Ioane 4
4
U RA TEBUAN SAMARIA.
Ioane 4.
1Ba a Tadaru i nunurai lena a kum te Faresaio diat a walogoropai ba Iesu i werapa diat a magoro, ma i bapitaisota diat ma Ioane a marawaina ku 2(ma Iesu pa i pam a bapitaiso, a nuna kum tara na wawera ku). 3I wan taka Iudaia, ma i wan balet u Kalilaia. 4Ma ra akapi i wan iai i wan bolo u ra bual Samaria. 5I wan pat u ra taman a nu ra Samaria, a iana Sikari, i matiti a pakan a wanua kuma ba Iakobo i a tara‐tai tan tunalik Iosefa. 6A danim‐ki a nun Iakobo i tana uni. Ma Iesu ba i malowo u ra winawan, i ki na ra danim‐ki. I ki kutkut a make. 7Rā tebuan Samaria i wan pat in witup a danim; Iesu i piri tana, Un wainimta iau. 8A kum tara‐na‐wawera diat wan u ra taman diat a kul utna na anian. 9A tebuan Samaria i piri tana, Lelawai kuma u arig a pala kon iau? kuma a te Iudaia ui, ma ra tebuan Samaria iau. (Kuma diat a Iudaia pa diat kukulweliā ma diat a Samaria.) 10Iesu i piri tana, Ba u nunura a wetabara a nun Nara, ma ia ba i piri tam, Un wainimta iau; un arig tana, ma in tari tam a pala na lalaun.
11A tebuan i piri tana, Tadaru, pa ta la un witup mai, ma ra danim‐ki i dogdog: kun takawai a num pala na lalaun kuma? 12U gala duk u ra tamamiat Iakobo, ia ba i tari a danim‐ki ta miat, ma i ininim uni, ma diat kai a kum na tunaliklik, ma ra nuna kum pika kai? 13Iesu i piri tana, Ia ba i inim a pala kumi in maruk balet; 14ma ia ba in inim a pala ba ăg tari tana, in tana u ra balana, a matanadanim i bulbulagit u ra lalaun pa in rap.
15A tebuan i piri tana, Tadaru, un tari tag a pala kuma, pa ăg maruk balet uni, ma pa ăg wan taltalili balet urin ba ăg witup. 16Iesu i piri tana, Un benpa a num taula, muru wan urin. 17A tebuan i piri tana, Pa nug ta taula. Iesu i piri tana, U pira nakurai lena, Pa nug ta taula: 18kuma limadi pipi ut a num taula; ma ia ba muru ki ugai kumari pa num taula: u piri ligtatuna u ra lig kuma. 19A tebuan i piri tana, Tadaru, iau nunurai marakam a parofita ui. 20Diat a numiat tara mukamuka diat lotu u ra tagai kumi; muat kai, muat piri lena, Ierusalema ku a bual i ka ba diat lotu uni a kum tara. 21Iesu i piri tana, Nelig, un nurutau u ra nug pirapira, kura in wan pat a pupukai ba pa muat a lotu uni korom Tamadat u ra tagai kumi, ba Ierusalema. 22Muat lotu korom ia ba pa muat nunura i: miat kai, miat lotu korom ia ba miat nunura i; kuma taka u diat a Iudaia ku a Tenawalaun. 23In wan pat a pakan a bug, ma i wan pat kubai, ba diat a kum tenalotu ligtatuna diat a lotu u ra niodi ma ra ligtatuna korom a Tamadat: kuma Tamadat i auare kup diat lenkuma ba diat lotu korom i. 24A Niono ku Nara: ma diat rap diat lotu korom i, i ka ba diat lotu u ra niodi ma ra ligtatuna. 25A tebuan i piri tana, Iau nunurai in wan pat Mesaia (ia ba di patapa i bulug, Karisito) ba in wan pat ut in piraweata a kum lig rap ta dat. 26Iesu i piri tana, Iau ku ia, iau pirapiri tam.
27A nuna tara na wawera diat wan pat: ma diat kakaian, kuma diara pirapiri ugai ma ra tebuan; ma pa te i tiri un i, Awa u auarekupi? ba, Lelawai kuma muru pirapira ugai ma i? 28Ma ra tebuan i wan talurai ma ku a nuna in pala, ma i wan u ra taman, ma i piri ta diat a kum tara, lena, 29Muat in, muat a bobo a muana i wapuata iau u ra lig rap iau a pamtai: a Karisito duk kumi, ba pate? 30Diat wan taka u ra taman ma ba diat wan kubai korom i, 31A kum tara‐na‐wawera diat arig i lena, Rabai, un wagan. 32I piri ta diat, Ră gag utna pa muat nunurai. 33A tara na wawera diat pirapiri ugai, lena, Te i kip‐tabarata i duk ma ta utna na anian? 34Iesu i piri ta diat, A gag utna ba ăg pet a wetula a nun ia ba i tula iau urin, ba ăg banoto a nuna pinapam. 35Pa muat piri duk lena, Wat na kalag ma ku in wan pat a kalag na rotkutu? Iau pira ta muat, Muat tatada, muat bobokokono a kum pinapam, i mukan ma. 36Ia ba i rotkutu di takom i, ma i kon a uaina u ra lalaun pa in rap; ma ia ba i oglamiratai, ia bulug ba i rotkutui, diara kaia ugai. 37A pirapira ligtatuna kumi, Rā i ogoglamira, ma rā bulug i rotkutui. 38Iau a tula muat lena muat a rotkutu a lig kuma pa muat papam uni: rā kum tara diat papam, ma muat, muat kon a uaina.
39Magoro na Samaria tak u ra taman kuma diat nurutau un i u ra pirapira a nu ra tebuan, kuma i piri, lena, I wapuata iau u ra lig rap ba iau a pamtai. 40Ba a kum te Samaria diat wan korom i, diat arig i lena in ki ugai ma diat: ma i ki iai ru bug. 41Ma magoro bulug diat nurutau un i u ra nuna pirapira: 42ma diat piri ta ra tebuan lena, Miat nuru marakam, ma pate u ra num pirapira: miat ut, miat walogoropa i, ma miat nunurai lena, a Tenawalaun ligtatuna kumi a nudiat a kum tara na tudu ra maua.
43Ba i rap ru bug i wan taka iai, ma i wan u Kalilaia. 44Kuma Iesu i wapua, lena, Pa di ururu u ra parofita u ra nuna bual. 45Ba i wan pat u Kalilaia, diat a Kalilaia diat pinaria ma i, kuma diat a bobota a kum lig rap i a petai u ra witamai Ierusalema: kuma diat kai diat witamai pa.
46I wan pat balet u Kana i Kalilaia, a taman kuma i a pamtai uni a pala in waine. Ma rā tadaru, na tunalik i malapag Kapanaumi: 47ba i walogoropai lena, Iesu i wan taka Iudaia, ma i wan pat u Kalilaia, i wan korom i, ma i arig i lena in wan pari, in wakadelpa na tunalik; kuma i pot na minat. 48Ma Iesu i piri tana, Ba pa muat bobo a kum wakilag, ma ra kum lig na kakaian, pa muat a nuru. 49A tadaru i arig i, lena, Tadaru, un wan pari ba pa i mat utbai na tuglik. 50Iesu i piri tana, Un wan ma; na tumlik i lalaun. A muana kuma i nuru u ra pirapira ba Iesu i wapua i uni, ma i wan talili balet. 51Ma ba i wan kubai, a nuna kum wetula diat wetarom ma i, ma diat wapua i, lena, Na tumlik i lalaun. 52Ma i tiri diat u ra pakan a bug i kadel kabin uni. Diat piri tana, Na bug, u ra limadi ma ruadi a pakana, a awawian i wan kon i. 53Ma tamana i nunurai lena, u ra pakan a bug ku kuma Iesu i piri tana, Na tumlik i lalaun: ma i nurutau un i, ia, ma diat rap ma i u ra matākina. 54A ru pakan a wakinilag kumi Iesu i petai, ba i wan taka Iudaia ma i wan pat u Kalilaia.
Published by the British and Foreign Bible Society in 1896.
