Matayo 19
19
Gireka
(Mrk 10:1-12)
1Yesu nënaawadaha urëghëtya nkhani yasii agadua uGalilaya, agenda umukoa wa uYudea, gitumbë ra uyongo ra uYoridani. 2Antu vingë vëgamuhonga kuuko, mweesonoo agavaforya. 3Afarisayo vëgëtuunga vëgamuhanga, vëgamuwëëya gwa umukwatya, “Wurë, inoneyena mughosya umureka mukhemaakwe gwa intu gëkaku?” 4Yesu agavasucha, “Wurë, mwinasomaa mu Maandëko në Meruna mwino Muungu agamutunda muntu ufuma mwandyo agamutenda mughosya nanë mukhema, 5na, agahanya: ‘Gusoko ësëë mughosya ugumureka tata ina yiu wakwe veeso vavëë noo vëutendeka mwëërë rumwe.’ 6Gwa uvii veesonoo ti vavëë kangë ëgweeso mwëërë rumwe. Uvii, në Muungu wagikhuvëye, mwaamuntu atagëtemanuee. 7Ëgweeso veeso vëgamwëëya, Gusokokë, uvii, Musa agaguraghëya mukhema afewe rëandëko ra urekwa?” 8Yesu agasucha, “Musa agamuyanjëya muareke akhema vanyu gusoko a ukaku wa nkhoo yanyu. 9Ëgweeso naa ëtiwuu ufuma mwandyo. Uvii, nene namwëëra, nyenye gëkaku muntu nëwamureka mukhemaakwe, nësa ti gusoko a üfümbu, waroghoa mukhema ungëja, walehadaa.”
10Asëywi vakwe vëgamwëëra, “Nësa në mantu a mughosya nanë mukhemaakwe ëuwuu, bahu udëa uroghoa sufu.” 11Yesu agavëëra, “Ti voong'e nëvëudaha urëmanya na urëkwatëëra isëyo ërëë, ëgweeso vasaa gutufu nëvafewe na Muungu. 12Ëgweeso vërëfo nëvëtina ughosya unë vatendekie uwuu ufuma ufafwa, na vërëfo nëvëtina ughosya unë vatendekie vëtina ughosya gusoko a antu, na vërëfo në vëtina ughosya une vatendekie gwa veeso aghonjo vëtina ughosya gusoko a utemi wa girunde. Mweeso unë ugudaha urëghenyifa ërëë, mweeso nëarëghenyife.”
Yesu uguvaforya ang'ënya anyuughuu
(Mrk 10:13-16; Luk 18:15-17)
13Antu vëgamweetea Yesu ang'ënya anyuughuu avatendëe mëkhono na uvarombea. Ëgweeso asëywi vëgaakenea antu. 14Ëgweeso Yesu agahanya, “Vareki ang'ënya vasaa vije kunë nee, taja muvaghëëye, gusoko gwa vasaa nëvëë mwino ang'ënya avaa Utemi wa girunde uu wawe.” 15Uvii, agavatendea mëkhono agenda kunë winjë.
Mubalanda në mughwarë
(Mrk 10:17-31; Luk 18:18-30)
16Muntu umwe agamuhanga Yesu, agamuwëëya, “Musëyi, ntende intuke në ija nëuhange ufanga wa khae na khae?” 17Yesu agamwëëra “Asikë nëugumbwëëya intu nëija? Urëfo umwe gutufu nëmuja. Nësa ugufenja gingëa mu ufanga kwatëëra maraghëëyo.” 18Muntu wasuu agamuwëëya, “Maragheeyo nëafe?” Yesu agahanya, “Utauraghee, utalehadee, utaivee, utafunyee usudangi wa weegheeghe, 19vakurye ho ina yiu wako, na, muyanjë munyafifë wako mwino wianjëte veve mughonjo.” 20Mubalanda wasuu agamwëëra, “Asaa oong'e nayakwatëëre udua ung'ënya wanë, itungwee nëtende ntuni ëngë?” 21Yesu agamwëëra, “Nësa ugufenja utendake wëë muja, enda mërinje maari ako uvafe atuki, veenoo ugutendeka wina mpamba girunde, faafo njuu ung'onge.” 22Mubalanda wasuu nënaa wategheeya asaa agenda kunë winjë wina uvavi, gusoko naa wina maari nyingë.
23Faafo Yesu agavakhanëa asëywi vakwe, “Tutë namwëëra ëgutendeka gukaku ino gwa mughwarë gingëa mu utemi wa girunde. 24Kangë ngumwëëra, uu gooro nanguu gwa ndoghwe ukëra mu njululi ra sëndano ukëra gwa mughwarë gingëa mu utemi wa girunde.” 25Asëywi vasaa nënaa vategheeya uvii vëgataka, vëgamuwëëya, “Uvii uu anyu nëudahite utyoekahe?” 26Yesu agavararaava, agahanya, “Gwa mwaamuntu intu ërëë rëtiudahëka, ëgweeso kunë Muungu mantu oong'e ëgudahëka utendeka.”
27Faafo Fetero agahanya, “Naanë see wurë? Gwarekie oong'e gwaguhonga vee guuhanga ntunihe?” 28Yesu agavëëra, “Ngumukhanëa tutë, Mwaamuntu nëikwë wëkhaa mwitumbë ra utemi ra üküü wakwe mu urëmi nëufya, nyenye nëmwang'ongie nee mugëkhaa mu matumbë ikumi na avërë muyëramuiya ndughu ikumi na ivëë ya Isiraeli. 29Na, muu wasuu nëwarekie khaya, mbesa aunakwe, mba ahaja, mba ihe, mba nyinya, mba vana, mba mëunda gusoko a rina rane, uguhanga mëhënjo ighana na ugusaa ufanga wa khae na khae. 30Gweeso, në va mwandyo vëutendeka va umpëo, na va umpëo vëutendeka va mwandyo.”
נבחרו כעת:
Matayo 19: RIMRC
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
Kirimi New Testament © Bible Society of Tanzania, 2008.
