Jan 6
6
Jézu fɛ nɔ mi baa fié mi wuru soru lɛ
(Mt 14:13–21; Mk 6:30–44; Lk 9:10–17)
1’Bɛ zuo, Jézu go Galilé tɛrɛ la wɛyi lé, wa laama Tibériad, a zi. 2Gyɛzorowenu lé Jézu ke a kɛlɛna gyɛamamunu lɛ, munu a ye, amalé mi gu blɛn go a zuo. 3Jézu gɔ gié yé yee valé é zuomunu nyana gɔ nwiin.
4’Té Taboyi lé fɛti bɔ é pu, Juifinu zé lé.
5É yara nwa yé é mi gu blɛn ye dana ’é va, yé é lé Filip lɛ léé: Fɛ kyɛnna lé ko dan buru lɔ lɛ munu ’konu blefɛ nyaa? 6We lé é dan a kɛlɛ lɛ, é a gi dɔɔ, naa, é we ’ko fe Filip gi danle we gi. 7Filip lé a lɛ léé: Dé wo buru lɔ moné sɔraa nyanama ma gɔɔli nya, dé wa nɔ wo lɛ kiéné boenwo‐oo, é ’ka dan sɔ lɛ wo faa ma lo. 8A zuomi do, Simɔn Piɛri zuané André lé a lɛ léé: 9Gɔné kporoné do ana ’ko, sɔnmlén buru soru valé pɔ fié a ’bɛ lee, ’naan, ’bɛ a mɛ fɛ nya mi kiɛre ’konu zé nyaa? 10Jézu léé: ’Ka wo nyana. Lu a fɛkona di. Yé wo nyana, dé mi baa fié wuru soru léé? 11Jézu burunu si, yé é Bale bɔ vɔ, yé wo lé wo ke é nyanale, é a guli wo ma. Yé é pɔ nɔ wo lɛ a zo é ziin, fɛan zo lé é sɔ wo lɛ, a zo. 12Wo kan aan wo, é lé é zuomunu lɛ léé: Buru kurunu lé wo vo, ’ka wo sia, té a do kpen é san lo. 13Yé wa sia, yé sɔnmlén buru soru lé munu a ble bɛ, wo kyɛɛné vu ta fié fan a kurunu lé wo vo, wo nya.
14Gyɛzorowe lé Jézu a kɛlɛ bɛ, dé munu ’konu a ye, wo léé: Balelayezan lé, wo léé, é dan da lɛ tɛrɛ la, yee lé é ke mi ’ko nya webozen nya. 15Yé Jézu a gi dɔɔ aan wo léé, wo dan ’é si lɛ yé wo ’é dɔ ’wo nwiinzan nya, é si wo va é ziin yé é go gɔ nwiin é do kpen.
Jézu tawo wɛyi ta
(Mt 14:22–27; Mk 6:45–52)
16Nyanadi pa aan wo, a zuomunu go wɛyi ba gi. 17Wo vɔ ’yitagoro gi, yé wo go Kapɛnaum vazia; ’bɛ a wɛyi zi. Gunu dɔra, ’té Jézu ’ka tan da lɛ wo va lo. 18Fu blɛn a giéna, yé wɛyi ma a nyɔɔnna. 19Wa ’yitagoro vɔna payili nya, yé wo bɔ dé kilo soru suiɛdo léé, a ta, yé wo Jézu ye tawona wɛyi ta, yé é bié ’yitagoro sɔnɔ. Yé kana zén wo gi. 20Naa, Jézu lé wo lɛ léé: Maa lé; té ka kana lo. 21Amalé wa nyi si léé, Jézu é vɔ wo va ’yitagoro gi yé kele tɔɔn ’yitagoro bɔ fɛana lé wo ke gona, ana.
Munu Jézu nagini
22’Bɛ é tu kini, mi gu lé wo vo é dɔle wɛyi zi, wa gi dɔɔ léé, ’yitagoro do kpen ɛ ke yese ana, naa, Jézu ’ka vɔ lɛ ’bɛ gi é zuomunu va lo; wo go wo saa. 23Naa, ’yitagoro bɛnu si Tibériad yé fɛana lé munu buru ble Mizan lé Bale bɔvɔle zuo, wo bɔ ’bɛna sɔnɔ; 24mi gu a ye aan wo léé, wo ’ka aan wo Jézu valé é zuomunu yena lo, wobozen wo vɔ ’yitagoro ’konu gi, yé wo go Kapɛnaum Jézu naginile we gi.
Jézu a mibéliburu nya
25Wo Jézu ye aan wo wɛyi zi, yé wo lé a lɛ léé: Kozan, bléyi kyɛn va lé i da ’koo? 26Jézu lé wo lɛ léé: Maa fe ka lɛ kyɔ webozen nya, gyɛzorowenu yele saa lé we ma‐an ka ke an naginina lo. Naa, ka buru ble yé ka kan, bɛwemalé ka ke an naginina. 27Té ka nyanama pa fɛblele lé é dan gié lɛ bɛ, ’bɛ lé we ma lo. ’Ka a pa yee lé é vo vole é yuɛma lé a glɛ ’ka lo, azé nya, alé we ma; yee lé maa blami Be é dan a nɔ lɛ ka lɛ. Naa, Tibale ézé tɔmase pa maa ɛ ma. 28Wo lé a lɛ léé: É a lé ko kɛlɛ kaa yé ko Kazambale lé nyanama paa? 29Jézu lé wo lɛ léé: Kazambale lé nyanama lé ke ’ko: maa lé é an pa zia, ka bli vole an lɛ lé. 30Wo lé a lɛ léé: Naa, mɛ we lé bé kɛla yé ko ye yé ko bli é vo i lɛɛ? Mɛ fɛ lé bé kɛlaa? 31Ko tranu mana ble bwi gi, é a é gyɛle sɛbɛ gi fɛan zo, a zo, léé:
É lagi buru nɔ wo lɛ fɛblele nya.
32Jézu lé wo lɛ léé: Maa fe ka lɛ kyɔ webozen nya, Moizi ’ka lagi buru nɔ lɛ ka lɛ lo; naa, an Ti ɛ lagi buru bozen no ka lɛ. 33Naa, Kazambale lé buru lé é ke maa lé an si la gi yé an zun tɛrɛ la, an nya, vole é yuɛma lé a glɛ ’ka lo, maa ɛ a no tɛrɛlamunu lɛ.
34Wo lé a lɛ léé: Mizan, ’i buru ’ko nɔ ko lɛ yifaama ma.
35Jézu lé wo lɛ léé: Maa lé ke mibéliburu nya. Mi lé é da an va, lɔrɔ ’ka dan a gyɛ lɛ monomono lo, yé mi lé a bli vo an lɛ, ’yiminilɔrɔ ’ka dan a gyɛ lɛ monomono lo. 36Naa, maa lé ka lɛ léé, ka an ye, yé ka bli ’ka vona an lɛ lo. 37Munu faa lé an Ti éé wo no an lɛ, wo dan da lɛ an va, yé mi lé é da an va, an ’ka dan sɔn vɔ lɛ a ma monomono lo. 38An ’ka si lɛ la gi yé an da anbo lé blibɔmawe kɛlɛle we ma lo, naa, an si la gi yé an da, mi lé é an pa zia, alé blibɔmawe kɛlɛle we ma. 39Yé mi lé é an pa zia, alé blibɔmawe lé é ke léé, munu faa lé é wo nɔ an lɛ, té wo va mi do kpen é san an lee lo, naa, ’maa wo nwa gamunu va yi voélazan nya. 40An Ti lé blibɔmawe lé é ke ’ko: dé miomian é an ye a Be nya, yé a bli vo an lɛ, vole é yuɛma lé a glɛ ’ka lo, é wɔra ’bɛ gi, yé maa dan a nwa lɛ gamunu va yi voélazan nya.
41É a fe aan wo léé, buru lé é si la gi, yee ɛ ke ’yee nya, amalé Juifinu vo gun gyɛna a ma. 42Yé wo léé: Mi ’ko ’ka Jozɛfu be Jézu nya loo? Ko a ti valé a bu dɔɔ. É kɛlɛ kaa yé é léé, ’é si la gi yé ’é daa?
43Jézu lé wo lɛ léé: Té ka gun gyɛ ka ke méléna lo; 44an Ti lé é an pa zia, dé é ’ka mi sia lɛ ana lo, mi do kpen ’ka bɔa dale lɛ an va lo; naa, mian é da an va, maa dan ’bɛzan nwa lɛ gamunu va yi voélazan nya. 45Balelayemunu a gyɛ wolé sɛbɛ gi léé:
Kazambale é dan we paa lɛ wo faa gi.
Dé miomian é an Ti dére ’ma, yé é alé we paale nyi si, ’bɛzan ɛ dan an va. 46É ’ka kɛlɛ lɛ léé, mi do kpen an Ti ye lo, ’té dé é ’ka maa lé an si Kazambale va, an nya lo; maa ɛ an Ti ye. 47Maa fe ka lɛ kyɔ webozen nya, mi lé a bli vo an lɛ, vole é yuɛma lé a glɛ ’ka lo, é wɔra ’bɛ gi. 48Maa lé ke mibéliburu nya. 49Ka tinu mana ble bwi gi yé wo ga. 50Buru lé é si la gi, yee lé an nya ’ko, yé mi lé éé an blé, é ’ka gaan monomono lo. 51Maa a mibéliburu lé é si la gi, a nya. Dé mi buru ’ko ble, é dan vo lɛ é yuɛma lɛɛfaama, a glɛ ’ka dɔa lo. Yé buru lé maa dan a nɔ lɛ a lɛ, an wi lé, yee lé maa dan a nɔ lɛ tɛrɛlamunu bélifɛ nya.
52’Bɛna tɔɔn, Juifinu vo zavɔna ’wo ke méléna, yé wo léé: É bɔa é wi nɔle lɛ ko lɛ fɛblele nya kaa?
53Jézu lé wo lɛ léé: Maa fe ka lɛ kyɔ webozen nya, dé ka ’ka maa blami Be wi blé lo, dé ka ’ka an nyɛ minian lo, ka ’ka voo é yuɛma monomono lo. 54Mi lé éé an wi blé yé éé an nyɛ minian, vole é yuɛma lé a glɛ ’ka lo, é a azé nya, yé maa dan a nwa lɛ gamunu va yi voélazan nya. 55Naa, an wi a blefɛ bozen nya; yé an nyɛ a minifɛ bozen nya. 56Mi lé éé an wi blé yé éé an nyɛ minian, éé voo an gi, yé maa voo ’bɛzan gi. 57Fɛan zo lé an Ti lé é ke é yuɛma é an pa zia, yé an voo é yuɛma alé we ma, a zo duo lé mian éé an blé é dan vo lɛ é yuɛma anlé we ma. 58Buru lé é si la gi, yee lé é ke an nya ’ko. Buru lé ka tranu a ble yé wo ga, an ’ka bélé ’bɛ zo lo. Mi lé éé buru ’ko blé, é dan vo lɛ é yuɛma lɛɛfaama, a glɛ ’ka dɔa lo. 59Jézu we ’konu fe bazorokɔn gi, ’té é a we paana Kapɛnaum munu gi.
Dérenu lé wo ke vole é yuɛma nya
(Ébr 3:12; 4:12–13; 10:38–39)
60A zuomunu we ’ko ’ma aan wo, wo va mi kiɛre léé: Dére ’ko a plɛplɛ; de ɛ bɔa é tɔné dɔle lɛ ’bɛ lɛɛ? 61Jézu a gi dɔɔ léé, é zuomunu a gun gyɛna we ’ko ma, yé é lé wo lɛ léé: We ’ko éé ka keleéé? 62Yé dé ka maa blami Be ye gona fɛana lé an ke é kyɛn, ana nii? 63Léli ɛ mi vo é yuɛma; mi kɔlɛ lé we tɔnɔ ’ka lo. Dérenu lé maa wo fe ka lɛ bɛ, wa léliwe nya yé wo ɛ mi vo é yuɛma. 64Naa, mi kenu ana ka va, yé wolé blipale ’ka monomono lo. Naa, a pélisiana, munu lé wo bli ’ka dan vo lɛ Jézu lɛ lo, é wo dɔɔ yé mi lé ’bɛ é dan a pa lɛ munu lee, é ’bɛzan dɔɔ. 65Amalé é we taa fe wo lɛ léé: Bɛwemalé maa lé ka lɛ léé, dé an Ti ’ka zi nɔ lɛ mi lɛ lo, é ’ka bɔa dale lɛ an va lo.
66É sia bléyi ’ko va, a zuomunu kiɛre diéra, yé wo ’ka go lɛ a zuo é ziin lo.
67Amalé Jézu lé mi vu ta fié lɛ léé: Ka é ziin, ka ’ka a va léé, ka go loo? 68Simɔn Piɛri lé a lɛ léé: ’I, Mizan, de ɛ va lé ko dan go lɛɛ? Vole é yuɛma lé a glɛ ’ka lo, a dérenu a i ’léé, 69yé ko a gi dɔɔ léé, bii a Krist nya, Kazambale lé Mi Sauun nya, yé ko dɔ ’bɛ ta. 70Jézu lé wo lɛ léé: An ’ka ka si lɛ munu va loo? ’Kaa mi vu ta fié; yé ka va mi do a yo nya. 71Kariɔtzan Simɔn be Judas lé we lé é ke a fena bɛ; yee ɛ ke mi vu ta fié va mi do nya, yé yee ɛ dan Jézu pa lɛ munu lee.
Alliance Biblique de Cote d'Ivoire 1979
