Mateo 10
10
Zesocca zozosse tabaqqui inarraroza pocca nauatohe inanarizarraro
Maraco 3.13-19; Roca 6.12-16
1Nazapa Zeso itoui pocca zozosse tabaqqui 12 inarraro, itoui uaua nazapa iaza pocca nauatohe inanarizarrarode. Nezape ia naqui madirra bodidenicca tocorime zosse inineriza-baqquiuiuarrine ia tonaparrire-baqquiuissa tarrari. Nazapa iaza pocca nauatohe inanarizeza naqui comaqquiri narrarideni naco comani onihi, onihi carririzemanaraha ihinanomi-rizabaqqui nauiuarrine ia tonaparrire-baqquirraride.
2Nazama ia pocca zozosse tabaqqui iquerrenarrarope ia oni bazimape arrima inarraro: Taidepa Simao, oni ouaha naco Pedoro. Pedoro poua ouaha onipa Adere. Madirra ouaha onipa Tiaco. Poua ouahapa Zouao. Pouadeni pamahapa Zebedeo bedi. 3Madirra ouahadeni naco Piripi, Batoromeo, Tome, quenarrari. Ouape Mateo rromanodenicca taminecca zossenirri ziniro nanaccade orrarrarode. Madirra ouahapa Tiaco. Tiacopa Arapeo bedi. Ouaha naco Tadeo (poua oni ouahapa Zoda). 4Madirra ouaha naco Simao, pouaza rromanodeni momouade quequenanarrari. Madirra ouahapa Zoda Iscariote. Narraripa Zeso ccaccorade. Nezape 12 inarraro Zesoza iquerrenarrarode.
Zesopa pocca zozosse tabaqqui 12 inarraro madirra maride ia zosse tarizabaqquirrari
Maraco 6.7-13; Roca 9.1-6
5Zesopa pocca zozosse tabaqqui 12 inarrarope poua tauimari mari icanarizabaqquiuiuarrine ia zosse tabaqquirrari. Ia zosse tabaqqui-rraraccazama ia mari tocanabaqquirraride. Poua attipa: —Rrehe, tiadenipe otauimari madirra mari ticanabaqquirizauiuarrine rraui tirrezape zodeo querrena-rrararraridenizape rraui tirra-rrerarri. Zama Samariacca oza pananiuarri naqui rraui tirrezima terrerarri. 6Naraha Izarraeo potemaui zodeodeniuarrina rraui tirrani bica tani. Narraridenipa pina eueue touatorarizemanarrarissa quenarrari. Rrehe, narraridenizana rrarraui tirrariza narri, onarraro. 7Narraridenizara rraui tirrarizeza otauimari tecomerarizemananissa tarri. “Deocca cacauehepe iaza bacco narronabote nani” tarizemanana, onarraro. 8Comaqquiri narrarideni Deocca dacorehema titinanomi-baqquimana nana. Madirra zoqquemanarrarideni naco Deocca dacorehema pouadeni titinauatonimana nana. Madirra zamacoma onini leprarrine rrazimanarrarideni naco Deocca dacorehema uapidenicca titinanomi-baqquimana nana. Madirra bodideniza Tocorime-Taminecca zozosse tabaqqui tocorime madizemanarrarideni naco bodidenicca zosse zosse titininebaqquimana narro, onarraro. Rrehe, tiadenizape manaconi rrirehe Deo pocca dacorehe tiadeniza inanarraro. Tiadeni naqui narrarideni tobiquemani-manazapa manaconitoui uati tiquenerrerarri, onarraro −nade Zeso.
9—Ticcadeni bobodeza naqui ziniro tiaqquemana terrerarri. Oro poni, prata poni, ccarara onihi naqui poni. 10Bobodecca saco naqui tiaqquemana terrerarri, poni. Ticcadeni etero onihi oro tizimemananiuarrinecca naqui poni. Temoridenicca onihipe tiaqquemana terrararri. Arri tezemanarrarora tiaqquemanaui orrari narro. Tiadeni totocauerriza aua naqui tiaqquemana terrerarri, poni. Nazama otauimari maridera tizepedeni ihirririzemana nezape ticcadeni mamari tabaqquina ticcadeni madierrine tiadeniza da da nanarizemana naui bica taui −nade Zeso.
11—Nazama oza panani onihiuarri, oza capamema narraro onihiuarri naqui bacco tiquenezape nauicca madirra bica tarrari, tiadeniza nacassa tarrari touira qqui tarizemanana. Madirra bica tarrari bacco tiquenazapa narraricca ozazara timadimanani bica tani. Oza panani onihiuarri rraui tirra-rreraqquezama arri bacco tiquenaporrarocca ozazara timadimanana, onarraro. 12Rrehe, nazama narraro ozaza madimanarrarideniza rraui tirrezimazape pouadeniza: “Nirra, bicaqquiri tiquenaqui? Deocca rronehe tiadeniza torrana” tiquenana. 13Nazama ticcadeni marinarra mittemanaza, tiadeniza bicaqquiri nazapa Deocca rronehe pouadeniza torranitoui. Naraha tiadeniza, ticcadeni marinarraza naco parramaquenazapa Deocca rronehe pouadeniza torra-rreranitoui. 14Nazapa tiadeniza nacasseraqquiri naza: “Arriza timadimanarri” quena-rrarazapa, arra ticcadeni marinarra mittade nacasseraqquiri naza naco narraro ozaza rraui tirreqquimani bica tani. Madirra nama quenauicca oza tinebomanezape temoridenicca sadariaza ssiqui ma tarraro catorraniuarrine pporo pporo tiquenana. Naui poccadeni iboue bodideni uatome-manauiuarrine −nade Zeso. 15—Rrehe, parrissehera tiadeniza uati onana: Nizaranibote madirra bazimacca uima Deo icattemaniuarrinecca uada bacco teza Deo pocca narrizoue torrezape narraridenizapa denima oppina tanitoui. Arrina maittaccazama oza panani Sodomacca madirra, oza panani onihi Comorracca madirra, nauiuarri madirra madirizemanarrarideni naco uaidiraqquiri nazapa Deorrine rricarizaporrariparra. Naraha pouadenipa niza zama rriquezape poccadeni uimasiri manaconipa narrizoue oppina tarraro pouadeniza ssonarinitoui. Neraha ouattiza nacasseraqquiri narraridenizana narrizoue denima oppina tanicca ssonarinitoui −nade Zeso.
Narrizoue torranitoui
16—Rrehe tibodideni uatome-manarri! Oua tiadeni zosse onabaqquirrarope pina eueue zomarri panauiuarri tiadeni zosse onabaqquirrarossa narraro. Rraui tirrarizaniuarripe madirra tiadeniza uadiqquiri naui carri taui. Nema nezape tinoccodeni panarri. Pina macca nocco panarrarissa tiquenarri. Naraha tiadenipe tedimana terrerana, pina ococo rrone tarrarossa tiquenarri, onarraro. 17Parri, tinoccodeni panarri! Madirra uadiqquiri narrari anirizaui. Narraridenipa tiadeni tadamemanazapa zodeodenicca taminedeniuarri tiadeni touaqquezimabaqqui-manauitoui. Zodeodenicca Deo Atti mamariuarri naqui tiadeni tacossimanauitoui. 18Otauimari tiadeniza torrarraro acconi uadimanaza zama cacauadedeniuarri tiadeni touaqquezimabaqqui-manauitoui. Zama onihicca zama onihicca madirra tamine deni toquerrenarrariuarri naco tiadeni touaqquezimabaqqui-manauitoui. Neraha nema nehe ticcadeni uima tecomeremanezape taminedeni, zodeo querrena-rrararrarideni naco otauimari mittemanauiuarrine. 19Nazama taminedeniza tiadeni touaqquezima-baqquimanazapa pouadeniza ticcadeni uima tecomeremananiuarrine nerrecoma onapazerre? tiquenerrerana. Ticappinemana terrerana, onarraro. Nauiza taminedeniza tecomeremananiuarrine Deo Poua Corimena tettideni acco tocanabaqquiuitoui. 20Uati tiquenezape tettideniraha ticcadeni Abi Deo Poua Corimerrinena uati tiquenarraro, onarraro −nade Zeso.
21—Neraha narrizouepe tiadenizaha ssonarini orrari nerreranitoui. Arra ouaza rrehe quenarraridenipa otauimariza toquerrenarrarirrine poua ouahadeniraha pouadeniza uadiqquiri nazapa eheccora-baqquimana nauitoui, inarricabaqqui-manauiuarrine. Imehideni naco poua bedideni otauimariza toquerrenarrarirrine bedideniza uadiqquiri nazapa pouadeni bedideni eheccora-baqquimana nauitoui, inarricabaqqui-manauiuarrine. Bedideni naco imehideni otauimariza toquerrenarrarirrine pouadeni imehideniza uadiqquiri nazapa imehideni ihinarrica-baqquimana nauitoui. 22Occa madirra tiquerrenezape madirra bazima tiadeniza nacasseraqquiri nauitoui. Neraha tiadenipe dacoco tirrirarri! Narraro uadie tinauanemana-zanapozape zama rricani bacco tiquenaza tiadenina ticassiuaueranitoui. 23Neraha tiadeniza nacasseraqquiri narrarideni tiadeni tonarrizo-baqquimanazapa uassinarra oza panani onihiuarri tidomodeni toccana! Tiadeni tonarrizo-baqquimanapomaza naco oza onihiuarri tidomodeni toccapomana! onarraro. Parrissehera tiadeniza uati onarrarope: Niza Izarraeo potemauidenicca oza panani uapimaza maride rraui tirrarizani rriquerreraraha Madirra Bedi oua ouatomani-pomanitoui, onarraro −nade Zeso.
24—Tetideni rrimemana terrerana: Madirra pocca mamari tabaqquipa pouadeni marideza deni toquerrena-rraraui. Pouadeni maridena denima nauato tarrari. Madirracca zozosse tabaqqui naco pouadeni zossedeza deni toquerrena-rraraui. Naraha pouadeni zossedena denima nauato tarrari. 25Narrarossa narraroa arri madirra poua marideza uima ssonarizape pouaza naqui uima ssonari tani. Nazapa poua atti: “Peperri, oua marideza nama quenazapa ouaza naqui nama quenana” naui bica tani. Madirra poua zossedeza uima ssonarizape pouaza naqui uima ssonari tani. Arri ouape ticcadeni tamine orrani oua itamassomaneza pina: “Tiape tocorimedenicca tamine Beheosebo” quenazapa tiadeni occa madirra tiquerrenarrarodeniza naco denima tatamasso quenauitoui −nade Zeso.
—Nerrecorrarizara ticappinemananiuarrine? −narrari Zeso
Roca 12.2-7
26—Nazama tiadeniza nacasseraqquiri narrarideni noppinedenipe ticappinemana terrerana, onarraro. Arrina, rridapana poccadeni uaidirehe inarrimemaneraha niza zotodena auato tanitoui. Uima bicani auatora taniza inanemana, uima bica terreranicca naqui auatora taniza inanemana neraha niza zotodena narraro uima bazima auato tanitoui. 27Arri ouattipe zome tiadeniza uati uati onarrarope niza ssiuarraniza tecomeremanarri. Teribodeniza orriza uati uati onarraro naqui niza amossiniuarrina rrazirema tecomeremanarri, onarraro −nade Zeso.
28—Nazama otauimariza tiquerrenarrarorrinepe madirra tiadeni tonarricabaqquiuiuarrine touini quenaraha narrarideni noppinedenipe ticappinemana terrerarri. Narraridenipa timedeni rricaniuarrine parriremanaraha niza tirricani nattinipe arri rrororoni rriquerreraniuarri ticorimedeni ua tozimabaqquiuiuarrine ssamoqquiri nauitoui. Deona tiadeni tonarricabaqquiuiuarrine parrireui. Arri rrororoni rriquerreraniuarri ticorimedeni ua tozimabaqquiuiuarrine naco parrireui. Nazama Deo noppinena ticappinemanarri, onarraro −nade Zeso.
29-30—Deopa madirra bazimacca uima nauato tarrari. Arri, titatideni conani uapima onini uade naco nauato tarrari. Deopa tiadeni touacaua-baqquiuitoui. Pouapa zama bazima cacauade naco nauato tarrari. Ppiriri naco Deo: “Rrehe uatia-rrarana” nazapa uatiehera taui. Naraha Deo: “Rrehe uatiana” nazana uatia taui. Nazama ppiriri manaconepa uati ccara taco? Uati ccarera taui. Ppiriri pamaha manaconepa ccarara carrarie da da ihiquena narraro. 31Nema nezape ticappinemana terrerarri! onarraro. Ppiriripa arramani toquerrenaraha bazima Deo ecauabaqquirrari. Naraha tiadenizana denima uati uana tarrari. Tiadeni touacaua-baqquiuissa tauitoui, onarraro −nade Zeso.
Madirra ouaha mittemanauiuarrine: —Ouape Zesocca orrani −quenarrarideni tauimarideni
Roca 12.8-9
32—Madirra orrariapa madirra ouaha mittemanauiuarrine poua cacomeraza: “Ouape Zesocca madirra orrani” nazapa manaco ouape occa Abi Deo memeuarri madirrariza ouacomeranitoui: “Arrarrari madirrapa occa torraui” onanitoui. 33Naraha madirrapa madirra ouaha mittemanauiuarrine poua cacomeraza: “Ouape Zesocca madirra orrarrerani” nazapa manaco ouape occa Abi Deo memeuarri madirrariza ouacomeranitoui: “Narraripa occa madirra rraraui” onanitoui −nade Zeso.
Zesorrinepa madirra pouadenira pouadenira narizemanarrari
Roca 12.51-53; 14.26-27
34—Tiadenipe tibodideniza: “Rrehe, Zesopa arrirraro namiza rronehe torrarizaniuarrine ccarronarrari” tiquenanitide. Neraha ouape madirra carronerara canauiuarrine occarrona-rrerani. Madirra cauadirere canauiuarrinera occarronarraro −nade Zeso. 35-36—Nazama arri occarronarrarope madirra pouadenira pouadenira narizemanauiuarrine. Madirra motapa ouaza rrehe quenarrari. Madirra motapa ouaza rrehe quena-rrararrari. Nazama madirra ouaza rrehe narraripa pocca ozaza madirra madimanarrarideni ouaza rrehe quena-rrarazapa pocca uauadi toquerrenarrari. Rrehe, occarronarrarope arrima nanitoui: Zabissopa imehi tezerre cacauadire nauitoui. Bedenipe imeni tazarrani cacauadire nanitoui. Rrinomadinipe massodini tazarrani cacauadire nanitoui −nade Zeso.
37—Madirrapa pocca madirraza denima uati uana taza ouazapa arramani uati uana tazapa narrari madirrapa occa torra-rrarauitoui. Arra madirra poua imehiza, poua imeniza uati uana taraha ouazapa arramani uati uana tazapa occa madirra torra-rrarauitoui. Poua bediza, poua bedeniza uati uana taraha ouazapa arramani uati uana tazapa occa madirra torra-rraraui. 38Madirra ouaza damera tarrarazapa occa madirra torrauiuarrine parrire-rraraui. Occa madirra torrauiuarrinepa otauimarirrine ocasserani inauaneraha nema nehe otauimarizara damera tarrari. Pouaza: “Aua porimacossaniza tia inanazoqquena” quenaza naco poua attipa: “Peperriua ozoqquena. Zeso onebo-rraraui” nazapa narrarina occa madirra torrarrari. 39Madirrapa pocca madie ouaza eccorezape poua inanazoqque-manaraha camittehe rriquerreraniccape carrizanapouitoui. Naraha madirra ouaha pocca madie ouaza acco taza arrirraro namiza madizanapouiuarrine touinira nazapa zoqqueuitoui. Zoqquezapa camittehe rriquerreranicca carri-rrarauitoui −nade Zeso.
Madirrapa tiadeniza bicaqquiri nazapa Deoza naco bicaqquiri naui
Maraco 9.41
40Zesopa pocca zozosse tabaqquiza denima uati tarrari: —Madirrapa pocca ozauarri rraui tirrezimaniuarrine tiadeniza poua attipa: “Rrehe, Zeso tauimari teccarronemanarraro bica tani. Rraui tirrezimarri!” naza narrari madirrapa tiadeniza bica tazapa ouaza naco bica tarrari. Ouaza bica tazapa oua Cazossede Abi Deoza naco bica tarrari −nade Zeso. 41—Nazama madirrapa Deo Atti cacomeraboteza poua attipa: “Parrissa, Deocca zozosse tirrani. Deo Atti tecomerezape mittade nacassa onani” naza narrari madirrazapa Deo pocca biquehe inananitoui. Pina Deo pocca biquehe Poua Atti cacomeraqquiri narrarideniza inanarizarrarossa narraro pouaza naqui inananitoui. Nazama madirrapa Deorrine madiuissa zanaporrariza poua attipa: “Rrehe, Deoza timadinissa zanapozape ouaza bica tinani. Occa ozauarri tiqquezimarri!” naza narrari madirrazapa Deo pocca biquehe inananitoui. Pina Deo pocca biquehe madirra madimanauissa tarrarideniza inanarizarrarossa narraro pouaza naqui inananitoui −nade Zeso. 42—Nazama madirrapa occa mamari orraria arramani torrarrari touati nauana tarrariza poua bodipa: “Rrehe, arrarraripa Zesocca madirra, pouaza accora onana” naza pouaza da inaza bica tani. Passo nauini ze nauiuarrine da icaneza naco manaco nizaranibote Deopa pocca biquehe narrari madirraza inananitoui. Parrissehera uati onarraro! −nade Zeso, pocca zozosse tabaqqui rraui torrarizauiuarrine zosse inabaqquiza.
2020 Impresso na Graafica da Biblia
