Jan 7
7
Jézu zuanénu ’ka é pale Jézu ta lo
(BWgfz 8:5)
1’Bɛ zuo, Jézu gié Galilé tɛrɛ la. É ’ka sɔ lɛ a lɛ léé, é gié Judé tɛrɛ la lo, ’bɛna Juifinu a kwa kulina léé, ’wa gya, azama.
2Juifinu lé fɛti lé wa kɛla yɔlaaban wuo, é bɔ é pu. 3Yé a zuanénu lé a lɛ léé: ’I si ’ko yé ’i go Judé tɛrɛ la yé i zuomunu é ziin ’wo i panyanamanu ye. 4Dé é sɔ mi lɛ léé, munu ’é dɔɔ, é ’ka we kɛla kyeen gi lo baa? Dé i a we ’konu kɛlɛna, ’ibozen nagɔɔn munu lɛ. 5Naa, a zuanénu boen‐oo, ’bɛnu ’ka é pale a ta lo. 6Jézu lé wo lɛ léé: Anzé bléyi ’ka tan bɔ lɛ lo, naa, kazé bléyi a é bɔle yifaama. 7Tɛrɛlamunu ’ka bɔa ka za pale lɛ lo. Maa wo ma we fe léé, wo kɛlɛwenu a é naané, amalé an za a wo gi. 8Kanu ’é go fɛti ’ko kɛlɛ. Anzé bléyi lɛ ’ka tan sɔɔ lɛ lo, bɛwemalé maa ’ka gona lo. 9We ’ko fele wo lɛ zuo, é vo Galilé tɛrɛ la.
Jézu go fɛti kɛlɛ lɛ yɔlaaban wuo
(Lév 23:33–44)
10A zuanénu go aan wo fɛti kɛlɛ lɛ, yeebozen é ziin é go ana munu ma trɔnné va. É ’ka ébo gɔɔn lɛ munu lɛ léé, ’yee lo, lo.
11Juifinu vo a ginina fɛti kɛlɛna, yé wo léé: É a kyɛɛn? 12Mi gu worona munu vo za kiɛre vɔna a ta. Mi kenu léé: Mi zin lé. Yé a kenu léé: Gba, é a munusaanzan nya. 13Naa, wa kanana Juifinu lee, amalé mi do kpen ’ka é dére bié lɛ a nya lo.
14Yi sɔraa fɛti lé; dé é bɔ é worona, Jézu go Balebangikɔn gi yé é kun we paale ma munu gi. 15Yé Juifinu gi vuru yé wo léé: Mi lé é ’ka sɛbɛ draan lɛ monomono lo, é kɛlɛ kaa yé é Bale lé sɛbɛ dɔɔ? 16Jézu lé wo lɛ léé: We lé maa a paama munu gi, é ’ka sié an va lo. Naa, mi lé é an pa zia, ’bɛzan va lé éé sié. 17Dé é sɔ mian lɛ léé, é ’bɛzan lé blibɔmawe kɛlɛ, we lé maa a paama munu gi, dé yee Kazambale va lé é sioo, dé maabozen va lé é sioo, ’bɛzan é dan a gi dɔɔ lɛ. 18Mi lé é ke we fena ébo dére nya abozen tɔbɔle lé é ke a ginina; naa, mi lé é ke é nwunvɔzan tɔbɔle ginina, ’bɛzan lé wefele a tegele yé weple do kpen ’ka ’bɛzan gi lo. 19Moizi ’ka bélidɔwe nɔ lɛ ka lɛ loo? Yé ka va mi do kpen ’ka a kɛlɛna lo. Mɛmalé ka a kwa kulina léé, ka an gyaa? 20Mi gu lé a lɛ léé: Yo a i gi. Mi kyɛn ɛ ke kwa kulina léé, ’é i gyaa? 21Jézu lé wo lɛ léé: An we do kɛlɛ, yé é ka faa gi vuru. 22Moizi gane dɔle we paa ka gi. Naa, Moizi ’ka we ’ko pélisiana ye lɛ lo, ka tranu ɛ pélisia, yé ka mi gane dɔa flinyi nya, yee kaan loo? 23Dé ka mi gane dɔa flinyi nya, té ’wo Moizi lé bélidɔwe sɛrɛ lo we gi, mɛmalé dé an mi do béli tata flinyi nya, yé ka bli fli an maa? 24’Ka we va sina ye faa yé ’ka we gi bɔi ’é bɔina.
Krist an ke ’ko loo?
25Jérusalɛm mi kenu léé: Mi lé wa kwa kulina léé, ’wa gya, yeean ke bɛ loo? 26Ka yua mun, é a we fena gɔrɔ la, yé wo ’ka we do kpen si lɛ a ta a zi lo. É a mi segelenu gi webozen nya léé, Krist lé lɛɛ? 27Mi ’ko, fɛana lé é si, ko a dɔɔ duowo, naa, dé Krist a dana yian ma, mi do kpen ’ka dan a sina dɔɔ lɛ lo. 28Jézu a we paana aan wo munu gi Balebangikɔn gi, yé é siaa yé é léé: Ka an dɔɔ, yé fɛana lé an si, ka ana dɔɔ. Maa ’ka da lɛ anboan lo, naa, mi lé é an pa zia, é a webozen nya, yé ka ’ka a dɔɔa lo. 29Naa, maa a dɔɔ; a va lé an si, yé yee ɛ an pa zia. 30Wa kwa kulina a ma léé, ’wa kunwo, naa, azé bléyi ’ka tan bɔ lɛ lo, amalé mi do kpen ’ka é bɛ mane lɛ a ma lo.
31Mi gu va mi kiɛre pa a ta yé wo léé: Dé Krist da yian ma, ’bɛ é dan gyɛzorowenu kɛlɛ lɛ kiɛre yé ’bɛ é mini mi ’ko zé taa?
Wo sunyanu pa zia Jézu kunna
32Gun lé munu ke a gyɛna Jézu ma, Farizimunu a ’ma. Yé Balebanmunu segelenu valé Farizimunu sunyanu pa zia a kunna.
33Jézu léé: Maa dan vo lɛ ka va bléyi sɛ nya é ziin; ’bɛ zuo, yé maa dan go lɛ, mi lé é an pa zia, a va. 34Ka dan an gini lɛ, yé ka ’ka dan an ye lɛ lo; yé fɛana lé maa dan kɛlɛ lɛ, ka ’ka bɔa gole lɛ ’bɛna lo. 35Bɛwemalé Juifinu lé wo ke lɛ léé: Fɛ kyɛnna lé é dan go lɛ, yé ko ’ka dan a ye lɛ loo? É dan go lɛ munu lé wo ke é sɔɔlale Grɛkinu suiɛ gi do do, wo vaa? Yé é dan we paa lɛ Grɛkinu gii? 36Dére lé é a fe léé, ka dan ’é gini lɛ yé ka ’ka dan ’é ye lɛ lo, yé fɛana lé ’é dan kɛlɛ lɛ, ka ’ka bɔa gole lɛ ’bɛna lo, ’bɛ gi lé nɔɔ?
Yuunu lé woo munu bélié
(Jo 2:28–29; Jn 4:10–14; Wg 22:17)
37Fɛti yi nyaana nya, yee lé é ke fɛti yi blɛn nya, Jézu dɔ loru, yé é siaa léé: Mian ’yiminilɔrɔ ke a gyɛna, ’é da an va ma, yé ’é ’yi mini ma. 38Mi lé é é bli voo an lɛ, mibéliyuunu é dan si lɛ a gi, ’té woo yoroan, fɛan zo lé Bale lé sɛbɛ a fe, a zo. 39É we ’ko fe munu lé wo dan ’wo bli vo lɛ a lɛ, Kazambale Léli lé wo dan a ye lɛ, alé we ma. Jézu ’ka tan wɔra lɛ élé fua gi lo; bɛwemalé Bale ’ka tan ’é Léli nɔ lɛ munu lɛ lo.
Munu gi bɔi
(Lk 12:51; Kw 28:23–27)
40Mi gu vamunu dére ’konu ’ma aan wo, wo léé: Mi ’ko a balelayezan‐o nya webozen nya. 41Mi kenu léé: Krist lé; yé a kenu léé: Galilé tɛrɛ la lé Krist é dan si lɛ webozen nyaa? 42Kazambale lé sɛbɛ ’ka a fe lɛ léé, David kulu gi lé é dan si lɛ loo? Krist ’ka dan si lɛ Bɛtléɛm, fɛana lé David ke é vinin, ana loo? 43Alé we ma lé mi gu vamunu gi bɔi. 44É sɔ wo va mi kenu lɛ léé, ’wa kun, naa, mi do kpen ’ka é bɛ mane lɛ a ma lo.
Minwiinmunu ’ka dɔ lɛ a ta léé, Jézu a balelayezan nya lo
45Amalé sunyanu nɔla ’wo pa gi Balebanmunu segelenu valé Farizimunu va. Yé ’bɛnu lé wo lɛ léé: Mɛmalé ka ’ka da lɛ a nya loo? 46Yé sunyanu léé: Mi vinin ’ka tan we fe lɛ bélé mi ’ko zo monomono lo. 47Farizimunu lé wo lɛ léé: ’Kaanu é ziin, é ka saan lɛɛ? 48Mi segelenu valé Farizimunu va mi do pa a taa? 49Naa, mi gu ’ko lé wo ’ka bélidɔwe dɔɔa lo, bale a é pale wo ma. 50Nikodɛm lé, ’bɛ da Jézu va é béli, ’té ’bɛ ke wo va mi do nya bɛ, ’bɛ lé wo lɛ léé: 51Dé wo ’ka tan mi dére ’ma lɛ lo, yé dé wo ’ka tan a kɛlɛwenu dɔɔ lɛ lo ’naan, kolé bélidɔwe éé we dɔa a nwiin é plaa? 52Wa zi pa a lɛ léé: Bii é ziin, i a Galilé mi nyaa? ’I go ’i sɛbɛ gi gini do, yé i dan a ye lɛ léé, balelayezan do kpen ’ka dan si lɛ Galilé tɛrɛ la lo.
Lezan lé wa kun gɔné ginina
(2 BDws 22:22; LvS 50:16–21; Rom 2:1–3, 17–23)
53Yé wo faa go wolé kɔn ’léé do do.
Alliance Biblique de Cote d'Ivoire 1979
