrini nauatoqquiri tiquenaniuarrine coma tarrariza uati onana −narrari. Nazapa madirra siri torrauiza poua attipa: —Titemarri! Titaboro tidiza ticca ozauarri ticcanirri! −naui nade Zeso.
7Nazapa totemaza pocca ozauarri toccanirrari nade. 8Nazama madirra siri torraui tonomiui madirra bazima qqui toquenazapa cappinemanaraha uatizemanaza: —A Deopa bica taui, bica taui! −quenarrari. —Deo pocca dacorehe madirra namiuarri madirrariza inanani qqui inani −quenaui nade.
Oua onipe Mateo. Otoui Zeso uaua narrari
Maraco 2.13-17; Roca 5.27-32
9Nazama Zeso rraui ccarronaza oua qqui tarrari. Ouape Mateo. Ouape rromanodenicca taminecca zossenirri ziniro nanaccade orrarrarode. Naui rromanodeniza ziniro da taniuarrine ihinaqquemana naniuarricca oza bedeni bodiza ouittizeraha Zeso ouaza uati tarrari: —Rrina, ouaza ticcarri −nade. Nezape otemeza pouaza occarrarode.
10Naui zotode occa ozauarri irripaniuarrine zamatapa uauanariza rrassi inauarranizape nauiza Zeso qquide rrauizimarrari. Otessedeni rromanodenicca taminecca zossenirri ziniro nanaccadedeni bazima naco rrauizimarrari. Zodeodenicca marinarra ecauemana-rrerarrarodeni naco iazama rrassi nauarranirrari. Zeso poua uatimadedeni ia naqui pouadeni tezerre rripade iquerrenarraro. 11Naraha zodeodeni mota marinarra parizeoza rrehe quenarraridenipa madirra bicaqquiri narrararrarideni tezerre irripani qqui toquenarrari. Narraro uimaza parramaquenarrari nazapa iaza uati toquenarraride: —A nerrecotoui tiadeni maridepa rromanodenicca taminecca zossenirri ziniro nanaccadedeni tezerre, uimasiri carrimanarrarideni tezerre rriparrari? −quenade. (Arra madirra nama narrarideni tezerrepa rripade oppina tani quequenanarrari, parizeodeni, zodeodenicca marinarra maridedeni tezerre.)
12Naraha pouadeni attideni mittaza manaco Zeso uati tarrari: —Nomiqquiri narraridenipa toponi totonanomide touini quena-rrararaha comaqquiri narraridenina toponi totonanomide touini quequenanarrari −nade. —Ouape pina toponi totonanomidessa onarraro. Madirradenicca uima Deoza tobicaniuarrine pouadeni accode occarronarrarode. 13Naraha madirrapa: “Iape bicaqquiri inani” quequenanarraridenicca uima onanabicaniuarrine occarrona-rrerarraro. Uimasiri totonanadedenicca uima onanabicaniuarrinena occarronarraro. Rrari, arrirraro uima ticauatterarri. Maittaccazama Deo Atti cacomerabote Ozea dozo inarraro:
“Touati uanehe, acco canehe touini onani. Moizecca marinarrassa tinanemanezape ouaza ticcadeni bani bedi ono torrauiuarrine da da titiquena naraha madirra ouahaza tetideni uaneraqquiri nezape ticcadeni danirriza nacassera onani.
Madirra bazimaza tetideni uanaqquiri naniuarrinena nacassa onani. Pouadeni acco ticanabaqquimanaza naco nacassa onani” napoui nade Deo −nade Zeso.
Zesoza rripehe nebocossanicca uima uati toquenarrari
Maraco 2.18-22; Roca 5.33-39
14Nazapa Zouao Batistacca mamari tabaqqui Zesouarri bacco narronemanazapa pouaza uati toquenarrari: —Nirra. Iape Deozara uati uati izanaponiuarrine rripehe ihinebocossa nani. Zodeodenicca marinarra parizeoza rrehe quenarrarideni naco rripehe nenebocossemana naraha nerrecotoui ticca mamari tabaqqui tezerredeni rripehe titinebocossemana nerrerarraro? −quenade.
15Nazapa Zeso pouadeniza uati tarrari: —Zabissopa amonerre carribote narrari pocca errete torrezape pouaza queriqquimanarrarideni uatizemanera taco? Uatizemana taui. Zabisso uenabote narrari tezerre uatizemanazapa rripehe nebocossemana-rrararrari. Neraha niza uada onihiccaza madirra ouahadeni zabisso uenabote narrari inanazoqque-manauiuarrine poua iaqquemanazapa poua tessedenipa rripehe nebocossemanauitoui −nade Zeso. (Arra poua atti nama narraripa pouapa pina zabisso uenabote narrari. Zeso pouadeniza madiccazapa poua uatimadedeni rripehe nenebocossemana narraraccarrari, narrari.)
16—Uima onihi naqui arrima narraro: Etero ssessequidedenipe etero rradanizape etero zatiza ihinauanacossemana nerrerarraro. Etero zatipe etero rradaniza uanacosseza zotode ssequi nezape rroca naqqui tani. Neza etero rradani sseo tapomezape denima touaidira tani −nade Zeso. (Arra poua atti nama narraripa pocca marinarra pina zodeodenicca marinarrassa nerrerani. Zeso pocca marinarrape zati.)
17—Uima onihi naqui arrima narraro: Uva pperrene nauatozatipa bani etero ssequi naui rradauiza sso sso ihizemana narrararrari. Uva pperrene nauatozatipa bani etero rradauiza sso tozaza ssicatazapa rrocaquera tarrarirrine sseo taui carri taui. Sseo tazapa uva pperrene sso taha rrica taui, zamine naco touaidirazapa coro iquena taui. Naraha uva pperrene zatipa bani etero ssequi naui zatizara sso sso totoza nazana uva pperrenepa ecauauissa tarrari. Arra zamine naco touaidira-rrararrari −nade Zeso. (Arra poua atti nama narraripa madirra bodi zati torrazana Zesocca marinarra zati ecauaniuarrine parrireui, narrari.)
Zairo bedeni tonominicca uima, Amonerre amauissoranarra coma teraha tonominicca uima
Maraco 5.21-43; Roca 8.40-56
18Zesopa pouadeni atti ecomera-zanapozape zodeodenicca Deo Atti mamariuarricca tamine Zesoza uati tauiuarrine ccarronarrari. Zesouarri bacco narronazapa poua bodi: —Zesopa deni torraui, ouape arrimani orrani −naza Zeso baccouarri poua pitoza uitta tocatteza narrari. Nazapa Zesoza uati tarrari: —Occa erredeni uatiaparra. Occa ozauarri tiqqueza tizepeza poni bara teza tirrine camittemaniza madipomaniuarrine −narrari. 19Nazapa Zeso pocca mamari tabaqqui tezerre poua natti rraui torramissarrari.
20-21Naraha rrauiza amonerre coma tarraro Zeso toccaui qqui tarraro. Ponipe zamacoma onini amauissoranarra carrirraro. Poni coma tanicca uarranopa 12 naraha ama rricaquera tanicca tonauanarronarraro. Nezape Zeso qqui teza poni bodinipe: —Rrehe, pocca eterozara bara onezape onominitoui −narraro. Nazama Zeso nattiuarri toccamisseza touarriressissi neza pocca etero inidi bara inarraro. 22Nazapa Zeso piti nauarraniza qqui tanerre amonerre coma tarraro qqui tarrari. Qqui tazapa: —Asi, ticappina terrerarri. Tibodipe ouaza: “Rrehe, Zeso oua tonanomiuiuarrine parrireui” tezape narrarorrine rridapanape ticca zamacoma toccapa −narrari Zeso. Nezape amazati amani totappezape tonomirraro.
23Nazapa denima tossoniqquimemana zanapozapa zodeodenicca Deo Atti mamariuarricca tamine tazariuarri Zeso bacco tarrari. Bacco tazapa madirra toqueriqquiui qqui tarrari. Erredeni ppa tozaniuarrine narroremanaza totoridedeni tori tori quenarrari, madirra motapa rrazirema orri orri quenarrari, motapa rroua rroua quenarrari. 24Naraha Zeso attipa: —Rrari, bazima arrirraro ozacca rraui tirrenarri! Erredenipe zoqque-rrerani. Uadarraro −narrari. Naraha pouadenipa Zeso atti rrarra icanemanarrari.
25Naraha pouapa madirra zosse ininebaqquiza Zeso toqquezimarrari. Toqquezimaza erredeni poni zapani equidi neza totemarraro. 26Nazapa narraro zama arobeniuarri madimanarrarideni bazima mittarizemanarrari. Erredeni camittemaninicca uima torraribaqquirizarrarode.
Nocco siri pamaha noccodeni ssire tocanirerraricca uima
27Zesopa erredenicca ozaza qquenazapa toccanirrari. Toccani toccani nanarra nocco siri pamaha Zeso natti touedamissarrari. Touedamissaza uaua tamissemanarrari: —Dabi Potemaui! Iaza teti uana tarri inaua! −tamissemanarrari.
28Nazapa Zeso oza bacco tazapa toqquezimarrari. Naraha nocco siri pamaha uedarronarraripa Zesoza touarriressimanaza Zeso pouadeniza uati tarrari: —Rrari, ouaza tibodidenipe nerrecoma tiquenani? “Ia tonanomibaqquiuiuarrine parrirerrari” tiquenarraroqui? −nade. Nazapa: —Rrehe ia Zozossede, ia tinanomibaqquiniuarrine nauato tinani, inarraro −quenade.
29Nazapa nocco siri pamaha nocco bara inabaqquiza Zesopa: —Rrehe, ouaza parrissa tiquenezape tinoccodeni ssire tanitoui −nade. 30Zeso atti nama nazapa nocco siri pamaha noccodeni ssire tocanirerrari. Nazapa Zeso pouadeniza uati tarrari: —Parri, arrirraro uimape madirradeniza tecomemanarri! −nade. 31Naraha touedanizapa pouadeni cacomemana-rrararrari. Poccadeni uima ecomerarize-manarraro. Narraro zama arobeniuarri madimanarrarideni bazima —Zeso nocco siri pamaha inanomibaqquirrari −uima mittarizemanarrari nade.
Ebeno siri ebeno tobicauicca uima
Mateo 12.22-24; Roca 11.14-15
32Nocco siri pamaha tocanomireza touedaniraha manaco ebeno siri eccarronemanarrari. Poua bodizapa Tocorime-Taminecca zozosse tocorime madizarrarirrine atti cappirarrari. 33Naraha Zeso poua bodicca zosse ininezapa ebeno tobiquemanizapa atti carripomarrari. Nazapa madirra bazima qqui toquenazapa: —A, bica taui. Zesopa nauato taui! −quenarrari. Attideni naco: —Arri ia Izarraeo potemaui icca zamaza nama naui qqui qqui inapo-rraraccade −quenade. 34Naraha zodeodeni mota marinarra parizeoza rrehe quenarrarideni attidenia: —Arrana, Zesopa tocorimedenicca tamine Tocorime-Taminecca dacorehe carrirrarirrinea pocca zozosse tabaqqui zosse ininebaqquirrariparra −quenaraha maizemanarraride.
Zesopa zama uapimacca madirraza uati cauanari canarrari
35Nazama Zesopa oza panani onihi, onihi narizarraroza, oza capamema narraro onihi, onihi narizarraroza bacco bacco nanariza nazapa poccadeni Deo Atti mamariuarri mari mari nanariza narrari. Zesopa Deocca cacauehecca uima bicani mari mari nanariza narrari. Comani onihi, onihi carririzemanarrarideni naco ihinanomi-baqquiriza narrari. 36Zeso madirra pouatoui rrauirronana canaui qqui inabaqquizapa pouadenipa pina eueue pouadeni cacauade rriraha pouama mamadiri narizemanarrarissa quenarrari. Nama quenazapa Zeso poua bodiza: —A, touati nauanaqquiri naui −naza pouadenitoui uati cauanariri canarizarrari. Madirra bazimapa pouadeni acco canade, pouadeni maride cappiremanazapa pina eueue pouadeni cacauade noueraza nanarrizo toquerrenarrarissa quena taui. 37Nazapa Zeso pocca mamari tabaqquiza uati tarrari: —Madirra Deo rriraha madimanaui uapi taraha pouadeni maridea uapi tarraraui. Pina uizarracca ppa taui bono rrica-rrararrarissa quenaraha bitedea madirra pama quenarrari. 38Nezape uizarra rrinede Deoza uati tiquenarri, Poua Atti maride zosse inabaqquiza bono bitede touapiuiuarrine −nade Zeso.
2020 Impresso na Graafica da Biblia
