Matayo 20
20
Atendamwëmo mu muunda wa mësabibu
1“Gusoko utemi wa girunde wikweti na munya khaya unë agafuma diu në nkuu ufenja anyamwëëmo va urëfa vende utenda mwëëmo u mughunda wakwe wa mësabibu. 2Vëgëyanjëya inaawe uvarëfa gënyamwëmo ga itiku (gwa dinari imwedu). Faafo agavatoa mu muunda wakwe wa mësabibu. 3Agafuma saa agatatu, agavoona vangëja vimëkië usokoni, vëtina mwëmo. 4Agavëëra: Endi nyeenoo mwende utenda mwëmo mu muunda wa mësabibu, neenoo ngumufa gënyamwëmo ganyu! 5Uvii, vëgeenda. Munya muunda wasuu agadua kangë saa a mutandatu na saa a kenda, agatenda uvii uvii. 6Nanë itungo ra saa ikumi na ëmwe, agadua kangë, agavahanga antu vangëja vimëkie faafo usokoni. Uvii, agavawëëya: ‘Asikë nëmwimëkie afaa mumwë woong'e mutina mwëmoo?’ 7Vëgamusucha: ‘Gusoko gutie muntu nëwagufaa mwëmo wa urëfwa.’ Mweeso agavëëra, ‘Endi nyeenoo noo mwende utenda mwëmo mu muunda wa mësabibu.’”
8Nënaa yuva raharëa, munya muunda wasuu agamwëëra munya ughondanëya mpamba wakwe: “Vataane atendamwëmo uvarëfe gënyamwëmo gawe, andëya na awoo va umpëo ufëwa mwëmo, na umarëye na awoo va mwandyo. 9Uvii, vëgaja awoo nënaavafewaa mwëmo itungo ra saa a ikumi na ëmwe, vëgahanga mu muntu gënyamwëmo ga itiku (dinari ëmwedu). 10Awoo va mwandyo nënaavafika, naavëiye vëufewa hela nyingë nanguu, ëgweeso nanë veesoonoo vëgafewa mu muntu gënyamwëmo ga itiku. 11Vëgaihora hela yawe, vëgaandya umunang'ana müküü wasuu. 12Vëgahanya: ‘Antu avaa nëajavafewaa mwëmo itungo ra umpëo vatendaa mwëmo gwa itungo ra saa ëmwedu gutufu asikë ugugutendea sese gwa ugwining'anëya na veeso chu sese gwaghimëëya mwëmo nëukaku gwa itiku na yuva ikharë?’ 13Faafo müküü wasuu agamusucha umwe wawe: ‘Mbuyanë, ntinagufenea intu! Wurë, aja gwënagiyanjiya ginako gënyamwëmo ga itikuna? 14Hora tutë ako, enda kunë winjë. Nëanjëte umufa uyuu nëwaumpëo mwino veve. 15Wurë, ntinoneyëna utenda na mari anë mwino nëanjëte?’ 16Yesu agadaha urëghëtya gwa uhanya, ‘Uvii, va umpëo vëutenda va mwandyo na va mwandyo vëutenda va umpëo.’”
Yesu ugurighëtya muhënjo wa gatatu ikuya rakwe
(Mrk 10:32-34; Luk 18:31-34)
17Yesu nënaa winjë uYerusalemu, agavahora asëywi vakwe vasaa ikumi na vavëë umpëo, na munjëa agavëëra, 18“Tegheeyi! Gwinjë uYerusalemu na kuuko Mwaamuntu ugutendewa umëkhono a akumbëki aküü nanë asëyi va Seria, veesoo noo vëumuramuëya auraghwe. 19Vëumutoa gwa antu në va ndughu ingëja iisëywe, akhuwe makhotya na ukhomwa, ëgweeso itiku ra gatatu ugufetyëwa.”
Irombi ramwa nyinya amwa Yakobo nanë Yohana
(Mrk 10:35-45)
20Faafo nyinya wa vana vamwa Sebedayo agamuhanga Yesu itambëëmwe na vanaakwe, agatungama usonge akwe kunu ugumuromba intu. 21Yesu agamuwëëya, “Ugufenja ntunihe?” Mukhema wasuu agamwëëra, “Vëka iraghano mwino vanaanë avaa vavëë vëgikhaa umwe uvaru wako wa gëlëlo na ungëja uvaru wako wa gëmoho mu utemi wako.” 22Yesu agasucha, “Mutighune muuromba ntuni. Wurë, muudaha unywea gakuu ga makhasëko nëngugënywa nenena?” Vëgamusucha “Guudaha.” 23Yesu agavëëra, “Tutë muunyweera gakuu ganë, ëgweeso gikhaa ugëlëlo namba ugëmoho ganë, ti mwëmo wanë uning'anëëya intu rësëë vëufewa vasaa nëvavëkëywe na Tata wanë.”
24Asëywi vangëja avoo ikumi nënaa vategheeya asaa, vëgavakheefea vauna vavëë vasaa. 25Uvii Yesu agavataana, agavëëra, “Mumanyie mwino atemi va antu në ti Ayahudi vëuvibalaa antu vawe gwa nguu na aküü vasaa vëuvikheeraa na uvatenda mari awe. 26Ëgweeso kunë nyee itatendekee uvii, ëgweeso gëkaku muntu nëugufenja utenda müküü mukhatë anyu inoneye atendeke mutumami wa voong'e, 27na nëugufenja utenda wa mwandyo mukhatë anyu inoneye atendeke mutumami wanyu. 28Uvii uvii, Mwaamuntu inajaa utumamëwa ëgweeso utumama na ufunya uduvi wakwe utendeke ikumbëko ra antu vingë.”
Yesu uguvaforya afoku vavëë
(Mrk 10:46-52; Luk 18:35-43)
29Yesu nënaa ufumie uYeriko, mwirundo üküü wa antu ugamuhonga. 30Uvii, naa gwina afoku vavëë vikhee umpëo a njëa, na nënaa vategheeya mwino Yesu naa ukëëre faafo, vëgaanga: “Müküü, Mwana wamwa Daudi, uguonëee uvavi!” 31Mwirundo usuu wa antu ugavakenea na uvëëra vëkire. Ëgweeso veeso vëgafwaghëëra gwaanga: “Müküü, Mwana wamwa Daudi, uguonee uvavi!” 32Yesu agimëka, agavataana na uvawëëya, “Muufenja nëmutendee ntunihe?” 33Vëgamusucha, “Müküü, guugunena ugurangwëëye miho itu.” 34Uvii, Yesu agavaonea uvavi, agavatenia miho awe na faafo faafo vëgoona kangë, vëgamuhonga.
נבחרו כעת:
Matayo 20: RIMRC
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
Kirimi New Testament © Bible Society of Tanzania, 2008.
